༄༅།། གཟའ་འཁོར་གཉིས་ཀྱི་སྔོན་དེར་ཨ་མི་རི་ཀ་བ་ཚོ་ཕན་ཚུན་རྒྱང་བཀྱེད་ནས་སྡོད་དགོས་པ་དང་མི་ཚོགས་འདུ་འཛོམས་ལ་འཛེམ་ཟོན་བྱ་དགོས་ཞེས་ལམ་སྟོན་བྱས་པ་ནི་བསམ་འཆར་ཙམ་དུ་ཟད། ད་ལྟ་ཨ་རིའི་མི་མང་གྲས་སུ་ཏོག་དབྱིབས་ནད་དུག་འགོས་པའི་མིའི་གྲངས་འབོར་༤༤༠༠་ལྷག་བརྒལ་ཟིན་པ་དང་ཉུང་མཐར་ཡང་མི་༨༧་ལ་འཆི་སྐྱོན་བྱུང་། ཨ་མི་རི་ཀའི་དབུས་གཞུང་གིས་མི་༡༠་ལས་མང་བ་མཉམ་དུ་འདུ་འཛོམས་མི་བྱེད་པའི་འབད་བརྩོན་བྱ་དགོས། གལ་སྲིད་ཨ་མི་རི་ཀ་བ་ཚོས་ཏོག་དབྱིབས་རིམས་ནད་སྔོན་འགོག་འདིར་གཟབ་ནན་མ་བྱས་ན་ཡུ་རོབ་རྒྱལ་ཁབ་ཨི་ཊི་ལི་ལྟ་བུ་ཞིག་ལ་འགྱུར་ཉེན་འདུག་ཅེས་བསྟན། ཨ་རིའི་གཞུང་གིས་ཀྱང་རྒྱལ་ཡོངས་ཀྱི་འགྲིམ་འགྲུལ་དང་སྐྱེལ་འདྲེན། མི་ཚོགས་འདུ་འཛོམས་དང་ཚོང་ལས་བཀག་སྡོམ། སློབ་གྲྭ་སོགས་སྒོ་རྒྱག་དགོས་ཐུག་སྲིད། ད་ལྟའི་བར་དུ་ཡུ་རོབ་རྒྱལ་ཁབ་ཨི་ཊི་ལིའི་མི་༢༤༧༤༧་ལ་ནད་དུག་འགོས་པ་དང་མི་༡༨༠༩་ལ་འཆི་སྐྱོན་བྱུང་བའི་དཀའ་ངལ་འདྲ་མཚུངས་ཤིག་ཨ་མི་རི་ཀ་ལའང་འཕྲད་ངེས་རེད་ཅེས་ཉེན་བརྡ་བཏང་སྟེ་ཨ་རིའི་མངའ་སྡེ་ཁག་ཅིག་གིས་ཟ་ཁང་དང་ཆང་ཁང་། སློབ་གྲྭ་དང་རྩེད་གླིང་ཆེ་ཁག གློག་བརྙན་ཁང་དང་ཟློས་གར་ཁང་། རྩལ་སྦྱོང་ཁང་སོགས་སྒོ་བརྒྱབ་ནས་རིམས་ནད་སྔོན་འགོག་གི་ཁྲིམས་ཤིག་ལག་ལེན་བསྟར་འགོ་ཚུགས་འདུག ཨ་རིའི་འཕྲོད་བསྟེན་སྤྱི་ཁྱབ་སྨན་པ་ཨེ་ཌམ་སིས་གསར་འགོད་པ་ཚོར་བཤད་པ་ལྟར་ན། བདུན་ཕྲག་གཉིས་ཀྱི་སྔོན་དེར་ཡུ་རོབ་རྒྱལ་ཁབ་ཨི་ཊི་ལིར་ཏོག་དབྱིབས་ནད་དུག་འགོས་པའི་ནད་པའི་གྲངས་འབོར་ཅི་ཙམ་ཡོད་པ་དེ་འདྲ་ཞིག་ད་ལྟ་ཨ་མི་རི་ཀར་འདུག ང་ཚོས་མི་ཚོགས་འདུ་འཛོམས་ལ་འཛེམ་ཟོན་དང་རིམས་ནད་སྔོན་འགོག་གི་ཐབས་ཇུས་བསྟེན་པའམ། ཡང་ན་སྔར་བཞིན་བག་ཡངས་ཀྱི་འཚོ་བར་རོལ་ནས་ཨི་ཊི་ལི་ལྟར་རིམས་ནད་ཁྱབ་ཏུ་འཇུག་རྒྱུ་ཡིན་མིན་གཉིས་ལ་འདམ་ང་བྱ་དགོས་ཞེས་བཤད།
ཨ་མི་རི་ཀར་ཏོག་དབྱིབས་རིམས་ནད་ཁྱབ་གདལ་གྱི་ཛ་དྲག་ཆེ་རུ་འགྲོ་དགོས་དོན་ནི་ཁ་སྔོན་གཟའ་ཉི་མའི་མཚམས་སུ་ཨ་རིའི་རྒྱལ་ཡོངས་སུ་ཏོག་དབྱིབས་ནད་དུག་འགོས་པའི་མི་༣༣༤༩་ལས་མེད་ཀྱང་དེ་ནས་ཆུ་ཚོད་༢༤་ཡས་མས་ཤིག་གི་རིང་ལ་ནད་པ་༡༠༠༠་ལྷག་འཕར་སྣོན་སོང་། དུས་ཡུན་ཆུ་ཚོད་༢༤་དེའི་རིང་ལ་མི་༢༠་ལྷག་ལ་འཆི་སྐྱོན་བྱུང་བས་ཁ་སང་གཟའ་ཟླ་བ་ནས་ཨ་རིའི་དབུས་གཞུང་དང་མངའ་སྡེ་ཁག གྲོང་ཁྱེར་ཁག་གི་འགོ་ཁྲིད་ཚོས་ཨ་མི་རི་ཀར་ཏོག་དབྱིབས་རིམས་ནད་ཉེན་ཚབས་ཆེ་རུ་འགྲོ་བཞིན་ཡོད་པ་མི་དམངས་ལ་ངོ་འཕྲོད་ཐབས་སུ་འབད། འོན་ཀྱང་ཏོག་དབྱིབས་རིམས་ནད་ཀྱིས་ཕྱི་ཟླ་༣་པའི་ཚེས་༡༦་གཅིག་པུར་ཨ་རིའི་མ་རྐང་གི་འཛའ་ཐང་བརྒྱ་ཆ་༡༢་དང་གྲངས་ཆུང་༩༣་ཆག་པ་ནི་ཨ་རིའི་མ་རྐང་ཁྲོམ་རའི་ལོ་རྒྱུས་སུ་ཉི་མ་གཅིག་ལ་ཆག་མྱོང་མེད་པ་ཞིག་ཆག གསར་འགོད་པའི་དྲིས་ལན་སྐབས་སུ་སྲིད་འཛིན་ཌོ་ནལ་ཊམ་གྱིས་ཨ་མི་རི་ཀའི་དཔལ་འབྱོར་ཉམས་རྒུད་ཀྱི་གཡང་ལ་ལྷུང་གི་ཡོད་སྲིད་ཅེས་མི་རྣམས་བློ་འཚབ་སྐྱེ་དགོས་པའི་ལན་ཞིག་བཏབ་པར་མ་ཟད། ཨ་རིའི་རྒྱལ་ཡོངས་སུ་ཁྱབ་བཞིན་པའི་ཏོག་དབྱིབས་རིམས་ནད་འཇོམས་པར་ཕྱི་ཟླ་༧་པ་ནས་༨་པའི་བར་དུ་འགོར་སྲིད་ཅེས་བཤད།
ནེའུ་ཡོཀ་གྲོང་ཁྱེར་སྤྱི་ཁྱབ་ཀྱིས་མི་འབོར་ས་ཡ་༩་ཡས་མས་ཤིག་ཡོད་པའི་གྲོང་ཁྱེར་དེའི་ཆང་ཁང་དང་ཟ་ཁང་རྣམས་སྒོ་འབྱེད་ཆོག་པའི་དུས་ཡུན་ལ་ཚོད་འཛིན་བྱ་རྒྱུ་ཡིན། ཟ་ཁང་ཁག་གིས་ཁ་པར་བཏང་ནས་ཟས་རིགས་མངགས་ཉོ་བྱེད་མཁན་ཁོ་ནར་བཟའ་བཏུང་རྣམས་ཕར་སྐྱེལ་ནས་ཚོང་ལས་གཉེར་དགོས། ཟ་ཁང་ནང་དུ་འགྲུལ་པ་མི་ཚོགས་བསུས་ནས་ཚོང་ལས་གཉེར་མི་ཆོག ང་ཚོས་དམག་འཁྲུག་གི་དུས་སྐབས་ལྟ་བུ་ཞིག་ལ་བསམ་བློ་བཏང་ནས་མི་ཚོགས་བཀག་སྡོམ་བྱ་རྒྱུ་ནི་སྐྱེ་བོ་སྟོང་ཕྲག་མང་པོའི་ཚེ་སྲོག་སྐྱོབ་ཐབས་ཤིག་ཡིན་པ་ངོས་ཟིན་དགོས་ཞེས་བཤད། ཀོ་ལོ་ར་ཌོ་མངའ་སྡེ་གཞུང་གིས་དུས་ཡུན་ཟླ་བ་༡་ལ་མངའ་སྡེ་དེའི་ས་གནས་ཁག་གི་ཟ་ཁང་དང་ཆང་ཁང་། རྩལ་སྦྱོང་ཁང་དང་ཟློས་གར་ཁང་། ཤོ་རྒྱག་རྒྱལ་འཛུགས་ཁང་རྣམས་སྒོ་རྒྱག་དགོས། ཟས་རིགས་དང་ཆང་སོགས་ཉོ་དགོས་ན་རླངས་འཁོར་བཏང་ནས་ཟ་ཁང་དང་ཆང་ཁང་གི་སྒེའུ་ཁུང་འགྲམ་དུ་བཅར་ནས་ཉོ་བའམ། ཡང་ན་ཟས་རིགས་དང་ཆང་སོགས་རང་ཁྱིམ་ལ་སྐྱེལ་དུ་འཇུག་ཆོག རྒྱལ་ཁབ་གཞན་དང་ཨ་རིའི་ཝ་ཤིང་ཊོན་མངའ་སྡེའི་གཞུང་གི་ཉམས་མྱོང་ལ་གཞིགས་ན་སྤྱི་ཚོགས་ཀྱི་འདུ་འཛོམས་རྣམས་ཅི་ཙམ་སྔོན་ལ་འགོག་ཐུབ་ན་དེ་ཙམ་གྱིས་རིམས་ནད་ཁྱབ་གདལ་འགོག་ཐུབ་པའི་དགེ་མཚན་འདུག་ཅེས་མངའ་སྡེ་དེའི་འཕྲོད་བསྟེན་དང་ཁོར་ཡུག་སྡེ་ཚན་གྱི་ལས་སྣེ་ཚོས་བཤད་འདུག འདི་དང་དུས་མཚུངས་སུ་ཨ་རིའི་མཱེ་རི་ལན་ཌི་དང་ཁན་ཊ་ཀི ལུ་ཝི་སི་ཡ་ན། ཨིན་ཌི་ཡ་ན་བཅས་ཀྱིས་ཀྱང་མི་ཚོགས་འདུ་འཚོམས་དང་ཚོང་ལས་སོགས་ལ་བཀག་སྡོམ་བྱེད་པའི་ཁྲིམས་ཤིག་ལག་ལེན་བསྟར་མགོ་བརྩམས།
བདུན་ཕྲག་འདི་ནས་ཨ་རིའི་ནེའུ་ཡོཀ་དང་ནེའུ་ཇར་སི། ཁེ་ནེ་ཊི་ཁེ་ཊི། མཱི་ཤཱི་གྷན། ཝི་སི་ཀོན་སན་བཅས་ཀྱིས་མི་༥༠་ལས་མང་བ་མཉམ་དུ་འདུ་འཛོམས་བྱེད་མི་ཆོག་པའི་སྒྲིག་ཁྲིམས་ལག་ལེན་བསྟར། སན་ཧྥ་རན་སི་སེ་ཁོ་གྲོང་ཁྱེར་སྤྱི་ཁྱབ་ཀྱིས་གྲོང་མི་རྣམས་བཟའ་བཅའི་རིགས་རྣམས་ཉོ་ཆ་རྒྱག་པ་དང་དངུལ་ཁང་ལ་འགྲོ་བ། རླངས་འཁོར་ནང་དུ་སྣུམ་ལྡུག་པ་དང་སྨན་ཉོ་བ། ཉེན་རྟོག་ལས་ཁུངས་སུ་བཅར་དགོས་ན་མ་གཏོགས་ཕྱི་ལ་བསྐྱོད་མི་ཆོག ང་ཚོས་འགུལ་སྐྱོད་བཀག་སྡོམ་འདིས་མི་མང་གི་ཉིན་རེའི་འཚོ་བར་བརྡབ་གསིག་འཕོག་གི་ཡོད་པ་ཤེས་ཀྱི་ཡོད། ཡིན་ནའང་འདི་ནི་མཐའ་གཅིག་ཏུ་ལག་ལེན་བསྟར་དགོས་ངེས་ཤིག་རེད། འདི་ནི་ང་ཚོའི་གྲོང་ཁྱེར་ལ་རྒྱལ་ཕམ་ཐག་གཅོད་ཀྱི་དུས་སྐབས་ཤིག་ཡིན་པས་ང་ཚོ་ཚང་མར་རང་འཁྲིའི་ལས་འགན་རེ་ཡོད། སོ་སོ་རང་ཉིད་དང་བཟའ་ཟླ་བུ་ཕྲུག ཁྱིམ་མཚེས་དང་གྲོང་མི་བཅས་ཀྱི་བདེ་ཐང་དོན་དུ་ཕྱི་ལ་འབུད་མི་དགོས་ན་རང་ཁྱིམ་དུ་འཛུལ་ནས་ཏོག་དབྱིབས་རིམས་ནད་ལ་གཡོལ་ཐབས་བྱ་དགོས་ཞེས་གསལ་བསྒྲགས་སྤེལ། ཨ་རིའི་དབུས་གཞུང་གིས་མི་༡༠་ལས་མང་བ་འཛོམས་མི་ཆོག་ཅེས་ལམ་སྟོན་སྒྲིག་གཞི་ཞིག་ཁྱབ་བསྒྲགས་བྱས་པ་ཉི་མ་བཅོ་ལྔར་ལག་ལེན་བསྟར་རྒྱུ། དེ་ནས་ཨ་རིའི་རྒྱལ་ཡོངས་ལ་ཏོག་དབྱིབས་རིམས་ནད་ཁྱབ་གདལ་འགྲོ་ཤུགས་ཆེ་ཆུང་ལ་གཞིགས་ནས་ལམ་སྟོན་སྒྲིག་གཞི་དེར་འགྱུར་བ་གཏོང་སྲིད།
ནེའུ་ཡོཀ་མངའ་སྡེ་སྤྱི་ཁྱབ་ཀྱིས་གྲོང་ཁྱེར་ཁག་དང་ས་གནས་ཁག མངའ་སྡེ་ཁག་གིས་ཐབས་བརྒྱ་ཇུས་སྟོང་གི་སྒོ་ནས་ཏོག་དབྱིབས་རིམས་ནད་ལ་འགོག་རྒོལ་བྱེད་བཞིན་ཡོད། འོན་ཀྱང་སྲིད་འཛིན་ཌོ་ནལ་ཊམ་གྱི་དབུས་གཞུང་གིས་ལམ་སྟོན་དང་རྒྱབ་སྐྱོར། རིམས་ནད་སྔོན་འགོག་ལ་འཆར་གཞི་གོ་རིམ་ལྡན་པ་ཞིག་ཁྱབ་བསྒྲགས་བྱེད་ཀྱི་མེད་པ་དེས་མི་རྣམས་མགོ་བོ་འཐོམ་དུ་འཇུག་གི་འདུག སྲིད་འཛིན་ཌོ་ནལ་ཊམ་གྱིས་ཨ་རིའི་དམག་གི་བཟོ་འགོད་པ་ཚོར་སྨན་ཁང་གསར་པ་བྲེལ་མྱུར་གྱིས་འཛུགས་སྐྲུན་བྱེད་དུ་འཇུག་དགོས། ཨ་རིའི་དམག་གི་བཟོ་འགོད་པ་ཚོར་སྨན་ཁང་འཛུགས་སྐྲུན་དང་མི་སྟོང་ཕྲག་མང་པོར་སྨན་བཅོས་བྱེད་ཐུབ་པའི་ཆ་རྐྱེན་དང་ཉམས་མྱོང་ཡོད། ད་ལྟ་སྲིད་འཛིན་ཌོ་ནལ་ཊམ་གྱིས་ཨ་རིའི་དམག་གི་བཟོ་འགོད་དཔུང་སྡེར་བཀའ་བཏང་ནས་ཏོག་དབྱིབས་རིམས་ནད་ལ་འགོག་རྒོལ་བྱེད་དུ་འཇུག་དགོས། གལ་སྲིད་སྨན་ཁང་གསར་པ་གྲ་སྒྲིག་མེད་པར་ལུས་ན་ཨ་རི་རྒྱལ་ཡོངས་སུ་ནད་པ་ཇེ་མང་དུ་སོང་སྟེ་སྨན་ཁང་དང་ཉལ་ཁྲི། དབུགས་གཏོང་འཕྲུལ་ཆས་སོགས་འདང་ངེས་མེད་པར་ཆག་སྒོ་ཆེན་པོ་ཞིག་འབྱུང་ངེས་རེད་ཅེས་ནན་བརྗོད་བྱས་འདུག མཱེ་རི་ལན་ཌི་མངའ་སྡེའི་སྤྱི་ཁྱབ་ཀྱིས་མངའ་སྡེའི་གཞུང་རྣམས་ཏོག་དབྱིབས་རིམས་ནད་ལ་འཐབ་རྒོལ་བྱེད་པའི་གཡུལ་སར་ཡོད་ཀྱང་དབུས་གཞུང་གི་ལམ་སྟོན་གསལ་པོ་ཞིག་ཡོད་ན་ཕན་ཐོགས་ཆེན་པོ་འདུག ང་ཚོས་རང་གི་མངའ་སྡེ་འདིར་དགོས་ངེས་རེད་བསམ་པའི་ཐབས་ཇུས་རྣམས་ལག་ལེན་བསྟར་བཞིན་ཡོད། ང་ཚོར་སྨན་ཁང་གི་ཡོ་བྱད་འདང་ངེས་མེད་པའི་དཀའ་ཆེན་ཆེན་པོ་ཞིག་འཕྲད་ཀྱི་འདུག་ཅེས་བཤད། ཨ་རིའི་མངའ་སྡེ་ཕལ་མོ་ཆེར་སྨན་དང་སྨན་ཁང་གི་ཡོ་བྱད་སོགས་འདང་ངེས་མེད་པའི་དཀའ་ངལ་ཆེན་པོ་ཞིག་ཡོད་ཀྱང་ཨ་རིའི་དབུས་འཕྲོད་བསྟེན་ལྷན་ཁང་གིས་སྨན་དང་ཉལ་ཁྲི། སྨན་ཁང་གི་ཡོ་བྱད་སོགས་འདང་ངེས་མེད་པ་རྣམས་འཕྲལ་དུ་མཁོ་སྒྲུབ་བྱེད་ཐུབ་ས་མ་རེད། ང་ཚོས་གང་ཐུབ་ཀྱིས་མཐུན་རྐྱེན་དེ་རྣམས་སྒྲུབ་ཐབས་བྱེད་བཞིན་ཡོད་ཅེས་བཤད། ཁ་སང་ཕྱི་ཟླ་༣་པའི་ཚེས་༡༦་ཉིན་ཨ་རིའི་གཞུང་གིས་ཏོག་དབྱིབས་རིམས་ནད་ཀྱི་འགོག་ཁབ་གསར་པ་དེ་ཐེངས་དང་པོར་མི་ཞིག་ལ་བརྒྱབ་ནས་ཞོར་གནོད་ཆེན་པོ་ཡོད་པ་ཚོད་ལྟ་བྱས་ཤིང་། གལ་སྲིད་སྨན་ཁབ་གསར་པ་དེ་མི་ལ་ཞོར་གནོད་མེད་པར་ཚོད་ལྟ་ལེགས་གྲུབ་བྱུང་ན་དུས་ཡུན་ཟླ་བ་གསུམ་ཡས་མས་ཤིག་གི་རྗེས་སུ་ཏོག་དབྱིབས་རིམས་ནད་ཀྱི་འགོག་ཁབ་རྒྱ་ཁྱབ་ཏུ་མཁོ་འགྲེམ་བྱེད་ཐུབ་པའི་ཚོད་དཔག་བྱེད་ཀྱི་ཡོད་པ་རེད།།
