༄༅།། ན་ནིང་ལོ་མཇུག་ཏུ་རྒྱ་ནག་གི་ཝུ་ཧན་གྲོང་ཁྱེར་ནས་ཁྱབ་པའི་ཏོག་དབྱིབས་རིམས་ནད་ཀྱིས་འཛམ་གླིང་ཁྱོན་ཡོངས་སུ་མི་༤༠༠༠་ལྷག་ལ་འཆི་སྐྱོན་དང་༡༡༣༠༠༠་ཡས་མས་ཤིག་ལ་ནད་དུག་འགོས། མི་ལ་འཆི་སྐྱོན་དང་ནད་མནར་བྱུང་བའི་གྲངས་འབོར་མང་ཆེ་བ་ནི་རྒྱ་ནག་ཏུ་བྱུང་ཡོད། འོན་ཀྱང་དེ་རིང་ཕྱི་ཟླ་༣་པའི་ཚེས་༡༠་ཉིན་རྒྱ་ནག་གི་སྲིད་འཛིན་ཞིས་ཅིན་ཕིང་ཝུ་ཧན་གྲོང་ཁྱེར་ལ་གཟིགས་ཞིབ་ཏུ་བསྐྱོད་པ་དེ་ལ་བལྟས་ཚེ། རྒྱ་ནག་གི་ས་གནས་ཁག་ཏུ་ཏོག་དབྱིབས་རིམས་ནད་འཇོམས་ཀྱི་ཡོད་པའི་རྟགས་མཚན་ཞིག་མངོན། གཟའ་མིག་དམར་ཉིན་རྒྱ་ནག་ལ་ནད་པ་གསར་པ་༡༩་བྱུང་བ་དེའི་ནང་གི་མི་༡༧་ཝུ་ཧན་གྲོང་ཁྱེར་དུ་བྱུང་། མི་༢་ལ་ཕྱི་རྒྱལ་དུ་རིམས་ནད་འགོས་པ་དང་རྒྱ་ནག་རྒྱལ་ཡོངས་སུ་ནད པ་༦༠༠༠༠་ལྷག་ལ་སྨན་བཅོས་བྱས་ནས་དྲག་སྐྱེད་བྱུང་སྟེ་སྨན་ཁང་ཁག་ནས་རང་ཁྱིམ་དུ་སློག འདས་པའི་ཉིན་དེར་རྒྱ་ནག་ལ་ཏོག་དབྱིབས་རིམས་ནད་ཀྱིས་མི་༡༧་ལ་མ་གཏོགས་འཆི་སྐྱོན་བྱུང་མ་སོང་ཞེས་བསྒྲགས། ཨེ་ཤི་ཡའི་རྒྱལ་ཁབ་ཁག་གི་གྲས་སུ་རྒྱ་ནག་མ་བརྩིས་པར་ལྷོ་ཀོ་རི་ཡར་ཏོག་དབྱིབས་རིམས་ནད་ཁྱབ་ནས་དཀའ་ངལ་ཚབས་ཆེན་ཞིག་འཕྲད་ཀྱི་ཡོད་མོད། གཟའ་འཁོར་འདི་ནས་ལྷོ་ཀོ་རི་ཡ་ལའང་ཏོག་དབྱིབས་རིམས་ནད་ཀྱི་ངར་ཤུགས་ཆག་གི་ཡོད་པའི་རྟགས་མཚན་ཞིག་ཐོན། དཔེར་ན་ལྷོ་ཀོ་རི་ཡའི་གཞུང་གིས་མི་༡༩༠༠༠༠་ལྷག་ལ་སྨན་ཡོན་མ་བླངས་པར་ནད་དུག་འགོས་ཡོད་མེད་གཞུང་གིས་བརྟག་དཔྱད་བྱས་པ་དང་། ལྷོ་ཀོ་རི་ཡའི་རིམས་ནད་ཁྱབ་ཡུལ་གཙོ་བོ་ཏཱེ་གུ་གྲོང་ཁྱེར་ལ་འགྲིམ་འགྲུལ་བཀག་ནས་རིམས་ནད་སྔོན་འགོག་བྱས་པར་ནུས་པ་ཐོན་ཡོད་པ་སྟེ། ད་ལྟའི་བར་དུ་ལྷོ་ཀོ་རི་ཡ་རྒྱལ་ཡོངས་སུ་ཏོག་དབྱིབས་རིམས་ནད་ཀྱི་ནད་པ་༧༥༡༢་བྱུང་བ་དེའི་ཁོངས་ནས་མི་༢༤༧་དྲག་སྐྱེད་བྱུང་། ད་སྔ་ཕན་ཆད་ལ་མི་༥༤་ལ་མ་གཏོགས་འཆི་སྐྱོན་བྱུང་མེད།
ད་ལྟ་རྒྱ་ནག་གི་ཏོག་དབྱིབས་རིམས་ནད་ཁྱབ་ཡུལ་གཙོ་བོ་དང་ཛ་དྲག་གི་གནས་སུ་ལྷུང་ཡོད་པ་ནི་ཡུ་རོབ་རྒྱལ་ཁབ་ཨི་ཊི་ལི་ཡིན་པ་སྟེ། ཁ་སང་གཟའ་ཟླ་བའི་ཕྱི་དྲོར་སྲིད་བློན་ཀོན་ཐེས་ཕྱི་ཟླ་༤་པའི་ཚེས་མགོ་བར་དུ་ཨི་ཊི་ལི་རྒྱལ་ཡོངས་སུ་སློབ་གྲྭ་ཁག་སྒོ་བརྒྱབ་ནས་འགྲིམ་འགྲུལ་དང་སྐྱེལ་འདྲེན་བཀག་སྡོམ། མི་ཚོགས་འདུ་འཛོམས་བྱེད་མི་ཆོག་པ་དང་ཚོང་ལས་ཁག་སྒོ་རྒྱག་དགོས། ཨི་ཊི་ལིའི་མི་འབོར་ས་ཡ་༦༠་རང་ཁྱིམ་དུ་འཛུལ་དགོས་པ་དང་ཨི་ཊི་ལིའི་ས་གནས་གཅིག་ནས་ས་གནས་གཞན་ཞིག་ལ་འགྲོ་སྐྱོད་བྱ་དགོས་ན་རང་གི་འབྲེལ་ཡོད་ས་གནས་ཁག་གི་ཉེན་རྟོག་ལས་ཁང་ནས་ཆོག་མཆན་འཐོབ་དགོས་པ་སོགས་རིམས་ནད་སྔོན་འགོག་གི་ཛ་དྲག་སྲིད་ཇུས་ཤིག་ལག་ལེན་བསྟར་འགོ་ཚུགས། ཨི་ཊི་ལི་རྒྱལ་ཡོངས་སུ་དམག་གི་ཉེན་རྟོག་པ་དང་མེ་འཁོར་ལྕགས་ལམ་ཉེན་རྟོག་པ། འཕྲོད་བསྟེན་ལས་སྣེ་སོགས་ཀྱིས་རྒྱ་ལམ་དང་མེ་འཁོར་འབབ་ཚུགས་རྣམས་བཀག འདི་ནི་འཛམ་གླིང་དམག་ཆེན་གཉིས་པའི་རྗེས་སུ་ཨི་ཊི་ལིའི་གཞུང་གིས་ལག་ལེན་བསྟར་མྱོང་མེད་པའི་སྲིད་ཇུས་ཤིག་ཡིན། ད་ལྟའི་བར་དུ་ཨི་ཊི་ལིའི་ས་གནས་ཁག་ཏུ་ཏོག་དབྱིབས་རིམས་ནད་ཀྱིས་མི་༤༦༣་ལ་འཆི་སྐྱོན་དང་མི་༩༡༧༢་ལ་ནད་དུག་འགོས་འདུག
དེ་རིང་གཟའ་མིག་དམར་གྱི་མཚམས་སུ་ཨ་མི་རི་ཀར་ཏོག་དབྱིབས་རིམས་ནད་ཀྱི་ནད་དུག་འགོས་པའི་མི་༧༣༢་བྱུང་ཡོད་པ་དང་མི་༢༦་ལ་འཆི་སྐྱོན། ད་ལྟ་ཨ་མི་རི་ཀའི་མངའ་སྡེ་༣༦་ལ་ཏོག་དབྱིབས་རིམས་ནད་ཁྱབ་ཟིན། ད་སྔ་ཉུར་མཐར་ཡང་ཨ་མི་རི་ཀའི་མངའ་སྡེ་༡༠་ཐམ་པས་ཛ་དྲག་གི་གནས་སུ་ལྷུང་ཡོད་ཅེས་ཁྱབ་བསྒྲགས་བྱས་ནས་ཛ་དྲག་གི་འགྲོ་གྲོན་གཏོང་ཆོག་པ་དང་ཛ་དྲག་དུས་སུ་ལག་ལེན་བསྟར་ཆོག་པའི་ཁྲིམས་རྣམས་ལག་ལེན་བསྟར་འགོ་ཚུགས་འདུག ཨ་རིའི་མངའ་སྡེ་ཁག་གི་གྲས་ཀྱི་ཏོག་དབྱིབས་རིམས་ནད་ཁྱབ་པའི་ནད་པ་མང་ཤོས་ནི་ཨ་མི་རི་ཀའི་ནུབ་ཕྱོགས་སུ་ཆགས་པའི་ཝ་ཤིང་ཊོན་དང་ཁེ་ལི་ཧྥོར་ཎི་ཡ། ཨ་རིའི་བྱང་ཤར་ཕྱོགས་སུ་ཆགས་པའི་ནེའུ་ཡོཀ་མངའ་སྡེ་བཅས་ཡིན་ཞིང་། ཀོ་ལིམ་བྷི་ཡ་དང་ནེའུ་ཡོཀ་སློབ་ཆེན། སི་ཊན་ཧྥོར་ཌི་དང་ཁེ་ལི་ཧྥོར་ཎི་ཡའི་ལྷོ་ཕྱོགས་སློབ་ཆེན་སོགས་ཨ་མི་རི་ཀའི་སློབ་ཆེན་ཁག་ཅིག་གིས་ཀྱང་སློབ་ཕྲུག་དང་དགེ་རྒན་རྣམས་འཛིན་གྲྭར་མཉམ་དུ་ཚོགས་ནས་སློབ་ཁྲིད་ཀྱི་ཚབ་ཏུ་དྲྭ་ལམ་དུ་སློབ་ཁྲིད་བྱ་རྒྱུ་མགོ་བརྩམས། ཉེ་ཆར་ཏོག་དབྱིབས་རིམས་ནད་ཀྱི་ནད་དུག་འགོས་པའི་མི་ཞིག་རྒྱལ་ས་ཝ་ཤིང་ཊོན་དུ་ཚོགས་པའི་ཆབ་སྲིད་ཀྱི་ཚོགས་འདུ་ཞིག་ལ་ཞུགས། མི་དེ་ཨ་རིའི་གྲོས་ཚོགས་འཐུས་མི་༦་ལ་ཐུག་འཕྲད་བྱུང་ཡོད་པར་བརྟེན། ཨ་རིའི་གྲོས་ཚོགས་གོང་འོག་གི་འཐུས་མི་༦་གིས་རང་མོས་ཀྱིས་སོ་སོ་ལོགས་སུ་བཀག་ནས་རིམས་ནད་སྔོན་འགོག་གི་ལས་ཐབས་བསྟེན་གྱི་ཡོད་པར་མ་ཟད། སྲིད་འཛིན་ཌོ་ནལ་ཊམ་གྱིས་ཀྱང་འཐུས་མི་དེ་དག་གི་གྲས་ཀྱི་གཅིག་ལ་ལག་པ་བཏང་བ་དང་མཉམ་དུ་འགྲིམ་འགྲུལ་བྱས་ཡོད་པས་སྲིད་འཛིན་ཌོ་ནལ་ཊམ་ལའང་རིམས་ནད་འགོས་ཡོད་སྲིད་པའི་དོགས་པ་བྱེད་ཀྱི་ཡོད་པ་རེད།
