ཨ་རུ་ན་ཅཱལ་གྱི་ས་ཐོག་ཏུ་རྒྱ་ནག་གིས་གྲོང་གསེབ་ཅིག་འཛུག་སྐྲུན།

Embed share

ཨ་རུ་ན་ཅཱལ་གྱི་ས་ཐོག་ཏུ་རྒྱ་ནག་གིས་གྲོང་གསེབ་ཅིག་འཛུག་སྐྲུན།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:06:16 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།

༄༅།། རྒྱ་ནག་གིས་རྒྱ་གར་ཤར་ཕྱོགས་ཀྱི་ཨ་རུ་ན་ཅཱལ་མངའ་སྡེའི་ས་མཚམས་བརྒལ་ནས་རྒྱ་གར་བའི་ས་ཐོག་ཏུ་ཁང་པ་༡༠༡་ཡོད་པའི་གྲོང་གསེབ་གསར་པ་ཞིག་འཛུགས་སྐྲུན་བྱས་ཡོད་ཅིང་། ཉེ་ལམ་ཕྱི་ཟླ་༡༡་པའི་ཚེས་༡་ཉིན་འཁོར་སྐར་གྱིས་བླངས་པའི་འདྲ་པར་དེར་དཔྱད་ཞིབ་པ་ཚོས་བརྟག་དཔྱད་ཞིབ་ཚགས་བྱས་ནས་གྲོང་གསེབ་དེ་ཧིན་བོད་ས་མཚམས་ནས་སྤྱི་ལེ་༤་དང་ཕྱེད་ཀ་བརྒལ་ཏེ་རྒྱ་གར་གྱི་མངའ་ཁོངས་སུ་འཛུགས་སྐྲུན་བྱེད་ཡོད་པས་རྒྱ་གར་གཞུང་གིས་བློ་འཚབ་ཆེན་པོ་བྱེད་དགོས་པ་ཞིག་ཏུ་གྱུར་ཡོད་པའི་གནས་ཚུལ་ཐོན། རྒྱ་གར་གྱི་ཨེན་ཌི་བརྙན་འཕྲིན་ཁང་ལ་རག་པའི་འཁོར་སྐར་གྱི་འདྲ་པར་དེར་བལྟས་ཚེ། རྒྱ་ནག་གིས་གསར་དུ་འཛུགས་སྐྲུན་བྱས་པའི་གྲོང་གསེབ་དེ་སྔ་ལོ་རྒྱ་དཀར་ནག་གི་དམག་མི་ཁག་ཅིག་ལག་འཛིང་ཐུག་ས་སྟེ། ལ་དྭགས་ཀྱི་གྷལ་ཝན་ལུང་གཤོང་དུ་དམར་འཛིང་བྱུང་བའི་སྐབས་དེར་འཛུགས་སྐྲུན་བྱས་པ་ཞིག་ཡིན་འདུག སྔ་ལོའི་ཕྱི་ཟླ་༦་པའི་ནང་དུ་རྒྱ་ནག་གི་དམག་མིས་རྒྱ་གར་གྱི་དབང་སྒྱུར་འོག་ཏུ་ཡོད་པའི་ལ་དྭགས་ཀྱི་གྷལ་ཝན་ལུང་གཤོང་ལ་བཙན་འཛུལ་བྱས་པའི་སྐབས་དེར་ཕྱོགས་གཉིས་ཀྱི་མཐའ་མཚམས་སྲུང་དམག་ཁག་ཅིག་ལག་འཛིན་ཐུག་སྟེ་ལོ་༤༥་ལྷག་གི་རིང་དུ་བྱུང་མྱོང་མེད་པའི་མི་གསོད་ཁྲག་སྦྱོར་གྱི་གནས་ཚུལ་བྱུང་། རྒྱ་གར་བའི་དམག་མི་༢༠་ཐམ་པར་སྲོག་སྐྱོན་ཕོག་པ་དང་རྒྱ་ནག་གི་དམག་མི་ཅི་ཙམ་ལ་སྲོག་སྐྱོན་བྱུང་མིན་ཕྱིར་བསྒྲགས་བྱས་མེད་ཀྱང་ཨ་མི་རི་ཀ་དང་རྒྱ་གར་གཉིས་ཀས་རྒྱ་ནག་གི་མཐའ་མཚམས་སྲུང་དམག་༣༠་ནས་༤༠་ཡས་མས་ཤིག་ལ་སྲོག་སྐྱོན་བྱུང་ཡོད་པའི་ཚོད་དཔག་བྱེད་ཀྱི་ཡོད་ཅིང་། ད་ལྟ་དགུན་གྱི་གྲང་ངད་ཤིན་ཏུ་ཆེ་བའི་དུས་སུའང་རྒྱ་དཀར་ནག་གཉིས་ཀས་ཧིན་བོད་ས་མཚམས་སུ་བཀྲམ་ཡོད་པའི་དམག་མི་རྣམས་ཕྱིར་འཐེན་མ་བྱས་པར་འཐབ་འཁྲུག་གི་གྲ་སྒྲིག་བྱས་ནས་བསྡད་ཡོད་པ་རེད།།

༢༠༡༩་ལོའི་ཕྱི་ཟླ་༨་པའི་ཚེས་༢༦་ཉིན་རྒྱ་གར་ཤར་ཕྱོགས་ཀྱི་ཨ་རུ་ན་ཅཱལ་མངའ་སྡེའི་ཧིན་བོད་ས་མཚམས་ཁག་འདྲ་པར་བླངས་པ་ཁག་དང་། དེའི་སྡོན་ལ་བླངས་པའི་འདྲ་པར་ཁག་ཏུ་རྒྱ་ནག་གིས་ས་མཚམས་བརྒལ་ནས་ཨར་ལས་ཀྱི་འཛུགས་སྐྲུན་བྱེད་ཀྱི་ཡོད་པ་གཏན་ནས་མི་གསལ། ༢༠༢༠་ལོའི་ཕྱི་ཟླ་༡༡་པའི་ཚེས་༡་ཉིན་བླངས་པའི་འདྲ་པར་ནང་དུ་རྒྱ་ནག་གིས་ཧིན་བོད་ས་མཚམས་བརྒལ་ནས་ཨ་རུ་ན་ཅཱལ་གྱི་ས་ཐོག་ཏུ་གྲོང་གསེབ་ཅིག་འཛུགས་སྐྲུན་བྱས་ཡོད་པ་གསལ་བས་རྒྱ་ནག་གཞུང་གིས་གྲོང་གསེབ་དེ་སྔ་ལོ་འཛུགས་སྐྲུན་བྱས་པ་ར་འཕྲོད། རྒྱ་གར་གྱི་བརྙན་འཕྲིན་ཁང་དེས་འཁོར་སྐར་གྱི་འདྲ་པར་དེའི་འདྲ་བཤུས་ཤིག་རྒྱ་གར་གྱི་ཕྱི་སྲིད་ལྷན་ཁང་ལ་བསྟན་ནས་དགོངས་ཚུལ་ཅི་ཡོད་དྲིས་ཀྱང་རྒྱ་གར་གྱི་ཕྱི་སྲིད་ལྷན་ཁང་གིས་ཧིན་བོད་ས་མཚམས་སུ་རྒྱ་ནག་གིས་འཛུགས་སྐྲུན་བྱེད་ཀྱི་ཡོད་པ་ང་ཚོས་ཤེས་ཀྱི་ཡོད། རྒྱ་ནག་གིས་འདས་པའི་ལོ་མང་རིང་ཧིན་བོད་ས་མཚམས་ཁག་ཏུ་འཛུགས་སྐྲུན་བྱས་ཡོད་པ་རེད། རྒྱ་གར་གཞུང་གིས་ཀྱང་ས་མཚམས་ཁུལ་དུ་རྒྱ་ལམ་དང་ཟམ་པ་གསར་པ་འཛུགས་སྐྲུན་བྱས་ནས་མི་མང་གི་འགྲིམ་འགྲུལ་བདེ་རུ་གཏོང་བཞིན་ཡོད་ཅེས་བཤད་འདུག
རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས་སྔ་ལོའི་ཕྱི་ཟླ་༡༠་པའི་ནང་དུ་རྒྱ་གར་གྱིས་ཧིན་བོད་ས་མཚམས་ཁུལ་དུ་འཛུགས་སྐྲུན་བྱ་རྒྱུ་ཤུགས་ཆེ་རུ་བཏང་སྟེ་དམག་མི་འགྲེམ་འཇོག་བྱེད་ཀྱི་འདུག འདི་ནི་རྒྱལ་ཁབ་གཉིས་ཀྱི་འགལ་རྐྱེན་གཙོ་བོ་ཞིག་རེད་ཅེས་བཤད། ཉེ་དུས་ཕྱི་ཟླ་༡༡་པའི་ཚེས་༡་ཉིན་བླངས་པའི་འདྲ་པར་གསར་པའི་ནང་དུ་རྒྱ་ནག་གིས་གྲོང་གསེབ་ཅིག་འཛུགས་སྐྲུན་བྱེད་ཡོད་པ་དེའི་ཁུལ་དུ་རྒྱ་གར་གྱིས་འགྲུལ་ལམ་གསར་པ་འཛུགས་བྱེད་ཀྱི་ཡོད་པ་མཐོང་རྒྱུ་མེད་མོད། ཨ་རུ་ན་ཅཱལ་མངའ་སྡེའི་རྒྱ་གར་གྱི་རྒྱལ་ཡོངས་གྲོས་ཚོགས་འཐུས་མི་ཏ་པཱིར་གྷཱའོ་ཡིས་གསར་འགོད་པར་ངས་འཁོར་སྐར་གྱིས་བླངས་པའི་འདྲ་པར་དེ་བསྟན་ནས་གྲོས་ཚོགས་ལ་ཆུ་བོ་སཱ་ཝར་ཏ་མའི་སྟོད་ཕྱོགས་ཀྱི་རྫོང་སྡེ་ཞིག་གི་ཁོངས་སུ་རྒྱ་ནག་གི་དམག་མི་བཙན་འཛུལ་བྱེད་ཀྱི་འདུག རྒྱ་ནག་གིས་ཆུ་བོ་སཱ་ཝར་ཏ་མའི་སྟོང་ཕྱོགས་སུ་ལམ་ཐིག་གཉིས་ཡོད་པའི་རྒྱ་ལམ་ཞིག་འཛུགས་སྐྲུན་བྱེད་ཀྱི་འདུག རྒྱ་ནག་གི་དམག་མི་ས་མཚམས་བརྒལ་ནས་ང་ཚོའི་མངའ་ཁོངས་སུ་སྤྱི་ལེ་༦༠་ནས་༧༠་ཙམ་སིམ་འཛུལ་བྱས་ཡོད་པར་མ་ཟད། ཁོ་ཚོས་མུ་མཐུད་དུ་ཆུ་བོ་སཱ་ཝར་མ་ཏིའི་སྟོད་ཕྱོགས་སུ་རྒྱ་ལམ་འཛུགས་སྐྲུན་བྱེད་མུས་ཡིན་པ་བཤད་ཡོད་ཅེས་གསར་འགོད་པར་གླེང་མོལ་བྱས་འདུག

རྒྱ་ནག་གིས་ཨ་རུ་ན་ཅཱལ་གྱི་ས་ཐོག་ཏུ་གྲོང་གསེབ་ཅིག་འཛུགས་སྐྲུན་བྱེད་ཡོད་པར་རྒྱ་གར་གྱི་ཕྱི་སྲིད་ལྷན་ཁང་གིས་རྒྱ་ནག་ལ་འདྲི་རྩད་བྱས་ཡོད་མེད་ལྡི་ལི་གསར་པའི་བརྙན་འཕྲིན་ཁང་དེས་འདྲི་རྩད་བྱས་པར་རྒྱ་གར་གྱི་ཕྱི་སྲིད་ལྷན་ཁང་གིས་ལན་འདེབས་ཐད་ཀར་མ་བྱས་པར་རྒྱ་གར་གཞུང་གིས་རྒྱལ་ཁབ་ཀྱི་བདེ་འཇགས་སྲུང་སྐྱོབ་ཀྱི་ལས་དོན་ཁག་ལ་བྱ་ར་ནན་པོ་བྱེད་ཀྱི་ཡོད། རྒྱལ་ཁབ་ཀྱི་བདག་དབང་དང་མངའ་ཁོངས་གོང་བུ་གཅིག་གྱུར་ལ་སྲུང་སྐྱོབ་བྱ་རྒྱུ་དེར་རྒྱ་གར་གཞུང་གིས་དགོས་ངེས་ཀྱི་འཐབ་ཇུས་ཁག་ལག་བསྟར་བྱེད་ཀྱི་ཡོད་ཅེས་ལན་བཏབ། རྒྱ་གར་གྱི་གཞུང་འབྲེལ་ས་ཁྲའི་ནང་དུ་རྒྱ་ནག་གིས་འཛུགས་སྐྲུན་བྱ་ཡུལ་གྲོང་གསེབ་དེ་རྒྱ་གར་གྱི་ས་ཐོག་ཏུ་ཁེལ་ཡོད་པ་གསལ་པོ་ཡིན་འདུག གྷུ་གྷལ་དྲྭ་རྒྱའི་འདྲ་པར་ནང་དུ་རྒྱ་ནག་གིས་འཛུགས་སྐྲུན་བྱ་ཡུལ་གྲོང་གསེབ་གསར་པ་དེ་མེག་མ་ཧན་ས་ཐིག་སྟེ། རྒྱ་གར་དང་བོད་ཀྱི་ས་མཚམས་ཕྱེ་ཡོད་པ་དེའི་རྒྱ་གར་གྱི་ས་མཚམས་ནང་ལོགས་སུ་འཛུགས་སྐྲུན་བྱས་འདུག རྒྱ་གར་གཞུང་གིས་ཧིན་བོད་ས་མཚམ་སུ་ཆ་འཛིན་བྱེད་པའི་མེག་མ་ཧན་ས་ཐིག་ལ་རྒྱ་ནག་གཞུང་གིས་ངོས་ལེན་བྱེད་ཀྱི་མེད་པ་རེད།།

རྒྱ་དཀར་ནག་གཉིས་ཀྱི་འབྲེལ་ལམ་ཉམས་ཞིབ་མཁས་པ་ཨར་པིས་རྒྱ་ནག་གིས་གསར་དུ་འཛུགས་སྐྲུན་བྱས་པའི་གྲོང་གསེབ་དེ་མེག་མ་ཧན་ས་ཐིག་གི་ལྷོ་ཕྱོགས་སུ་རྒྱ་གར་གྱི་ས་ཐོག་ཏུ་འཛུགས་སྐྲུན་བྱས་འདུག རྒྱ་ནག་གིས་རྒྱ་གར་གྱི་མངའ་ཁོངས་སུ་གྲོང་གསེབ་གསར་པ་ཞིག་འཛུགས་སྐྲུན་བྱས་ཡོད་པ་དེས་ས་མཚམས་ཀྱི་རྩོད་གཞི་ཡོད་པ་རྣམས་ཛ་དྲག་ཆེ་རུ་གཏོང་སྲིད་ཅེས་བཤད། རྒྱ་ནག་གིས་རྒྱ་གར་གྱི་ས་ཐོག་ཏུ་གྲོང་གསེབ་ཅིག་འཛུགས་སྐྲུན་བྱས་པའི་རྐྱེན་གྱིས་ཕྱོགས་གཉིས་ཀས་མིང་རྟགས་བཀོད་པའི་གྲོས་མཐུན་ཁག་ཅིག་རྩིས་མེད་བཏང་བ་ཞིག་ཏུ་འགྱུར་སྲིད། རྒྱ་དཀར་ནག་གི་གྲོས་མཐུན་ཁག་ཏུ་རྩོད་གཞི་ཆེ་བའི་ས་མཚམས་ཁག་ཏུ་རྒྱལ་ཁབ་གཉིས་ཀས་ལྷིན་འཇགས་བསྐྲུན་རྒྱུ། ཕྱོགས་གཉིས་ཀྱི་མི་མང་གི་བདེ་འཇགས་སྲུང་སྐྱོབ་ལ་དོ་ཕོག་གཏོང་རྒྱུ་མིན་ཞེས་བཀོད། ད་ལྟའི་བར་དུ་རྒྱ་དཀར་ནག་གི་སྐུ་ཚབ་ཚོས་ས་མཚམས་ཀྱི་གྲོས་མོལ་ཐེངས་༢༠་ལྷག་བྱས་ཡོད་པ་རེད།།