མཚོ་སྔོན་གྱི་བོད་ས་ཁག་བཞི་ལ་རྒྱ་མི་ཇེ་མང་དུ་གཏོང་འཆར།

༄༅།། རྒྱ་ནག་གཞུང་གིས་བོད་ཀྱི་མཚོ་སྔོན་ཞིང་ཆེན་གྱི་མཚོ་ལྷོ་ཁུལ་དང་རེབ་གོང་ཁུལ། ཡུལ་ཤུལ་ཁུལ་དང་ཁྲི་ཀ་རྫོང་བཅས་ས་ཁུལ་གསུམ་དང་རྫོང་གཅིག་གི་བོད་ས་ཁག་བཞི་གྲོང་ཁྱེར་ཅན་དུ་བསྒྱུར་རྒྱུའི་འཆར་འགོད་བྱས་ནས་རྒྱ་རིགས་འབུམ་ཕྲག་མང་པོ་གནས་སྤོར་བྱེད་དུ་འཇོག་རྒྱུ་ཡིན་ཞིང་། མཚོ་ལྷོ་ཁུལ་ཐོག་ཏུ་རྒྱ་ནག་གི་ཅང་སུའུ་ཞིང་ཆེན་ནས་རྒྱ་རིགས་མང་པོ་ཞིག་འབྱོར་ཡོད་པའི་གནས་ཚུལ་ཐོན་འདུག དེ་ཡང་ཕྱི་ཚེས་༡༨་ཉིན་བོད་ནས་འདི་གར་མིང་བརྗོད་འདོད་མེད་པའི་བོད་པ་ཞིག་གིས་གནས་ཚུལ་མཁོ་སྤྲོད་བྱས་པ་ལྟར་ན། མཚོ་ལྷོ་ཁུལ་ཐོག་ཏུ་རྒྱ་ནག་གི་ཅང་སུའུ་ཞིང་ཆེན་ནས་རྒྱ་རིགས་མང་པོ་ཞིག་འབྱོར་ཏེ་སྔོ་ཚོད་འདེབས་ལས་དང་ཚོང་ར་སྒོ་འབྱེད་སོགས་ཀྱི་ཚོང་ལས་གཉེར་འགོ་ཚུགས་བཞིན་པའི་སྐབས་རེད། གོ་ཐོས་ལྟར་ན་མཚོ་ལྷོ་ཁུལ་ཐོག་གཅིག་པུར་རྒྱ་རིགས་འབུམ་༤་ལྷག་གནས་སྤོར་བྱེད་དུ་འཇུག་རྒྱུ་རེད་ཅེས་གླེང་གི་ཡོད་ཀྱང་མིག་སྔར་རྒྱ་མི་འབུམ་༤་སླེབས་ཡོད་མེད་ནི་ཁ་ཚོན་གཅོད་དཀའ་བ་ཞིག་འདུག་ཅེས་བཤད།།

གསར་འགྱུར་མཁོ་སྤྲོད་པས་མུ་མཐུད་དུ་བཤད་པ་ལྟར་ན། ཡུལ་ཤུལ་ཁུལ་ཐོག་ཏུ་དེ་སྔ་ས་འགུལ་བརྒྱུགས་པའི་རྗེས་སུ་རྒྱལ་ཁབ་ཀྱིས་འཛུགས་སྐྲུན་བྱས་ཏེ་རྣམ་པ་ཧ་ཅང་རྒྱ་ཆེན་པོར་བསྒྱུར་ཡོད་པ་དང་ཁུལ་ཐོག་གི་ཟ་ཁང་དང་མགྲོན་ཁང་ཆེན་པོ་རྣམས་ཀྱི་བདག་པོ་ཚང་མ་རྒྱ་རིགས་རེད། ཟ་ཁང་གི་ཞབས་ཞུ་བ་རྣམས་བོད་པ་ཡིན་པ་དང་ཡུལ་ཤུལ་ཁུལ་དུ་འགྱུར་ལྡོག་ཆེན་པོ་ཞིག་ཐེབས་ཏེ་ཡུན་རིང་མི་འགོར་པར་ས་ཆ་སྟོང་པ་ཡོད་ཚད་རྒྱ་རིགས་ཚོས་བདག་འཛིན་བྱ་སྲིད་པའི་ཉེན་ཁ་འདུག

མཚོ་ལྷོ་ཁུལ་ལ་མཚོན་ན་ཁོར་ཡུག་དང་འཛུགས་སྐྲུན་ཧ་ཅང་རྒྱ་ཆེན་པོ་བྱས་ཏེ་རྒྱ་སྐྱེད་གཏོང་གི་འདུག དཔེར་ན་སྒོ་མེ་ཞིང་ཁ་ཞེས་བའི་གྲོང་སྡེ་དེའི་གྲོང་མི་ཕལ་ཆེ་བའི་སྡོད་ཁང་དང་ཞིང་ས་ཚང་མ་རྒྱ་གཞུང་གིས་བསྡུས་ནས་བོད་པ་ཚོར་གུན་གསབ་དངུལ་སྒོར་ཅུང་ཟད་རེ་སྤྲད་འདུག་པར་མ་ཟད། ཁུལ་དེར་གཞུང་ལམ་གསར་པ་འཛུགས་སྐྲུན་དང་རྒྱ་སྐྱེད། ཐོག་བརྩེགས་ཅན་གྱི་ཁང་ཆེན་མང་པོ་འཛུགས་སྐྲུན་བྱས་དང་བྱེད་བཞིན་པའི་སྒང་རེད་། གྲོང་མི་ཚང་མར་རྒྱ་གཞུང་གིས་གུན་གསབ་དངུལ་སྒོར་ཅུང་ཟད་རེ་སྤྲད་པ་དེས་བཟའ་མི་ཚང་མའི་འཚོ་བ་འཁྱོལ་དཀའ་བའི་གནས་སུ་ལྷུང་ཡོད་ཅིང་། སྡོད་ཁང་དང་ས་ཞིང་ཚང་མ་མེད་པར་གྱུར་ཡོད་པས་མ་འོངས་པར་འཚོ་བའི་དམིགས་སྒོ་མེད་པར་དཀའ་ངལ་འཕྲད་རྒྱུ་རེད་ཅེས་བརྗོད།།

ཟླ་བ་སྔོན་མར་ཀྲུང་གོའི་བོད་ལྗོངས་ཞེས་བའི་གཞུང་འབྲེལ་དྲྭ་ཚིགས་སུ་གནས་ཚུལ་སྤེལ་བར་གཞིགས་ན། རྒྱ་ནག་གི་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་སྟེ་མཚོ་སྔོན་ཞིང་ཆེན་གྱི་རྨ་ལྷོ་ཁུལ། ཐུན་རིན་རྫོང་མེད་པར་བཏང་སྟེ་དེའི་ཚབ་ཏུ་རེབ་གོང་གྲོང་ཁྱེར་ཅན་དུ་བསྒྱུར་དགོས་ལུགས་བཀོད། རྒྱ་གཞུང་གིས་བོད་ས་ཁག་གྲོང་ཁྱེར་ཅན་དུ་བསྒྱུར་རྒྱུའི་གོ་སྐབས་བཟུང་སྟེ་རྒྱ་རིགས་མང་པོ་བོད་ས་ཁག་ལ་གནས་སྤོར་བྱེད་དུ་བཅུག་སྟེ་བོད་པ་ཚོ་རང་ཡུལ་དུ་གྲངས་ཉུང་མི་རིགས་ལ་གྱུར་ནས་བོད་ཀྱི་སྐད་ཡིག་དང་རིག་གཞུང་སོགས་འཛིན་སྐྱོང་སྤེལ་གསུམ་ལ་དོ་ཕོག་གཏོང་རྒྱུ་རེད་ཅེས་སྐད་འཕྲིན་དང་སྤྱི་ཚོགས་དྲྭ་ལམ་ཁག་ཏུ་གླེང་སློང་ཆེན་པོ་བྱེད་ཀྱི་ཡོད་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

Embed share

མཚོ་སྔོན་གྱི་བོད་ས་ཁག་བཞི་ལ་རྒྱ་མི་ཇེ་མང་དུ་གཏོང་འཆར།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:04:18 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།