ངོ་འཕྲད་བདེ་བའི་དྲ་འབྲེལ།

བོད་པ་ཚོས་སྔར་བཞིན་ནད་དུག་ལ་འཛེམ་ཟོན་བྱ་དགོས་པའི་ནན་སྐུལ།


༄༅།། ཕྱི་ཟླ་དང་པོའི་ཚེས་༡༦་ནས་འགོ་འཛུགས་ཀྱིས་རྒྱ་གར་རྒྱལ་ཡོངས་སུ་ཏོག་དབྱིབས་ནད་དུག་སྔོན་འགོག་གི་སྨན་ཁབ་རྒྱག་འགོ་ཚུགས། འདི་ནི་རྒྱ་གར་རྒྱལ་ཡོངས་སུ་ཏོག་དབྱིབས་ནད་དུག་རྩ་མེད་བཟོ་རྒྱུའི་གོམས་སྟབས་དང་པོ་ཡིན་རུང་འཕྲོད་ལས་བྱེད་པ་ཚོས་རྒྱ་གར་ལྟ་བུའི་མི་འབོར་དུང་ཕྱུར་༡༣་ལྷག་ཡོད་པའི་རྒྱལ་ཁབ་ཅིག་ལ་སྤྱི་དམངས་ཀུན་པོར་འགོག་ཁབ་མ་ཐོབ་པར་ཡུན་རིང་འགོར་གྱི་རེད། དེར་བརྟེན་མི་ཚོས་ཏོག་དབྱིབས་ནད་དུག་སྔོན་འགོག་ཆེད་དུ་ཁ་རས་གྱོན་པ་དང་ལག་པ་ཡང་ཡང་བཀྲུ་རྒྱུ། སྤྱི་ཚོགས་རྒྱང་བཀྱེད་སོགས་ཀྱི་ཐབས་ལམ་ཁག་སྔར་བཞིན་ལག་ལེན་བསྟར་དགོས་པའི་ནན་སྐུལ་ཞུས་སོང་། དེ་ཡང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་འགྲེམ་སྤེལ་བྱ་འཆར་ཡོད་པའི་གློ་ནད་གཉན་ཚད་ཊི་བྷིའི་སྙན་ཐོ་དེར་ཏོག་དབྱིབས་རིམས་ནད་སྔོན་འགོག་གི་བྱ་ཐབས་ཁག་ནི་ཊི་བྷི་ཁྱབ་གདལ་འགྲོ་རྒྱུ་སྔོན་འགོག་བྱ་ཐབས་ལའང་ཕན་ཐོགས་ཡོད། ཏོག་དབྱིབས་ནད་དུག་འཇོམས་པའི་རྗེས་སུ་མུ་མཐུད་དུ་ནད་རིགས་སྔོན་འགོག་གི་གོམས་གཤིས་རྣམས་རྒྱུན་འཁྱོངས་བྱ་དགོས་ཞེས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ནད་གཞི་སྔོན་འགོག་ལས་འཆར་གྱི་འགན་འཛིན་བསྟན་འཛིན་སྒྲོལ་དཀར་གྱིས་ལམ་སྟོན་བྱས་འདུག

འཕྲོད་བསྟེན་ལས་ཁུངས་ཀྱིས་འགྲེམ་སྤེལ་བྱ་འཆར་ཡོད་པའི་སྙན་ཐོ་ནི་༢༠༡༢་ལོ་ནས་༢༠༡༩་བར་དུ་རྒྱ་གར་རྒྱལ་ཡོངས་ཀྱི་བོད་པ་བཙན་བྱོལ་བའི་སྤྱི་ཚོགས་སུ་ཊི་བྷི་སྔོན་འགོག་གི་ལས་དོན་སྒྲུབ་མཁན་སྨན་ཁང་གཙོ་བོ་བདུན་གྱིས་ཞིབ་འཇུག་བྱས་པ་ཞིག་ཡིན་ཞིང་། ཕྱི་ལོ་༢༠༡༢་ལོར་ནད་པ་༣༨༧་ཡོད་ཀྱང་ཕྱི་ལོ་༢༠༡༩་ལོར་ནད་པ་༡༨༥་བར་དུ་བརྒྱ་ཆ་༤༠་ཙམ་ཉུང་དུ་ཕྱིན་ཡོད་ཅིང་། སྨན་པ་བློ་བཟང་གིས་ནད་པ་བརྒྱ་ཆ་༤༠་ལྷག་ཉུང་དུ་ཕྱིན་པ་ནི་བོད་པ་བཙན་བྱོལ་བའི་སྤྱི་ཚོགས་སུ་ཊི་བྷིའི་གློ་ནད་ཉུང་དུ་ཕྱིན་པའི་རྟགས་མཚན་རེད། ང་ཚོས་ཊི་བྷིའི་ནད་གཞི་དེ་དངོས་སུ་རྩ་འཇོམས་གཏོང་བར་ཁོར་ཡུག་ལ་གཙང་སྦྲ་དང་རྒྱུན་ལྡན་གྱི་ནད་འགོག་གོམས་གཤིས་རྣམས་འཇགས་རྒྱུ་གནད་འགག་ཆེན་པོ་རེད། ད་ལྟའི་ཆར་ཊི་བྷིའི་ནད་པ་བརྒྱ་ཆ་༤༠་ལྷག་སློབ་གྲྭ་ཁག་ཏུ་འཐོན་བཞིན་འདུག་ཅེས་བཤད།།

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ནད་གཞི་སྔོན་འགོག་ལས་འཆར་གྱི་འགན་འཛིན་བསྟན་འཛིན་སྒྲོལ་དཀར་གྱིས་༢༠༢༠་ལོར་འཛམ་གླིང་ཁྱོན་ཡོངས་སུ་ཏོག་དབྱིབས་ནད་དུག་ཁྱབ་བརྡལ་བྱུང་བའི་རྐྱེན་གྱིས་མང་ཚོགས་ཀྱིས་དོ་སྣང་བྱ་ཡུལ་གཙོ་བོ་ནི་ཏོག་དབྱིབས་ནད་དུག་འབའ་ཞིག་ལ་གྱུར་ནས་འགོས་ནད་གཞན་པ་སྔོན་འགོག་བྱ་རྒྱུ་དེར་འཐུས་ཤོར་ཕྱིན་པ་ལྟར་ཊི་བྷི་སྔོན་འགོག་བྱ་རྒྱུ་དེ་ལའང་འཐུས་ཤོར་ཕྱིན་འདུག ཏོག་དབྱིབས་ནད་དུག་དང་ཊི་བྷི་གཉིས་ལ་ནད་རྟགས་ཧ་ཅང་འདྲ་བོ་ཡོད་པས་ལོ་འདིར་ཏོག་དབྱིབས་ནད་དུག་ལ་བརྟག་དཔྱད་བྱས་པའི་སྐབས་སུ་བཙན་བྱོལ་བོད་མིའི་སྤྱི་ཚོགས་སུ་ཊི་བྷིའི་ནད་པ་མང་པོ་ཡོད་པ་རྩད་གཅོད་ཐུབ་སོང་ཞེས་བསྒྲགས།།

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་ཨ་རིའི་ཇཱོན་ཧོབ་ཀིན་སི་གཙུག་ལག་སློབ་གྲྭ་གཉིས་ཟུང་འབྲེལ་གྱིས་བཙན་བྱོལ་བོད་མིའི་སྤྱི་ཚོགས་སུ་ཊི་བྷིའི་ནད་གཞི་རྩ་མེད་བཟོ་རྒྱུའི་ལས་གཞི་བརྩམས་པར་ལམ་ལྷོངས་ཡོང་བའི་ཆེད་དུ་ཚང་མས་ཏོག་དབྱིབས་ནད་དུག་སྔོན་འགོག་གི་གོམས་གཤིས་རྣམས་རྒྱུན་འཇགས་དང་རྒྱུན་འཁྱོངས་བྱ་དགོས། མི་ལ་ནད་རྟགས་ཐོན་མ་ཐག་ཏུ་བརྟག་དཔྱད་བྱ་དགོས། དེ་བཞིན་རང་གི་ན་ཚ་སྐྱེ་བོ་གཞན་ལ་མི་བགོ་བའི་བྱ་ཐབས་རྣམས་ལག་ལེན་བསྟར་རྒྱུ་ཧ་ཅང་གལ་ཆེན་རེད་ཅེས་གསུངས་ཡོད་པའི་སྐོར། བཞུགས་སྒར་རྡ་རམ་ས་ལ་ནས་ཨ་རིའི་རླུང་འཕྲིན་ཁང་གི་གསར་འགོད་པ་བསྟན་འཛིན་བཟང་མོ་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།


XS
SM
MD
LG