བལ་བོད་ས་མཚམས་ཀྱི་འགྲམ་དང་སྐྱིད་རོང་གི་འགག་སྒོ་བརྒྱབ་པ།

༅།། དེང་སྐབས་ལྷོ་ཨེ་ཤི་ཡར་ཆར་ཞོད་ཀྱི་དུས་སྐབས་ཡིན་པ་དང་ཆུ་ལོག་རྒྱུག་གི་ཡོད་པས་བལ་བོད་ས་མཚམས་ཀྱི་འགྲམ་དང་སྐྱིད་རོང་གི་འགག་སྒོ་གཉིས་བསྐྱར་དུ་སྒོ་བརྒྱབ་ཡོད་ཅིང་། སྐྱིད་རོང་ཕྱོགས་སུ་རི་ཉིལ་བ་དང་ཆུ་ལོག་གིས་གཞུང་ལམ་བསྣུམས་ཏེ་བལ་བོད་བར་གྱི་དོལ་སྐྱེལ་རླངས་འཁོར་རྣམས་འགྲིམ་འགྲུལ་འགགས་ཏེ་དངོས་ཟོག་རྣམས་དུས་ཐོག་ཏུ་འབྱོར་མ་ཐུབ་པར་ལས་ཀ་བ་དང་ཉེ་འཁོར་གྱི་མང་ཚོགས་ལ་དངུལ་དངོས་གཉིས་ཀྱི་གྱོང་གུད་ཕོག་སྟེ་དཀའ་ངལ་འཕྲད་བཞིན་པའི་གནས་ཚུལ་ཐོན་འདུག

ཕྱི་ཚེས་༢༠་ཉིན་བལ་བོད་ས་མཚམས་ཀྱི་འགྲམ་དང་སྐྱིད་རོང་གི་འགག་སྒོ་གཉིས་སྒོ་བརྒྱབ་སྟེ་ས་གནས་མི་མང་ལ་དཀའ་ངལ་འཕྲད་ཀྱི་ཡོད་པ་བལ་བོའི་ཡུལ་མི་ཞིག་དང་བོད་པ་ཞིག་བཅས་མི་གཉིས་ཀྱིས་འདི་ག་རླུང་འཕྲིན་ཁང་གསར་འགོད་པར་གནས་ཚུལ་མཁོ་སྤྲོད་བྱས་བྱུང་། སྐྱིད་རོང་ས་མཚམས་སུ་གཏན་སྡོད་བྱེད་མཁན་བོད་མི་པ་སངས་ཀྱིས་ཟླ་སྔོན་མའི་ཟླ་མཇུག་དེར་སྐྱིད་རོང་གི་འགག་སྒོ་ནས་ཉིན་རེར་དངོས་ཟོག་སྐྱེལ་འདྲེན་བྱེད་པའི་དོལ་སྐྱེལ་རླངས་འཁོར་བཞི་རེ་གཏོང་གི་ཡོད། ད་ལྟ་ཆར་དུས་ལ་ཁེལ་ནས་ཆར་ཞོད་ཅང་ཆེ་བའི་སྟབས་ཀྱིས་རི་ཉིལ་བ་དང་ས་རྡོ་ཉིལ་བ་སོགས་ཀྱིས་གཞུང་ལམ་བཀག་པ་དང་ཏོག་དབྱིབས་ནད་དུག་གིས་ཀྱང་འགྲོ་འོང་བཀག དངོས་ཟོག་མང་པོ་ཞིག་དུས་ཐོག་ཏུ་སྐྱེལ་འདྲེན་དང་ཚོང་འགྲེམ་བྱེད་མ་ཐུབ་པར་འཕྲོ་བརླག་ཏུ་འགྲོ་ཡི་འདུག་ཅེས་བརྗོད་བྱུང་། འགྲམ་གྱི་འགག་སྒོར་ཞོར་ལས་གཉེར་བཞིན་པའི་ཡུལ་མི་ཞིག་གིས་བརྗོད་དོན་ལྟར་ན། འགྲམ་གྱི་འགག་སྒོ་ནས་འདས་བའི་བདུན་ཕྲག་ཁ་ཤས་རིང་དངོས་ཟོག་སྐྱེལ་འདྲེན་གྱི་རླངས་འཁོར་ཁག་ལ་རྟོག་ཞིབ་བྱས་ནས་རིམ་གྱིས་གཏོང་གི་འདུག དེ་རིང་ཕྱི་ཚེས་༢༠་ནས་བཟུང་སྟེ་གཞུང་གི་བཀའ་རྒྱ་ལྟར་ཉུང་མཐར་ཡང་དུས་ཡུན་བདུན་ཕྲག་གཅིག་གི་རིང་ལ་འགྲོ་འོང་བཀག་སྡོམ་བྱས་ནས་འགག་སྒོ་བརྒྱབ་སོང་། ཏོག་དབྱིབས་ནད་དུག་ཁྱབ་གདལ་འགྲོ་བཞིན་པ་ཅུང་ཙམ་མགོ་བོ་མ་འཇོམས་བར་དུ་འགག་སྒོ་འབྱེད་ཀྱི་ཡོད་ས་མ་རེད། ད་ལྟ་འགྲམ་གྱི་འགག་སྒོ་ཡོངས་སུ་སྒོ་བརྒྱབ་འདུག་ཅེས་བརྗོད་སོང་།།

འདི་དང་དུས་མཚུངས་སུ་བལ་ཡུལ་རྒྱལ་ནང་དུ་འདས་བའི་བདུན་ཕྲག་གསུམ་ཡས་མས་ཤིག་ལ་འགྲོ་འོག་བཀག་སྡོམ་ཕྱིར་འཐེན་བྱས་མོད། འོན་ཀྱང་ད་ལྟ་སླར་ཡང་ཏོག་དབྱིབས་ནད་དུག་འགོས་པའི་ནད་པའི་གྲངས་འབོར་༢༠༠༠༠་ལྷག་བརྒལ་ཡོད་པས་བལ་ཡུལ་གཞུང་གིས་ཕྱི་ཚེས་༢༠་ནས་བསྐྱར་དུ་ཛ་དྲག་གི་གཞུང་འབྲེལ་བཀའ་བརྒྱ་བཏང་སྟེ་དུས་ཡུན་བདུན་ཕྲག་གཅིག་གི་རིང་དུ་འགྲོ་འོང་བཀག་སྡོམ་བྱ་རྒྱུའི་ཐག་བཅད། ཁ་སང་ཕྱི་ཚེས་༡༩་ཉིན་བཟའ་བཅའི་ཚོང་ཁང་ཁག་ཏུ་ཉོ་ཆ་རྒྱག་མཁན་མང་ཚོགས་ཧ་ཅང་ཇེ་མང་དུ་སོང་འདུག དེ་རིང་ནས་བཟུང་གཞུང་ལམ་ཡོངས་སུ་འཁྲུལ་འཁོར་གྱི་རིགས་མཐོང་རྒྱུ་མེད་པར་གྱུར་ཡོད་པ་མ་ཟད། ཚོང་ཁང་ཆེ་ཆུང་ཡོངས་རྫོགས་བསྐྱར་དུ་སྒོ་བརྒྱབ། ད་ལོའི་ཕྱི་ཟླ་༣་པ་ནས་བཟུང་སྟེ་ད་ལྟའི་བར་དུ་ཚོང་ལས་གཉེར་མཁན་ཚོས་ཡོང་འབབས་འཚོལ་སྒྲུབ་མ་ཐུབ་པ་དང་ཁང་གླ་ཆེན་པོ་དུས་ཐོག་ཏུ་སྤྲོད་མ་ཐུབ་པར་ཟ་ཁང་དང་ཚོང་ཁང་མང་པོ་སྟོང་པར་བཞག་ཡོད་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

Embed share

བལ་བོད་ས་མཚམས་ཀྱི་འགྲམ་དང་སྐྱིད་རོང་གི་འགག་སྒོ་བརྒྱབ་པ།

by ཝི་ཨོ་ཨེ།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:47 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།