ངོ་འཕྲད་བདེ་བའི་དྲ་འབྲེལ།

ལྷ་སར་ཞོ་སྟོན་དུས་ཆེན་ཚུགས་པ།


༄༅།། བོད་ཀྱི་སྲོལ་རྒྱུན་ལྟར་ཕྱི་ཟླ་༨་ཚེས་༡༩་ནས་རྒྱལ་ས་ལྷ་སར་དངོས་སུ་འབྲས་སྤུངས་དང་སེ་ར་དགོན་པར་ཞོ་སྟོན་དུས་ཆེན་ཚུགས་ཏེ་གོས་སྐུ་བཤམས། དགེ་འདུན་པ་ཚོས་ཁྲུས་གསོལ་དང་རབ་གནས། འབྲས་སྤུངས་གོས་སྐུའི་མདུན་དུ་ལྷ་མོའི་འཁྲབ་གཞུང་གཟིགས་འབུལ་ཞུས་ཏེ་མང་ཚོགས་སྟོང་ཕྲག་མང་པོས་གོས་སྐུ་མཇལ་བཞིན་ཡོད་ཅིང་། རྒྱ་གཞུང་གི་ཉེན་རྟོག་པ་རྣམས་གང་སར་བཀྲམ་ཡོད་པ་བཅས་ཀྱི་བརྙན་ཐུང་ཞིག་མིང་འདོན་བྱེད་འདོད་མེད་པའི་འབྲེལ་ཡོད་བོད་པ་ཞིག་གིས་གནས་ཚུལ་མཁོ་སྤྲོད་བྱས་བྱུང་། དེ་ཡང་གསར་འགྱུར་མཁོ་སྤྲོད་པས་འགྲེལ་བརྗོད་བྱས་པ་ལྟར་ན། དེ་རིང་ཕྱི་ཚེས་༡༩་ཉིན་ནས་ཞོ་སྟོན་འགོ་ཚུགས། ད་ནངས་ཞོགས་པར་འབྲས་སྤུངས་དགོན་པ་དང་སེ་ར་དགོན་པར་གོས་སྐུ་མཇལ་དུ་འཇུག་གི་འདུག གོས་སྐུའི་མདུན་ཐང་དུ་ལྷ་མོ་འཁྲབ་སོང་། སྤྱིར་ད་ལོ་ཏོག་དབྱིབས་ནད་ཡམས་ཀྱིས་གོས་སྐུ་མཇལ་མཁན་མང་ཚོགས་ཚང་མས་ཁ་རས་མ་བརྒྱབ་པར་འགྲོ་ཆོག་གི་མི་འདུག དེ་མ་གཏོགས་མི་ཚོགས་འདུ་འཛོམས་ལ་གྲངས་ཚད་བཀག་སྡོམ་མི་འདུག འོན་ཀྱང་ད་ལོ་སྔོན་དང་མ་འདྲ་བར་ས་ཚིགས་ཁག་ཏུ་དམག་མི་དང་ཉེན་རྟོག་པ་འགྲེམ་འཇོག་བྱ་རྒྱུ་མང་དུ་བཏང་འདུག ད་ནངས་འབྲས་སྤུངས་དང་སེ་རའི་གཡས་གཡོན་གང་སར་ཉེན་རྟོག་པ་མང་པོ་བཀྲམ་སྟེ་དམ་དྲག་བྱེད་ཀྱི་འདུག་ཅེས་འགྲེལ་བརྗོད་གནང་སོང་།།

ཕྱི་ཚེས་༡༩་ནས་ཚེས་༢༥་བར་དུ་ནོར་བུ་གླིང་ཁ་དང་རྫོང་རྒྱབ་ཀླུ་ཁང་། པད་ནག་ལུང་ཤུར་དང་སྟག་གདོང་གྲོང་ཚོ། ལྷ་ཀླུའི་འདམ་ར། ཀྲོང་ཅིའི་ཐང་ཆེན་བཅས་ས་གནས་འདྲ་མིན་ཞིག་ཏུ་ཞོ་སྟོན་གྱི་ལྷ་མོ་འཁྲབ་སྟོན་བྱ་འཆར་འདུག ཡིན་ནའང་ད་ལོ་གནས་ཚུལ་གསར་པ་ཞིག་ལ་ཞོ་སྟོན་རིང་ནོར་བུ་གླིང་ཁར་མི་གྲངས་ཚད་གཞི་བཟོས་འདུག ཉིན་རེར་ས་གནས་མང་ཚོགས་༡༠༠༠༠་དང་ཕྱི་ནས་ཡོང་མཁན་ཡུལ་སྐོར་བ་མི་གྲངས་༥༠༠༠་མ་གཏོགས་གཏོང་མི་ཆོག་པ་བཟོས་འདུག མང་ཚོགས་དང་ལྟ་སྐོར་བ་ཚང་མས་ནོར་བུ་གླིང་ཁར་འཛུལ་བར་ཁ་རས་རྒྱག་དགོས་པ་དང་བདེ་ཐང་གི་ཨང་རྟགས། གྲོང་མིའི་ཐོབ་ཐང་ལག་འཁྱེར་བསྟན་ནས་ནུབ་སྒོའི་ནང་དུ་འཛུལ་དགོས་ཀྱི་འདུག ཞོ་སྟོན་རིང་ནོར་བུ་གླིང་ཁ་ཞོགས་པའི་ཆུད་ཚོད་༩་པ་ནས་དགོང་མོའི་ཆུ་ཚོད་༩་པའི་བར་དུ་སྒོ་འབྱེད་ཀྱི་འདུག པ་སི་འཚོང་བའི་དུས་ཚོད་ཀྱང་ཞོགས་པའི་ཚོུད་༩་པ་ནས་ཕྱི་དྲོའི་ཆུ་ཚོད་༥:༣༠་བར་དུ་རེད་ཅེས་འགྲེལ་བརྗོད་གནང་བྱུང་།།

ད་དུང་ཞོ་སྟོན་རིང་ལྷ་མོ་འཁྲབ་སྟོན་མ་ཡིན་པར་ཟུར་དུ་བྱེད་སྒོ་མང་པོ་ཞིག་སྤེལ་གྱི་འདུག ཕྱི་ཚེས་༢༠་ཉིན་བྱང་གི་རྟ་རྒྱུག་ཐང་ལ་རྟ་རྒྱུག་འགྲན་སྡུར་དང་ཕྱི་ཚེས་༢༠་དང་༢༡་གཉིས་ལ་བྱང་གི་གནམ་མཚོར་གོམ་བགྲོད་། དེ་བཞིན་ཕྱི་ཚེས་༢༠་ནས་༢༥་བར་དུ་འདམ་གཞུང་རྫོང་དང་སྙེ་མོ། འཕན་པོ་ལྷུན་གྲུབ་རྫོང་བཅས་ལ་ཚོང་འདུས་ཆེན་པོ་ཞིག་འཚོགས་ཀྱི་འདུག

ཕྱི་ཚེས་༡༩་ནས་༢༡་བར་དུ་རྫོང་རྒྱབ་ཀླུ་ཁང་དུ་མིག་མངས་འགྲན་སྡུར་བྱེད་ཀྱི་ཡོད་པར་མ་ཟད། ལྷ་སའི་ལས་ཁུངས་ཁག་ཀྱང་ཕྱི་ཟླ་༨་ཚེས་༡༩་ནས་ཕྱི་ཚེས་༢༥་བར་དུ་ཉིན་བདུན་གྱི་རིང་ལ་ཞོ་སྟོན་དུས་ཆེན་གྱི་གུང་སེང་བཏང་འདུག་ཅེས་འགྲེལ་བརྗོད་གནང་སོང་།།

སྤྱིར་ཞོ་སྟོན་ཞེས་པ་ནི་བོད་ཀྱི་ལོ་རྒྱུས་ཡིག་ཆ་ཁག་ཏུ་གསལ་བ་ལྟར་ན། སྟོན་པ་བཅོམ་ལྡན་འདས་ཞལ་བཞུགས་དུས་སུ་རྒྱ་གར་དུ་དགེ་འདུན་པ་རྣམས་དབྱར་གནས་ལ་བཞུགས་པའི་རིང་དུ་ཞོའི་སྟོན་མོ་འབུལ་སྲོལ་ཡོད་པ་ཕྱིས་སུ་བོད་ཀྱི་གདན་ས་སེ་འབྲས་དགའ་གསུམ་ལ་དར་ཞིང་། ༧གོང་ས་ལྔ་པ་ཆེན་པོ་ངག་བློ་བཟང་རྒྱ་མཚོ་དང་རྒྱལ་དབང་སྐུ་ཕྲེང་༡༡་པ། རྒྱལ་དབང་སྐུ་ཕྲེང་༡༣་བཅས་རྒྱལ་དབང་སྐུ་ཕྲེང་གསུམ་གྱི་རིང་དུ་རིམ་བཞིན་ཞོ་སྟོན་ལྷ་མོའི་འཁྲབ་སྟོན་གསར་འཛུགས་དང་འཕེལ་རྒྱས། སྤྱི་ཚོགས་དང་མང་ཚོགས་ཀྱིས་སྤྲོ་སྐྱིད་གཏོང་བའི་རྣམ་པ་མཚོན་པའི་དུས་ཆེན་འཐུས་སྒོ་ཚང་བ་ཞིག་ཏུ་གྱུར། བོད་ཀྱི་ཐུན་མོང་མ་ཡིན་པའི་ལྷ་མོའི་འཁྲབ་སྟོན་ནི་དུས་རབས་༡༤་པར་བྱོན་པའི་གྲུབ་ཆེན་ཐང་སྟོང་རྒྱལ་པོས་སྲོལ་གཏད། དེ་ནས་བཟུང་སྟེ་ལོ་༦༠༠་ལྷག་ལ་དར་ཁྱབ་བྱུང་བའི་བོད་ཀྱི་ལོ་རྒྱུས་ལྡན་པའི་འཁྲབ་གཞུང་ཞིག་ཡིན་འདུག་པའི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།


XS
SM
MD
LG