ངོ་འཕྲད་བདེ་བའི་དྲ་འབྲེལ།

རྒྱ་གར་ལྷོ་ཕྱོགས་སུ་བོད་པ་སེར་སྐྱ་༣༣༤་ཟུར་འགོག


ཐད་ཀར་ཕབ་ལེན་གྱི་དྲ་འབྲེལ།

༄༅།། ཐོག་མར་རྒྱ་ནག་ནས་ཁྱབ་པའི་ཏོག་དབྱིབས་ནད་དུག་སྔོན་འགོག་ཆེད་དུ་རྒྱ་གར་དབུས་དང་ས་གནས་མངའ་སྡེ་གཞུང་། བཙན་བྱོལ་བོད་མིའི་སྒྲིག་འཛུགས་བཅས་ཀྱི་བཀའ་ཁྱབ་ལམ་སྟོན་ལྟར་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཆེ་ཁག་ལྔར་ད་ལྟའི་བར་དུ་ཏོག་དབྱིབས་ནད་དུག་སྔོན་འགོག་གི་ལས་དོན་ཁག་ཇི་ལྟར་སྒྲུབ་བཞིན་ཡོད་མེད་དང་མ་འོངས་པར་གནས་སྟངས་དེ་བས་ཀྱང་ཛ་དྲག་ཅན་དུ་གྱུར་ན་གྲ་སྒྲིག་ཅི་ཙམ་ཡོད་མེད། ད་སྔ་བོད་པ་ཅི་ཙམ་ཟུར་འགོག་བྱས་ཡོད་མེད་བཅས་ལ་ལྷོ་ཕྱོགས་གཞིས་ཆགས་ཁག་ལྔའི་གཞིས་འགོ་རྣམ་པར་བཅར་དྲི་ཞུས་ནས་ཤེས་རྟོགས་བྱུང་བར་གཞིགས་ན། དེ་རིང་ཕྱི་ཚེས་༢༦་བར་དུ་གཞིས་ཆགས་ཁག་ལྔ་དང་དགོན་སྡེ་ཁག་བཅས་སུ་ཁྱོན་བསྡོམས་བོད་པ་སེར་སྐྱ་༣༣༤་ཟུར་འགོག་བྱས་འདུག

མོན་གྷོ་འདོད་རྒུ་གླིང་ལ་མཚོན་ན་ས་གནས་གཞིས་འགོ་ལས་ཁུངས་ཀྱི་སྣེ་ཁྲིད་འོག་མི་མང་དང་དགོན་སྡེ་གྲ་ཚང་ཁག་གི་ལས་སྣེ་སོགས་མཉམ་རུབ་ཀྱིས་ཏོག་དབྱིབས་རིམས་ནད་སྔོན་འགོག་གི་གྲ་སྒྲིག་ཞིབ་ཚགས་བསྒྲུབས་ཡོད་ཅིང་། མི་གྲངས་༢༠༠་ཤོང་བའི་ཟུར་འགོག་བྱ་ཡུལ་ཁག་བཞི་གྲ་སྒྲིག་བྱས་འདུག ད་ལྟའི་ཆར་ཟུར་འགོག་བྱ་ཡུལ་ཁག་གཉིས་ལ་དགའ་ལྡན་དང་འབྲས་སྤུངས་ཀྱི་དགེ་འདུན་པ་དང་མི་མང་བཅས་ཁྱོན་བསྡོམས་སེར་སྐྱ་མང་ཚོགས་༡༦༤་ཟུར་འགོག་བྱས་ཡོད་ཅེས་མོན་གྷོ་འདོད་རྒྱུ་གླིང་གི་ས་གནས་འགོ་འཛིན་ལྷག་པ་ཚེ་རིང་ལགས་ཀྱིས་འགྲེལ་བརྗོད་གནང་སོང་།།

ཀོ་ལི་གྷལ་དོན་ལྡན་གླིང་གཞིས་ཆགས་ཀྱི་སློབ་ཕྲུག་རྣམས་གུང་སེང་ལ་ལེན་དུ་ཕྱིན་ཏེ་ཚུར་འཁོར་བའི་ཕ་མ་དང་ཕྲུ་གུ་བཅས་མི་༨༥་དང་ཨ་རི་ནས་འབྱོར་བའི་བོད་པ་གཉིས་བཅས་ཁྱོན་བསྡོམས་མི་༨༧་ཟུར་འགོག་བྱས་ཡོད་པ་འགྲེལ་བརྗོད་གནང་སོང་།

ཧུན་སུར་སུར་རབ་རྒྱས་གླིང་གཞིས་ཆགས་སུ་རྫོང་ཆོས་གྲྭ་ཚང་དུ་མི་༣་དང་རྒྱུད་སྨད་གྲྭ་ཚང་དུ་མི་༥་བཅས་ཁྱོན་བསྡོམས་མི་༨་ཟུར་འགོག་བྱས་ཡོད་ཀྱང་ད་སྔ་མི་སྐྱ་གནས་ཡུལ་གཞིས་ཆགས་ནང་དུ་མི་མང་ཟུར་འགོག་བྱེད་ཡོད་པ་བྱུང་མེད་པ་དང་། ཧུན་སུར་གཞིས་ཆགས་སུ་ཏོག་དབྱིབས་རིམས་ནད་སྔོན་འགོག་གི་ལས་དོན་ཇི་ལྟར་སྒྲུབ་བཞིན་ཡོད་མེད་བཅས་ལ་གཞིས་འགོ་ཐུབ་བསྟན་ལགས་ཀྱིས་འགྲེལ་བརྗོད་གནང་སོང་།

སྦེལ་ཀོབ་བོད་མིའི་གཞིས་ཆགས་སུ་ཏོག་དབྱིབས་རིམས་ནད་སྔོན་འགོག་གི་ལས་དོན་ཇི་ལྟར་སྤེལ་གྱི་ཡོད་མེད་ལ་སྦེལ་ཀོབ་ལུགས་བསམ་ས་གནས་འགོ་འཛིན་ཐུབ་བསྟན་ཚེ་རིང་ལགས་སུ་བཅར་འདྲི་ཞུས་པ་དང་ཕྱི་ནས་ཕེབས་མཁན་ཚོར་འཕྲོད་བསྟེན་བརྟག་དཔྱད་དང་ཟུར་འགོག་གི་མཐུན་རྐྱེན་ཅི་ཙམ་ཡོད་མེད་བཅས་སྦེལ་ཀོབ་འཚོ་བྱེད་སྨན་ཁང་གི་འགན་འཛིན་རིག་འཛིན་རྣམ་རྒྱལ་ལགས་སུ་བཅར་དྲི་ཞུས་ཤིང་། སེར་ར་ཐེག་ཆེན་གླིང་གི་གྲྭ་ཚང་བྱེས་སྨད་གཉིས་ཀྱིས་ཟུར་འགོག་ཁང་གྲ་སྒྲིག་གིས་ད་ལྟའི་ཆར་མི་༨༠་ཡས་མས་ཤིག་ཟུར་འགོག་བྱས་ཡོད་ཅེས་སེར་སྨད་གྲྭ་ཚང་གི་དགེ་བསྐོས་དགེ་བཤེས་དགེ་ལེགས་ལགས་ཀྱིས་འགྲེལ་བརྗོད་གནང་སོང་།

དེང་སྐབས་ལྷོ་ཕྱོགས་དགོན་སྡེ་ཁག་དང་གྲྭ་ཚང་ཁག་ལ་ཕྱི་མི་རྣམས་མཆོད་མཇལ་སོགས་ལ་གཏོང་གི་མེད་པ་དང་ཆབས་ཅིག དགེ་འདུན་པ་རྣམས་ཀྱི་ཚོགས་དང་ཆོས་ར། དཔེ་ཁྲིད་སོགས་ཀྱང་ཡོངས་རྫོགས་སུ་མཚམས་འཇོག་བྱས་ནས་ཕྱི་ལ་ཕེབས་མི་ཆོགས་པར་རང་ཤག་ཏུ་དཔེ་ཆ་བློ་འཛིན་དང་སྐྱོར་སྦྱོང་གནང་སྟེ་བཞུགས་འདུག ལྷོ་ཕྱོགས་གཞིས་ཆགསས་ཁག་ལ་མཚོན་ན་བཟའ་བཅའ་དང་སྔོ་ཚོད་སོགས་ཀྱི་ཚོང་ཁང་རྣམས་སྒོ་འབྱེད་ཆོག་གི་ཡོད་པ་ལས། དེ་མིན་ཚོང་རིགས་སྡེ་ཚན་དང་ལས་ཁུངས་ཁག་གནས་སྐབས་རིང་སྒོ་བརྒྱབ་སྟེ་ཕར་ཚུར་འགྲོ་འོང་བྱེད་མཁན་ཧ་ཅང་ཉུང་དུ་ཕྱིན་ཡོད་པ་སོགས་ཀྱི་སྐོར། རྒྱ་གར་ལྷོ་ཕྱོགས་ནས་ཨ་རིའི་རླུང་འཕྲིན་ཁང་གི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

XS
SM
MD
LG