བལ་ཡུལ་གཞུང་གིས་མི་དམངས་ལ་འགྲོ་འོང་བཀག་སྡོམ།

Embed share

བལ་ཡུལ་གཞུང་གིས་མི་དམངས་ལ་འགྲོ་འོང་བཀག་སྡོམ།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:53 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།

༄༅།། དེང་སྐབས་འཛམ་གླིང་ཡོངས་སུ་རྒྱ་ནག་གི་ཝུ་ཧན་གྲོང་ཁྱེར་ནས་བྱུང་བའི་ཏོག་དབྱིབས་རིམས་ནད་ཁྱབ་ཀྱི་ཡོད་པའི་རྐྱེན་གྱིས་བལ་ཡུལ་གྱི་རྒྱལ་ས་ཀ་ཐ་མན་དྷུ་གྲོང་ཁྱེར་གྱི་ཟ་ཁང་དང་ཚོང་ཁང་རྣམས་སྒོ་བརྒྱབ། མི་རེ་ཟུང་འགྲོ་འོང་བྱེད་བཞིན་པ་རྣམས་ཀྱང་དམག་མིས་བཀག་སྡོམ་དང་ཉིན་མཚན་གཉིས་ལ་དོགས་ཟོན་ནན་མོ་བྱེད་བཞིན་འདུག

ཟླ་འདིའི་ཕྱི་ཚེས་༢༢་ཉིན་ནས་བཟུང་སྟེ་འདི་ག་བལ་ཡུལ་གྱི་རྒྱལ་ས་ཀ་ཐ་མན་དྷུའི་གཞུང་གིས་བཀོད་ཁྱབ་བཏང་ནས་བཀག་སྡོམ་བྱེད་འགོ་ཚུགས། ཕྱི་ཚེས་༢༥་ཉིན་ནས་དམིགས་བསལ་གྱིས་བཀག་སྡོམ་བྱ་རྒྱུ་ཤུགས་ཆེ་རུ་བཏང་སྟེ་གཞུང་ལམ་དང་ཁྲོམ་ལམ་སོགས་ནི་མི་མེད་ལུང་སྟོང་ལྟ་བུ་ཞིག་ཏུ་གྱུར་སོང་། གསར་འགོད་པས་བོད་པ་སྐྱབས་བཅོལ་བ་འདུས་སྡོད་ཀྱི་ས་གནས་འཕགས་པ་ཤིང་ཀུན་ཕྱོགས་སུ་གནས་སྟངས་གང་འདྲ་ཡིན་མིན་འབྲེལ་ཡོད་མི་སྣ་ཞིག་ལ་བཅར་འདྲི་ཞུས། ཁོང་གིས་ང་ནི་ཞོགས་པ་ནམ་མ་ལངས་གོང་གི་ཆུ་ཚོད་ལྔ་པ་ནས་སྐོར་བ་རེ་འགྲོ་བཞིན་ཡོད། འཕགས་ཤིང་མཆོད་རྟེན་མཐའ་རུ་དམག་མིས་སྐོར་སྲུང་ནན་མོ་བྱས་ནས་བསྡད་ཡོད་པར་མ་ཟད། འཕྲུལ་རྟ་དང་རླངས་འཁོར་ལྟ་ཞོག ཐ་ན་སྐོར་བ་འགྲོ་མཁན་རྣམས་ཀྱང་བཀག་འགོག་བྱེད་བཞིན་འདུག དམག་མིས་བརྗོད་དོན་གཙོ་བོ་ནི་མི་རྣམས་རང་ཁྱིམ་དུ་འཛུལ་ནས་འདུག་དགོས། ཕྱི་ལོགས་སུ་འགྲོ་འོང་བྱེད་མི་ཉན་པ་དང་མི་མང་སྤྱི་ཡོངས་ཀྱི་བདེ་ཐང་གི་ཆེད་དུ་ཡིན་པས་ཚང་མས་ཕྱར་བ་གྲུ་འདེགས་བྱ་དགོས་པའི་བཀོད་འདོམས་བྱེད་ཀྱི་འདུག གལ་སྲིད་དམག་མིར་ཁ་ལན་སློག་མཁན་དང་རྩོད་པ་རྒྱག་མཁན་བྱུང་ན་དེ་ལ་རྒྱུག་རྡུང་བྱེད་ཀྱི་འདུག དེར་བརྟེན་ང་ནི་རང་ཁྱིམ་དུ་ཕྱིར་ལོག་བྱས་ནས་བསྡད་ཡོད་ཅེས་བརྗོད་སོང་།

འདི་དང་དུས་མཚུངས་སུ་མཆོད་རྟེན་ཆེན་མོ་བྱ་རུང་ཁ་ཤོར་གྱི་མཐའ་འཁོར་དུའང་ཟླ་འདིའི་ཕྱི་ཚེས་༢༣་ཉིན་གྱི་དགོང་མོ་ནས་བཟུང་སྟེ་དངོས་སུ་ཕྱི་མི་གཅིག་ཀྱང་ཡོང་མི་ཆོག་ཅེས་བཀོད་པའི་སྦྱར་ཡིག་མཐོང་རྒྱུ་ཡོད་པ་དང་གཞུང་ལམ་ཁག་དང་ཁྲོམ་ལམ་བཅས་སུ་དམག་མས་སྐོར་གཡེང་བྱས་ནས་བསྡད་འདུག

གཞན་ཡང་རྒྱལ་སའི་ཕྱོགས་སུ་བསྐྱོད་དེ་ཕྱིར་ལོག་བྱས་མ་ཐག་པའི་བོད་པ་ཞིག་གིས་དུས་རྒྱུན་རྒྱལ་སའི་དཀྱིལ་དབུས་ཀྱི་མི་ཚོགས་འདུ་འཛོམས་ཆེ་ཡུལ་དུ་གཞུང་གི་དམག་མི་ཕོན་ཆེན་ཞིག་བཀྲམ་འདུག་ཅེས་འགྲེལ་བརྗོད་བྱས་སོང་། བལ་ཡུལ་གཞུང་གིས་འགྲིམ་འགྲུལ་དང་ཚོང་ལས་སོགས་འགོག་གི་ཡོད་པའི་ཐད་དུ་བལ་ཡུལ་དོན་གཅོད་ཚུལ་ཁྲིམས་རྒྱ་མཚོ་ལགས་ཀྱིས་བརྗོད་དོན་ལྟར་ན། ད་ལྟའི་ཆར་མི་མང་ཚང་མ་རང་ཁྱིམ་དུ་འཛུལ་ནས་འཕྲོད་བསྟེན་ལ་གཟབ་དགོས། འདི་ནི་གལ་འགངས་ཆེན་པོ་ཡིན་། ཉིན་ཤས་གོང་ནས་ས་གནས་འགོ་འཛིན་ཚང་མར་དབུས་ནས་ཕེབས་པའི་བཀའ་རྒྱ་དང་མང་ཚོགས་ལ་ཏོག་དབྱིབས་རིམས་ནད་འདིར་གཟབ་ནན་བྱ་དགོས་ཞེས་མ་གོ་མ་ཐོས་མེད་པར་གསལ་བསྒྲགས་སྤེལ་ཟིན། ད་ལྟ་ལས་ཁུངས་ཁག་ཡོངས་སུ་སྒོ་བརྒྱབ་ཡོད་ཀྱང་དྲྭ་རྒྱ་བརྒྱུད་ནས་ལས་བྱེད་པ་ཚོ་ཕན་ཚུན་འབྲེལ་བ་ཟམ་མ་ཆད་པར་ཡོད། མང་ཚོགས་འདུས་སྡོད་ཀྱི་ས་གནས་ཁག་གི་གནས་སྟངས་ལ་དཀའ་ངལ་འཕྲད་ཀྱི་ཡོད་མེད་སོགས་དོན་གཅོད་ལས་ཁུང་དང་གངས་ཅན་བདེ་རྩ། ས་གནས་གཞི་ལས་ཁང་བཅས་ཐུན་མོང་གི་ཚོགས་ཆུང་བཙུགས་ནས་ལྟ་རྟོག་ཞིབ་ཚགས་བྱས་དང་བྱེད་བཞིན་ཡོད། ད་དུང་བོད་པའི་སློབ་གྲ་ཁག་དང་རྒན་གསོ་ཁང་བཅས་པ་སྒོ་བརྒྱབ་ནས་མིས་འགྲོ་འོང་བྱ་རྒྱུ་མཚམས་བཞག་ཡོད་། མང་ཚོགས་ཚང་མས་གནས་ཡུལ་རྒྱལ་ཁབ་དང་རང་གཞུང་གི་བཀའ་རྒྱ་གཞིར་བཟུང་ལྟར་ལག་ལེན་བསྟར་དགོས་བའི་འབོད་སྐུལ་ཞུ་བཞིན་ཡོད་ཅེས་བརྗོད་ཡོད་པའི་སྐོར།

བལ་ཡུལ་ནས་འདི་ག་རླུང་འཕྲིན་ཁང་གི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།