ངོ་འཕྲད་བདེ་བའི་དྲ་འབྲེལ།

བལ་ཡུལ་གྱི་རྒྱལ་སའི་ཉེ་འཁོར་དུ་ས་འགུལ་བརྒྱུགས་པ།


༄༅།། དེ་རིང་སྤྱི་ཟླ་༩་པའི་ཚེས་༡༦་གི་ཐོ་རངས་ཀྱི་ཆུ་ཚོད་༥་པའི་མཚམས་སུ་བལ་ཡུལ་ལ་གློ་བུར་དུ་ས་འགུལ་བརྒྱུགས་ཏེ་མི་མང་ལ་དངངས་སྐྲག་ཆེན་པོ་བྱུང་ཡོད་ཅིང་། རོ་ཡེ་ཊར་གསར་འགྱུར་ལས་ཁང་སོགས་ཀྱིས་གནས་ཚུལ་སྤེལ་བ་ལྟར་ན། ད་ཐེངས་ཀྱི་ས་འགུལ་རྒྱུག་ཡུལ་གཙོ་བོ་ནི་རྒྱལ་ས་ཀ་ཐ་མན་རྡུ་ནས་སྤྱི་ལེ་༥༠་ཡས་མས་མཚམས་སུ་ཁེལ་ཡོད་པ་སྟེ། བོད་དང་བལ་ཡུལ་གྱི་ས་མཚམས་ནས་རྒྱང་ཐག་སྤྱི་ལེ་༣༠་ཙམ་གྱི་མཚམས་སུ་ཆགས་པའི་བལ་ཡུལ་གྱི་སིན་ངྷིལ་པལ་ཅོག་གི་རམ་ཆཱེ་ཞེས་བའི་ས་གནས་ཡིན་པ་དང་ས་ཡོམ་འགུལ་ཚད་༦་བྱུང་སྟེ་རྒྱལ་ས་ཀ་ཐ་མན་རྡུ་གྲོང་ཁྱེར་དུའང་གཡོ་འགུལ་ཐེབས་འདུག

གསར་འགོད་པས་རམ་ཆཱེ་ས་གནས་ཀྱི་ཡུལ་མི་ཞིག་ལ་ས་ཡོམ་སྐོར་བཅར་འདྲི་ཞུས་པར་མི་དེས་རང་གི་ས་གནས་དེར་ཐོ་རངས་ཆུ་ཚོད་༥་དང་སྐར་མ་༡༩་སྟེང་དུ་ས་འགུལ་ཆེན་པོ་ཞིག་བརྒྱུགས་སོང་། དེ་ནས་ཆུ་ཚོད་༦་དང་སྐར་མ་༡༠་ཡས་མས་ཤིག་ལ་སླར་ཡང་ས་འགུལ་ཆུང་ཆུང་ཞིག་བརྒྱུགས་སོང་། ད་ནངས་ཞོགས་པར་ས་འགུལ་སྔ་ཕྱི་ཐེངས་གཉིས་བརྒྱུགས་ཀྱང་ད་སྔ་མི་ལ་སྲོག་སྐྱོན་བྱུང་ཡོད་པའི་གནས་ཚུལ་འདྲ་གོ་ཐོས་མི་འདུག འོན་ཀྱང་མི་མང་ལ་དངངས་སྐྲག་ཆེན་པོ་ཞིག་བྱུང་སྟེ་ཁྱིམ་དུ་འདུག་མ་ཕོད་པར་ཕྱི་ལ་འབྲོ་དགོས་བྱུང་འདུག་ཅེས་བཤད།།

གསར་འགོད་པའི་བཅར་འདྲི་ཞུ་ཡུལ་དེས་ད་ནངས་ཞོགས་པར་ང་ཚོ་གཉིད་ཁུག་བཞིན་པའི་སྐབས་སུ་གློ་བུར་ཏུ་ས་འགུལ་བརྒྱུགས་པས་བཟའ་མི་ཀུན་ལ་དངསས་སྐྲག་ཆེན་པོ་བྱུང་ཡོད་པར་མ་ཟད། ཁང་བའི་ཕྱི་ལོགས་ལ་བྲོས་ནས་ཆུ་ཚོད་ཁ་ཤས་རིང་བསྡད་པ་ཡིན། ང་ཚོ་ལྟར་ཁྱིམ་མཚེས་ཚང་མ་རང་རང་གི་ཁང་པའི་ཕྱི་ལོགས་སུ་བྲོས་ནས་བསྡད་འདུག ས་འགུལ་རྒྱུག་མ་ཐག་ཏུ་བལ་ཡུལ་དྲྭ་དམངས་ཚོས་རང་རང་གི་དྲྭ་རྒྱའི་རྒྱབ་ལྗོངས་སོགས་སུ་ས་འགུལ་སྐོར་གྱི་འདྲ་པར་དང་སྐྲག་སྣང་གི་སེམས་ཚོར་ཅི་བྱུང་རྣམས་བཀོད། དེ་སྔ་༢༠༡༥་ལོའི་ཕྱི་ཟླ་༤་པའི་ཚེས་༢༥་ཉིན་བལ་ཡུལ་ས་ཡོམ་འགུལ་ཚད་༧་༨་ཅན་ཞིག་བྱུང་སྟེ་མི་རྒྱུ་གཉིས་ཀར་གོད་ཆག་ཆེན་པོ་ཕོག་ཡོད་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།


XS
SM
MD
LG