༄༅།། རྒྱ་ནག་གི་འཕེལ་རྒྱས་ཀྱི་འབྱུང་རྩ་ནི་སྒེར་གཉེར་ཁེ་ལས་ཁག་ལ་ཐུག་ཡོད་ཀྱང་ཞིས་ཅིན་ཕིང་གི་དབང་སྒྱུར་འོག་ཏུ་རྒྱ་ནག་དམར་ཤོག་ཚོགས་པར་ཚོང་ལས་ཀྱི་རིགས་ལ་མཐར་ཐུག་གི་ཐག་གཅོད་བྱེད་ཆོག་པའི་དབང་ཚད་ཡོད་ཅིང་། ༢༠༡༢་ལོར་ཞིས་ཅིན་ཕིང་གིས་སྲིད་དབང་བཟུང་བའི་དུས་སུ་རྒྱ་ནག་གི་དཔལ་འབྱོར་འཕེལ་རྒྱས་གྲུབ་འབྲས་རྣམས་སྒེར་གྱི་ཁེ་ལས་ཁག་གི་གྲུབ་འབྲས་ཡིན་པ་མིག་གིས་མཐོང་རུང་ཁོ་པས་གཞུང་གཉེར་ཁེ་ལས་ཁག་གཙིགས་སུ་འཛིན་དགོས་པའི་ཨུ་ཚུགས་བརྒྱབ། སྐབས་དེར་རྒྱ་ནག་གི་ཚོང་ལས་བརྒྱ་ཆ་༥༠་ཐམ་པ་སྒེར་གཉེར་ཁེ་ལས་ཁག་ཡིན་པ་དང་རྒྱ་ནག་ནང་ཁུལ་དུ་མ་རྩ་འཛུགས་མཁན་བརྒྱ་ཆ་༧༥་ལ་སྒེར་གྱི་བཟོ་ཚོང་ལས་ཁང་ཁག་ཡིན་རུང་ཞིས་ཅིན་ཕིང་གིས་རྒྱ་ནག་གི་སྲིད་ཇུས་ཀྱི་ཁ་ཕྱོགས་ལ་གོ་ནོར་ཐེབས་ས་མེད་པའི་འགྱུར་བ་བཏང་བས་༢༠༡༢་ནས་བཟུང་སྟེ་རྒྱ་ནག་གི་གཞུང་གཉེར་ཁེ་ལས་ཁག་བསྐྱར་དུ་དར་སྟོབས་ཤུགས་རྒྱས་ནས་སྒེར་གཉེར་ཁེ་ལས་ཁག་གི་སྟོབས་ཤུགས་ཉམས་འགོ་ཚུགས་འདུག་ཅེས་ཨ་མི་རི་ཀའི་དཔལ་འབྱོར་རིག་པའི་ཉམས་ཞིབ་པ་ལཱར་ཌི་ཞེས་པ་ཞིག་གིས་ཞིབ་འཇུག་སྙན་ཐོན་བཏོན་འདུག
མའོ་ཙེ་ཏུང་གི་དུས་སྐབས་ནས་རྒྱ་ནག་གི་གཞུང་གཉེར་ཁེ་ལས་ཁག་གིས་རྒྱལ་ཁབ་ཀྱི་དཔལ་འབྱོར་ཁ་ལོ་བསྒྱུར། རྒྱ་ནག་དམར་ཤོག་ཚོགས་པས་དཔལ་འབྱོར་ལས་རིགས་ལ་ཐད་ཀར་སྟངས་འཛིན་བྱ་རྒྱུ་མཚམས་བཞག་མྱོང་མེད། འདས་པའི་ལོ་བཅུ་ཕྲག་གཅིག་ལྷག་གི་རིང་ལ་རྒྱ་ནག་དམར་ཤོག་ཚོགས་པས་སྒེར་གྱི་ཁེ་ལས་ཁག་ལ་ཐེ་གཏོགས་བྱ་རྒྱུ་མཚམས་བཞག་མེད་པར་མ་ཟད། ཞིས་ཅིན་ཕིང་གི་ལས་དུས་ཐེངས་དང་པོའི་སྐབས་སུ་རྒྱ་ནག་གཞུང་གིས་སྤྱི་སྒེར་གཉིས་ཀྱི་ཁེ་ལས་ལ་ཐེ་གཏོགས་ཆེན་པོ་བྱེད་ཐུབ་པའི་འགྱུར་བ་ཆེན་པོ་ཞིག་བཏང་སྟེ་རྒྱ་ནག་དམར་ཤོག་ཚོགས་པས་སྒེར་གྱི་ཁེ་ལས་ཁག་ལ་སྟངས་འཛིན་བྱེད་ཐུབ་པའི་ནུས་པ་ཆེ་རུ་སོང་འདུག རྒྱལ་སྤྱིའི་སྤྱི་ཚོགས་ཀྱིས་ཞིས་ཅིན་ཕིང་གིས་སྒེར་གྱི་ཁེ་ལས་ཁག་ལ་ཐེ་གཏོགས་དང་སྟངས་འཛིན་བྱེད་ཀྱི་ཡོད་པར་བློ་འཚབ་ཆེན་པོ་བྱེད་ཀྱི་ཡོད་པས་ཨ་མི་རི་ཀས་༢༠༡༩་ལོའི་མགོ་སྟོད་ནས་ཧྭ་ཝེ་བརྡ་འཕྲིན་བཟོ་ཚོང་ཁང་རྒྱ་གཞུང་གི་སྟངས་འཛིན་འོག་ཏུ་འདུག རྒྱ་གཞུང་གིས་བཀོད་འདོམས་འོག་ཏུ་ཧྭ་ཝེ་བརྡ་འཕྲིན་བཟོ་ཚོང་ཁང་གིས་སོ་མྱུལ་བྱས་ནས་ཨ་མི་རི་ཀ་དང་ནུབ་ཕྱོགས་ཀྱི་དམངས་གཙོའི་རྒྱལ་ཁབ་ཁག་གི་གསང་བའི་གནས་ཚུལ་རྐུ་འཁྱེར་བྱས་མེད་པའི་དཔང་རྟགས་སྟོན་དགོས་ཞེས་འཚིར་འགོ་ཚུགས། ཨ་མི་རི་ཀའི་གཞུང་གིས་རྒྱ་ནག་གི་འགོ་ཁྲིད་ཚོས་སྒེར་གྱི་ཁེ་ལས་ཁག་ལ་གོ་རིམ་ལྡན་སྒོ་ནས་ཐེ་གཏོགས་བྱེད་ཀྱི་ཡོད་པས་ཧྭ་ཝེ་བརྡ་འཕྲིན་བཟོ་ཚོང་ཁང་གིས་རྒྱ་ནག་གཞུང་གི་དགོས་མཁོ་བསྒྲུབས་ཡོད་ཅེས་སྒྲུབ་བྱེད་བཀོད། ༢༠༡༧་ལོར་རྒྱ་ནག་གི་རྒྱལ་ཡོངས་གསང་བའི་ལས་དོན་གྱི་བཅའ་ཁྲིམས་ཞེས་པ་ཞིག་གཏན་ལ་ཕབ། བཅའ་ཁྲིམས་དེར་ཚོགས་པ་དང་སྒེར་པ་ཐམས་ཅད་ཀྱིས་རྒྱལ་ཁབ་ཀྱི་གསང་བའི་ལས་དོན་ལ་མཉམ་འབྲེལ་བྱ་དགོས་ཞེས་འཁོད་པས་རྒྱ་ནག་གི་ཁྲིམས་ལུགས་ནང་དུ་སྒེར་པ་ཚོས་སྲིད་གཞུང་གི་བཀོད་འདོམས་ལ་མཉན་དགོས་པའི་ཁྲིམས་བཟོས་འདུག འདི་ནི་རྒྱ་ནག་གི་སྒེར་གཉེར་ཁེ་ལས་ཁག་གིས་ནུབ་ཕྱོགས་རྒྱལ་ཁབ་ཀྱི་སྲིད་གཞུང་ཁག་ལ་འབྲེལ་བ་བཟུང་ན་རྒྱ་ནག་གཞུང་དགའ་མོས་མེད་པའི་རྟགས་མཚན་རེད་ཅེས་བསྟན།
ཞིས་ཅིན་ཕིང་གིས་ལན་ཁག་སྣ་ཚོགས་ཤིག་དཀྲིས་ནས་ཨ་མི་རི་ཀ་དང་ཡུ་རོབ་མཉམ་འབྲེལ་གྱི་འཕྲུལ་རིག་ལག་རྩལ་གྱི་བཟོ་ཚོང་ལས་ཁང་ཁག་གིས་རྒྱ་ནག་གི་ཁྲོམ་རའི་ཡོང་དུ་ཚོང་ལས་གཉེར་རྒྱུ་གང་ཐུབ་ཀྱིས་བཀག་མོད། འོན་ཀྱང་རྒྱ་ནག་འཕྲུལ་རབས་ལྔ་པའི་བརྡ་འཕྲིན་མ་ལག་ཨ་མི་རི་ཀ་དང་ཨོ་གླིང་། ཡུ་རོབ་མཉམ་འབྲེལ་སོགས་ལ་ཁྱབ་སྤེལ་གང་ཐུབ་གཏོང་གི་ཡོད་པས་ནམ་ཞིག་ཨ་མི་རི་ཀ་དང་ནུབ་ཕྱོགས་རྒྱལ་ཁབ་ཁག་གི་བརྡ་འཕྲིན་གྱི་ལས་རིགས་མཐའ་དག་རྒྱ་ནག་གི་སྟངས་འཛིན་འོག་ཏུ་འཆར་སྲིད་པའི་ཉེན་ཀ་ཡོད་ཅིང་། དེས་ན་ཨ་རིའི་སྲིད་འཛིན་ཌོ་ནལ་ཊམ་གྱིས་རྒྱ་ནག་གི་འཕྲུལ་རབས་ལྔ་པའི་བརྡ་འཕྲིན་མ་ལག་ཨ་མི་རི་ཀ་དང་ཡུ་རོབ་མཉམ་འབྲེལ། ཨོ་གླིང་དང་ནེའུ་ཛི་ལན་ཌི། ཉི་ཧོང་དང་ཐེ་ཝན། རྒྱ་གར་སོགས་ཀྱི་ཁྲོམ་རའི་ནང་དུ་འགོག་དགོས་པའི་སྐུལ་ལྕག་གཏོང་གི་ཡོད་ཀྱང་རྒྱ་གར་སོགས་ཀྱིས་རང་གི་དགོས་མཁོའི་ཆེད་དུ་རྒྱ་ནག་གི་འཕྲུལ་རིག་ལ་བརྟེན་དགོས་ཐུག་ཅིང་། དབྱིན་ཇི་དང་འཇར་མན་ཎི་སོགས་ཡུ་རོབ་རྒྱལ་ཁབ་ཁག་ཅིག་གིས་ཀྱང་རྒྱ་ནག་གི་འཕྲུལ་རབས་ལྔ་པའི་བརྡ་འཕྲིན་མ་ལག་ལ་བརྟེན་དགོས་ཐུག་གི་ཡོད་པ་རེད། ཨ་རིའི་གཞུང་གིས་རྒྱ་ནག་གཞུང་གིས་ཧྭ་ཝེ་བརྡ་འཕྲིན་བཟོ་ཚོང་ཁང་ལ་ནུབ་ཕྱོགས་རྒྱལ་ཁབ་ཁག་གི་གློག་དང་ཆུ། རྒྱ་ལམ་འགྲིམ་འགྲུལ་སྟངས་འཛིན་གློག་སྒྲོན་བཅས་པ་འཁྲུབ་ཐེབས་སུ་བཅུག་སྟེ་ཟིང་ཆ་སློང་ཐུབ། གྲོང་ཁྱེར་ཁག་གི་མི་མང་ས་ཡ་མང་པོར་འཐུང་ཆུ་ཁོགས་ཞེས་བཀའ་བཏང་ན་རྒྱ་ནག་གི་སྒེར་གཉེར་བཟོ་ཚོང་ལས་ཁང་གཅིག་གིས་ཀྱང་རྒྱ་ནག་གཞུང་ལ་མིན་ཟེར་མི་ཕོད་ཅེས་རྒྱུ་མཚན་བགྲངས།
རྒྱ་ནག་གི་གཞུང་གཉེར་དང་སྒེར་གཉེར་ཁེ་ལས་ཁག་ལ་ཁྱད་པར་ཆེན་པོ་ཞིག་མེད། རྒྱ་ནག་གི་སྒེར་གཉེར་ཁེ་ལས་ཁག་གི་ཉིན་རེའི་འཛིན་སྐྱོང་ལའང་རྒྱ་ནག་གཞུང་གིས་ཐེ་གཏོགས་བྱ་རྒྱུ་མཚམས་འཇོག་མི་འདུག དཔེར་ན་རྒྱ་ནག་གི་སྒེར་གཉེར་ཁེ་ལས་རེའི་ནང་དུ་དམར་ཤོག་ཚོགས་པའི་ལས་སྣེ་རེའི་གདན་ཐོབ་ཡོད་པས་རྒྱ་ནག་གི་སྒེར་གཉེར་ཁེ་ལས་ཁག་གིས་ཐག་གཅོད་ཆེན་པོ་ཅི་ཞིག་བྱས་ཀྱང་དམར་ཤོག་ཚོགས་པའི་འཐུས་མི་དེའི་ཤུགས་རྐྱེན་འོག་ནས་ཐར་དཀའ། ཉམས་ཞིབ་པ་ཞིག་གིས་རྒྱ་ནག་གི་ནང་ཁྲིམས་དང་འཛིན་སྐྱོང་གི་སྒྲིག་གཞི། དངོས་སུ་མ་བསྒྲགས་པའི་སྒྲིག་ཁྲིམས་དང་དམར་ཤོག་ཚོགས་པའི་ནང་ཁུལ་གྱི་ཐག་གཅོད་བཅས་ཀྱིས་ཅི་ཞིག་གཞུང་གཉེར་དང་ཅི་ཞིག་སྒེར་གཉེར་ཡིན་པ་དབྱེ་མཚམས་གཅོད་དཀའ་ཞེས་བཤད། འོ་ན་རྒྱ་ནག་གཞུང་གིས་སྒེར་གཉེར་ཁེ་ལས་དེར་སྟངས་འཛིན་བྱས་ཡོད་དམ་ཞེ་ན་མིག་ལྔའི་གནས་སྟངས་འོག་ཏུ་དབྱེ་བ་གསལ་པོ་ཞིག་འབྱེད་ཐུབ་རྒྱུ་ཤིན་ཏུ་དཀའ། མདོར་ན་རྒྱ་ནག་གི་གཞུང་གཉེར་ཁེ་ལས་གང་ཡིན་དང་སྒེར་གཉེར་ཁེ་ལས་གང་ཡིན་གྱི་ཁྱད་པར་ནི་ཞིས་ཅིན་ཕིང་གིས་ཅི་ཞིག་བཤད་པ་དེས་ཐག་ཆོད་ཅེས་བཤད། རྒྱ་ནག་དང་ཨ་མི་རི་ཀའི་ཚོང་དམག་མཇུག་བསྒྲིལ་མི་ཐུབ་པའི་འགག་རྩ་གཙོ་བོ་ཞིག་རྒྱ་ནག་གི་སྒེར་གཉེར་ཁེ་ལས་ཁག་ལ་རང་དབང་དང་དབང་ཆ་མེད་པར་སྲིད་གཞུང་གི་བཀོད་འདོམས་ལ་ཉན་དགོས་པ་དེར་ཐུག་འདུག་ཅེས་སྤྱི་ཡོངས་ཀྱི་ལྟ་ཚུལ་ཡོང་གི་ཡོད་པ་རེད།།
