ངོ་འཕྲད་བདེ་བའི་དྲ་འབྲེལ།

ཕྱི་རྒྱལ་གྱི་བཟོ་ཚོང་ལས་ཁང་ལ་དཔྱ་ཁྱལ་ཆག་ཡང་།
please wait

No media source currently available

0:00 0:04:13 0:00
ཐད་ཀར་ཕབ་ལེན་གྱི་དྲ་འབྲེལ།


༄༅།། ཨ་མི་རི་ཀའི་གཞུང་གིས་རང་ཡུལ་གྱི་དཔྱ་ཁྲལ་ལམ་ལུགས་ཀྱི་ཁྲིམས་ལ་སྒྱུར་བཅོས་བཏང་བའི་རྗེས་སུ་རྒྱ་ནག་གི་ས་ཐོག་ཏུ་ཚོང་ལས་གཉེར་བཞིན་པའི་ཨ་མི་རི་ཀའི་བཟོ་ཚོང་ལས་ཁང་ཁག་གིས་རང་གི་ཁེ་སང་རྣམས་ཨ་མི་རི་ཀའི་ཁྲོམ་རར་མ་རྩ་འཛུགས་ཀྱི་ཡོད་པ་དང་། རྒྱ་ནག་གཞུང་གིས་ཨ་མི་རི་ཀའི་བཟོ་ཚོང་ལས་ཁང་ཁག་གིས་རྒྱ་ནག་གི་ཁྲོམ་རར་ཚོང་ལས་གཉེར་ནས་ཐོབ་པའི་ཁེ་སང་རྣམས་སླར་ཡང་རྒྱ་ནག་གི་ཁྲོམ་རའི་ནང་དུ་མ་རྩ་འཛུགས་དགོས། རྒྱ་ནག་གཞུང་གིས་གནས་སྐབས་རིང་ཕྱི་རྒྱལ་གྱི་བཟོ་ཚོང་ལས་ཁང་ཁག་ལ་དཔྱ་ཁྲལ་ཆག་ཡང་གཏོང་ཆོག ཕྱི་རྒྱལ་གྱི་བཟོ་ཚོང་ལས་ཁང་ཁག་གིས་རང་གི་ཁེ་སང་རྣམས་རྒྱ་ནག་གི་མེ་འཁོར་ལྕགས་ལམ་འཛུགས་སྐྲུན་དང་གཏེར་ཁ་སྔོག་འདོན། ཞིང་ལས་དང་འཕྲུལ་རིག་ལག་རྩལ་གྱི་བཟོ་ལས་ཁག་ལ་མ་རྩ་འཛུགས་དགོས། སྲིད་ཇུས་གསར་པ་འདི་༢༠༡༨་ལོའི་ཕྱི་ཟླ་དང་པོའི་ཚེས་༡་ནས་ལག་ལེན་བསྟར་རྒྱུ་ཡིན་ཞེས་རྒྱ་ནག་གི་ནོར་སྲིད་ལྷན་ཁང་གི་ཁྱབ་བསྒྲགས་བྱས་འདུག རྒྱ་ནག་གི་ནོར་སྲིད་ལྷན་ཁང་གིས་དཔྱ་ཁྲལ་ཆག་ཡང་གི་ཐབས་ཇུས་གསར་པ་འདིས་ཕྱི་རྒྱལ་གྱི་བཟོ་ཚོང་ལས་ཁང་ཁག་གིས་རྒྱ་ནག་ལ་མ་རྩ་འཛུགས་རྒྱུ་ཇེ་མང་དུ་འགྲོ་བ་དང་མ་རྩ་འཛུགས་འཇོག་གི་སྤུས་ཚད་ཇེ་ལེགས་སུ་འགྲོ་ཐུབ། ཕྱི་རྒྱལ་གྱི་བཟོ་ཚོང་ལས་ཁང་ཁག་གིས་རྒྱ་ནག་ལ་མ་རྩ་འཛུགས་རྒྱུ་རྒྱ་བསྐྱེད་གཏོར་བར་སྐུལ་ལྕག་ཀྱང་ཐེབས་ཐུབ་ཅེས་གསར་འགོད་གསལ་བསྒྲགས་སྤེལ་མོད། འོན་ཀྱང་དོན་དངོས་སུ་ཕྱི་རྒྱལ་གྱི་བཟོ་ཚོང་ལས་ཁང་ཁག་གིས་རྒྱ་ནག་གི་ཁྲོམ་རའི་ནང་དུ་ཚོང་ལས་གཉེར་ནས་ཐོབ་པའི་ཁེ་སང་རྣམས་སླར་ཡང་རྒྱ་ནག་ལ་མ་རྩ་འཛུགས་རྒྱུ་ཡིན་མིན་ངེས་གཏན་མེད་ཅིང་། རྒྱ་ནག་གཞུང་གིས་ཕྱི་རྒྱལ་གྱི་བཟོ་ཚོང་ལས་ཁང་ཁག་ལ་དཔྱ་ཁྲལ་བརྒྱ་ཆ་༢༥་རྒྱག་པ་དང་བཟོ་བ་ཚོར་སྤྱི་ཚོགས་འགན་སྲུང་གི་རྒས་ཕོགས། སྨན་བཅོས་སོགས་ཀྱི་འགྲོ་གྲོན་ཆེན་པོ་ཞིག་སྤྲོད་དུ་འཇུག་གི་ཡོད་པ་མ་ཟད། རྒྱ་ནག་གི་བཟོ་བའི་གླ་ཕོགས་འཕར་པ་དང་སྒྲིག་ཁྲིམས་མགོ་ཉོག་ཆེ་བ། རྒྱ་ནག་གི་བཟོ་ཚོང་ལས་ཁང་ཁག་གི་འགྲན་སྡུར་ཆེ་རུ་འགྲོ་བ་བཅས་ལ་སུན་སྣང་སྐྱེས་ཏེ། རྒྱ་ནག་ལ་མ་རྩ་བཙུགས་ཡོད་པའི་ཕྱི་རྒྱལ་གྱི་བཟོ་ཚོང་ལས་ཁང་ཁག་ཅིག་ཝི་ཏེ་ནམ་དང་ཧྥི་ལི་ཕིན། བྷང་ག་ལ་དང་རྒྱ་གར་སོགས་ལ་སྤོར་གྱི་ཡོད་པ་དང་། ད་དུང་ཨ་མི་རི་ཀའི་གཞུང་གིས་རང་ཡུལ་གྱི་བཟོ་ཚོང་ལས་ཁང་ཁག་ལ་དཔྱ་ཁྲལ་གཅོག་རྒྱུའི་བཅའ་ཁྲིམས་ཤིག་གཏན་འབེབས་བྱས་ཡོད་པར་བརྟེན། ཨ་མི་རི་ཀའི་བཟོ་ཚོང་ལས་ཁང་ཁག་གིས་རང་གི་དངུལ་སྒོར་རྣམས་རྒྱ་ནག་ནས་ཨ་མི་རི་ཀར་གཏོང་སྲིད་པའི་ཉེན་ཀ་ཆེ་རུ་སོང་ཡོད། དེར་བརྟེན་ཕྱི་རྒྱལ་གྱི་བཟོ་ཚོང་ལས་ཁང་ཁག་གིས་རང་གི་མ་རྩ་རྣམས་རྒྱ་ནག་ནས་ཕྱིར་འཐེན་མི་བྱེད་པའི་དོན་དུ་རྒྱ་ནག་གཞུང་གིས་གནས་སྐབས་རིང་ཕྱི་རྒྱལ་གྱི་བཟོ་ཚོང་ལས་ཁང་ཁག་ལ་དཔྱ་ཁྲལ་བཅགས་ནས་ཁེ་སང་སྤྲོད་ཀྱི་ཡོད་པ་རེད། ཁ་སང་གཟའ་ཕུར་བུའི་ཉིན་རྒྱ་ནག་གཞུང་གིས་ཁྱབ་བསྒྲགས་བྱས་པ་ཨ་མི་རི་ཀའི་དཔྱ་ཁྲལ་ལམ་ལུགས་ལ་སྒྱུར་བཅོས་བཏང་ཡོད་པར་འབྲེལ་བ་ཡོད་མེད་གསལ་བོ་ཞིག་བཤད་དཀའ། ཉམས་ཞིབ་པ་ཚོས་རྒྱ་ནག་གཞུང་གིས་ཕྱི་རྒྱལ་གྱི་བཟོ་ཚོང་ལས་ཁང་ཁག་ལ་དཔྱ་ཁྲལ་གཅོག་རྒྱུའི་ཁྱབ་བསྒྲགས་བྱས་པ་ཨ་མི་རི་ཀའི་དཔྱ་ཁྲལ་ལམ་ལུགས་ལ་སྒྱུར་བཅོས་བཏང་བར་ཐད་ཀར་འབྲེལ་བ་ཆགས་ཡོད། ཟླ་བ་འདིར་རྒྱ་ནག་གི་ནོར་སྲིད་བློན་ཆེན་གཞོན་པས་ཨ་མི་རི་ཀའི་དཔྱ་ཁྲལ་ལམ་ལུགས་ལ་སྒྱུར་བཅོས་བཏང་ན་རྒྱ་ནག་གིས་ཀྱང་དེ་མཚུངས་ཀྱི་སྲིད་ཇུས་ཤིག་ལག་ལེན་བསྟར་རྒྱུ་ཡིན། ཨ་མི་རི་ཀའི་དཔྱ་ཁྲལ་ལམ་ལུགས་ལ་སྒྱུར་བཅོས་བཏང་ནས་ཕྱི་རྒྱལ་ལ་ཤུགས་རྐྱེན་ཐེབས་རྒྱུ་ཡིན་པར་སྣང་ཆུང་གཏན་ནས་གཏོང་མི་ཉན་ཞེས་གཏམ་བཤད་བྱས་འདུག ཨ་རིའི་སྤྱི་མཐུན་ཚོགས་པ་དང་སྲིད་འཛིན་ཌོ་ནལ་ཊོམ་གྱིས་ཨ་མི་རི་ཀའི་བཟོ་ཚོང་ལས་ཁང་ལ་དཔྱ་ཁྲལ་གཅོག་དགོས། ཁོ་ཚོར་དཔྱ་ཁྲལ་བཅགས་ན་དངུལ་སྒོར་ཁེ་སང་ཐོབ་པ་རྣམས་བསྐྱར་དུ་མ་རྩ་བཙུགས་ནས་ལས་ཀའི་གོ་སྐབས་དང་ཚོང་ལས་དར་འཕེལ་འགྲོ་ཐུབ། ཨ་མི་རི་ཀའི་བཟོ་ཚོང་ལས་ཁང་ཕྱི་རྒྱལ་ལ་སྤོར་ནས་མ་རྩ་འཛུགས་ཀྱི་ཡོད་པ་ཨ་མི་རི་ཀའི་བཟོ་ཚོང་ལས་ཁང་ལ་དཔྱ་ཁྲལ་མཐོ་དྲགས་པས་རེད་ཅེས་རྩོད་པ་བརྒྱབ་སྟེ། ཉི་མ་འགའ་ཞིག་གི་གོང་དུ་ཨ་རིའི་གྲོས་ཚོགས་ཀྱིས་ཨ་མི་རི་ཀའི་བཟོ་ཚོང་ལས་ཁང་ཁག་གིས་དཔྱ་ཁྲལ་བརྒྱ་ཆ་༣༥་འཇལ་དགོས་པ་དང་བརྒྱ་ཆ་༢༡་བར་དུ་མར་བཅགས་པ་དང་། ཨ་མི་རི་ཀའི་དཔྱ་ཁྲལ་ལམ་ལུགས་ལ་སྒྱུར་བཅོས་བཏང་བར་བློ་འཚབ་ཡོང་གི་ཡོད་པ་རྒྱ་ནག་གཅིག་པུ་མིན། དཔེར་ན་འཛམ་གླིང་རྒྱལ་ཁབ་གཞན་ཁག་གི་ནོར་སྲིད་བློན་ཆེན་རྣམས་དང་ཉམས་ཞིབ་པ་ཚོས་ཀྱང་ཨ་མི་རི་ཀས་དཔྱ་ཁྲལ་བཅགས་ནས་མ་རྩ་ནང་འགུགས་བྱེད་ཀྱི་ཡོད་པ་དང་། དཔྱ་ཁྲལ་བཅགས་ནས་ཕྱི་རྒྱལ་གྱི་མ་རྩ་ནང་འགུགས་བྱེད་པའི་ཐབས་ཇུས་འདི་རྒྱལ་ཁབ་མང་དག་ཅིག་གིས་ལག་ལེན་བསྟར་མྱོང་ཡོད། ཨ་མི་རི་ཀའི་བཟོ་ཚོང་ལས་ཁང་ཁག་གིས་ཕྱི་རྒྱལ་ཡུལ་གྲུ་ཁག་ལ་མ་རྩ་བཙུགས་ནས་ཚོང་ལས་གཉེར་གྱི་ཡོད་པ་ཕྱིར་འཐེན་བྱེད་ཚེ། འཛམ་གླིང་སྤྱི་ཡོངས་ཀྱི་དཔལ་འབྱོར་དང་ཚོང་ལས་ལའང་ཤུགས་རྐྱེན་ཐེབས་སྲིད་ཅེས་བློ་འཚབ་བྱེད་ཀྱི་ཡོད་ཅིང་། རྒྱ་ནག་གི་བློ་འཚབ་གཙོ་བོ་ཕྱི་རྒྱལ་གྱི་བཟོ་ཚོང་ལས་ཁང་ཁག་གིས་རང་གི་ཁེ་སང་རྣམས་རྒྱ་ནག་ནས་ཕྱི་ལ་བཏང་སྟེ། རྒྱ་ནག་གི་དངུལ་ཁང་ཁག་ལ་མ་རྩ་འཁོར་རྒྱུག་གི་དངུལ་སྒོར་འབྱུང་ཁུངས་བརྟན་པོ་ཞིག་མེད་ན་མི་དམངས་ཤོག་སྒོར་གྱི་འཛའ་ཐང་ཆག་རྒྱུ་དང་། མི་དམངས་ཤོག་སྒོར་གྱི་འཛའ་ཐང་ཆག་ན་རྒྱ་ནག་གི་དཔལ་འབྱོར་དང་ཚོང་ལས་ཉམས་རྒུད་འགྲོ་སྲིད། རྒྱ་ནག་གཞུང་གིས་ཕྱི་རྒྱལ་གྱི་བཟོ་ཚོང་ལས་ཁང་ཁག་གིས་རྒྱ་ནག་གི་ཁྲོམ་རའི་ནང་དུ་ཁེ་སང་བླངས་པ་རྣམས་སླང་ཡང་རྒྱ་ནག་གི་ས་ཐོག་ཏུ་མ་རྩ་འཛུགས་དགོས་པའི་ཁྲིམས་ཤིག་གཏན་འབེབས་བྱ་འཆར་ཡོད་རུང་། དེང་སྐབས་ཨ་མི་རི་ཀའི་བཟོ་ཚོང་ལས་ཁང་ཁག་གིས་རྒྱ་ནག་གི་ས་ཐོག་ཏུ་དངུལ་སྒོར་ཅི་ཙམ་ཉར་འཛིན་བྱེད་ཡོད་མེད་ཀྱི་གནས་ཚུལ་གསལ་བོ་ཞིག་གཏན་ནས་ཤེས་རྟོགས་ཐུབ་ཀྱི་མེད་པ་རེད།།

XS
SM
MD
LG