རྒྱང་སྲིང་དུས་ཚོད།

རྒྱ་ནག་གཞུང་གིས་བོད་ཀྱི་ཆུ་བོ་ཆེན་པོ་ཡར་ཀླུང་གཙང་བའིི་རྒྱུད་དུ་ཆུ་མཛོད་ཞིག་འཛུགས་སྐྲུན་བྱ་འཆར་ཡོད་པ་དང་། དེས་བོད་དང་ཁྱིམ་མཚེས་རྒྱལ་ཁབ་ཀྱི་སྣོད་བཅུད་གཉིས་ལ་གནོད་ཆེན་པོ་སྐྱེལ་རྒྱུའི་ཉེན་ཁ་ཡོད་པ། ཨ་རིའི་གྲོས་ཚོགས་ཀྱི་ཆབ་སྲིད་ཚོགས་པ་གཉིས་ཀྱི་འཐུས་མི་ལས་གྲུབ་པའི་ལས་དོན་ཚོགས་ཆུང་ཞིག་གིས་རྒྱ་ནག་དང་འབྲེལ་བ་ཡོད་པའི་སྙན་ཐོ་ཤོག་ངོས་ལྔ་བརྒྱ་ལྷག་ཅན་ཞིག་བཏོན་ཡོད་པ། རྒྱ་ནག་ཕྱི་འབྲེལ་ལྷན་ཁང་གི་མི་སྣས་ཨོ་སི་ཁྲི་རི་ལིས་ཡ་རྒྱལ་ཁབ་ལ་དམའ་འབེབས་བྱས་ཡོད་པའི་འདྲ་པར་དྲ་ལམ་དུ་སྤེལ་བས་རྒྱལ་ཁབ་གཉིས་ཀྱི་འབྲེལ་ལམ་སྡུག་རུ་འགྲོ་བཞིན་པ། དབྱིན་ཇིའི་རྒྱལ་ཁབ་ཀྱིས་ཐེངས་དང་པོར་ཨ་རི་དང་འཇར་མན་གྱི་སྨན་རྫས་བཟོ་གྲྭས་བཟོས་པའི་ཏོག་དབྱིབས་རིམས་ནད་ཀྱི་འགོག་སྨན་བེད་སྤྱོད་བཏང་ཆོག་པའི་ཆོག་མཆན་སྤྲད་ཟིན་པ་སོགས་ཀྱི་གནས་ཚུལ་ཡོད།