ངོ་འཕྲད་བདེ་བའི་དྲ་འབྲེལ།

རྒྱ་གཞུང་གིས་བོད་པ་༢་ལ་བཙོན་འཇུག་གི་ཁྲིམས་ཐག་བཅད་པ།


༄༅།། རྒྱ་ནག་གཞུང་གིས་དབྱེ་བགོ་བྱས་པའི་མཚོ་སྔོན་ཞིང་ཆེན་གྱི་རྨ་ལྷོ་བོད་རིགས་རང་སྐྱོང་ཁུལ། རྩེ་ཁོག་རྫོང་གི་རྡོ་དཀར་ཡུལ་ཚོ། རྡོ་དཀར་སྡེ་པའི་རུ་ཆུང་དང་པོའི་བོད་པ་ན་གཞོན་མཁའ་འགྲོ་ཚེ་བརྟན་ཞེས་པ་ཞིག་ལ་རྒྱ་ནག་གཞུང་གིས་༢༠༡༩་ལོར་༧གོང་ས་ཏཱ་ལའི་བླ་མ་མཆོག་ལ་ཆེ་བསྟོད་ཀྱི་གླུ་ཚིག་བརྩམས་པའི་ནག་ཉེས་བཙུགས་ནས་ལོ་འདིའི་ཕྱི་ཟླ་༧་པའི་ཟླ་མགོར་ལོ་བདུན་གྱི་བཙོན་འཇུག་གི་ཁྲིམས་ཐག་བཅད། ༧གོང་ས་མཆོག་ལ་ཆེ་བསྟོད་ཀྱི་གླུ་དབྱངས་ལེན་མཁན་ེས་པ་ཞིག་ལ་ལོ་གསུམ་གྱི་བཙོན་འཇུག་གི་ཁྲིམས་ཐག་བཅད་པའི་གནས་ཚུལ་ཐོན་འདུག

དེ་ཡང་གནས་ཚུལ་མཁོ་སྤྲོད་པས་འགྲེལ་བརྗོད་བྱས་པ་ལྟར་ན། མཁའ་འགྲོ་ཚེ་བརྟན་དང་ཚེ་རྒོ་གཉིས་ལ་རྒྱལ་ཁབ་མགོ་རྟིང་སློག་ཐབས་བྱས་པའི་ཉེས་མིང་བཏགས་ནས་ཁྲིམས་ཐག་བཅད་ཡོད་ཅིང་། འདི་ནི་ལོ་བདུན་གྱི་ཁྲིམས་ཆད་ཕོག་མཁན་མཁའ་འགྲོ་ཚེ་བརྟན་ལ་མཚོན་ན་འཛིན་བཟུང་བཙོན་འཇུག་བྱས་པ་ཐེངས་གཉིས་པ་ཡིན་འདུག ༢༠༡༠་ལོར་རེབ་གོང་དུ་བོད་པའི་སློབ་ཕྲུག་ཚོས་བོད་ཡིག་བོད་སྐད་ཀྱི་ཐོབ་ཐང་དོན་དུ་ངོ་རྒོལ་ལས་འགུལ་སྤེལ་བ་དེར་ཞུགས་ནས་༢༠༡༢་ལོའི་ཕྱི་ཟླ་༡༢་པར་བཟུང་། ཁོ་པ་༢༠༡༤་ལོའི་ཟླ་༧་པ་བར་དུ་ལོ་གཉིས་མ་ཟིན་ཙམ་ལ་བཙོན་དུ་བཅུག་པའི་རྗེས་སུ་གློད་གྲོལ་ཐོབ། ཁོང་གི་ཡུལ་མིའི་ཐོབ་ཐང་ལག་འཁྱེར་རྩིས་མེད་བཏང་སྟེ་༢༠༡༤་ནས་༢༠༡༨་བར་དུ་ལོ་བཞི་ལ་འགྲོ་སྡོད་རང་དབང་མེད་པ། སྤྱི་ཚོགས་སྟེང་དུ་བྱ་བ་གང་ཡང་གཉེར་མི་ཆོག་པ། སློབ་གྲྭར་འགྲིམ་མི་ཆོག་པར་བཟོས་ཏེ་རང་ཁྱིམ་དུ་སྡོད་དགོས་བྱུང་འདུག

༢༠༡༩་ལོར་མཁའ་འགྲོ་ཚེ་བརྟན་གྱིས་༧གོང་ས་ཏཱ་ལའི་བླ་མ་མཆོག་ལ་ཆེ་བསྟོད་ཀྱི་གླུ་ཚིག་བརྩམས། ཡུལ་དེའི་གཞས་པ་ཚེ་རྒོས་རྡུང་ལེན་གྱི་ལམ་ནས་གླུ་གཞས་དེ་བླངས། ས་གནས་དེའི་ནག་ལྡོང་སྡེ་པའི་བུ་མོ་ཞིག་གིས་གླུ་གཞས་དེ་སྐད་འཕྲིན་སོགས་སྤྱི་ཚོགས་དྲྭ་ལམ་ཁག་ཏུ་བཀྲམ། ལོ་དེའི་ཕྱི་ཟླ་༤་ཚེས་༢༦་ཉིན་གླུ་ཚིག་རྩོམ་མཁན་དང་རྡུང་ལེན་པ། བརྒྱུད་སྐུར་བྱེད་མཁན་བཅས་མི་གསུམ་འཛིན་བཟུང་བྱས་ནས་བུ་མོ་དེ་ལོ་གཅིག་ཡས་མས་ཤིག་ལ་བཙོན་འཇུག་བྱས་པའི་རྗེས་སུ་གློད་གྲོལ་བཏང་རུང་མཁའ་འགྲོ་ཚེ་བརྟན་དང་གླུ་བ་ཚེ་རྒོ་གཉིས་མུ་མཐུད་རྨ་ལྷོ་ཁུལ། ཐུང་རེན་རྫོང་དུ་བཙོན་འཇུག་བྱས་ནས་༢༠༢༠་ལོའི་ཕྱི་ཟླ་༧་པའི་ཟླ་མགོར་མཁའ་འགྲོ་ཚེ་བརྟན་ལ་རྒྱལ་ཁབ་མགོ་སྟེང་སློག་ཐབས་ཀྱི་ཉེས་མིང་འོག་ལོ་༥་དང་རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་པའི་ཉེས་མིང་འོག་ལོ་༢་བཅས་ཁྱོན་བསྡོམས་ལོ་༧ གྱི་ཁྲིམས་ཐག་བཅད། གླུ་བ་ཚེ་རྒོ་ལ་ལོ་གསུམ་གྱི་ཁྲིམས་ཐག་བཅད་ཡོད་པའི་གནས་ཚུལ་ཐོན་འདུག

ད་དུང་གནས་ཚུལ་མཁོ་སྤྲོད་པས་མུ་མཐུད་དུ་བརྗོད་དོན་ལྟར་ན། མཁའ་འགྲོ་ཚེ་བརྟན་ལ་མཚོན་ན་རྟག་ཏུ་མི་རིགས་ཀྱི་ལ་རྒྱ་དང་སེམས་ཤུགས་ཆེན་པོ་ཡོད་མཁན་ཞིག་ཡིན་པར་མ་ཟད། ཕྱི་ལོ་༢༠༡༤་ལོར་གློད་གྲོལ་ཐོབ་པའི་རྗེས་སུ་སློབ་གྲྭ་དང་སྤྱི་ཚོགས་ཐོག་ཏུ་ལས་ཀ་གང་ཡང་བྱེད་དུ་མ་བཅུག་པར་འགྲོ་སྡོད་སྤྱོད་གསུམ་གྱི་རང་དབང་ཡོངས་སུ་འཕྲོག་སྟེ་མནའ་མ་བླངས་ནས་ཁྱིམ་དུ་བསྡད་ཡོད་པ་དང་ཁྱོ་ཤུག་ཟུང་ལ་ཕྲུ་གུ་ཞིག་ཀྱང་ཡོད་པའི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།



XS
SM
MD
LG