རྒྱ་ནག་གི་ཝུ་ཧན་གྲོང་ཁྱེར་ནས་ཁྱབ་པའི་ཏོག་དབྱིབས་ནད་དུག་གི་རྐྱེན་པས་བོད་ཀྱི་ཞིང་འབྲོག་ས་ཁུལ་ཁག་གི་གྲོང་ཚོ་ཕན་ཚུན་བར་དུའང་འགྲོ་འོང་བཀག་སྡོམ་བྱས་ཡོད་པ་དང་། བོད་ཀྱི་རྒྱལ་སར་མགྲོན་ཁང་ཚང་མ་སྒོ་རྒྱག་བཞིན་པའི་སྟབས་ཀྱིས་ཕྱོགས་ཡོང་གི་མགྲོན་པོ་རྣམས་རང་གནས་སུ་ཕྱིར་ལོག་བྱེད་བཞིན་ཡོད་པའི་གནས་ཚུལ་ཐོན་འདུག
ཟླ་བ་འདིའི་ཕྱི་ཚེས་༢༨་ཉིན་མགོ་ལོག་ཁུལ་དུ་ཚོགས་འདུ་ཞིག་བསྐོངས་ནས་ཐེངས་འདིའི་ནད་ཡམས་སྐོར་ལ་དཀྲོག་གཏམ་སྒྲོམས་པའམ། ཡང་ན་གནས་ཚུལ་རྫུན་བཟོ་བྱས་ནས་དྲྭ་ལམ་ཁག་ཏུ་བསྒྲགས་ན་ཁྲིམས་འགལ་བྱས་པའི་ཉེས་ཆད་གཅོད་རྒྱུ་ཡིན། ད་ལྟའི་ཛ་དྲག་གི་སྐབས་འདིར་ཟ་མ་དང་ཁ་རས་སོགས་ཀྱི་རིན་གོང་སྤར་ནས་ཚོང་སྒྱུར་བྱེད་མཁན་རྣམས་སྲིད་གཞུང་ལ་ཞུ་གཏུག་བྱ་དགོས། ཁོ་ཚོ་དེ་མ་ཐག་ཏུ་ཁྲིམས་ལ་སྦྱར་ནས་གནད་དོན་ཐག་གཅོད་ནན་པོ་བྱ་རྒྱུ་ཡིན་ཞེས་ཁྱབ་བསྒྲགས་བྱས་པ་འབྲེལ་ཡོད་མི་སྣ་ཞིག་གིས་འདི་ག་རླུང་འཕྲིན་ཁང་གི་གསར་འགོད་པར་བརྗོད་འདུག
གསར་འགྱུར་མཁོ་སྤྲོད་པའི་བརྗོད་དོན་གཙོ་བོ་ནི་ནད་ཡམས་འདིའི་སྐབས་སུ་མི་མང་ལ་མགོ་སྐོར་བཏང་ནས་བཟའ་བཅའི་རིགས་ཉོ་རུ་འཇུག་པ་སོགས་དཀྲོག་གཏམ་གྱི་རིགས་སྒྲོགས་མཁན་བྱུང་ན་རྒྱལ་ཁབ་ཀྱིས་ཉེས་ཆད་ནན་པོ་གཅོད་རྒྱུ་ཡིན། མང་ཚོགས་ཀྱིས་རྟག་ཏུ་གཟབ་གཟབ་དང་མི་མང་པོ་འདུ་འཛོམས་བྱེད་མི་ཆོག་ཅེས་བཀའ་ཁྱབ་བཏང་འདུག
ཡང་བོད་ཀྱི་རྒྱལ་ས་ལྷ་སར་མཚོ་སྔོན་དང་ཀན་སུའུ། ཆབ་མདོ་སོགས་བོད་ཀྱི་ས་ཁུལ་གཞན་ནས་མཆོད་མཇལ་དུ་སླེབས་ནས་མགྲོན་ཁང་དུ་བསྡད་ཡོད་པའི་བོད་པ་རྣམས་རང་གནས་སུ་ཕྱིར་ལོག་བྱེད་བཞིན་ཡོད་ཅིང་། ཕྱི་ཚེས་༢༩་ཉིན་ནས་བཟུང་སྟེ་ལྷ་ས་གྲོང་ཁྱེར་གྱི་མགྲོན་ཁང་ཚང་མ་སྒོ་རྒྱག་དུ་འཇུག་ཡོད་འདུག ལྷག་པར་དུ་ཕྱི་ཚེས་༢༦་ཉིན་ནས་བཟུང་སྟེ་སེ་འབྲས་དགའ་གསུམ་གཙོས་ལྷ་སའི་གཙུག་ལག་ཁང་དང་རྩེ་པོ་ཏ་ལ། ར་མོ་ཆེ་སོགས་མཆོད་མཇལ་བྱ་ཡུལ་ཚང་མ་སྒོ་བརྒྱབ་ནས་ཡུལ་སྐོར་བ་དང་མཆོད་མཇལ་བ་ཚང་མ་བཀག་ཡོད་པར་མ་ཟད། ད་དུང་གྲོང་ཁྱེར་ནང་གི་ཟ་ཁང་དང་ཚོང་ཁང་མང་པོ་ཞིག་ཀྱང་གནས་སྐབས་རིང་སྒོ་འབྱེད་ཐུབ་ཀྱི་མེད་པར་བརྟེན། གནས་སྐོར་བ་རྣམས་ལྷ་སར་བསྡད་ཀྱང་རྣམ་དཀར་དགེ་སྦྱོར་གྱི་ལས་དོན་གང་ཡང་སྒྲུབ་ཐུབ་ཀྱི་མེད་པས་མི་རྣམས་རང་གནས་སུ་ཕྱིར་ལོག་བྱེད་བཞིན་པའི་གནས་ཚུལ་ཐོན།
ལྷ་སར་སྒེར་གྱི་རླངས་བཏང་ནས་ཡོང་བའི་གནས་སྐོར་བ་དང་འགྲུལ་པ་རྣམས་རང་གནས་སུ་ཕྱིར་ལོག་བྱེད་ཀྱི་ཡོད་པའི་སྟབས་ཀྱིས་ཕྱི་ཚེས་༣༠་ཉིན་མྱུར་སྐྱོད་གཞུང་ལམ་སྟེང་དུ་རླུང་འཁོར་གི་འཚང་ཁ་ཧ་ཅང་ཆེན་པོ་འདུག་ཅེས་བོད་ནང་གི་བོད་པ་ཞིག་གིས་གནས་ཚུལ་མཁོ་སྤྲོད་བྱས་སོང་། མཚོ་སྔོན་ཞིང་ཆེན་གྱི་ཁོངས་སུ་གཏོགས་པའི་རོང་ཕྱོགས་ཁྲི་ཀ་སྡེ་པ་དང་གཅན་ཚ་སོགས་ཀྱི་གྲོང་སྡེ་ཕན་ཚུན་བར་དུའང་འགྲོ་འོང་བྱེད་མི་ཆོག་ཅེས་བཀག་སྡོམ་བྱས་ཡོད་པའི་གནས་ཚུལ་ཐོན་འདུག དེ་བཞིན་མཚོ་ལྷོ་ཁུལ་གྱི་བཟའ་བཅའི་ཁྲོམ་ར་ཆེན་པོ་ཞིག་གི་ནང་དུ་ཕྱི་ཚེས་༢༩་ཉིན་གྲོ་ཕྱེ་དང་འབྲས། སྣུམ་བཅས་ཉིན་གཅིག་གི་རིང་ལ་མང་ཚོགས་ཀྱི་འཚང་ཁ་ཤིག་ཤིག་ཉོས་ཟིན་པའི་གནས་ཚུལ་ཐོན།
ད་ལྟ་བོད་ཀྱི་ས་གནས་ཁག་གི་ཁུལ་སོ་སོ་དང་རྫོང་སོ་སོའི་བར་གྱི་གཞུང་ལམ་ཕལ་ཆེ་བར་བཀག་ནས་ཡུལ་མི་རྣམས་ཕན་ཚུན་འགྲོ་འོང་བྱེད་དུ་འཇུག་རྒྱུ་མིན་ཞེས་བཀོད་པའི་བརྡ་ཁྱབ་བརྙན་ཐུང་དང་ཡིག་ཆ་མང་པོ་ཞིག་སྤྱི་ཚོགས་དྲྭ་ལམ་ཁག་ཏུ་ཁྱབ་བཞིན་ཡོད་ཅིང་། གལ་སྲིད་འགྲིམ་འགྲུལ་དང་མི་མང་གི་འགྲོ་འོང་འགགས་ནས་ཡུན་རིང་ལུས་ཚེ། མང་ཚོགས་ལ་ཕྱོགས་གང་ཐད་དུ་དཀའ་ངལ་སྣ་ཚོགས་ཤིག་ཕྲད་ནས་ཛ་དྲག་གི་གནས་ཚུལ་འབྱུང་སྲིད་ཅེས་བློ་འཚབ་ཆེན་པོ་བྱེད་བཞིན་ཡོད་འདུག