ངོ་འཕྲད་བདེ་བའི་དྲ་འབྲེལ།

གཟའ་ཕུར་བུ། ༢༠༢༤/༠༣/༢༨

ལྷོ་ཕྱོགས་གཞིས་ཆགས་ཁག་ཏུ་ནད་པ་༢༣༡་ལ་སྨན་བཅོས་བྱེད་བཞིན་པ།


ཐད་ཀར་ཕབ་ལེན་གྱི་དྲ་འབྲེལ།

༄༅།། དེང་སྐབས་རྒྱ་གར་ལྷོ་ཕྱོགས་ཀྱི་བོད་མིའི་གཞིས་ཆགས་ཁག་དང་དགོན་སྡེ་ཁག་ཏུ་རྒྱ་ནག་ནས་བྱུང་བའི་ཏོག་དབྱིབས་ནད་དུག་ཁྱབ་སྟེ་ཛ་དྲག་ཆེ་རུ་འགྲོ་བཞིན་ཡོད་ཅིང་། དེ་ཡང་ཟླ་བ་འདིའི་ཕྱི་ཚེས་༢་ཉིན་འབྲས་སྤུངས་བློ་གསལ་གླིང་གྲྭ་ཚང་གི་དགེ་འདུན་པ་གཉིས་ལ་ཏོག་དབྱིབས་ནད་རྟགས་ཐོན་ཏེ་བློ་གླིང་གྲྭ་ཚང་གི་དགེ་འདུན་པ་སྤྱི་ལ་བརྟག་དཔྱད་བྱེད་བཞིན་ཡོད་པས་ཕྱི་ཟླ་༡༠་ཚེས་༡༤་བར་དུ་ཁྱོན་བསྡོམས་དགེ་འདུན་པ་༢༧༥༡་ལ་བརྟག་དཔྱད་བྱས་ནས་དགེ་འདུན་པ་༢༤༩་ལ་ཏོག་དབྱིབས་ནད་རྟགས་ཐོན། དགེ་འདུན་པ་༡༢༢་དྲག་སྐྱེད་བྱུང་བ་དང་ད་དུང་ནད་པ་༡༢༧་ཡོད་པར་མ་ཟད། དགེ་འདུན་པ་འཕྲོ་རྣམས་ལ་མུ་མཐུད་དུ་བརྟག་དཔྱད་བྱ་རྒྱུ་ཡིན་ཞེས་འབྲས་སྤུངས་བློ་གསལ་གླིང་གྲྭ་ཚང་གི་མཁན་རིན་པོ་ཆེ་བློ་བཟང་བསམ་གཏན་གྱིས་འདི་གར་གསུངས་བྱུང་། ཁོང་གིས་ནད་དུག་ཕོག་པའི་དགེ་འདུན་པ་དེ་དག་གི་གྲས་ཀྱི་དགུང་ལོ་མཐོ་ཤོས་ནི་༦༣་དང་ཆུང་ཤོས་ནི་ལོ་༡༠་ཡིན་ཞིང་། སྟབས་ལེགས་པ་ཞིག་ལ་ནད་པ་དེ་དག་གི་གྲས་སུ་ཛ་དྲག་ཅན་གཅིག་ཀྱང་བྱུང་མ་སོང་། ད་དུང་སྦག་སའི་གནས་བརྟན་བགྲེས་སོང་ཚོར་ནད་དུག་གཏན་ནས་འགོས་མེད་ཅེས་གསུངས་འདུག

ད་ལྟའི་ཆར་དྲག་སྐྱེད་ཟིན་པ་དང་ནད་གཞི་ཡོད་པ་རྣམས་མུ་མཐུད་དུ་ཟུར་འགོག་བྱས་ནས་བཞག་ཡོད་ཅིང་། སྤྱི་ཐབ་གནས་སྐབས་རིང་སྒོ་བརྒྱབ་སྟེ་དགོན་པའི་གླིང་ནང་དུ་ཕར་ཚུར་འགྲོ་སྐྱོད་བྱེད་མི་ཆོག་པ་དང་གྲྭ་ཚང་གིས་དགེ་འདུན་པ་ཚང་མར་གསོལ་དོད་འབུལ་གྱི་ཡོད། སྨན་དང་སྨན་བཅོས་སོགས་ཀྱི་མཐུན་རྐྱེན་གང་དགོས་གྲྭ་ཚང་གིས་ནར་གཏོང་བྱེད་ཀྱི་ཡོད། དགེ་འདུན་པ་སྤྱི་ཡོངས་ལ་བརྟག་དཔྱད་རིམ་པ་གཉིས་པ་ཞིག་བྱ་འཆར་ཡོད། སྤྱིར་འབྲས་སྤུངས་བློ་གསལ་གླིང་གྲྭ་ཚང་ལ་དགེ་འདུན་པ་༣༠༠༠་ཙམ་ཡོད་པ་དེའི་ཁོངས་ནས་མི་༢༠༠་ལྷག་གྲྭ་ཚང་གི་ལས་དོན་འདྲ་མིན་ཆེད་དུ་ཕྱི་ཕྱོགས་སུ་བཞུགས་ཡོད་ཅེས་གསུངས་བྱུང་།།

འདི་དང་དུས་མཚུངས་སུ་ཟླ་བ་འདིའི་ཕྱི་ཚེས་༡༢་ནས་མོན་གྷོ་བོད་མིའི་འཕྲོད་བསྟེན་སྨན་ཁང་དུ་བརྟག་དཔྱད་བྱས་ནས་བྱང་རྩེ་གྲྭ་ཚང་གི་དགེ་འདུན་པ་༦༠་ལྷག་ལ་ཏོག་དབྱིབས་ནད་དུག་འགོས་ཡོད་པ་རྩད་ཆོད་སོང་ཞེས་བྱང་རྩེ་གྲྭ་ཚང་འཕྲོད་བསྟེན་སྨན་ཁང་གི་ཕྱི་ལུགས་སྨན་པ་དོན་གྲུབ་ཀྱིས་འགྲེལ་བརྗོད་གནང་སོང་། ཁོང་གིས་དགེ་འདུན་དམངས་རྣམས་ས་གནས་རྒྱ་གར་གཞུང་གི་སྨན་ཁང་དུ་ཚད་མཐོའི་བརྟག་དཔྱད་བྱེད་བཞིན་ཡོད། ད་ལྟ་གྲུབ་འབྲས་འཐོན་རྒྱུར་སྒུག་བཞིན་ཡོད་ཅེས་གསུངས་ཡོད་ཅིང་། དེའེ་སྔོན་ལ་དགའ་ལྡན་ཤར་རྩེ་གྲྭ་ཚང་གི་དགེ་འདུན་པ་བརྒྱ་ལྷག་ལ་ཏོག་དབྱིབས་ནད་དུག་འགོས་པའི་གནས་ཚུལ་ཐོན། ད་ལྟ་ཤར་རྩེ་གྲྭ་ཚང་གི་དགེ་འདུན་པ་ཚང་མ་དྲག་སྐྱེད་བྱུང་འདུག དེ་བཞིན་འབྲས་སྤུངས་སྒོ་མང་གྲྭ་ཚང་གི་དགེ་འདུན་པ་རྣམས་ལའང་རྟག་དཔྱད་བྱ་རྒྱུའི་འཆར་གཞི་འདུག

མོན་གྷོ་འདོད་རྒུ་གླིང་དུ་ཏོག་དབྱིབས་ནད་ཡམས་ཁྱབ་གདལ་ཤུགས་ཆེར་འགྲོ་བཞིན་པའི་ཛ་དྲག་གིས་མོན་གྷོ་འདོད་རྒུ་གླིང་ཏོག་དབྱིབས་ནད་དུག་ཛ་དྲག་ལས་དོན་ཚོགས་ཆུང་བཙུགས་ནས་ཚོགས་མི་ཚོས་གྲོས་སྡུར་དང་ཐག་གཅོད་བྱས་པ་ལྟར་ཕྱི་ཟླ་༡༠་ཚེས་༡༥་ནས་དུས་ཡུན་བདུན་ཕྲག་གཉིས་རིང་དུ་མོན་གྷོ་འདོད་རྒུ་གླིང་གི་མང་ཚོགས་དང་དགེ་འདུན་པ་རྣམས་ཕྱི་ནང་གང་དུའང་འགྲོ་འོང་བྱེད་མི་ཆོག་པའི་བཀག་སྡོམ་བྱ་རྒྱུ་རེད་འདུག ད་ལྟའི་བར་དུ་མོན་གྷོ་འདོད་རྒུ་གླིང་གི་ཁྱབ་ཁོངས་སུ་མི་གྲངས་༣༠༠༠་བརྒལ་བ་ཞིག་ལ་ཏོག་དབྱིབས་ནད་དུག་འགོས་ཡོད་མེད་བརྟག་དཔྱད་བྱས་ཟིན་ཞེས་མོན་གྷོ་འདོད་རྒུ་གླིང་གི་ས་གནས་གཞིས་འགོ་ལྷག་པ་ཚེ་རིང་གིས་འགྲེལ་བརྗོད་གནང་བྱུང་།།

གཞན་ཡང་སྦེལ་ཀོབ་བོད་མིའི་གཞིས་ཆགས་དང་དགོན་སྡེ་ཁག་ཏུ་ད་ལྟའི་བར་དུ་ཏོག་དབྱིབས་ནད་དུག་ཕོག་པའི་ནད་པ་༤༢་བྱུང་ཞིང་། ད་ལྟ་སྨན་བཅོས་བྱེད་བཞིན་པ་མི་གྲངས་༢༡་ཡོད་ཅེས་སྦེལ་ཀོབ་འཕྲོད་འཕྲོད་བསྟེན་སྨན་ཁང་གི་འགན་འཛིན་རིག་འཛིན་རྣམ་རྒྱལ་གྱིས་འགྲེལ་བརྗོད་གནང་བྱུང་། ཧུན་སུར་རབ་རྒྱས་གླིང་དུ་ནད་པ་༣༠་བྱུང་བ་དེ་དག་གི་གྲས་ནས་མི་༨་དྲག་སྐྱེད་བྱུང་། ད་དུང་ནད་པ་༢༢་ལ་སྨན་བཅོས་བྱེད་བཞིན་ཡོད་ཅེས་ཧུན་སུར་རབ་རྒྱས་གླིང་འཕྲོད་བསྟེན་སྨན་ཁང་གི་འགན་འཛིན་བསོད་ནམས་གཡུ་རྒྱལ་གྱིས་འགྲེལ་བརྗོད་གནང་བྱུང་། ཀོ་ལི་གྷལ་དོན་ལྡན་གླིང་དུ་ནད་པ་༢་བྱུང་སྟེ་གཅིག་དྲག་སྐྱེད་བྱུང་། ནད་པ་གཞན་པ་དེར་སྨན་བཅོས་བྱེད་བཞིན་ཡོད་ཅེས་གཞིས་འགོ་དགེ་ལེགས་འབྱུང་གནས་ཀྱིས་འགྲེལ་བརྗོད་གནང་བྱུང་། སྤྱིར་ད་ལྟའི་ཆར་ལྷོ་ཕྱོགས་བོད་མིའི་གཞིས་ཆགས་ཁག་དང་དགོན་སྡེ་ཁག་ཏུ་ཁྱོན་བསྡོམས་ཏོག་དབྱིབས་ནད་དུག་ཕོག་པའི་ནད་པ་༢༣༡་བྱུང་བ་ཡོད་པ་དེ་དག་ལ་སྨན་བཅོས་བྱེད་བཞིན་ཡོད་ཀྱང་བརྟག་དཔྱད་གྲུབ་འབྲས་ཐོན་རིམ་བཞིན་དུ་ནད་པའི་གྲངས་འབོར་མུ་མཐུད་འཕར་སྲིད་པའི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

XS
SM
MD
LG