བོད་ནང་གི་ཁོར་སྲུང་སྐྱོབ་ཚོགས་པས་སྐྱེ་དངོས་སྣ་མང་གི་ཉིན་མོ་སྲུང་བརྩི།

Embed share

བོད་ནང་གི་ཁོར་སྲུང་སྐྱོབ་ཚོགས་པས་སྐྱེ་དངོས་སྣ་མང་གི་ཉིན་མོ་སྲུང་བརྩི།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:38 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།

༄༅།། དེ་རིང་བོད་ནང་གི་སྐྱེ་ཁམས་ཁོར་ཡུག་སྲུང་སྐྱོབ་ཚོགས་པ་མིང་གྲགས་ཅན་གཉན་ཚོགས་ཀྱི་སྐད་འཕྲིན་འཕྲིན་སྟེགས་སུ་གཙང་གསུམ་སྣ་མང་སྐྱེ་དངོས་ཞེས་པའི་དཔེ་དེབ་ཅིག་པར་སྐྲུན་འགྲེམ་སྤེལ་གྱིས་རྒྱལ་སྤྱིའི་སྣ་མང་སྐྱེ་དངོས་ཀྱི་ཉིན་མོ་སྲུང་བརྩི་བྱས་འདུག གཙང་གསུམ་སྣ་མང་སྐྱེ་དངོས་ཞེས་པའི་དཔེ་དེབ་འདིར་སྲོག་ཆགས་དང་སྐྱེ་དངོས་སོགས་རིགས་༡༦༦༩་ཡི་པར་རིས་འཁོད་ཡོད་པར་མ་ཟད། པར་རིས་དེ་དག་ལ་རྒྱ་བོད་སྐད་ཡིག་གཉིས་ཀྱི་མིང་འཁོད་རིས་འགྲེལ་བཀོད། དཔེ་དེབ་འདིར་འཁོད་པའི་སྐྱེ་དངོས་དང་སྲོག་ཆགས་རིགས་དེ་དག་ནི་གཉན་ཚོགས་ཀྱིས་ལོ་ངོ་༡༡་གི་རིང་ལ་རྨ་འབྲི་རྫ་གསུམ་འབབ་ཡུལ་བོད་ཀྱི་ས་ཁུལ་ཁག་ཏུ་བསྡུ་སྒྲིག་བྱས་ནས་ཟླ་བ་སྔོན་མར་དཔར་དུ་བསྐྲུན་བྱས་པ་ཞིག་རེད།།

ད་ལྟ་བོད་མི་གཞོན་སྐྱེས་མང་པོ་ཞིག་གྲོང་ཁྱེར་དུ་ནར་སོན་བཞིན་པ་དང་། བོད་ཀྱི་སྐྱེ་དངོས་དང་སྲོག་ཆགས་ཀྱི་རིགས་ལ་ཆེད་དུ་ཉམས་ཞིབ་བྱེད་མཁན་དཀོན་པས་སྲོག་ཆགས་དང་སྐྱེ་དངོས་ཀྱི་མིང་སོགས་འདུས་པའི་རིག་གནས་རྩ་ཆེན་ཞིག་ཉམས་དམས་སུ་འགྲོ་རྒྱུའི་ཉེན་ཁ་ཆེན་པོ་ཡོད་པའི་སྐབས་འདིར་གཉན་ཚོགས་ཀྱིས་བཏོན་པའི་སྣ་མང་སྐྱེ་དངོས་ཀྱི་དཔེ་དེབ་འདིས་སྟོང་ཆ་ཆེན་པོ་ཞིག་བསྐངས་། ཁྱད་པར་དུ་གཉན་ཚོགས་ཞེས་འབོད་པའི་མགོ་ལོག་གི་གཉན་པོ་གཡུ་རྩེའི་སྐྱེ་ཁམས་ཁོར་ཡུག་སྲུང་སྐྱོབ་ཚོགས་པ་གསར་འཛུགས་པ་འཇུ་བཀྲ་ཤིས་བཟང་པོ་ལྟ་བུར་མཚོན་ན་ལོ་མང་པོར་བོད་ཀྱི་ས་ཁུལ་ཁག་ཏུ་ཡོད་པའི་འདབ་ཆགས་ཀྱི་རིགས་ལ་དམིགས་བསལ་གྱིས་ཉམས་ཞིབ་བྱས་ཡོད་པས་མི་མང་པོ་ཞིག་གིས་ཁོང་ལ་བྱ་བླ་མ་ཞེས་འབོད་སྲོལ་ཞིག་དར། སྣ་མང་སྐྱེ་དངོས་ཞེས་པའི་དཔེ་དེབ་དུའང་འཇུ་བཀྲ་ཤིས་བཟང་པོ་དང་ཁོང་གིས་བཙུགས་པའི་ཚོགས་པ་འདིའི་ཚོགས་མི་ཚོས་ཆེད་དུ་ཉམས་ཞིབ་བྱས་ནས་སྲོག་ཆགས་དང་སྐྱེ་དངོས་ཀྱི་རིགས་ལ་ངོས་འཛིན། དབྱེ་གསེས་བྱས་ནས་དེབ་ཏུ་ཕྱོགས་བསྒྲིགས་བྱས་ཡོད་པ་ཞིག་རེད།།

གཉན་པོ་གཡུ་རྩེའི་སྐྱེ་ཁམས་ཁོར་ཡུག་སྲུང་སྐྱོབ་ཚོགས་པ་ནི་སྤྱི་ལོ་༢༠༠༧་ལོར་བཙུགས། ཚོགས་པ་འདིས་གཉན་པོ་གཡུ་རྩེའི་རི་རྒྱུད་གཙོས་བོད་ཀྱི་ས་ཁུལ་ཁག་ཅིག་ཏུ་ཁོར་ཡུག་སྲུང་སྐྱོབ་དང་རི་སྐྱེས་སྲོག་ཆགས་ཀྱི་རིགས་བརྙན་ལམ་དུ་ཟིན་ཐོར་བཀོད་ནས་སྲུང་སྐྱོབ་ཀྱི་ལས་དོན་སྒྲུབ་ཀྱི་ཡོད་ཅིང་། བོད་ཀྱི་ས་ཁུལ་ཁུག་ཏུ་རྩི་ཤིང་དང་སྲོག་ཆགས་ཀྱི་རིགས་མེད་བརླག་ཏུ་མི་འགྲོ་བའི་ཆེད་དུ་ཉམས་ཞིབ་ཀྱི་ལས་དོན་འདི་གཉེར། དེང་སྐབས་མཚོ་བོད་མཐོ་སྒང་གི་རི་ཆུའི་རིག་གནས་ཞེས་དཔེ་དེབ་ཁག་ཅིག་ཀྱང་བཏོན་འདུག ས་གནས་མི་དམངས་ལ་སྐྱེ་ཁམས་ཁོར་ཡུག་སྲུང་སྐྱོབ་བྱེད་ཕྱོགས་སྐོར་གྱི་གོ་རྟོགས་སྤེལ་བ་དང་ཁོར་ཡུག་སྲུང་སྐྱོབ་ཀྱི་ལས་འགུལ་མང་པོ་སྤེལ་གྱི་ཡོད་པ་རེད།།

རྒྱལ་སྤྱིའི་སྣ་མང་སྐྱེ་དངོས་ཀྱི་ཉིན་མོ་ཞེས་པ་ནི་མཉམ་འབྲེལ་རྒྱལ་ཚོགས་ཀྱིས་༡༩༩༢་ལོར་ཐག་གཅོད་བྱས་པ་ཞིག་ཡིན། སྤྱི་ལོ་༢༠༠༡་ལོ་ནས་བཟུང་སྟེ་རྒྱལ་སྤྱིའི་སྣ་མང་སྐྱེ་དངོས་ཀྱི་ཉིན་མོ་འདི་ལོ་ལྟར་སྤྱི་ཟླ་༥་བའི་ཚེས་༢༢་ལ་གཏན་ཁེལ་བྱུང་རྗེས་ལོ་རེ་བཞིན་དུ་སྲུང་བརྩི་བྱེད་བཞིན་འདུག གཉན་ཚོགས་ཀྱི་འཕྲིན་སྟེགས་སུ་ངོ་སྤྲོད་གནང་བ་ལྟར་ན། ཉིན་མོ་འདི་ནི་འགྲོ་བ་མིའི་རིགས་ཀྱི་སྤྱོད་ལམ་གྱི་གོ་ལ་ཧྲིལ་པོའི་སྣ་མང་སྐྱེ་དངོས་རྩ་མེད་གཏོང་བཞིན་པར་དྲན་སྐུལ་བྱེད་པའི་ཉིན་མོ་རེད་ཅེས་བཀྲལ། ད་སྔ་གོ་ལ་ཧྲིལ་པོར་སྲོག་ཆགས་དང་རྩི་ཤིང་གི་རིགས་ངོས་ཟིན་ཡོད་པ་ས་ཡ་༨་ཙམ་ཡོད་པ་དེའི་ཁོངས་ནས་ས་ཡ་༡་ལྷག་རྩ་སྟོང་དུ་འགྲོ་རྒྱུའི་ཉེན་ཁར་ཐུག་འདུག་ཅེས་བཀོད། ཉིན་མོ་འདིར་གཉན་ཚོགས་མ་ཡིན་པའི་བོད་པ་སྒེར་པ་ཁག་ཅིག་གིས་ཀྱང་བོད་ཀྱི་རི་སྐྱེས་སྲོག་ཆགས་དང་རྩི་ཤིང་སྐྱེ་དངོས་ལ་སྲུང་སྐྱོབ་བྱེད་ཕྱོགས་ཀྱི་པར་རིས་དང་རྩོམ་ཡིག་རྣམས་རང་རང་གི་སྐད་འཕྲིན་སོགས་དྲྭ་རྒྱའི་བརྒྱུད་ལམ་དུ་བཀྲམ་ནས་རྒྱལ་སྤྱིའི་སྣ་མང་སྐྱེ་དངོས་ཀྱི་ཉིན་མོར་སྲུང་བརྩི་བྱས་འདུག