ངོ་འཕྲད་བདེ་བའི་དྲ་འབྲེལ།

ཁྲིམས་ཞིབ་པ་ཟུར་པ་བློ་བཟང་མཁས་གྲུབ་ལགས་འདས་གྲོངས།


ཐད་ཀར་ཕབ་ལེན་གྱི་དྲ་འབྲེལ།

༄༅།། བོད་གཞུང་གི་ཁྲིམས་ཞིབ་པ་ཟུར་པ་བློ་བཟང་མཁས་གྲུབ་ལགས་ཨ་རིའི་ཝ་ཤིང་ཊོན་མངའ་སྡེའི་ཝྭེན་ཀུ་ཝྭར་གྲོང་ཁྱེར་གྱི་རང་ཁྱིམ་དུ་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་ཐོན་འདུག འདི་གར་གནས་ཚུལ་འགྲེལ་བརྗོད་གནང་དོན་ལ་གཞིགས་ན་བློ་བཟང་མཁས་གྲུབ་དམ་པ་དེ་ཉིད་བཞུགས་སྒར་དུ་གཞུང་ཞབས་ཟུར་པའི་བརྟན་བཞུགས་ལ་བཅར་ནས་ཨ་རིར་ཕྱིར་འཁོར་མཚམས་སུ་སྐུ་གཟུགས་མི་བདེ་བ་བྱུང་ཞིང་། ཁོང་ལ་སྨན་བཅོས་སོགས་ཐབས་ཤེས་གང་ཡོད་བྱས་ཀྱང་རིམ་བཞིན་སྐུ་གཟུགས་ཀྱི་གནས་སྟངས་ཇེ་ཞན་དུ་གྱུར་ཏེ་རེས་གཟའ་ཟླ་བའི་ཉིན་གྱི་སྔ་དྲོར་ཨ་རིའི་རང་ཁྱིམ་དུ་འདས་གྲངས་སུ་གྱུར་འདུག

བློ་བཟང་མཁས་གྲུབ་དམ་པ་དེ་ནི་བོད་མདོ་ཁམས་བྲག་གཡབ་ཏུ་སྤྱི་ལོ་༡༩༣༩་ལོར་འཁྲུངས། ཕྱིས་སུ་ར་སྟོད་དགོན་པར་ཆོས་ཞུགས་གནང་སྟེ་སྤྱི་ལོ་༡༩༥༩་ལོར་རྒྱ་གར་ལ་བཙན་བྱོལ་དུ་འབྱོར། ༡༩༦༣་ལོར་བོད་གཞུང་གི་གཞུང་ཞབས་ཁོངས་འཛུལ་ཞུགས་ཀྱིས་མི་ལོ་༤༠་ཉེ་བ་ཞིག་ལ་སྲི་ཞུ་བསྒྲུབས། མཐར་སྤྱི་ལོ་༢༠༠༠་ལོར་གཞུང་ཞབས་ཁོངས་ནས་བགྲེས་ཡོལ་ཕེབས་ཀྱང་ལོ་གཉིས་ཀྱི་རྗེས་སུ་བོད་མི་མང་སྤྱི་འཐུས་ལྷན་ཚོགས་ཀྱིས་མང་མོས་འོས་བསྡུའི་ལམ་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་པར་འོས་འདེམས་ཀྱིས་བསྐོ་བཞག་གནང་བ་བཅས་མདོར་ན་མི་ལོ་༤༠་ལྷག་ལ་བོད་གཞུང་གི་སྲི་ཞུ་བའི་ཁོངས་སུ་ཐེམ་པ་རིམ་འཛེགས་ཀྱིས་དྲུང་ཡིག་ཆེན་མོའི་བར་དུ་ལྷག་བསམ་ཧུར་བསྐྱེད་ཆེན་པོས་ཞབས་ཞུ་ཞུས་ཡོད་པ་རེད། བཙན་བྱོལ་བོད་གཞུང་གི་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་ནི་བློ་བཟང་མཁས་གྲུབ་དམ་པ་དེ་དང་མཉམ་དུ་བོད་གཞུང་གི་སྒྲིག་འཛུགས་ཁོངས་སུ་ཕྱག་ལས་གནང་མྱོང་ཡོད་མཁན་ཞིག་ཡིན་ཞིང་། ཁོང་གི་གསུངས་དོན་ལ་བློ་བཟང་མཁས་གྲུབ་དམ་པ་དེ་བོད་པ་བཙན་བྱོལ་བའི་ཁོངས་ནས་གཞུང་ཞབས་གྲས་སུ་སྒྲིག་ཞུགས་གནང་མཁན་རུ་ཁག་དང་པོར་མི་བཞི་ཡོད་པའི་གྲས་ཀྱི་གཅིག་རེད། རྒྱུན་དུ་མི་གཤིས་བཟང་པོ་དང་ལས་རོགས་མཐོ་དམན་ཀུན་ལ་མཐུན་པོ། ལབ་གླེང་གི་གནས་ཚུལ་གཏན་ནས་མེད་པའི་སྲི་ཞུ་བ་མིག་དཔེར་འོས་པ་ཞིག་རེད། ད་ལམ་ཁོང་འདས་གྲོངས་སུ་གྱུར་བའི་གནས་ཚུལ་ཐོས་པར་བློ་ཕམ་ཆེན་པོ་བྱུང་ཞེས་གསུངས་ཀྱི་འདུག

XS
SM
MD
LG