རྔ་བ་ཁུལ་གྱི་འབར་ཁམས་ས་གནས་སུ་ཆུ་ལོག་གི་གནོད་འཚེ།

༄༅།། དེང་སྐབས་རྒྱ་གཞུང་གིས་དབྱེ་བགོ་བྱེད་ཡོད་པའི་སི་ཁྲོན་ཞིང་ཆེན། རྔ་བ་བོད་རིགས་རང་སྐྱོང་ཁུལ་གྱི་འབར་ཁམས་ས་གནས་སུ་ཆུ་ལོག་བརྒྱུགས་ཏེ་གཞུང་ལམ་དང་ཟམ་པ་སོགས་ལ་གནོད་སྐྱོན་ཕོག་པའི་གནས་ཚུལ་ཐོན་འདུག དེ་ཡང་མིང་འདོན་བྱེད་འདོད་མེད་པའི་མི་སྣ་ཞིག་གིས་འདི་ག་རླུང་འཕྲིན་ཁང་ལ་གནས་ཚུལ་མཁོ་སྤྲོད་བྱུང་བ་ལྟར་ན། ཕྱི་ཟླ་༦་པའི་ཚེས་༡༣་ཉིན་གྱི་དགོང་མོར་རྔ་བ་ཁུལ་གྱི་འབར་ཁམས་ས་གནས་སུ་ཆར་ཞོད་ཆེན་པོ་བྱུང་སྟེ་ཆུ་ལོག་བརྒྱུགས་པས་རྒྱ་ལམ་དང་ཟམ་པ་ཁག་ལ་གས་སྲུབས་བྱུང་བ་ཡོད་པ་སྟེ། རྔ་བ་རྫོང་ནས་འབར་ཁམས་ཁུལ་དུ་བསྐྱོད་ས་དང་ཆུ་ཆེན་རྫོང་དུ་བསྐྱོད་ས་། ད་དུང་འཛམ་ཐང་ཕྱོགས་སུ་བསྐྱོད་ས་བཅས་ལ་ཆུ་ལོག་བརྒྱུགས། ལྷག་པར་དུ་ཕྱི་ཚེས་༡༤་དགོང་མོར་ཆུ་ལོག་གིས་ཟམ་པ་མང་པོ་ཞིག་བརྡིབས་ནས་རླངས་འཁོར་གྱི་འགྲིམ་འགྲུལ་འགགས་ཡོད་པའི་གནས་ཚུལ་ཐོན་འདུག དེ་རིང་ཕྱི་ཚེས་༡༥་ཉིན་རླུང་འཁོར་ཆུང་བའི་རིགས་ཡར་མར་བསྐྱོད་ཐུབ་པ་ཙམ་གྱི་རྒྱ་ལམ་དང་ཟམ་པ་རྣམས་བསྐྱར་གསོ་བྱུང་འདུག སྤྱིར་ཆུ་ལོག་བརྒྱུགས་ཡུལ་ལྟེ་བ་ནི་འབར་ཁམས་ཁུལ་ཡིན་རུང་ཉེ་འཁོར་གྱི་མི་མང་གི་ཁང་པ་མང་པོ་ཞིག་ལ་གས་སྲུབས་ཤོར་དུ་བཅུག་ཡོད་ཅིང་། ད་སྔ་མི་ལ་འཆི་སྐྱོན་བྱུང་བའི་གནས་ཚུལ་བྱུང་ཡོད་མེད་རྩད་གཅོད་གསལ་པོ་ཞིག་མི་ཐུབ་མོད། འོན་ཀྱང་རྒྱ་གཞུང་གི་ལམ་བཟོ་བ་དང་ཉེན་རྟོག་རུ་ཁག་གིས་འགྲུལ་བཞུད་བྱེད་མཁན་ཚོར་རོགས་རམ་བྱེད་ཀྱི་འདུག་ཅེས་འགྲེལ་བརྗོད་བྱས་བྱུང་།།

ས་བརྐོ་རྡོ་སློག་གི་འཕྲུལ་ཆས་ཁག་གིས་གཞུང་ལམ་དང་ཟམ་པ་ཆད་ཡོད་ས་ཁག་ཏུ་གནས་སྐབས་རིང་རླངས་འཁོར་ཆེ་ཆུང་རྣམས་འགྲུལ་བཞུད་བྱེད་ཐུབ་པའི་ལམ་ཞིག་བཟོ་བཞིན་པའི་སྒང་རེད་། ལོ་ལྟར་ས་གནས་དེར་ཆུ་ལོག་གི་གནོད་འཚེ་འབྱུང་གི་ཡོད་པ་དང་ཐེངས་འདིའི་ཆུ་ལོག་གི་གནོད་འཚེ་ནི་ཆར་ཤུགས་ཆེ་བའི་དབང་གིས་ཆུ་ལོག་བརྒྱུགས་པ་རེད་ཅེས་གནས་ཚུལ་མཁོ་སྤྲོད་བྱུང་ཡོད་པའི་སྐོར། བལ་ཡུལ་ནས་འདི་ག་རླུང་འཕྲིན་ཁང་གི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

Embed share

རྔ་བ་ཁུལ་གྱི་འབར་ཁམས་ས་གནས་སུ་ཆུ་ལོག་གི་གནོད་འཚེ།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:02:53 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།