བོད་ཀྱི་རྒྱལ་ས་ལྷ་སར་དམག་མི་མང་པོ་འབྱོར་བཞིན་པ།

༄༅།། ཕྱི་ཟླ་༦་པའི་ཚེས་༥་ནས་བོད་ཀྱི་རྒྱལ་ས་ལྷ་སར་རྒྱ་ནག་གི་དམག་མི་མང་པོ་ཞིག་འབྱོར་བཞིན་ཡོད་པ་དང་མིང་འདོན་བྱེད་འདོད་མེད་པའི་འབྲེལ་ཡོད་བོད་པ་ཞིག་གིས་འདི་ག་རླུང་འཕྲིན་ཁང་གི་གསར་འགོད་པར་གནས་ཚུལ་དང་འདྲ་པར་བཅས་པ་བཏང་འབྱོར་བྱུང་བར་གཞིགས་ན་རྒྱ་ནག་ནས་དམག་མི་མང་པོ་ཞིག་ལྷ་སའི་མེ་འབོར་འབབ་ཚུགས་སུ་འབྱོར་འདུག མེ་འཁོར་འབབ་ཚུགས་ཀྱི་སྒོ་རྟགས་ཨང་༡༡་པ་དང་༡༢་པ། ཆེད་མངགས་དམག་མིའི་འགྲོ་ལམ་བཟོས་པ་ཡིན་རུང་མི་མང་དཀྱུས་མ་རྣམས་འཛུལ་སྒོ་དེ་དག་གི་ནང་དུ་འཛུལ་ཆོག་གི་མེད་པ་རེད། རྒྱ་ནག་ནས་ཡོང་བའི་དམག་མི་རྣམས་སྔོན་ཆད་ལྷ་སའི་གཙང་ཆུའི་འགྲམ་དུ་དམག་གི་མཐོ་སློབ་ཞིག་ཡོད་པ་དམག་མིའི་སྣེ་ལེན་ཁང་ལ་བསྒྱུར་ཡོད་པ་དེར་ཁྲིད་འདུག

གསར་འགྱུར་མཁོ་སྤྲོད་པས་དམག་མིའི་སྣེ་ལེན་ཁང་དེ་ནི་༢༠༡༩་ལོར་གསར་དུ་སྒོ་ཕྱེ་པ་དང་ལྷ་ལྡན་གཙུག་ལག་ཁང་གི་གཡས་ཕྱོགས་ནས་སྤྱི་ལེ་༡༢་ཀྱི་མཚམས་སུ་ཡོད་པ་རེད། སྣེ་ལེན་ཁང་དེར་རྒྱ་ནག་གི་ས་ཁུལ་གཞན་ནས་འབྱོར་བའི་དམག་མི་ཚོས་ཐོ་འགོད་དང་གནས་སྡོད་བྱ་ཡུལ་ཞིག་རེད། ད་རེས་རྒྱ་ནག་ནས་ལྷ་སའི་དམག་མིའི་སྣེ་ལེན་ཁང་དུ་དམག་མི་གསར་པ་འབྱོར་བ་རྣམས་གཞིས་ཀ་རྩེ་དང་ལྷོ་བྲག་ཕྱོགས་སུ་གཏང་འཆར་ཡོད་པའི་གནས་ཚུལ་གོ་ཐོས་བྱུང་སོང་ཞེས་བཤད་འདུག

ཁོང་གིས་མུ་མཐུད་དུ་ད་ལོ་དང་ན་ནིང་གཉིས་ལ་རྒྱ་དཀར་ནག་གཉིས་ལ་ས་མཚམས་ཀྱི་རྩོད་གླེང་བྱུང་བ་དེ་ལ་བསྟུན་ནས་དམག་མི་ཧ་ཅང་མང་པོ་ཞིག་བོད་རང་སྐྱོང་ལྗོངས་སུ་གཏོང་གི་འདུག རྒྱ་ནག་གི་ཚོགས་ཆེན་གཉིས་ཚོགས་ནས་བཟུང་སྟེ་དམག་མི་ཡར་རྒྱས་གཏང་གི་ཡིན་ཞེས་བཤད་ཀྱིན་འདུག རྒྱ་ནག་གཞུང་གིས་༢༠༢༠་ལོའི་མགོ་སྟོད་ནས་ལྷ་སའི་ཉེ་འགྲམ་དུ་ཡོད་པའི་ཀྲུང་ཏུའུ་དམག་སྒར་ཞེས་པ་དེར་རྒྱ་ནག་གི་གྲོང་ཁྱེར་ཁག་༢༠་ཡས་མས་ནས་དམག་མི་༢༥༠༠༠༠་ཙམ་བཏང་སྟེ་བོད་ཁུལ་ལ་སྔར་ལས་དམ་དྲག་བྱ་རྒྱུ་ཡིན་འདུག དེང་སྐབས་ལྷ་སའི་ནང་ཁུལ་དང་ལྷ་སའི་མེ་འཁོར་འབབ་ཚུགས་ལ་སྔར་དང་མི་འདྲ་བར་དམག་མི་མང་པོ་མཐོང་རྒྱུ་འདུག་བཅས་འགྲེལ་བརྗོད་བྱས་ཡོད་པའི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

Embed share

བོད་ཀྱི་རྒྱལ་ས་ལྷ་སར་དམག་མི་མང་པོ་འབྱོར་བཞིན་པ།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:14 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།