ངོ་འཕྲད་བདེ་བའི་དྲ་འབྲེལ།

༧གོང་ས་མཆོག་ལ་བྷ་ར་ཏ་རཏྣ་གཟེངས་རྟགས་འབུལ་དགོས་པའི་ལས་འགུལ།


༄༅།། རྒྱ་གར་བ་སྟོང་ཕྲག་མང་པོས་བོད་ཀྱི་བླ་ན་མེད་པའི་དབུ་ཁྲིད་༧གོང་ས་སྐྱབས་མགོན་ཏཱ་ལའི་བླ་མ་མཆོག་ལ་རྒྱ་གར་གྱི་ཆེས་མཐོའི་གཟེངས་རྟགས་ཏེ། བྷ་ར་ཏ་རཏྣ་འབུལ་དགོས་པའི་འབོད་སྐུལ་དང་ལས་འགུལ་སྤེལ་བཞིན་ཡོད་ཅིང་། ཉེ་ཆར་རྒྱ་དཀར་གཉིས་ལ་བོད་ཀྱི་ས་མཚམས་ཁག་ཏུ་འཁྲུག་རྩོད་བྱུང་བ་དང་སྔ་ལོ་རྒྱ་ནག་ནས་ཏོག་དབྱིབས་ནད་དུག་ཁྱབ་པའི་སྟབས་ཀྱིས་རྒྱ་གར་གཞུང་དམངས་གཉིས་ཀས་རྒྱ་ནག་ལ་འཛིན་པའི་ལྟ་སྟངས་དེར་འགྱུར་ཐེབས་ཀྱི་ཡོད་པ་རེད། ཕྱི་ཚེས་༢༡་ཉིན་རྒྱ་གར་རྒྱལ་ཡོངས་སུ་ཁྱབ་པའི་རྒྱ་གར་བོད་དོན་རྒྱབ་སྐྱོར་ཚོགས་པའི་རྒྱལ་ཡོངས་འབྲེལ་མཐུད་པ་དང་འབྲེལ་མཐུད་པ་གཞོན་པ་༡༡་གིས་དྲྭ་ལམ་དུ་ཚོགས་འདུ་ཞིག་བསྐོངས་ནས་ཚོགས་ཞུགས་པ་ཚང་མས་གཅིག་གྱུར་གྱིས་རྒྱ་གར་གཞུང་གིས་༧གོང་ས་ཏཱ་ལའི་བླ་མ་མཆོག་ལ་བྷ་ར་ཏ་རཏྣ་གཟེངས་རྟགས་འབུལ་དགོས། རྒྱ་གར་གྱི་རྒྱལ་ས་ལྡི་ལིའི་རྒྱལ་ཡོངས་གྲོས་ཚོགས་སུ་༧གོང་ས་ཏཱ་ལའི་བླ་མ་མཆོག་གདན་འདྲེན་ཞུས་ནས་གསུང་བཤད་གནང་དུ་འཇུག་དགོས། དེ་བཞིན་བོད་མིའི་སྒྲིག་འཛུགས་ཀྱི་ཆེ་མཐོང་གོང་འདེགས་ཡོང་སླད་ཆབ་སྲིད་དང་འཛིན་སྐྱོང་གི་ལས་འགུལ་གང་མང་སྤེལ་ནས་རྒྱ་ནག་ལ་བརྡ་ལན་གསལ་པོ་ཞིག་སྤྲོད་དགོས་ཞེས་གྲོས་སྡུར་བྱས་འདུག

དྲྭ་ལམ་ཚོགས་འདུ་དེ་གོ་སྒྲིག་བྱེད་མཁན་རྒྱ་གར་གྱི་རྒྱལ་ས་ལྡི་ལིར་གནས་འཁོད་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ཀྱིས་རྩ་བའི་ཐེངས་འདིའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་འདུ་འདི་མ་ཚོགས་གོང་དུ་ཕྱི་ཟླ་༧་ཚེས་༢༤་ནས་ད་ལྟའི་བར་དུ་དྲྭ་ལམ་དུ་ཚོགས་འདུ་ཐེངས་༢༦་ལྷག་ཚོགས་ཟིན། ལྷག་པར་དུ་ཟླ་བ་འདིའི་ཕྱི་ཚེས་༡༤་སྟེ། རྒྱ་གར་རང་བཙན་གྱི་སྔ་ཉིན་དེར་ཧིན་བོད་མཛའ་འབྲེལ་ཚོགས་པ་དང་བྷ་ར་ཏ་བོད་དོན་ཚོགས་པ། ཧི་མ་ལ་ཡའི་ཁྱིམ་ཚང་ཚོགས་པ་སོགས་རྒྱ་གར་གྱི་བོད་དོན་རྒྱབ་སྐྱོར་ཚོགས་པ་ཁག་༡༧་གྱི་ཚོགས་འདུ་རྒྱས་པ་ཞིག་ཚོགས་འདུག་ཅེས་བཤད།།

ཐེངས་འདིའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཁོངས་ཀྱི་ནང་པའི་སྡེ་ཚན་གྱི་ཚོགས་འདུ་དེར་རྒྱལ་ཡོངས་སྤྱི་ཁྱབ་འབྲེལ་མཐུད་པ་གྲོས་ཚོགས་འཐུས་མི་ཟུར་པ་ཁེ་ཨར་ཁི་རི་མཱེ་དང་སྐུ་ཞབས་ཀུལ་དིབ་ཨ་གྷ་ཎི་ཧོ་ཊི་རི། ལྕམ་རུ་བྷི་མུ་ཁེར་ཇཱི་སོགས་ཕེབས་འདུག སྤྱིར་རྒྱ་གར་རྒྱལ་ཡོངས་སུ་བོད་དོན་རྒྱབ་སྐྱོར་ཚོགས་པ་འདྲ་མིན་ཞིག་ཡོད་པ་དེ་དག་གིས་ལས་གྲུབ་པའི་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་གཙོ་གྲས་ཏེ། ནང་པའི་སྒྲིག་འཛུགས་ནི་༢༠༠༢་ལོར་གསར་འཛུགས་བྱུང་སྟེ་བོད་པའི་རང་དབང་འཐབ་རྩོད་ཁག་ལ་རྒྱབ་སྐྱོར་དང་བོད་དོན་གྱི་ལས་འགུལ་ཁག་སྤེལ་དང་སྤེལ་བཞིན་ཡོད་པའི་སྐོར། ལྡི་ལི་ནས་འདི་གའི་གསར་འགོད་པ་བསྟན་འཛིན་ནོར་བཟང་ལགས་ཀྱིས་བཏང་བའི་གནས་ཚུལ་དེ་གནས་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།


XS
SM
MD
LG