རྒྱ་ནག་གིས་བོད་པ་ཚོ་རྒྱ་གར་ལ་འགྲོ་སྐྱོད་འགོག་དོན།

༄༅།། ཉེ་བའི་ལོ་ཤས་ཤིག་ནས་རྒྱ་གར་ལ་བོད་ནས་བཙན་བྱོལ་དུ་འབྱོར་མཁན་ཇེ་ཉུང་དུ་ཕྱིན་ཡོད་ཅིང་། དེ་ནི་བོད་ནང་གི་ཁོར་ཡུག་གཏོར་སྐྱོན་དང་སྐད་ཡིག་སློབ་ཁྲིད་ཀྱི་རང་དབང་མེད་པ་སོགས་དུས་ཐོག་ཏུ་བོད་ཕྱི་ཕྱོགས་སུ་ཁྱབ་ཏུ་མི་འཇུག་རྒྱུའི་ཆེད་དུ་རེད་ཅེས་བོད་ནང་གི་མགོ་ལོག་ཁུལ་གྱི་རྒྱ་གཞུང་གི་ལས་བྱེད་པ་ཟུར་པ་ཞིག་གིས་འདི་གའི་གསར་འགོད་པར་འགྲེལ་བརྗོད་བྱས་འདུག ཁོང་གིས་ཕྱི་ལོ་༢༠༠༨་ཀྱི་གཞུག་ནས་རིམ་བཞིན་བོད་ནས་བལ་ཡུལ་བརྒྱུད་དེ་རྒྱ་གར་ལ་བྲོས་བྱོལ་དུ་འགྲོ་མཁན་ཇེ་ཉུང་དུ་སོང་ཡོད་པ་རེད། དེ་ནི་གཙོ་བོ་ལམ་ཁྲིད་པ་མང་པོ་ཞིག་རྒྱ་ནག་གིས་འཛིན་བཟུང་བྱས་པ་དང་ས་འཚམས་ཁག་ཏུ་བཀག་སྡོམ་བྱུང་བ། མདོ་ཁམས་ཕྱོགས་ཀྱི་བོད་པ་མང་པོ་ཞིག་ལྷ་སར་འབྱོར་ཏེ་བྲོས་བྱོལ་ལ་འགྲོ་གྲབས་བྱས་མ་ཐག་ཏུ་རྒྱ་གཞུང་གིས་འཛིན་བཟུང་བྱེད་ཀྱི་ཡོད་པ་སོགས་ལ་འབྲེལ་བ་ཡོད་པས་བྲོས་བྱོལ་དུ་འགྲོ་རྒྱུ་མཚམས་ཆད་པའི་གནད་དོན་གཅིག་དེ་རེད་ཅེས་བརྗོད་བྱུང་།།

ཁོང་གིས་མུ་མཐུད་དུ་བརྗོད་དོན། གནད་དོན་གཉིས་པ་ནི་རྒྱ་གཞུང་གིས་འཆར་གཞི་ལྡན་པའི་སྒོ་ནས་རོང་འབྲོག་མང་ཚོགས་ལ་རོགས་དངུལ་སྤྲོད་པ་དང་ནགས་སྲུང་། རྩྭ་སྲུང་སོགས་ཀྱི་ལས་ཀ་གོ་སྒྲིག་བྱས་ནས་ཁང་པ་འཛུགས་སྐྲུན། ཆུ་དང་གློག་གི་མཐུན་རྐྱེན་སྦྱོར་བ། འབྱོར་མེད་དུད་ཁྱིམ་གྱི་མི་གྲངས་ལྟར་དཔལ་འབྱོར་གྱི་རོགས་དངུལ་སྤྲོད་པ་བཅས་ཀྱིས་བོད་པ་ཞིང་འབྲོག་མང་ཚོགས་ཀྱི་འཚོ་བར་འགྱུར་རྡོག་ཆེན་པོ་ཐེབས་པ་རེད། གནད་དོན་གསུམ་པ་ནི་རྒྱ་གཞུང་གིས་བོད་པའི་འབྲོག་པ་རྣམས་གྲོང་སྡེ་ཅན་དུ་བསྒྱུར་དགོས་ཞེས་སྲིད་ཇུས་ཤིག་ལག་ལེན་བསྟར་ནས་མང་ཚོགས་མཉམ་དུ་བསྡུས་ཏེ་གྲོང་ཁྱེར་གྱི་འཚོ་བའི་རྣམ་པ་ཅན་དུ་བསྒྱུར་པ། འདི་དང་དུས་མཚུངས་སུ་རྒྱ་ནག་གི་རྩ་ཁྲིམས་ལ་འགལ་མི་ཉན་པའི་སློབ་གསོ་ཡང་ནས་ཡང་དུ་གཏོང་གི་ཡོད་པར་མ་ཟད། ཁྲིམས་འགལ་གྱི་རིགས་ལ་ཉེས་ཆད་ཕོག་པ་དང་ཁྱིམ་ཚང་དེའི་བྱིས་པ་རྣམས་སློབ་གྲྭར་འགྲིམ་མི་ཆོག་པའི་བཀག་འགོག་ཐེབས་ཀྱི་ཡོད་པས་བོད་ཀྱི་རོང་འབྲོག་མང་ཚོགས་ཀྱི་བློ་ཁ་བསྒྱུར་ཡོད་པ་རེད།།

གོང་གི་རྒྱུ་མཚན་དེ་དག་ལ་བརྟེན་ནས་བོད་ཀྱི་གནས་ཁག་ཏུ་རང་ལུས་མེར་སྲེག་བཏང་བའི་ཛ་དྲག་གི་གནས་ཚུལ་བྱུང་བ་དང་གཏེར་ཁ་སྔོག་འདོན། སྐད་ཡིག་སློབ་ཁྲིད་ཀྱི་རང་དབང་མེད་པ་སོགས་ལ་འབུར་དུ་ཐོན་ཏེ་སྐད་ཆ་བཤད་མཁན་མེད་པར་གྱུར་པ་རེད། ཞིང་ཆེན་གྱི་རྒྱལ་ས་དང་ཁུལ་ཐོག་ཏུ་གཏན་སྡོད་བྱེད་བཞིན་པའི་བོད་པ་མང་པོ་ཞིག་རྒྱ་གཞུང་གི་ལས་བྱེད་པ་ཡིན་པས་རང་གི་འཚོ་བའི་ཡོང་འབབ་ཆེད་དུ་གནད་དོན་མང་པོ་ཞིག་མིག་གིས་མ་མཐོང་བ་དང་ཤེས་རྟོགས་མ་བྱུང་ཁུལ་བྱས་ནས་མི་སྡོད་ཐབས་མེད་དུ་གྱུར་འདུག མདོར་ན་བོད་ཕྱི་ལོགས་སུ་གནས་ཚུལ་མཁོ་སྤྲོད་བྱེད་པ་ལས་རང་གི་འཚོ་བ་དང་བདེ་འཇགས་གལ་ཆེན་ཏུ་བརྩིས་ན་ལེགས་སྙམ་སྟེ་བཤད་མ་ཕོད་པ་རེད་ཅེས་བརྗོད་བྱས་ཡོད་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

Embed share

རྒྱ་ནག་གིས་བོད་པ་ཚོ་རྒྱ་གར་ལ་འགྲོ་སྐྱོད་འགོག་དོན།

by ཝི་ཨོ་ཨེ།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:50 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།