ངོ་འཕྲད་བདེ་བའི་དྲ་འབྲེལ།

གཟའ་པ་སངས། ༢༠༢༤/༠༣/༢༩

བོད་ཀྱི་དཀར་མཛེས་དང་རྫ་ཆུ་ཁའི་ཕྱོགས་སུ་ས་འགུལ།


ཐད་ཀར་ཕབ་ལེན་གྱི་དྲ་འབྲེལ།

༄༅།། དེང་སྐབས་རྒྱ་ནག་གཞུང་གིས་ཆ་བགོ་བྱེད་ཡོད་པའི་དཀར་མཛེས་བོད་རིགས་རང་སྐྱོང་ཁུལ་དང་རྫ་ཆུ་ཁའི་ཕྱོགས་སུ་ས་འགུལ་བརྒྱུགས་ཏེ་རོང་འབྲོག་མང་ཚོགས་ཀྱི་ཁང་པར་གས་སྲུབས་བྱུང་བ་དང་མི་མང་པོ་ཞིག་གནས་སྐབས་རིང་གུར་བརྒྱབ་སྡེ་ཕྱི་ལོགས་སུ་བསྡད་ཡོད་པའི་གནས་ཚུལ་ཐོན་འདུག

ས་གནས་དེའི་བོད་པ་ཁག་ཅིག་ལ་འདི་ག་རླུང་འཕྲིན་ཁང་གི་གསར་འགོད་པས་བཅར་འདྲི་ཞུས་ནས་ཤེས་རྟོགས་བྱུང་བར་གཞིགས་ན། ཐེངས་འདིའི་ས་འགུལ་རྒྱུག་ཡུལ་ནི་སི་ཁྲོན་ཞིང་ཆེན་ཁོངས་སུ་བཅུག་པའི་དཀར་མཛེས་ཁུལ་དང་སྡེ་དགེ་རྫོང་། ཧྲི་ཆུ་རྫོང་བཅས་ཡིན་རུང་མི་ལ་སྲོག་སྐྱོན་དང་དཔལ་འབྱོར་གྱི་གྱོང་གུད་ཆེན་པོ་ཐེབས་མེད་ཅིང་། མང་ཚོགས་ཀྱི་ཁང་པར་གས་སྲུབས་ཤོར་འདུག བོད་པ་རོང་འབྲོག་གཉིས་ཀྱི་ནང་གི་འབྲོག་ཕྱོགས་སུ་ཁང་པ་མང་པོ་ཞིག་ལ་གས་སྲུབས་ཤོར་ཀྱང་ཁང་པ་འཐོར་ཞིག་སོང་བའི་གནས་ཚུལ་བྱུང་མི་འདུག གློ་བུར་དུ་ས་འགུལ་བརྒྱུགས་པའི་རྐྱེན་གྱིས་མི་མང་ལ་སྐྲག་སྣང་ཆེན་པོ་ཞིག་བྱུང་སོང་ཞེས་འགྲེལ་བཤད་བརྒྱབ་སོང་།

ས་གནས་དེའི་འབྲེལ་ཡོད་མི་སྣ་གཞན་ཞིག་གིས་ཐེངས་འདིའི་ས་འགུལ་དེས་སྐྱོན་འབྱུང་ཡུལ་ནི་རྫ་ཆུ་ཁའི་ཕྱོགས་ཀྱི་དབོན་པོ་རྫོང་དང་འབྱོམ་རྫ། ཨ་རིག་རྫ། འབྱོམ་རྫ་གོང་མ་བཅས་ལ་གནོད་སྐྱོན་ཅུང་ཟད་ཐེབས་ཀྱང་མི་ལ་སྲོག་སྐྱོན་བྱུང་བ་སོགས་ཀྱི་གནས་ཚུལ་ནི་གནས་སྐབས་རིང་ཅི་ཡང་མཐོང་ཐོས་བྱུང་མ་སོང་། དེ་རིང་ཕྱི་ཚེས་༢་ནས་བཟུང་སྟེ་གོང་གི་ས་གནས་ཁག་གི་རོང་འབྲོག་མང་ཚོགས་རྣམས་ཁང་པའི་ནང་དུ་འདུག་མ་ཕོད་པར་གུར་བརྒྱབ་ནས་ཕྱི་ལོགས་སུ་གནས་སྤོར་བྱས་འདུག གཙོ་བོ་རྒྱལ་ཁབ་ཀྱི་ས་འགུལ་བརྟག་དཔྱད་ཁང་གིས་བཤད་ན་ད་དུང་ཡང་ས་འགུལ་ཞིག་བརྒྱུག་ཉེན་ཆེ་ཟེར་གྱི་འདུག་པས་ཕྱི་ལོགས་སུ་བསྡད་ཡོད་ཅེས་བཤད་བྱུང་།

རྫ་ཆུ་ཁའི་ཕྱོགས་ཀྱི་རྫོང་སྡེ་ཁག་ལ་ས་འགུལ་གྱི་གནོད་སྐྱོན་ཆེན་པོ་ཐེབས་མེད་ཀྱང་མང་ཚོགས་ཀྱི་ཁང་པར་གས་སྲུབས་ཤོར་ཡོད་མེད་ལ་བརྟག་དཔྱད་བྱས་ཏེ་རྒྱལ་ཁབ་ཀྱི་ལས་བྱེད་པ་འགའ་འགྲོ་འོང་བྱེད་ཀྱི་འདུག་ཅེས་འགྲེལ་བརྗོད་བྱས་སོང་། གཞན་ཡང་སྤྱི་ཚོགས་དྲྭ་ལམ་ཁག་དུ་གནས་ཚུལ་སྤེལ་བ་ལྟར་ན། རྫ་ཆུ་ཁའི་འབྲེལ་ཡོད་སྡེ་ཁག་གིས་ས་འགུལ་མུ་མཐུད་དུ་བརྒྱུག་རྒྱུའི་སྔོན་དཔག་བྱེད་ཀྱི་ཡོད་པར་མ་ཟད། ཡུལ་མི་རྣམས་ཁྱིམ་དུ་ཉལ་མི་ཉན་པར་ཕྱི་ལོགས་སུ་ཉལ་དགོས་བའི་ཁྱབ་བསྒྲགས་བྱེད་བཞིན་འདུག ཐེངས་འདིའི་ས་ཡོམ་གྱི་འགུལ་ཚད་ནི་རིམ་པ་༥་དང་གྲངས་ཆུང་༦་རེད་ཟེར་གྱིན་འདུག་ཅེས་བཀོད་འདུག

XS
SM
MD
LG