༄༅།། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་ཏཱ་ལའི་བླ་མ་མཆོག་གིས་ཨ་རིའི་ཕྱི་སྲིད་དྲུང་ཆེ་ཨན་ཐོ་ཎི་བྷ་ལེན་ཁེན་གྱིས་བོད་དོན་གླེང་སློང་གནང་བར་རྗེས་སུ་ཡི་རངས་ཡོད་ཅེས་གསུང་འཕྲིན་ཞིག་སྩལ་འདུག་ཅིང་། དེ་ཡང་ཉེ་ཆར་ཨ་རིའི་ཕྱི་སྲིད་དྲུང་ཆེ་གསར་པའི་བོད་ཀྱི་ལྕགས་གླང་གནམ་ལོ་གསར་དུ་བཞད་པའི་དགའ་སྟོན་ལ་བསྟུན་ནས་ཧི་མ་ལ་ཡའི་མངའ་ཁུལ་གྱི་མི་དམངས་རྣམས་གཙོས་འཛམ་གླིང་གི་ས་ཕྱོགས་གང་སར་བོད་ཀྱི་ལོ་སར་ལ་དགའ་སྟོན་རྟེན་འབྲེལ་ཞུ་བཞིན་པ་ཚོར་ལོ་སར་གྱི་འཚམས་འདྲི་ཞུས། ༧གོང་ས་མཆོག་གིས་ཨ་རིའི་ཕྱི་སྲིད་དྲུང་ཆེའི་མཚན་ཐོག་ཏུ་སྩལ་བའི་གསུང་འཕྲིན་དེར་ཉེ་དུས་སྐུ་ཉིད་ཀྱིས་རྒྱ་ནག་གི་འགོ་ཁྲིད་ཚོར་མཇལ་འཕྲད་དང་བཀའ་མོལ་གནང་བའི་སྐབས་སུ་བོད་དོན་གླེང་སློང་གནང་བར་བཀའ་དྲིན་ཆེ། ད་དུང་སྐུ་ཉིད་ཀྱིས་ཡོངས་གྲགས་སུ་བོད་ཀྱི་ལོ་སར་ལ་འཚམས་འདྲི་ཞུས་པར་རྗེས་སུ་ཡི་རངས་ཡོད་ཅེས་བཀོད་འདུག
ཕྱི་སྲིད་དྲུང་ཆེ་བྷ་ལིན་ཁེན་གྱིས་ཨ་རིའི་གཞུང་དམངས་གཉིས་ཀྱི་ཚབ་ཞུས་ནས་བོད་ཀྱི་ལོ་སར་ལ་འཚམས་འདྲི་ཞུས་ཤིང་། ཁོང་གིས་བྷ་ཌན་གྱི་སྲིད་གཞུང་གིས་ལོ་ངོ་སྟོང་ཕྲག་གཉིས་ལྷག་ལ་དར་སྤེལ་བྱུང་བའི་བོད་ཀྱི་ཆོས་དང་རིག་གཞུང་། སྐད་ཡིག་བཅས་ལ་སྲུང་སྐྱོབ་དང་རྒྱུན་འཛིན། ཆེས་བསྟོད་ཞུ་རྒྱུའི་དམ་བཅའ་བརྟན་པོ་ཡོད་ཅེས་གསུངས་ཡོད་པར་མ་ཟད། ལོ་ངོ་བརྒྱ་ཕྲག་མང་པོའི་རིང་ལ་བྱམས་པ་དང་བརྩེ་བ། འཚེ་བ་མེད་པ་དང་ཞི་བདེ་བཅས་མཚོན་པའི་བོད་ཀྱི་རིག་གཞུང་ནི་བོད་གཅིག་པུ་མ་ཡིན་པར་འཛམ་གླིང་ཡོངས་སུ་ལོ་སར་ལ་དགའ་སྟོན་བྱེད་བཞིན་པ་ཚོར་ཕན་ཐོགས་བྱུང་ཡོད་པས་ཨ་རི་གཞུང་དུས་ནས་དུས་སུ་དེ་ལྟ་བུའི་མཛད་སྒོ་ཁག་ལ་མཉམ་ཞུགས་བྱ་རྒྱུའི་འདོད་པ་ཆེན་པོ་ཡོད་ཅེས་གསུངས་ཡོད་པ་རེད།།
༧གོང་ས་སྐྱབས་མགོན་ཆེན་པོ་མཆོག་གི་གསུང་འཕྲིན་དེར་སྐུ་ཞབས་བྷ་ལིན་ཁེན་གྱིས་ཨ་རིའི་ཕྱི་སྲིད་དྲུང་ཆེའི་མཛད་ཁུར་བཞེས་པར་འཚམས་འདྲི་ཡོད། སྐུ་ཉིད་ཀྱིས་བོད་པའི་ལོ་སར་ལ་འཚམས་འདྲི་ཞུས་པ་དེས་བོད་པ་སྤྱི་དང་ཁྱད་པར་དུ་གཞིས་བཞུགས་བོད་པ་ཚོར་དཀའ་སྡུག་གི་ཁྲོད་དུ་སྙིང་སྟོབས་མི་ཞུམ་པའི་སེམས་སྐུལ་དང་རེ་བ་ཞིག་སྤྲད་པ་རེད་ཅེས་གསུངས་ཡོད་ཅིང་། ཨ་རིའི་གཞུང་གིས་བོད་ཀྱི་ཆོས་དང་རིག་གཞུང་། སྐད་ཡིག་རྣམས་སྲུང་སྐྱོབ་དང་དར་སྤེལ་གཏོང་རྒྱུའི་དགོངས་པ་ནི་འཛམ་གླིང་འདིར་དུས་ཀྱི་དགོས་མཁོ་ཞིག་ཡིན་པས་ངོས་རང་ཧ་ཅང་དགའ་ཚོར་ཆེན་པོ་བྱུང་ཞེས་བཀོད།།
༧གོང་ས་མཆོག་གིས་ཨ་རིའི་སྲིད་འཛིན་ཇཱོ་བྷ་ཌན་གྱི་སྲིད་གཞུང་གིས་རྒྱལ་ཁབ་དང་མི་རིགས་མཉམ་རུབ་ཀྱིས་ཕྱག་ལས་གནང་རྒྱུའི་ཁ་ཡོད་ལག་ཡོད་ཀྱི་དགོངས་པ་དང་འབད་བརྩོན་བཅས་ཀྱིས་རྒྱལ་སྤྱིའི་ཐོག་ཏུ་བག་ཆག་བཟང་པོ་དང་ནུས་པ་ཡག་པོ་ཞིག་ཐེབས་ཐུབ་པའི་ཡིད་ཆེས་ཡོད། ཕྱི་སྲིད་དྲུང་ཆེ་བྷ་ལིན་ཁེན་གྱིས་གཅིག་ལ་གཅིག་བརྟེན་གྱི་འཛམ་གླིང་འདིར་ནུས་པ་མཉམ་སྤུངས་ཀྱི་དགོངས་པ་བཞེས་བཞིན་ཡོད་པར་དགེ་མཚན་ཆེ། རྒྱལ་ཁབ་མང་པོས་ཨ་རི་ནི་རང་དབང་དང་གཅིག་གྱུར། དྲང་བདེན་དང་དམངས་གཙོ་རྣམས་སྲུང་སྐྱོབ་བྱེད་མཁན་གྱི་དམིགས་དཔེར་ལྟ་ཡི་ཡོད། དེས་ན་ཨ་མི་རི་ཀས་འོས་ཤིང་འཚམས་པའི་འགན་འཁྲི་དེ་རྒྱུན་འཁྱོངས་གནང་དགོས་ཞེས་ནན་སྐུལ་གནང་འདུག
༧གོང་ས་སྐྱབས་མགོན་ཆེན་པོ་མཆོག་ནི་འཛམ་གླིང་གི་སའི་གོ་ལའི་གནམ་གཤིས་འགྱུར་ལྡོག་དང་ཁོར་ཡུག་སྲུང་སྐྱོབ་སོགས་ལ་བཀའ་མོལ་ལྷུག་པོ་དང་འཛེམ་ཟོན་མེད་པར་གསུང་མཁན་ཞིག་ཡིན་ཞིང་། ལྷག་པར་དུ་༧གོང་ས་མཆོག་གིས་ཁོར་ཡུག་སྲུང་སྐྱོབ་ལ་ཧུར་སྐྱེད་གནང་གི་ཡོད་པས་ཨ་རིའི་སྲིད་གཞུང་གསར་པས་གནམ་གཤིས་འགྱུར་ལྡོག་གི་གནད་དོན་ཛ་དྲག་ཅིག་ཏུ་བརྩིས་ནས་ཐུགས་ཁུར་ཆེ་བཞེས་ཀྱི་སྲིད་ཇུས་ཁག་ལག་ལེན་བསྟར་གྱི་ཡོད་པར་སླར་ཡང་བསྔགས་བརྗོད་གནང་འདུག ཕྱི་སྲིད་དྲུང་ཆེ་བྷ་ལིན་ཁེན་གྱི་ཕྱག་ལས་ལ་བར་ཆད་ཕྲ་མོ་ཙམ་ཡང་མེད་པར་ལས་དོན་མཐའ་དག་ལྷུན་གྱིས་གྲུབ་པའི་ཐུགས་སྨོན་མཚམས་སྦྱོར་གནང་ཡོད་པ་བཅས་ཀྱི་སྐོར། བཞུགས་སྒར་རྡ་རམ་ས་ལ་ནས་ཨ་རིའི་རླུང་འཕྲིན་ཁང་གི་གསར་འགོད་པ་བསྟན་འཛིན་བཟང་མོ་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
