༄༅།། ཁ་སང་ཕྱི་ཟླ་དང་པོའི་ཚེས་༢༠་ཉིན་ཨ་རིའི་སྲིད་འཛིན་༤༦་པ་ཇཱོ་བྷ་ཌན་དང་སྲིད་འཛིན་གཞོན་པ་ཀ་མ་ལ་ཧེ་རི་སི་རྣམ་གཉིས་ཀྱིས་ལས་ཁུར་དམ་འབུལ་གྱི་མཛད་སྒོ་ཚོགས་ཡོད་ཅིང་། ད་ནངས་སྔ་དྲོར་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་ཏཱ་ལའི་བླ་མ་མཆོག་དང་བོད་མིའི་སྒྲིག་འཛུགས། བོད་མི་དམངས་སྤྱི་འཐུས་ལྷན་ཁང་བཅས་ཀྱིས་ཨ་རིའི་སྲིད་འཛིན་གསར་པ་གཙོ་གཞོན་གཉིས་ལ་ལས་དོན་ཐམས་ཅད་གེགས་མེད་ལྷུན་གྲུབ་ཡོང་བའི་སྨོན་འདུན་དང་རྟེན་འབྲེལ་ཞུས་འདུག
སྲིད་འཛིན་བྷ་ཌན་གྱིས་ལས་ཁུར་བཞེས་པའི་ཉིན་དང་པོ་དེར་ཨ་མི་རི་ཀ་འཛམ་གླིང་གི་སའི་གོ་ལའི་གནམ་གཤིས་ལ་འགྱུར་ལྡོག་བཀག་སྡོམ་གྱི་རྒྱལ་སྤྱིའི་གྲོས་མཐུན་ཁོངས་སུ་བསྐྱར་ཞུགས་བྱ་རྒྱུའི་མཚན་བཀོད། ༧གོང་ས་སྐྱབས་མགོན་ཆེན་པོ་མཆོག་གིས་ཨ་རིའི་གཞུང་ཚབ་པ་བརྒྱུད་ནས་ཇཱོ་བྷ་ཌན་གྱིས་ཨ་རི་རྒྱལ་སྤྱིའི་གྲོས་མཐུན་དེའི་ཁོངས་སུ་བསྐྱར་ཞུགས་གནང་རྒྱུའི་མཚན་རྟགས་བཀོད་པར་བསྔགས་བརྗོད་ཆེན་པོ་ཡོད། སའི་གོ་ལའི་ཚ་དྲོད་རྒྱས་ཀྱི་ཡོད་པའི་གནད་དོན་ནི་འགྲོ་བ་མིའི་འཚོ་གནས་ལ་ཐད་ཀར་འབྲེལ་བ་ཡོད་པར་མ་ཟད། ཛ་དྲག་གི་གནད་དོན་ཞིག་ཀྱང་རེད་ཅེས་དྲན་སྐུལ་གནང་སོང་ཞེས་དགའ་ལྡན་ཕོ་བྲང་གི་དྲུང་ཡིག་ཆེན་མོ་ཆོས་སྐྱབས་པ་འཆི་མེད་རིག་འཛིན་གྱིས་ཞལ་པར་ཐོག་ཏུ་འགྲེལ་བརྗོད་གནང་སོང་།།
དགའ་ལྡན་ཕོ་བྲང་གི་དྲུང་ཆེན་མོ་འཆི་མེད་རིག་འཛིན་གྱིས་མུ་མཐུད་དུ་གསུངས་པ་ལྟར་ན། ༧གོང་ས་མཆོག་གི་གསུང་འཕྲིན་དེར་ཨ་མི་རི་ཀས་རང་དབང་དང་དམངས་གཙོ། ཆོས་དད་རང་དབང་དང་ཁྲིམས་སྐྱོང་ལམ་ལུགས་བཅས་པ་གལ་ཆེན་དུ་བརྩིས་ནས་རྒྱལ་ཁབ་འཛིན་སྐྱོང་གནང་གི་ཡོད་པར་ངོས་ནས་སྔ་མོ་ནས་ཡིད་སྨོན་དང་རྗེས་སུ་ཡི་རང་ཞུ་བཞིན་ཡོད། འཛམ་གླིང་ཡོངས་ཀྱིས་ཨ་རིའི་དམངས་གཙོའི་ཕུག་བསམ་དང་དབུ་ཁྲིད་ཀྱི་ནུས་པར་རེ་ལྟོས་འཆང་བཞིན་ཡོད་པས་དཀའ་ངལ་ཆེ་བའི་དུས་སྐབས་འདིར་སྐུ་ཞབས་བྷ་ཌན་གྱིས་འཛམ་གླིང་གི་དབུལ་ཕོངས་དང་ནད་མནར། དེ་བཞིན་འཚེ་བའི་དཀའ་སྡུག་མྱོང་མཁན་ཚོར་རོགས་སྐྱོབ་མཛད་དེ་ཞི་བདེའི་སྤྱི་ཚོགས་ཤིག་བསྐྲུན་རྒྱུའི་ལས་དོན་བསྒྲུབ་ངེས་ཡིན་པའི་ཡིད་ཆེས་བརྟན་པོ་ཡོད་ཅེས་འཁོད་འདུག དོན་ཚན་དེ་རྣམས་ཧ་ཅང་གི་གནད་འགག་ཆེན་པོ་ཤ་སྟག་རེད། དེ་རིང་གི་གསུང་འཕྲིན་འདི་བརྒྱུད་ནས་༧གོང་ས་མཆོག་གིས་ཨ་རིའི་གཞུང་དང་སྲིད་འཛིན་བྷ་ཌན། དེ་བཞིན་ཨ་རིའི་མི་དམངས་བཅས་ཀྱིས་བོད་དོན་ལ་རྒྱབ་སྐྱོར་གནང་བར་སླར་ཡང་བཀའ་དྲིན་ཆེ་ཞུས་སོང་ཞེས་གསུངས་ཡོད་པ་རེད།།
བོད་མིའི་སྒྲིག་འཛུགས་ཀྱི་དྲྭ་ལམ་དུ་སྲིད་སྐྱོང་བློ་བཟང་སེངྒེས་ཨ་རིའི་སྲིད་འཛིན་ཇཱོ་བྷ་ཌན་དང་སྲིད་འཛིན་གཞོན་པ་ཀ་མ་ལ་ཧེ་རི་སི་རྣམ་གཉིས་ལ་བོད་མིའི་སྒྲིག་འཛུགས་དང་བོད་པ་ཡོངས་ཀྱི་ཚབ་ཞུས་ནས་རྟེན་འབྲེལ་ཞུ་བའི་ཕྱག་བྲིས་ཞིག་བཀྲམ་ཡོད་ཅིང་། ཕྱག་བྲིས་དེར་ཨ་རིའི་སྲིད་གཞུང་རིམ་པ་ཞིག་གིས་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག བྷ་ཌན་གྱི་སྲིད་གཞུང་གསར་པས་ཀྱང་སྔར་བཞིན་བོད་དོན་ལ་རྒྱབ་སྐྱོར་གནང་རྒྱུའི་རེ་བ་ཡོད་ཅེས་བཀོད་ཡོད་པ་སོགས་བོད་མིའི་སྒྲིག་འཛུགས་ཀྱི་མགྲིན་ཚབ་པ་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ཀྱིས་ངོ་སྤྲོད་གནང་སོང་།
