ངོ་འཕྲད་བདེ་བའི་དྲ་འབྲེལ།

བོད་ཕྲུག་གསུམ་ལ་སྦྱངས་འབྲས་རྩེ་ཕུད་ཀྱི་གཟེངས་རྟགས་ཐོབ་པ།


༄༅།། བོད་པའི་སློབ་ཕྲུག་མང་པོ་ཞིག་རྒྱལ་གར་རྒྱལ་ཡོངས་ཀྱི་གྲོང་ཁྱེར་ཁག་གི་སློབ་ཆེན་རྣམས་འགྲིམ་བཞིན་ཡོད་པ་ལྟར་རྒྱ་གར་ལྷོ་ཕྱོགས་ཀྱི་གྲོང་ཁྱེར་ཁག་གི་མཐོ་སློབ་དེ་དག་གི་ནང་དུའང་བོད་ཕྲུག་སློབ་གཉེར་བ་མི་ཉུང་བ་ཞིག་ཡོད་ཅིང་། རྒྱལ་ཁབ་འདྲ་མིན་གྱི་སློབ་ཕྲུག་སྟོང་ཕྲག་མང་པོ་ཡོད་པའི་རྒྱ་གར་གྱི་མཐོ་སློབ་དེ་དག་གི་ནང་དུ་བོད་ཕྲུག་ཚོའི་ཤེས་ཡོན་སྦྱངས་འབྲས་གཟེངས་སུ་ཐོན་པ་ཇེ་མང་དུ་འགྲོ་བཞིན་ཡོད་པ་སྟེ། ལོ་འདི་གཅིག་པུར་རྒྱ་གར་ལྷོ་ཕྱོགས་སུ་སྙན་གྲགས་ཆེ་བའི་མཐོ་སློབ་ཁག་གཉིས་སུ་བོད་ཕྲུག་གསུམ་ལ་བསླབ་པ་མཐར་སོན་གྱི་མཛད་སྒོའི་ཐོག་ཏུ་ཤེས་ཡོན་སྦྱངས་འབྲས་རྩེ་ཕུད་གསེར་གྱི་རྟགས་མ་ཐོབ་འདུག

ཉེ་ཆར་༢༠༢༡་ལོའི་ཕྱི་ཟླ་དང་པོའི་ཚེས་༢༢་ཉིན་བྷེང་ལོར་གྲོང་ཁྱེར་གྱི་དྷ་ཡ་ནན་དྷ་ས་གྷར་གཙུག་ལག་སློབ་གྲྭའི་སྐབས་༤་པའི་བསླབ་པ་མཐར་སོན་གྱི་མཛད་སྒོའི་ཐོག་ཏུ་ཚོང་རིག་འཛིན་སྐྱོང་མཐོ་རིམ་རབ་འབྱམས་པའི་སྡེ་ཚན་དུ་སྦེལ་ཀོབ་གཞིས་ཆགས་ཀྱི་བུ་མོ་བསྟན་འཛིན་ཆོས་འཛོམས་ལ་སྦྱངས་འབྲས་རྩེ་ཕུད་གསེར་གྱི་རྟགས་མ་ཐོབ། མཐོ་སློབ་དེའི་ཚོང་རིག་མཐོ་རིམ་རབ་འབྱམས་པའི་སྡེ་ཚན་དུ་སྦེལ་ཀོབ་གཞིས་ཆགས་ཀྱི་བུ་མོ་བསོད་ནམས་ཆོས་སྐྱིད་ལ་སྦྱངས་འབྲས་རྩེ་ཕུད་གསེར་གྱི་རྟགས་མ་ཐོབ། དེ་བཞིན་ཕྱི་ལོ་༢༠༢༠་ལོའི་ཕྱི་ཟླ་༡༡་པར་མེ་སོར་གྲོང་ཁྱེར་གྱི་ཇཱེ་ཨེ་སི་ཨེ་སི་མཐོ་སློབ་ཏུ་བོད་ཕྲུག་སློབ་གཉེར་བ་པདྨ་རྒྱལ་མཚན་ལ་མཐོ་སློབ་དེའི་སྐབས་༡༡་པའི་བསླབ་པ་མཐར་སོན་མཛད་སྒོའི་ཐོག་ཏུ་ཁོར་ཡུག་ཚན་རིག་སྡེ་ཚན་ཀྱི་སྦྱངས་འབྲས་རྩེ་ཕུད་གསེར་གྱི་རྟགས་མ་ཐོབ་ཡོད་པ་རེད།།
དྷ་ཡ་ནན་དྷ་ས་གྷར་གཙུག་ལག་སློབ་གྲྭར་རྒྱལ་ཁབ་༢༧་གྱི་སློབ་ཕྲུག་༢༧༠༠༠་ལྷག་དང་ཇཱེ་ཨེ་སི་ཨེ་སི་མཐོ་སློབ་ཏུ་རྒྱལ་ཁབ་༢༠་ཙམ་གྱི་སློབ་ཕྲུག་༡༠༠༠༠་བརྒལ་བ་ཞིག་གིས་སློབ་སྦྱོང་བྱེད་བཞིན་ཡོད་འདུག བོད་ཕྲུག་སློབ་གཉེར་བ་ཚོས་མཐོ་སློབ་དེ་དག་ལ་ལོ་རེར་སློབ་ཡོན་བརྒྱ་ཆ་༢༥་མ་གཏོགས་སྤྲོད་མི་དགོས་པའི་དམིགས་བསལ་གྱི་ཆག་ཡང་ཐོབ། བུ་མོ་བསྟན་འཛིན་ཆོས་འཛོམས་དང་བསོད་ནམས་ཆོས་སྐྱིད་གཉིས་ལ་སྦྱངས་འབྲས་རྩེ་ཕུད་གསེར་གྱི་རྟགས་མ་ཐོབ་པར་དགའ་ཚོར་ཅི་བྱུང་དྲིས་པར་སློབ་ཕྲུག་གཉིས་ཀས་སོ་སོ་འཛིན་གྲྭར་མ་ཆད་པར་ཞུགས་པ་དང་རང་སྦྱོང་ཧུར་ཐག་བྱས་པའི་གྲུབ་འབྲས་ཡིན་ཞེས་ལན་འདེབས་བྱས་བྱུང་།།

གཞན་ཡང་པད་མ་རྒྱལ་མཚན་གྱིས་༧གོང་ས་མཆོག་དང་བོད་མིའི་སྒྲིག་འཛུགས། བོད་ཕྲུག་ཁྱིམ་སྡེ། དེ་བཞིན་དགེ་རྒན་རྣམ་པའི་ཐུགས་རྗེ་བཀའ་དྲིན་དང་སོ་སོ་རང་གིས་སློབ་སྦྱོང་ཧུར་བརྩོན་བྱས་པའི་གྲུབ་འབྲས་ཡིན་ཞེས་ལན་བཏབ། བོད་ཕྲུག་མང་པོ་ཞིག་བྷེང་ལོར་གྲོང་ཁྱེར་དུ་ཡོད་པའི་རྒྱ་གར་གྱི་མཐོ་སློབ་སྐད་གྲགས་ཅན་མང་དག་ཅིག་གི་ནང་དུ་བོད་ཕྲུག་ཁྱིམ་སྡེས་ཆེད་བཙུགས་བོད་ཁྱིམ་སྡོད་ཁང་གཅིག་པུར་སློབ་ཕྲུག་༢༠༠་ལྷག་གནས་སྡོད་བྱེད་ཀྱི་ཡོད་འདུག བོད་ཁྱིམ་སྡོད་ཁང་གི་དབུ་འཛིན་ཆོས་དབྱིངས་ཀྱིས་བྷེང་ལོར་གྲོང་ཁྱེར་དུ་བོད་ཕྲུག་སློབ་གཉེར་བ་རྣམས་ཤེས་ཡོན་སྡེ་ཚན་འདྲ་མིན་གྱི་ནང་དུ་སློབ་སྦྱོང་བྱེད་བཞིན་ཡོད། བོད་ཕྲུག་མང་ཆེ་བས་སྨན་ཞབས་པའི་སློབ་སྦྱོང་བྱེད་ཀྱི་འདུག སློབ་སྦྱོང་གི་གནས་ཚད་ཀྱང་འགྲིག་ངེས་འདུག་ཅེས་ངོ་སྤྲོད་གནང་བྱུང་།།
བྷེང་ལོར་གྲོང་ཁྱེར་དུ་གནས་འཁོད་བཀྲ་ཤིས་དབང་འདུས་ནི་དམིགས་བསལ་མཐོ་སློབ་ཁག་གི་བོད་པའི་སློབ་ཕྲུག་ཚོར་འབྲེལ་བ་དམ་ཟབ་ཡོད་པར་མ་ཟད། ཁོང་གིས་བོད་ཕྲུག་ཚོའི་སློབ་སྦྱོང་ལ་དོ་སྣང་ཆེན་པོ་གནང་གི་ཡོད་ཅིང་། སྐུ་ཞབས་བཀྲ་ཤིས་དབང་འདུས་ཀྱིས་དེང་སྐབས་སྔོན་དང་མི་འདྲ་བར་རྒྱ་གར་གྱི་མཐོ་སློབ་ཁག་ཏུ་བོད་ཕྲུག་གསེར་གྱི་རྟགས་མ་ལེན་མཁན་ཇེ་མང་དུ་འགྲོ་བཞིན་འདུག་ཅེས་བཤད། རྒྱ་གར་ལྷོ་ཕྱོགས་བྷེང་ལོར་དང་མེ་སོར་བཅས་ཀྱི་གཙུག་ལག་སློབ་གྲྭ་སྐད་གྲགས་ཅན་ཁེ་རེ་སི་སློབ་ཆེན་དང་ཨོཀ་སི་ཧྥོར་ཌི་སློབ་ཆེན། ཇཱེ་ཨེ་སི་སློབ་ཆེན་བཅས་སུ་འཛིན་སྐྱོང་དང་སྒྱུ་རྩལ། བཟོ་བཀོད། ཁྲིམས་ལུགས་སོགས་ལ་སློབ་སྦྱོང་བྱེད་མཁན་བོད་ཕྲུག་རྣམས་ལོ་རེ་བཞིན་ཇེ་མང་སོང་སྟེ་བྷེང་ལོར་གྲོང་ཁྱེར་གྱི་མཐོ་སློབ་བཅུ་གྲངས་ཤིག་གི་ནང་དུ་བོད་ཕྲུག་སློབ་གཉེར་བ་རྣམས་ཁྱབ་ཡོད་པའི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་ལྡན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།


XS
SM
MD
LG