༄༅།། རྒྱ་ནག་ནས་ཁྱབ་པའི་ཏོག་དབྱིབས་ནད་དུག་གིས་བཙན་བྱོལ་བོད་མིའི་མི་འབོར་དང་གཞིས་ཆགས་ཆེ་ཁག་སྟེ། རྒྱ་གར་ལྷོ་ཕྱོགས་ཀྱི་བོད་པའི་སྤྱི་ཚོགས་ལ་ཤུགས་རྐྱེན་ངེས་ཅན་ཞིག་ཐེབས་ཀྱི་ཡོད་ཅིང་། དཔེར་ན་དགོན་སྡེ་ཁག་གི་བསླབ་པ་སློབ་གཉེར་དང་མང་ཚོགས་ཀྱི་ཉིན་རེའི་འཚོ་བའི་བྱེད་སྒོ་ཡོངས་སུ་རྫོགས་པ་མཚམས་འཇོག་བྱ་དགོས་བྱུང་ཡོད་པ་ལྟར་སྦེལ་ཀོབ་བོད་མིའི་གཞིས་ཆགས་ཀྱི་གཞི་རིམ་མང་ཚོགས་ཁག་ཅིག་ལ་ཉིན་རེའི་འཚོ་བའི་དཀའ་ངལ་དང་ཤུགས་རྐྱེན་ཇི་ལྟར་ཐེབས་བཞིན་ཡོད་མེད་བཅས་ལ་བཅར་དྲི་ཞུས་ཡོད།
སྦེལ་ཀོབ་གཞིས་ཆགས་ལ་མཚོན་ན་གཞིས་ཆགས་ནང་ཁུལ་གྱི་བོད་པའི་བཟའ་ཆས་ཚོང་ཁང་རྣམས་ཉིན་ཧྲིལ་པོར་སྒོ་འབྱེད་ཆོག་གི་ཡོད་ཀྱང་ཚོང་བདག་གིས་སྔ་དྲོ་ནས་ཉིན་གུང་བར་དུ་ཉིན་ཕྱེད་མ་གཏོགས་སྒོ་འབྱེད་ཀྱི་མི་འདུག གོང་རིམ་གྱི་བཀའ་ལྟར་ཉོ་ཆ་རྒྱག་མཁན་ཚོས་ཀྱང་ཕན་ཚུན་རྒྱང་ཐག་འཇོག་གི་མི་འདུག དེང་སྐབས་ཚོང་བདག་གིས་ཕྱི་ནས་ཅ་དངོས་ཉོ་སྒྲུབ་བྱ་རྒྱུ་ཁག་ཏུ་སོང་ཡོད་ཀྱང་ཚོང་ཁང་དུ་ཅི་ཞིག་ཡོད་པ་དེ་ལ་རིན་གོང་མ་སྤར་པར་སྔར་བཞིན་ཉོ་མཁན་གྱི་དགོས་མཁོ་སྐོང་བཞིན་ཡོད་ཅེས་སྦེལ་ཀོབ་གཞིས་གྲོང་དང་པོའི་རྒྱ་མཚོ་ཚོང་ཁང་གི་འཛིན་སྐྱོང་འགན་འཛིན་བསྟན་འཛིན་ཕུན་ཚོགས་ལགས་ཀྱིས་གསུངས་བྱུང་།
