ཁྲེང་ཏུའུ་གྲོང་ཁྱེར་དུ་ལི་ཐང་གི་ན་གཞོན་ཞིག་འཛིན་བཟུང་། 

༄༅།། སྔ་ལོའི་ཕྱི་ཟླ་༥་པའི་ཚེས་༡༣་ཉིན་རྒྱ་ནག་གཞུང་གིས་བོད་མདོ་ཁམས་ལི་ཐང་ཉག་ཆུ་རྫོང་། ཧོར་ལུང་ཡུལ་ཚོའི་སྟོད་གནས་སྡེ་བའི་རྒྱ་རཱ་ཚང་གི་བུ་ཆུང་བ་བསྟན་འཛིན་ཡོན་ཏན་ཞེས་པ་ཞིག་ཁྲིང་ཏུའུ་གྲོང་ཁྱེར་ལ་ཅ་དངོས་ཉོ་རུ་བསྐྱོད། ཁོ་པར་རྒྱ་མིའི་ཚོང་ཁང་ཞིག་ཏུ་ཚོང་ཁང་གི་བདག་པོས་ཁྱོད་ཚོ་བོད་པ་ཚོ་ཚོང་ཁང་ནང་དུ་ཡོང་མི་ཆོག བོད་པ་ཚོ་ཡག་པོ་མེད་པ་དང་ཅ་དངོས་ཉོ་ཐུབ་ཀྱི་མ་རེད་ཅེས་མི་རིགས་དབྱེ་འབྱེད་དང་མཐོང་ཆུང་སོགས་ཀྱི་ངན་སྨོད་བྱས་པས་བོད་པ་ན་གཞོན་དེ་དང་རྒྱ་མི་ཚོང་ཁང་བདག་པོ་གཉིས་ཁ་རྩོད་ཤོར། ཚོང་ཁང་བདག་པོས་འཕྲལ་དུ་ཉེན་རྟོག་པར་ཁ་པར་བཏང་སྟེ་རྒྱ་གཞུང་གི་ཉེན་རྟོག་པས་རྒྱ་མི་དེར་གང་ཡང་མ་བྱས་པར་བསྟན་འཛིན་ཡོན་ཏན་ལ་ལག་རུབ་བརྒྱབ་ནས་རྡུང་རྡེག་བཏང་ཞིང་། ཁོ་པ་འཛིན་བཟུང་བྱས་ནས་ཁྲེང་ཏུའུ་གྲོང་ཁྱེར་གྱི་བཙོན་ཁང་ཞིག་ཏུ་ཟླ་བ་ལྔའི་རིང་ལ་བཙོན་འཇུག་བྱས་པ་རེད་ཅེས་འབྲེལ་ཡོད་ས་གནས་དེའི་བོད་པ་ཞིག་གིས་འདི་གའི་གསར་འགོད་པར་གནས་ཚུལ་མཁོ་སྤྲོད་བྱས་འདུག

གསར་འགྱུར་མཁོ་སྤྲོད་པས་རྒྱ་མི་ཚོང་ཁང་བདག་པོར་ནོར་འཁྲུལ་ཡོད་ཀྱང་ཉེན་རྟོག་པ་ཚོ་རྒྱ་མི་དེའི་ཕྱོགས་སུ་ལངས་ནས་འདྲི་རྩད་བྱས་མེད་ཅིང་། བོད་པ་བསྟན་འཛིན་ཡོན་ཏན་གྱིས་གནད་དོན་དེའི་འབྱུང་རྐྱེན་སོགས་ཉེན་རྟོག་པར་གསལ་བཤད་ཇི་ལྟར་བྱས་ཀྱང་ཉན་འཇོག་མ་བྱས་པར་ཉེས་རྡུང་ཚད་མེད་བཏང་འདུག འདི་ནི་རྒྱུན་དུ་རྒྱ་ནག་གི་ནང་ཁུལ་དུ་བོད་པ་ཚོར་རྒྱ་ནག་པ་ཚོས་མི་རིགས་དབྱེ་འབྱེད་ཆེན་པོ་བྱས་དང་བྱེད་བཞིན་པའི་གནས་ཚུལ་ཞིག་རེད། བོད་པ་ཚོར་མཐོང་ཆུང་དང་བརྙས་བཅོས་བྱས་ནས་སྡོད་བཟོད་མི་ཐུབ་པ་ཞིག་ལ་འགྱུར་གྱི་འདུག་ཅེས་བཤད། བསྟན་འཛིན་ཡོན་ཏན་ལ་ནག་ཉེས་མེད་ཀྱང་ཟླ་བ་ལྔའི་རིང་ལ་བཙོན་འཇུག་ཁྲིམས་ཐག་བཅད། ཁོ་པར་བཙོན་ཁང་དུ་གཅར་རྡུང་ཚད་མེད་བཏང་བ་དང་ངལ་རྩོལ་བཙན་བཀོལ། མཚན་དཀྱིལ་གྱི་དུས་སུ་གློ་བུར་དུ་མགོ་ལ་རས་ནག་པོ་གཡོགས་ནས་བཙོན་ཁང་བརྗེ་སྤོར་ཐེངས་མང་པོ་བརྒྱབ་པ། བཙོན་ཁང་བརྗེ་སྤོར་གྱི་དུས་ཚོད་ནི་རྟག་ཏུ་དགོང་མོའི་མུན་ནག་གི་དུས་སྐབས་ཡིན་པས་ས་གནས་གང་དུ་ཁྲིད་པ་སོགས་ཤེས་དཀའ། བཙོན་ཁང་ཁ་ཤས་ཀྱི་གནས་སྟངས་ནི་ཧ་ཅང་ཞན་པོ་ཡོད་ས་རེད་ཅེས་བཤད་འདུག

ཕྱི་ལོ་༢༠༢༠་ལོའི་ཟླ་༩་ཚེས་༡༤་ཉིན་བསྟན་འཛིན་ཡོན་ཏན་གློད་གྲོལ་ཐོབ། ཁོ་པ་གློད་གྲོལ་བཏང་བའི་སྐབས་སུ་ཡིག་ཆའི་ནང་དུ་ཅ་དངོས་རྐུ་འཕྲོག་གི་ནག་ཉེས་ཕོག་པ་རེད་ཅེས་བཀོད། ད་ལྟ་བཙོན་གྲོལ་ཐོབ་པའི་རྗེས་སུའང་རྒྱ་གཞུང་གིས་བསྟན་འཛིན་ཡོན་ཏན་གྱི་འགྲོ་འདུག་སྤྱོད་གསུམ་ལ་དོ་དམ་ནན་པོ་བྱེད་བཞིན་འདུག ཁོ་པ་ལོ་ན་༢༤་ལ་སོན་ཡོད་པ་དང་སྤུན་མཆེད་མིང་སྲིང་༧་ཡོད་པ་རེད། བསྟན་འཛིན་ཡོན་ཏན་གྱིས་ལོགས་སུ་ཁྱིམ་ཐབ་བཟུང་སྟེ་བཟའ་ཟླ་བུ་ཕྲུག་བཅས་བཟའ་མི་གསུམ་འདུག ཁྱིམ་ཚོང་གི་དཔལ་འབྱོར་ཡོང་ཁུངས་ནི་ལས་གཉེར་གྱི་ཡོང་འབབ་ལ་བརྟེན་དགོས་པ་དང་ཁོ་པ་བཙོན་འཇུག་བྱས་པའི་རིང་དུ་ཁྱིམ་ཚང་གི་འཚོ་བར་དཀའ་ངལ་མང་དག་ཅིག་ཕྲད། ཕྱི་ལོ་༢༠༠༨་ལོར་ས་བྱིའི་ཞི་རྒོལ་ཆེན་མོའི་ལངས་པའི་རྗེས་སུ་བོད་པ་ཚོར་རྒྱ་ནག་གི་ས་གནས་ཁག་ཏུ་མགྲོན་ཁང་གླ་མི་ཆོག་དང་ས་ཚིགས་ཁག་ཏུ་བོད་པ་ཚོར་དམིགས་སུ་བཀར་ནས་ཞིབ་བཤེར་བྱེད་ཀྱི་ཡོད་པའི་དཀའ་ངལ་རྣམས་མུ་མཐུད་དུ་ཡོད་པ་སོགས་ཀྱི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

Embed share

ཁྲེང་ཏུའུ་གྲོང་ཁྱེར་དུ་ལི་ཐང་གི་ན་གཞོན་ཞིག་འཛིན་བཟུང་།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:44 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།