རྒྱ་གཞུང་གིས་བོད་པའི་གྲྭ་བཙུན་ཚོ་སློབ་གྲྭར་འགྲིམ་དགོས་ཟེར།

Embed share

རྒྱ་གཞུང་གིས་བོད་པའི་གྲྭ་བཙུན་ཚོ་སློབ་གྲྭར་འགྲིམ་དགོས་ཟེར།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:04:15 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།

༄༅།། དེང་སྐབས་རྒྱ་གཞུང་གིས་དབྱེ་བགོ་བྱེད་ཡོད་པ་ལྟར་མཚོ་སྔོན་ཞིང་ཆེན་གྱི་ཡུལ་ཤུལ་ཁུལ། ཁྲི་འདུ་རྫོང་ཁོངས་ཀྱི་དགོན་སྡེ་ཁག་ཏུ་ཆོས་ཞུགས་བྱེད་ཡོད་པའི་གྲྭ་བཙུན་ལོ་༡༨་ལ་མ་སོན་པ་ཚོར་རྒྱལ་གཅེས་ཆོས་གཅེས་ཀྱི་སློབ་གསོ་འཐོབ་ཐབས་སུ་གཞུང་གི་སློབ་གྲྭ་ཁག་འགྲིམ་དགོས་པའི་བཀའ་རྒྱ་བཏང་ཡོད་པའི་གནས་ཚུལ་ཐོན་འདུག དེ་ཡང་མིང་དངོས་སུ་བརྗོད་འདོད་མེད་པའི་གནས་ཚུལ་མཁོ་སྤྲོད་པ་ཞིག་གིས་འདི་ག་རླུང་འཕྲིན་ཁང་ལ་བརྗོད་དོན་ལྟར་ན། རྒྱ་ནག་གཞུང་གིས་སྔ་རྗེས་སུ་བཀའ་རྒྱ་ཡང་ཡང་བཏང་སྟེ་གྲྭ་བཙུན་ལོ་ཆུང་རྣམས་སློབ་གྲྭར་འགྲིམ་དགོས་ཟེར། ལྷག་པར་དུ་ཁ་སང་སྤྱི་ཟླ་༦་པའི་ཚེས་༣༠་ཉིན་ཉ་མཚོ་ཟིལ་དཀར་དགོན་པའི་གྲྭ་པ་ལོ་༡༨་ལ་མ་སོན་པ་༦༠་ནས་༧༠་ཡས་མས་ཤིག་གཞུང་གི་བཀའ་རྒྱ་ལྟར་རྫོང་གི་སློབ་གྲྭར་བསྐྱལ་ནས་ཐོ་འགོད་བྱས་པ་དང་འདྲ་པར་ལེན་པ་སོགས་བྱས་འདུག

ད་དུང་དགོན་པ་གཞན་ཁག་ལའང་དཀའ་ངལ་གཅིག་མཚུངས་ཤིག་འཕྲད་བཞིན་ཡོད་པ་སྟེ། མདོ་སྔགས་སྐལ་བཟང་ཆོས་འཁོར་གླིང་ཞེས་པའི་བཙུན་དགོན་དེའི་བཙུན་མ་མང་པོ་ཞིག་ཀྱང་གཞུང་གི་སློབ་གྲྭར་འགྲིམ་དགོས་པའི་འབོད་འགུག་བྱས་འདུག་ཅིང་། རྒྱ་ནག་གི་འཆར་གཞི་ལྟར་ན་དུས་ཡུན་ཉིན་གྲངས་༢༠་ནས་ཟླ་ངོ་གཅིག་ཙམ་ལ་རྫོང་ཐོག་གི་སློབ་གྲྭའི་ནང་དུ་གྲྭ་བཙུན་ཚོར་སློབ་གསོ་སྤྲོད་རྒྱུའི་སྲིད་ཇུས་ཤིག་ལག་ལེན་བསྟར་རྒྱུ་ཡིན་པར་མ་ཟད། གྲྭ་བཙུན་དེ་དག་གི་ཕ་མ་ཁག་ཅིག་གིས་གཞུང་གི་བཀའ་རྒྱ་དེར་མི་འདོད་རྣམ་འགྱུར་བསྟན། ཁོ་ཚོས་རང་གི་བུ་ཕྲུག་ཚོ་ཐོག་མ་ཉིད་ནས་སློབ་གྲྭར་གཏོང་མ་ཤེས་པ་མིན། ང་ཚོར་བུ་ཕྲུག་དགོན་པར་བསྐྱལ་ནས་ནང་ཆོས་ལ་སློབ་སྦྱོང་བྱེད་དུ་འཇུག་འདོད་ཡོད་པས་དགོན་པར་བསྐྱལ་བ་ཡིན། བུ་ཕྲུག་ཚོར་གང་འདོད་བྱེད་དུ་འཇུག་མི་ཆོག གལ་སྲིད་རྒྱལ་ཁབ་ཀྱིས་ང་ཚོའི་བུ་ཕྲུག་དགོན་པར་འདུག་ཏུ་མི་འཇུག་ཚེ་། ང་ཚོས་རང་གི་བུ་ཕྲུག་རྣམས་རང་ཁྱིམ་ལ་ཕྱིར་ཁྲིད་བྱ་རྒྱུ་ཡིན་ཟེར་འདུག

གསར་འགྱུར་མཁོ་སྤྲོད་པས་མུ་མཐུད་དུ་བཤད་པ་ལྟར་ན། ཕ་མ་ཁག་ཅིག་གིས་བུ་ཕྲུག་རྣམས་རང་ཁྱིམ་ལ་ཁྲིད་འགྲོ་བ་དང་ཕ་མ་ཁག་ཅིག་གིས་བུ་ཕྲུག་རྣམས་རྫོང་ཐོག་ཏུ་སློབ་གྲྭར་ཁྲིད་རྗེས་དགོན་པར་ཕྱིར་སློག་བྱེད་ཀྱི་ཡོད་པའང་འབྱུང་གི་ཡོད་འདུག རྒྱ་ནག་གིས་ལོ་༡༨་ལ་མ་སོན་པའི་གྲྭ་བཙུན་རྣམས་སློབ་གྲྭར་སྐྱེལ་དགོས་ཞེས་སྲིད་ཇུས་ཤིག་ལག་ལེན་བསྟར་གྱི་ཡོད་པའི་དམིགས་ཡུལ་ནི་བོད་པ་ལོ་ཆུང་ཚོའི་བསམ་བློར་རྒྱལ་གཅེས་ཆོས་གཅེས་ཀྱི་སློབ་གསོ་དང་རྒྱལ་ཁབ་ལ་དགའ་ཞེན་གྱི་འདུ་ཤེས་བསྐྱེད་ཐུབ་པའི་ཆེད་དུ་ཡིན་ཞིང་། དུས་ཡུན་ཉིན་གྲངས་༢༠་ནས་ཟླ་ངོ་གཅིག་ཙམ་ལ་སློབ་གྲྭར་བསྐྱལ་ནས་སྦྱངས་འབྲས་འཐོན་ཐུབ་རྒྱུ་ཁག་པོ་རེད། གཙོ་བོ་དགོན་སྡེའི་སློབ་གསོ་དང་མི་རིགས་རང་གི་སྲོལ་རྒྱུན་རིག་གནས་བཅས་ལ་སློབ་སྦྱོང་བྱེད་དུ་འཇུག་རྒྱུའི་ཚབ་ཏུ་རྒྱལ་གཅེས་ཆོས་གཅེས་ཀྱི་བབ་ཆག་ཟབ་མོ་ཞིག་འཇོག་ཐུབ་པའི་ཆེད་དུ་རེད་ཅེས་བརྗོད་ཡོད་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་གནས་ཚུལ་བཏང་བ་ཞིག་གསན་རོགས་གནང་།།