ངོ་འཕྲད་བདེ་བའི་དྲ་འབྲེལ།

བོད་པའི་ཁྱིམ་ཚང་ཁག་གིས་ཞིས་ཅིན་ཕིང་གི་འདྲ་པར་བཤམ་དགོས་པ།


ཐད་ཀར་ཕབ་ལེན་གྱི་དྲ་འབྲེལ།

༄༅།། རྒྱ་ནག་གཞུང་གིས་བོད་ཀྱི་དཔལ་ཡུལ་རྫོང་དང་ཛམ་ཐང་ཕྱོགས་ཀྱི་བོད་པ་མང་ཚོགས་ལ་འདོད་མོས་ཡོད་མེད་མི་བལྟ་བར་རྒྱ་ནག་གི་འགོ་ཁྲིད་ཚོའི་འདྲ་པར་རེ་ཁྱིམ་ཚང་ཁག་ལ་བགོ་འགྲེམ་གྱིས་སྒྲིག་གཤོམ་བྱེད་དུ་འཇུག་གི་ཡོད་པའི་གནས་ཚུལ་ཐོན་འདུག དེ་ཡང་ཕྱི་ཟླ་༥་ཚེས་༡༣་ཉིན་འདི་ག་རླུང་འཕྲིན་ཁང་ལ་བོད་ནས་གནས་ཚུལ་འབྱོར་དོན་ལྟར་ན། རྒྱ་ནག་གི་སི་ཁྲོན་ཞིང་ཆེན་ཁོངས་སུ་ཆ་བགོས་བྱེད་ཡོད་པའི་དཔལ་ཡུལ་རྫོང་གི་ཁྲོམ་ཐ་ཁོག་ཡུལ་མཚོ་དང་སྡེ་པ་ཚང་མའི་བོད་པའི་ཁྱིམ་ཚང་ཕལ་ཆེ་བར་རྒྱལ་ཁབ་ཀྱི་འཛུགས་སྐྲུན་གསར་པ་དང་དབུལ་ཕོངས་ཕྱུག་འགྱུར་ཞེས་པའི་སྲིད་ཇུས་ཤིག་ལག་ལེན་བསྟར་ནས་རྒྱ་ནག་དམར་ཤོག་གི་འགོ་ཁྲིད་མའོ་ཙེ་ཏུང་དང་ཏིན་ཞའོ་ཕིན། ཞིས་ཅིན་ཕིན་བཅས་ཀྱི་འདྲ་པར་ཞིག་བོད་པའི་ཁྱིམ་ཚང་ཁག་ལ་བགོ་འགྲེམ་བྱས་ནས་སྒྲིག་གཤོམ་བྱེད་དུ་འཇོག་བཞིན་ཡོད་པ་རེད།།

ཐོག་མར་བོད་པའི་དུད་ཁྱིམ་སོ་སོའི་མཆོད་བཤམས་ནང་དུ་འདྲ་པར་དེ་བཤམ་དགོས་པའི་གླེང་སློང་བྱུང་ཡང་ཕྱིས་སུ་མཆོད་གཤོམ་ནང་དུ་སྒྲིག་གཤོམ་བྱེད་མི་དགོས་པར་གོང་རིམ་གྱི་ལས་བྱེད་པ་སོགས་སླེབས་པའི་སྐབས་སུ་འདྲ་པར་དེ་ཀུན་གྱིས་མཐོང་ཐུབ་ས་དང་ཁང་པའི་ནང་གི་མཐོ་ས་ཞིག་ལ་འགེལ་དུ་འཇུག་གི་ཡོད་འདུག འདི་ནི་གཙོ་བོ་རྒྱལ་ཁབ་ལ་དགའ་ཞེན་དང་བཀའ་དྲིན་ཆེ་ཚུལ་གྱི་རྣམ་པ་སྟོན་ཐབས་སུ་འདྲ་པར་དེ་དག་སྦྱར་དགོས་པ་ཞིག་རེད་ཅེས་བརྗོད་སོང་།།

འདི་དང་དུས་མཚུངས་སུ་བོད་ནང་གི་ཛམ་ཐང་ཕྱོགས་ཀྱི་གནས་ཚུལ་མཁོ་སྤྲོད་པ་ཞིག་གིས་ཀྱང་སི་ཁྲོན་ཞིང་ཆེན། རྔ་བ་བོད་རིགས་རང་སྐྱོང་ཁུལ་གྱི་ཛམ་ཐང་རྫོང་གི་མངའ་ཁོངས་ནམ་ཟླ་ཡུལ་མཚོ་དང་ཀ་ཐོག་ཛི་རོང་སོགས་ཀྱི་ཡུལ་སྡེ་དང་ཚོ་བ་ཚང་མའི་ནང་དུ་རྒྱ་གཞུང་གི་བཀོད་ཁྱབ་ལྟར་བོད་པའི་དུད་ཁྱིམ་ཁག་ལ་ལོ་ཤས་རིང་རྒྱ་ནག་དམར་ཤོག་གི་འགོ་ཁྲིད་གསུམ་གྱི་འདྲ་པར་སྒྲིག་གཤོམ་བྱེད་དུ་བཅུག་མོད། འོན་ཀྱང་ད་ལོ་ནས་བཟུང་སྟེ་རྒྱ་ནག་གི་སྲིད་འཛིན་ལས་ཐོག་ཞིས་ཅིན་ཕིང་གཅིག་པུའི་འདྲ་པར་མ་གཏོགས་འདྲ་པར་གཞན་ཚང་མ་ལེན་དུ་བཅུག་ཡོད་ཅིང་། དེང་སྐབས་བོད་པའི་ཁྱིམ་ཚང་ཁག་ལ་ཞིས་ཅིན་ཕིང་གི་འདྲ་པར་ཆེན་པོ་རེ་བགོ་འགྲེམ་བྱས་ནས་ཁྱིམ་གྱི་མཐོ་ས་ཞིག་ལ་འགེལ་དུ་འཇོག་བཞིན་ཡོད་འདུག བོད་པའི་ཁྱིམ་ཚང་གཅིག་ཀྱང་མ་ལུས་པར་འདྲ་པར་དེ་བཤམ་དགོས་པ་དང་། གལ་སྲིད་སྲིད་གཞུང་གིས་སྤྲད་པའི་ཞིས་ཅིན་ཕིང་གི་འདྲ་པར་དེ་མ་བཤམས་ན་རྒྱལ་ཁབ་ལ་ངོ་ལོག་དང་མི་དགའ་བའི་རྣམ་འགྱུར་བསྟན་པའི་གྲས་སུ་བརྩིས་ཏེ་རྗེས་སོར་དཀའ་ངལ་འཕྲད་རྒྱུ་ཡིན་ཞིང་། དེར་བརྟེན་བོད་པའི་ཁྱིམ་ཚང་ཁག་ལ་ཞིས་ཅིན་ཕིང་གི་འདྲ་པར་བཤམས་ནས་བཞག་འདུག་ཅེས་བརྗོད་སོང་།།

གཞན་ཡང་བོད་ནང་གི་མགོ་ལོག་ཁུལ་གྱི་རྫོང་ཁག་ཚང་མ་དང་མཚོ་ལྷོ་ཁུལ་གྱི་ས་གནས་ཁག་བཅས་རྒྱ་གཞུང་གིས་ལོ་ལྟར་རོགས་དངུལ་སྤྲོད་ཡུལ་བོད་པ་ཚང་མས་རང་ཁྱིམ་གྱི་མཐོ་ས་ཞིག་ལ་ད་ལྟའི་རྒྱ་ནག་གི་སྲིད་འཛིན་ཞིས་ཅིན་ཕིང་གི་འདྲ་པར་རེ་སྒྲིག་གཤོམ་བྱེད་དགོས་ཀྱི་ཡོད་པའི་གནས་ཚུལ་ཐོན་འདུག

XS
SM
MD
LG