ངོ་འཕྲད་བདེ་བའི་དྲ་འབྲེལ།

སྐད་འཕྲིན་ཞིབ་བཤེར་གྱི་སྒྲིག་གཞི་དོན་ཚན་བཅུ།


༄༅།། རྒྱ་ནག་གཞུང་གིས་སྐད་འཕྲིན་དྲྭ་ལམ་གྱི་ཁྲིམས་ལ་འགལ་འཛོལ་བྱེད་མཁན་ཚོར་ཁྲིམས་གཅོད་དང་སྐད་འཕྲིན་ལ་དོ་དམ། སྐད་འཕྲིན་ནང་གི་བརྗོད་བྱ་སོགས་ལ་ཞིབ་བཤེར་བྱེད་ཕྱོགས་ཀྱི་སྒྲིག་གཞི་དོན་ཚན་བཅུ་ཁྱབ་བསྒྲགས་བྱས་ཏེ་འགལ་འཛོལ་བྱེད་མཁན་བྱུང་ན་ལོ་གཅིག་ནས་ལོ་བརྒྱད་ཡས་མས་རེའི་བཙོན་འཇུག་གི་ཁྲིམས་གཅོད་བྱ་རྒྱུ་ཡིན་ཞེས་ཁྱབ་བསྒྲགས་བྱེད་བཞིན་པའི་གནས་ཚུལ་ཐོན་འདུག དེ་ཡང་ཕྱི་ཚེས་༡༣་ཉིན་མིང་དངོས་སུ་བརྗོད་འདོད་མེད་པའི་བོད་པ་ཞིག་གིས་འདི་གའི་གསར་འགོད་པར་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ཟླ་༨་པའི་༡༡་ཉིན་མཚོ་སྔོན་ཞིང་ཆེན་གྱི་མཚོ་ལྷོ་ཁུལ་དེའི་རྫོང་ཁག་སོ་སོར་ཚོགས་འདུ་བསྡུས་ཏེ་རོང་འབྲོག་མང་ཚོགས་ལ་སྐད་འཕྲིན་བེད་སྤྱོད་གཏོང་ཕྱོགས་དེར་གཟབ་ནན་བྱ་དགོས་བའི་སྒྲིག་གཞི་དོན་ཚན་བཅུ་གསལ་བསྒྲགས་བྱས་འདུག

གསར་འགྱུར་མཁོ་སྤྲོད་པས་སྐད་འཕྲིན་དོ་དམ་གྱི་སྒྲིག་གཞི་གཙོ་བོ་ནི་སྐད་འཕྲིན་ནང་དུ་རྒྱལ་ཁབ་ལ་གནོད་པའི་སྐད་ཆ་བཤད་མི་ཆོག་པ་དང་ཁ་འཁྲུག་གཏོར་བརླག་བཤད་མི་ཆོག་པ། བརྡ་འཕྲིན་འདྲ་མིན་ལ་ལྟ་ཉན་དང་བརྒྱུད་སྐུར་བྱེད་མི་ཆོག་པ། སྐད་འཕྲིན་ཚོགས་པ་ཁག་གི་ནང་དུ་འཛུལ་ཞུགས་བྱེད་མི་ཆོག་པ་སོགས་འདུས་འདུག དེང་སྐབས་རྒྱ་གཞུང་གིས་སྐད་འཕྲིན་དོ་དམ་དང་ཞིབ་བཤེར་གྱི་སྒྲིག་ཁྲིམས་རྣམས་གསལ་བསྒྲགས་དང་བརྒྱུད་བསྒྲགས་བྱེད་བཞིན་པའི་སྒང་རེད། ད་དུང་རྒྱལ་ནང་གི་སྐད་ཆ་ཕྱི་ལ་སྐྱེལ་མི་ཆོག་ཅིང་། ཧོང་ཀོང་དང་ཨོ་མེན། ཐེ་ཝན་བཅས་ཀྱི་གསར་འགྱུར་རྣམས་གཞུང་གི་དྲྭ་ཚུགས་སུ་གསལ་བསྒྲགས་མ་བྱས་སྔོན་ལ་བསྐུར་ཚེ། རྒྱལ་ཁབ་ཀྱི་བཅའ་ཁྲིམས་ལ་འགལ་འཇོལ་བྱུང་བ་དང་ཁྲིམས་འགལ་གྱི་ཆ་འཕྲིན་ཁྱབ་སྤེལ་བྱས་པའི་ནག་ཉེས་ཐོག་ཏུ་ཁྲིམས་གཅོད་བྱེད་ཆོག དུས་ཚོད་ལོ་གཅིག་ནས་ལོ་བརྒྱད་བར་གྱི་བཙོན་འཇུག་གི་ཁྲིམས་ཐག་གཅོད་ཆོག་ཟེར་གྱི་འདུག་ཅེས་བཤད།།

གསར་འགྱུར་མཁོ་སྤྲོད་པ་དང་བཞུགས་སྒར་དྷ་རམ་ས་ལའི་བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་པད་མ་རྒྱལ་གྱིས་སྐད་འཕྲིན་ནི་རྒྱ་ནག་གཞུང་གིས་གསལ་བསྒྲགས་དང་འཇིགས་སྐུལ་བྱེད་བཞིན་པའི་ལེ་ཚན་ཞིག་རེད། གནད་དོན་འདིའི་ཁུངས་སྣེ་དེད་ན་༢༠༡༦་ལོར་གཏན་འབེབས་བྱས་པ་དང་༢༠༡༧་ལོར་དངོས་སུ་ལག་བསྟར་བྱས་བའི་དྲྭ་རྒྱའི་བདེ་འཇགས་ཀྱི་བཅའ་ཁྲིམས་དེར་འབྲེལ་བ་འདུག དེའི་ནང་གསེས་ཀྱི་ནག་སེལ་གཤེད་བཅོམ་ཟེར་བའི་སྲིད་ཇུས་ནི་༡༠༡༨་ལོ་ནས་ལག་བསྟར་བྱས་པ་རེད། གཙོ་བོ་བོད་པའི་ཆོས་དང་རིག་གཞུང་། ཁོར་ཡུག་སྲུང་སྐྱོབ། མདོར་ན་གཞི་ལུས་བོད་མི་རྣམས་ཀྱིས་རང་གི་འཚོ་གནས་ཀྱི་ཆེད་དུ་བསམ་ཚུལ་བཤད་པ་དང་མི་འདོད་པའི་རྣམ་འགྱུར་ཞིག་རུང་ནག་ཚོགས་དང་ཁྲིམས་འགལ་གྱི་ངོ་བོ་སྦྱར་ནས་ནག་ཉེས་བཙུགས་ཏེ་འཛིན་བཟུང་བཙོན་འཇུག་བྱེད་ཀྱི་ཡོད་པ་རྣམས་སྐད་འཕྲིན་དོ་དམ་གྱི་སྒྲིག་གཞིའི་ནང་དུ་འདུས་འདུག

དེས་ན་བོད་ཀྱི་ས་གནས་ཁག་ཏུ་དོན་མེད་བསྙོན་འཛུགས་ཀྱི་གནས་ཚུལ་མང་པོ་ཞིག་འབྱུང་དང་འབྱུང་བཞིན་ཡོད་ཅིང་། བོད་པ་ཚོར་ཉེས་མེད་ཉེས་འཛུགས་ཀྱང་འཕོག་གི་འདུག དཔེར་ན་ཆབ་མདོ་སྟེང་ཆེན་པ་བསམ་གྲུབ་ཚེ་རིང་དང་གཞིས་ཀ་རྩེའི་དབང་ཕྱུག དིང་རི་བ་རྡོ་རྗེ་ཚེ་རི་བཅས་མི་གསུམ་ལ་སྐད་འཕྲིན་གྱི་ལམ་ནས་ཁ་བརྡ་དང་གནས་ཚུལ་བརྒྱུད་བསྒྲགས་བྱས་བའི་ནག་ཉེས་བཙུགས་ནས་འཛིན་བཟུང་བཙོན་འཇུག་བྱས་མྱོང་བ་རེད་ཅེས་བཤད་ཡོད་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།


XS
SM
MD
LG