ངོ་འཕྲད་བདེ་བའི་དྲ་འབྲེལ།

གཟའ་པ་སངས། ༢༠༢༤/༠༣/༢༩

ཛམ་ཐང་དུ་མི་མང་གི་ས་ཞིང་བླངས་ནས་ཤིང་ནགས་འདེབས་འཛུགས།


ཐད་ཀར་ཕབ་ལེན་གྱི་དྲ་འབྲེལ།

༄༅།། དེང་སྐབས་རྒྱ་གཞུང་གིས་ཆ་བགོས་བྱས་པ་ཡོད་པའི་སི་ཁྲོན་ཞིང་ཆེན། རྔ་བ་བོད་རིགས་རང་སྐྱོང་ཁུལ། ཛམ་ཐང་རྫོང་དུ་ཕྱི་ལོ་༢༠༠༦་ཡས་མས་ནས་རྒྱ་ནག་གཞུང་གིས་འཆར་འགོད་བྱས་པ་ལྟར་མང་ཚོགས་ཀྱི་ས་ཞིང་ནང་དུ་ཤིང་ནགས་འདེབས་འཛུགས་བྱ་དགོས། རྒྱལ་ཁབ་ཀྱིས་མི་མང་ལ་དངུལ་སྒོར་དང་བཟའ་བཅའ་རོགས་རམ་སྤྲོད་རྒྱུ་ཡིན་ཞེས་བསྒྲགས་ཏེ་སྲིད་ཇུས་དེ་ལག་ལེན་བསྟར་ནས་སྔ་ལོ་བར་དུ་མི་མང་ལ་རོགས་དངུལ་སོགས་སྤྲད་འདུག ཡིན་ནའང་ན་ནིང་ནས་བཟུང་སྟེ་ས་ཞིང་ཚང་མའི་བདག་དབང་རྒྱལ་ཁབ་ལ་ཡོད། མི་མང་གིས་བསྐྱར་དུ་ས་ཞིང་དེ་ཚོ་བརྐོ་སློག་བྱེད་ན་ཁྲིམས་འགལ་ཡིན་ཞེས་ཁྱབ་བསྒྲགས་བྱས་ཡོད་པའི་གནས་ཚུལ་ཐོན་འདུག

བོད་ནང་གི་གནས་ཚུལ་མཁོ་སྤྲོད་པ་ཞིག་གིས་འདི་གའི་གསར་འགོད་པར་འགྲེལ་བརྗོད་བྱས་པ་ལྟར་ན། ད་ལྟ་བསྐྱར་དུ་ཛམ་ཐང་ཕྱོགས་ཀྱི་མི་མང་ལ་རི་མགོ་སོགས་སུ་ཤིང་ནགས་འདེབས་འཛུགས་བྱེད་དུ་འཇུག་འགོ་ཚུགས་སོང་། དེ་སྔ་ཤིང་ནགས་འདེབས་འཛུགས་བྱ་ཡུལ་ནི་ཛམ་ཐང་རྫོང་གི་མངའ་ཁོངས་ཀྱི་ནམ་ཟླ་ཡུལ་མོ་དང་ཀ་ཐོག་ཡུལ་ཚོ། ཛི་རོང་ཡུལ་ཚོ་དང་ཛམ་ཐང་བར་མ་ཡུལ་ཚོ་བཅས་སུ་བོད་པ་ཞིང་འབྲོག་གཉིས་ཀ་ཡོད་པའི་མང་ཚོགས་ཀྱི་ས་ཞིང་རྣམས་ཡིན་ཞིང་། ས་ཞིང་དེ་ཚོར་ཚེར་མ་དང་ལྕང་སྨྱུག་གི་རིགས་བཏབ་པ་རེད་། ཤིང་ནགས་བཏབ་ནས་ཕལ་ཆེར་ལོ་ངོ་༡༡་ཡས་ཡས་ཤིག་ལ་རྒྱལ་ཁབ་ཀྱིས་ལོ་ལྟར་ས་ཞིང་གི་རྒྱ་ཁྱོན་ལྟར་དངུལ་སྒོར་ཅུང་ཙམ་རེ་དང་འབྲས། གྲོ་ཕྱེ་འདྲ་སྤྲད་པ་རེད། སྔ་ལོ་ནས་བཟུང་སྟེ་རོགས་དངུལ་སོགས་སྤྲོད་མཚམས་བཞག་སོང་། དེར་བརྟེན་མང་ཚོགས་ཀྱིས་བསྐྱར་དུ་ས་ཞིང་ཁོད་སྙོམས་བྱས་ནས་འབྲུ་རིགས་གདབ་རྩིས་བྱས་ཀྱང་རྒྱ་གཞུང་གིས་བཀའ་བཏང་སྟེ་ས་ཞིང་ཡོད་ཚད་ཀྱི་བདག་དབང་རྒྱལ་ཁབ་ལ་ཡོད་པས་མང་ཚོགས་ཀྱིས་བརྐོ་སློག་བྱེད་མི་ཆོག གལ་ཏེ་ས་ཆ་བརྐོ་སློག་བྱེད་ན་ཁྲིམས་འགལ་བྱས་པའི་ནག་ཉེས་འཕོག་རྒྱུ་རེད་ཅེས་བསྒྲགས་འདུག

བོད་ནང་གི་གནས་ཚུལ་མཁོ་སྤྲོད་པས་མུ་མཐུད་དུ་བརྗོད་པ་ལྟར་ན། ད་ལོ་ནས་བཟུང་སྟེ་ཛམ་ཐང་ཕྱོགས་ཀྱི་རི་མགོ་ཁག་ལ་གསོམ་ཤིང་གི་རིགས་འདེབས་འཛུགས་བྱེད་འགོ་ཚུགས་སོང་། འདི་གའི་མང་ཚོགས་ཚང་མ་ཤིང་ནགས་འདེབས་འཛུགས་ཀྱི་ལས་ཀར་འགྲོ་བཞིན་པའི་སྒང་རེད། དུད་ཁྱིམ་རེ་ནས་མི་རེ་ངེས་པར་དུ་ཉི་མ་གཅིག་ཀྱང་མ་ཆད་པར་ཤིང་ནགས་འདེབས་འཛུགས་བྱེད་དུ་འགྲོ་དགོས་ཀྱི་འདུག ཉིན་ལྟར་ཐོ་འགོད་བྱས་ནས་ལས་ཀར་མ་སོང་ན་ཆད་པ་གཅོད་རྒྱུ་ཡིན་ཟེར་གྱི་འདུག ཤིང་ནགས་བཏབ་ཟིན་པའི་ས་ཆ་དེ་དག་ལ་ཕྱིས་སུ་རྒྱལ་ཁབ་ཀྱིས་རོགས་དངུལ་ཞིག་སྤྲོད་རྒྱུ་ཡིན་ཟེར་ནས་ཁྱབ་བསྒྲགས་བྱས་སོང་། འོན་ཀྱང་འདི་ནི་སྔོན་མ་དང་གཅིག་མཚུང་རེད། ཐོག་མར་མང་ཚོགས་ཀྱི་འཚོ་རྟེན་ས་ཆའི་སྟེང་དུ་ཤིང་ནག་བཏབ་ནས་ལོ་ཤས་རྗེས་སུ་ས་ཆ་ཚང་མ་རྒྱལ་ཁབ་ལ་དབང་བ་རེད་ཟེར་ནས་བཙན་འཕྲོག་བྱ་རྒྱུ་རེད། ད་ནི་མང་ཚོགས་ཀྱི་འཚོ་རྟེན་ས་ཆ་ཚང་མ་རྒྱལ་ཁབ་ཀྱིས་བཙན་འཕྲོག་བྱེད་ཚེ། མང་ཚོགས་རྣམས་འགྲོ་ས་འདུག་ས་མེད་པའི་གནས་སུ་ལྷུང་ཉེན་ཆེ། ས་ཞིང་མེད་པའི་སྒང་ལ་ཕྱུགས་ཟོག་ཀྱང་འཚོ་སྐྱོང་བྱ་ཡུལ་ཁག་ལ་ཤིང་ནག་བཏབ་ནས་སེམས་ཅན་ལ་གཟན་རྩྭ་ཟ་རུ་མ་བཅུག་ན་འཚོ་བར་དོ་ཕོག་ཆེན་པོ་ཡོང་རྒྱུ་རེད། མང་ཚོགས་ལ་སེམས་ཁྲལ་ཅི་ཙམ་ཆེ་ཡང་རྒྱལ་ཁབ་ཀྱི་བཀའ་སླེབས་ན་མགོ་སྒུར་རྒྱུ་ལས་བྱ་ཐབས་གཞན་པ་མི་འདུག་ཅེས་འགྲེལ་བརྗོད་བྱས་ཡོད་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

XS
SM
MD
LG