ཟླ་བ་བཞིའི་རྗེས་སུ་པ་ཏ་ལ་མང་ཚོགས་ལ་སྒོ་ཕྱེ་པ།

༄༅།། རྒྱ་ནག་གཞུང་གིས་ཏོག་དབྱིབས་རིམས་ནད་སྔོན་འགོག་ཆེད་དུ་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏ་ལ་དུས་ཡུན་ཟླ་བ་བཞི་ལྷག་སྒོ་བརྒྱབ། དེ་རིང་ཕྱི་ཟླ་༦་པའི་ཚེས་༣་ཉིན་མང་ཚོགས་ལ་སླར་ཡང་ཆོས་སྒོ་ཕྱེ། ད་ནངས་ཞོགས་པ་སྔ་པོ་ནས་པོ་ཏ་ལ་མཇལ་སྐོར་དུ་ཡོང་བའི་རྒྱ་མི་ཡུལ་སྐོར་བ་བརྒྱ་ཕྲག་མང་པོས་ཁ་རས་མ་བརྒྱབ་པར་ཕོ་བྲང་པོ་ཏ་ལའི་མདུན་ཐང་དུ་ཚང་ཁ་བརྒྱབ་ནས་བསྡད་པའི་རྙན་ཐུང་ཞིག་དྲྭ་ལམ་དུ་ཐོན་འདུག ཁ་སང་ཕོ་བྲང་པོ་ཏ་ལའི་དོ་དམ་ཁང་གིས་བརྡ་ཐོ་ཞིག་སྤེལ་བ་དེར་འཁོད་པ་ལྟར་ན། རྒྱལ་ནང་གི་ནད་ཡམས་གནས་ཚུལ་ཇེ་ལེགས་སུ་འགྲོ་བཞིན་པ་དང་གྲོང་མིའི་འཚོ་བ་ཡང་རྒྱུན་ལྡན་ཅན་དུ་འགྱུར་བཞིན་ཡོད་ཅིང་། ད་ཆ་གོང་རིམ་ནས་ཆོག་མཆན་ཐོབ་པ་ལྟར་ཕྱི་ཚེས་༣་ནས་ཕོ་བྲང་པོ་ཏ་ལ་སྒོ་འབྱེད་རྒྱུ་ཡིན། དྲྭ་ལམ་ནས་པ་སེར་མངགས་ཉོ་བྱ་དགོས་ཞེས་བཀོད་ཡོད་པར་མ་ཟད། ཕོ་བྲང་པོ་ཏ་ལའི་དྲྭ་ཚིགས་དང་པོ་ཏ་ལའི་སྐད་འཕྲིན་གཉིས་སུའང་པ་སེ་ཉོ་ཕྱོགས་ནི་ཉི་མ་གཅིག་གི་སྔོན་ནས་པོ་ཏ་ལའི་སྐད་འཕྲིན་དང་དྲྭ་ཚིགས་བརྒྱུད་ནས་པ་སེ་ཉོ་དགོས། པ་སིའི་གྲངས་ཚད་ངེས་ཅན་ཡིན་ཞེས་བཀོད་ཡོད་པ་མིང་འདོན་བྱེད་འདོད་མེད་པའི་ས་གནས་དེའི་འབྲེལ་ཡོད་མི་སྣ་ཞིག་གིས་གནས་ཚུལ་མཁོ་སྤྲོད་བྱུང་འདུག

གསར་འགྱུར་མཁོ་སྤྲོད་པས་མུ་མཐུད་དུ་བརྗོད་པ་ལྟར་ན། དྲྭ་ལམ་དུ་པ་སེ་ཉོ་བ་དང་མི་གྲངས་ཚད་བཀག་བྱེད་ཡོད་པ་ནི་གནས་ཚུལ་གསར་པ་གང་ཡང་མ་རེད། སྔོན་མ་ནས་དེ་འདྲ་རེད། མི་གྲངས་ཚད་གཞི་བཟོ་དགོས་དོན་ནི་ཕོ་བྲང་ཤར་ལ་སེར་ཁ་ཆེན་པོ་ཞིག་ཡོད་པ་དང་བོད་པ་ཡིན་ན་མཆོད་མཇལ་ཞུས་ཏེ་ཤར་རྒྱག་ལོག་འགྲོ་ཡི་རེད། རྒྱ་མི་ཡུལ་སྐོར་བ་སྟོང་ཕྲག་མང་པོ་ཕུང་གསོག་བརྒྱབ་སྟེ་ལངས་ནས་པར་རྒྱག་གི་ཡོད་པས་ཉེན་ཁ་ཡོད་པ་རེད། དེ་གསང་བ་བྱེད་ཀྱི་ཡོད་པ་རེད། དེ་རིང་པོ་ཏ་ལར་རྒྱ་མི་ཡུལ་སྐོར་བ་ཧ་ཅང་པོ་འགྲོ་ཡི་ཡོད་ཀྱང་བོད་པ་ཡིན་ན་སྲིད་གཞུང་གི་ལས་བྱེད་པ་དང་། ཐ་ན་ལྷ་ས་གྲོང་ཁྱེར་དུ་ཚོང་རྒྱག་མཁན་ཚུན་ཆད་ཀྱང་མཆོད་མཇལ་ལ་འགྲོ་ཆོག་གི་ཡོད་པ་མ་རེད་ཅེས་བཤད།

དེ་རིང་ཕོ་བྲང་པོ་ཏ་ལའི་མདུན་ཐང་དུ་རྒྱ་མི་ཡུལ་སྐོར་བ་བརྒྱ་ཕྲག་མང་པོས་ཁ་རས་མ་བརྒྱབ་པར་ཚང་ཁ་བརྒྱབ་ནས་བསྡད་ཡོད་པའི་བརྙན་ཐུང་དེར་བོད་ཀྱི་རྩོམ་པ་པོ་གྲགས་ཅན་ཚེ་རིང་འོད་ཟེར་གྱི་ངོ་དེབ་ཏུ་ཁ་རས་མ་བརྒྱབ་པར་ཡུལ་སྐོར་བ་དེ་འདྲ་མང་པོ་ཞིག་ས་གནས་གཅིག་ལ་བསྡད་འདུག ཏོག་དབྱིབས་ནད་དུག་འཇོམས་པ་རེད་ཅེས་སུས་བཤད་པ་རེད་དམ། གལ་སྲིད་སླར་ཡང་ཀྲང་མིང་ཅན་གྱི་ནད་པ་གཞན་ཞིག་བྱུང་ན་བོད་རང་སྐྱོང་ལྗོངས་མི་དམངས་སྨན་ཁང་གསུམ་པའི་སྨན་པ་དང་སྨན་ཞབས་༡༥༠་ལྷག་གིས་མི་གཅིག་ལ་སྨན་བཅོས་བྱ་རྒྱུ་ཡིན་ནམ་ཞེས་བྲིས་འདུག

རྒྱ་ནག་ནས་ཁྱབ་པའི་ཏོག་དབྱིབས་ནད་དུག་སྔོན་འགོག་སླད་རྒྱ་ནག་གཞུང་གིས་ཕོ་བྲང་པོ་ཏ་དང་གཙུག་ལག་ཁང་། གདན་ས་སེ་འབྲས་དགེ་གསུམ་སོགས་ཀྱིས་མཚོན་པའི་ལྷ་སའི་ཉེ་ཁུལ་དགོན་སྡེ་ཁག་ལོ་འདིའི་ཕྱི་ཟླ་༡་ཚེས་༢༧་ཉིན་ནས་སྒོ་བརྒྱབ། ལྷ་སའི་གཙུག་ལག་ཁང་མ་གཏོགས་དགོན་སྡེ་གཞན་རྣམས་ཉེ་ཆར་ཕྱི་ཟླ་༥་ཚེས་༢༠་ནས་སྒོ་ཕྱེ། འོན་ཀྱང་ཕྱི་ཟླ་༤་ཚེས་༡༤་ཉིན་བསམ་ཡས་དགོན་པ་དང་ལྷོ་ཁ་སྣེ་གདོང་རྫོང་ཁོངས་སུ་ཆགས་པའི་བཀའ་བརྒྱུད་པའི་ཆོས་སྡེ་ཆེན་པོ་གཡང་བཟང་དགོན་པ་གཉིས་ནད་ཡམས་སྔོན་འགོག་ཆེད་དུ་ཡིན་ཞེས་རྒྱ་གཞུང་གིས་གློ་བུར་དུ་སྒོ་བརྒྱབ་ཡོད་པ་སོགས་ཀྱི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

Embed share

ཟླ་བ་བཞིའི་རྗེས་སུ་པ་ཏ་ལ་མང་ཚོགས་ལ་སྒོ་ཕྱེ་པ།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:43 0:00

ཐད་ཀར་ཕབ་ལེན་གྱི་དྲ་འབྲེལ།

• 128 kbps | MP3
• 32 kbps | MP3

གསན་གཟིགས་གནང་ས།