རྔ་པའི་བོད་སྐད་སྲོལ་ཡིག་ལ་དག་ཐེར་བྱ་རོགས།

Embed share

རྔ་པའི་བོད་སྐད་སྲོལ་ཡིག་ལ་དག་ཐེར་བྱ་རོགས།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:04:07 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།

༄༅།། རྔ་པ་བོད་རིགས་དང་ཆཱང་རིགས་རང་སྐྱོང་ཁུལ་གྱི་བོད་སྐད་ཡིག་སྲོལ་ལ་དག་ཐེར་བྱ་དགོས་པའི་སྙན་ཞུ་ཞིག་ཁ་སང་སྤྱི་ཟླ་༤་བའི་ཚེས་༣༠་ཉིན་དྲྭ་ལམ་ལ་ཡོངས་ཁྱབ་ཏུ་བཀྲམ་འདུག སྙན་ཞུ་དེ་རྒྱ་བོད་སྐད་ཡིག་གཉིས་ཀྱི་སྐད་འཕྲིན་སོགས་དྲྭ་ལམ་ཁག་ཏུ་ཁྱབ་སྤེལ་བྱུང་སྟེ་ཁྲིམས་གླེང་དྲྭ་ཚིགས་སུའང་སྙན་ཞུ་དེ་འདྲེན་བཀོད་བྱས་འདུག

སྙན་ཞུ་དེར་ཉེ་ཆར་རྔ་པ་ཁུལ་སློབ་གསོའི་ལས་ཁུངས་ཀྱིས་ཚོགས་འདུ་ཞིག་ཚོགས་ཏེ་༢༠༢༠་ལོའི་ལོ་མཇུག་ནས་ཁུལ་དེའི་བོད་རིགས་སློབ་ཕྲུག་གཙོ་བོར་གྱུར་པའི་སློབ་གྲྭ་ཆུང་འབྲིང་ཁག་ཏུ་བོད་ཀྱི་སྐད་ཡིག་མ་གཏོགས་སློབ་ཚན་གཞན་རྣམས་རྒྱ་སྐད་དུ་སློབ་ཁྲིད་བྱ་རྒྱུའི་བཀའ་ཁྱབ་ཞིག་བསྒྲགས་ཡོད་པར་རྔ་པ་གཙོས་བོད་ཀྱི་ས་ཁུལ་མང་པོའི་དགེ་སློབ་དང་མང་ཚོགས་རྣམས་མོས་མཐུན་མེད་པའི་བསམ་ཚུལ་མང་པོ་བཏོན། བཀའ་ཁྱབ་དེར་འཐད་པ་ཡོད་མེད་མང་ཚོགས་ལ་དྲྭ་ལམ་དུ་བསམ་ཚུལ་བསྡུ་ལེན་བྱས་ཡོད་པའི་མཇུག་འབྲས་ལྟར་ན། མི་༢༧༢༠༠་ལྷག་གིས་སློབ་ཚན་རྣམས་བོད་ཡིག་གིས་སློབ་ཁྲིད་བྱ་ཐབས་ལ་རྒྱབ་སྐྱོབ་ཡོད་ཅེས་བསམ་འཆར་བཤད་ཡོད་ཅིང་། དེ་བཞིན་སྤྱི་ལོ་༢༠༡༠་ལོར་མཚོ་སྔོན་ཞིང་ཆེན་སློབ་གསོའི་ལས་ཁུངས་ཀྱིས་ཀྱང་སློབ་ཚན་ཚང་མ་རྒྱ་ཡིག་གིས་སློབ་ཁྲིད་བྱ་ཐབས་ལག་བསྟར་བྱ་རྒྱུའི་བཀའ་ཁྱབ་ཞིག་བསྒྲགས་པར་ས་གནས་མི་དམངས་ཀྱིས་སྐྱོན་བརྗོད་བྱས་པས་མཐའ་མཇུག་བཀའ་ཁྱབ་དེ་ཕྱིར་བསྡུ་བྱ་དགོས་བྱུང་ཡོད་པའི་གནས་ཚུལ་ཁག་ཅིག་ལུང་འདྲེན་བྱས་ཡོད་པར་མ་ཟད། ད་ལྟའི་རྔ་པ་ཁུལ་གྱི་སློབ་གྲྭ་ཁག་ཏུ་རྒྱ་ཡིག་གཙོ་བོར་འཛིན་པའི་སློབ་གསོའི་ཐབས་ལམ་ལག་བསྟར་བྱེད་མི་ཉན། རྒྱ་ཡིག་གཙོ་བོར་འཛིན་དགོས་པའི་སློབ་གསོ་ལག་བསྟར་བཅའ་ཁྲིམས་ཀྱི་རྒྱབ་རྟེན་དུ་གྱུར་ཡོད་པའི་རྔ་པ་ཁུལ་གྱི་བོད་སྐད་སྲོལ་ཡིག་ལ་དག་ཐེར་བྱ་དགོས་པའི་རེ་འདུན་བཏོན་འདུག

སྙན་ཞུ་དེར་རྔ་པ་ཁུལ་གྱི་བོད་སྐད་སྲོལ་ཡིག་གི་དོན་ཚན་༨་པ་ནི་རྒྱལ་ཁབ་ཀྱི་རྩ་ཁྲིམས་དང་མི་རིགས་རང་སྐྱོང་བཅའ་ཁྲིམས་ཀྱི་དགོངས་དོན་ལ་འགལ་ཡོད་པས་རྒྱ་ནག་གི་བཅའ་ཁྲིམས་དོན་ཚན་༩༠་པའི་ནང་གསེས་༢་པར་འཁོད་པའི་སྤྱི་དམངས་ཀྱི་ཐོབ་ཐང་ལྟར་རྒྱལ་ཡོངས་དམངས་ཆེན་རྒྱུན་ལས་ལྷན་ཁང་གིས་རྔ་པ་ཁུལ་གྱི་བོད་སྐད་སྲོལ་ཡིག་ལ་དག་ཐེར་བྱ་དགོས་པའི་རྒྱུ་མཚན་བགྲངས་འདུག སྲོལ་ཡིག་དེ་ནི་སྤྱི་ལོ་༢༠༡༨་ལོའི་ཟླ་༩་པའི་ཚེས་༡་ཉིན་ནས་ལག་ལེན་བསྟར་མགོ་བརྩམ་རྒྱུ། སྲོལ་ཡིག་དེའི་དོན་ཚན་༨་པར་རྔ་པ་ཁུལ་དུ་བྱིས་སྐྱོང་སློབ་གསོའི་སྐབས་ནས་བཟུང་སྟེ་རྒྱ་བོད་སྐད་ཡིག་གཉིས་ཀ་ལག་ལེན་བསྟར་ཆོག་པའི་གཏན་ཁེལ་བྱུང་བ་དེར་བོད་པ་ནི་མི་རིགས་ས་ཁོངས་རང་སྐྱོང་གི་བཅའ་ཁྲིམས་འགལ་འདུག མི་རིགས་ས་ཁོངས་རང་སྐྱོང་གི་བཅའ་ཁྲིམས་དོན་ཚན་༣༧་པའི་ནང་དུ་བྱིས་སྐྱོང་སློབ་གསོའམ། རྒྱུན་ལྡན་གྱི་སློབ་ལོ་མ་སོན་པའི་སློབ་གསོ་སྤེལ་སྐབས་རང་གི་ཕ་སྐད་ཁོ་ནས་སློབ་གསོ་སྤེལ་དགོས་ཞེས་གསལ་པོར་ཡོད་པ་ཁུངས་སྐྱེལ་ར་སྤྲོད་བྱས་འདུག
མཐའ་དོན་དེར་རྔ་པ་ཁུལ་ཁྲིམས་བཟོ་ལྷན་ཁང་གིས་གཏན་ལ་ཕབ་པའི་རྔ་པ་ཁུལ་བོད་སྐད་སྲོལ་ཡིག་གིས་རྔ་པ་ཁུལ་མི་དམངས་ཀྱིས་རང་གི་སྐད་དང་ཡི་གེ་དར་སྤེལ་དང་བཀོལ་སྤྱོད་བྱ་རྒྱུའི་རང་དབང་ལ་བརྩི་བཀུར་བྱས་མི་འདུག རྔ་པའི་སྲོལ་ཡིག་གི་གོང་དུ་བཀུར་དགོས་པའི་རྒྱལ་ཁབ་ཀྱི་རྩ་ཁྲིམས་དང་མི་རིགས་ས་ཁོངས་རང་སྐྱོང་གི་བཅའ་ཁྲིམས་བཅས་ལ་རྒྱབ་འགལ་སོང་ཞིང་། རྒྱལ་ཡོངས་དམངས་ཆེན་རྒྱུན་ལས་ལྷན་ཁང་གིས་རྔ་པ་ཁུལ་གྱི་བོད་སྐད་སྲོལ་ཡིག་ལ་དག་ཐེར་བྱ་རོགས་ཞེས་སྙན་ཞུ་ཕུལ་འདུག

ད་ལྟ་རྒྱ་ནག་གཞུང་གིས་རྔ་པ་བོད་རང་སྐྱོང་ཁུལ་ལ་བོད་པ་དང་ཆཱང་རིགས་རང་སྐྱོང་ཁུལ་ཞེས་བོད་ཀྱི་ཡོད་ཀྱང་༡༩༥༣་ལོར་ས་གནས་འདིར་སི་ཁྲོན་ཞིང་ཆེན་བོད་རིགས་རང་སྐྱོང་ལྗོངས་ཞེས་པའི་མིང་བཏགས། དེའི་རྗེས་སུ་༡༩༥༥་ལོར་རྔ་པ་བོད་རིགས་རང་སྐྱོང་ཁུལ་ཞེས་མིང་བསྒྱུར། ༡༩༨༧་ལོར་རྔ་པ་བོད་རིགས་དང་ཆཱང་རིགས་རང་སྐྱོང་ཁུལ་ཞེས་མིང་བཏགས། དེང་སྐབས་ཁུལ་འདིའི་ཁོངས་སུ་གྲོང་ཁྱེར་༡་དང་རྫོང་༡༢་འདུས། རྒྱ་ནག་གཞུང་གིས་བསྡོམས་རྩིས་བྱས་པའི་གྲངས་ཀ་ལྟར་ན་ཁྱོན་བསྡོམས་མི་འབོར་འབུམ་༩་དང་ཁྲི་༤་ལྷག་ཡོད་པའི་གྲས་ཀྱི་བརྒྱ་ཆའི་༦༠་ལྷག་བོད་པ་ཡིན་པ་རེད།།