ཨེ་ཤི་ཡའི་མི་རབས་གསར་པའི་ན་གཞོན་ལས་འགུལ་བ།

༄༅།། རྒྱལ་སྤྱིའི་ཉེས་ཡངས་འགྲོ་བ་མིའི་ཐོབ་ཐང་ཚོགས་པས་ཉེ་ཆར་ཕྱི་ལོ་༢༠༡༩་ལོར་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་འགྲོ་བ་མིའི་ཐོབ་ཐང་གི་གནས་སྟངས་ལ་བསྐྱར་ཞིབ་ཀྱིས་ཨེ་ཤི་ཡའི་རྒྱལ་ཁབ་༢༥་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་དཔྱད་ཞིབ་བྱས་པའི་ལས་བསྡོམས་སྙན་ཐོ་གསར་པ་ཞིག་བཏོན་ཞིང་། སྙན་ཐོ་དེར་སྤྱི་ཡོངས་ཀྱི་ཆ་ནས་༢༠༡༩་ནི་བཙོན་གནོན་དང་མཉམ་དུ་འགོག་རྒོལ་གྱི་ལོ་ཞིག་ཡིན་པའི་ངོས་འཛིན་བྱས་འདུག

Embed share

ཨེ་ཤི་ཡའི་མི་རབས་གསར་པའི་ན་གཞོན་ལས་འགུལ་བ།

by ཝི་ཨོ་ཨེ།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:53 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།

རྒྱལ་སྤྱིའི་ཉེས་ཡངས་འགྲོ་བ་མིའི་ཐོབ་ཐང་ཚོགས་པའི་ལས་བསྡོམས་སྙན་ཐོ་དེར་ཕྱི་ལོ་༢༠༡༩་ལོར་ཨེ་ཤི་ཡའི་རྒྱལ་ཁབ་༢༥་སྲིད་གཞུང་ཁག་གིས་ཆབ་སྲིད་ལྡོག་ཕྱོགས་ཀྱི་ལྟ་བ་འཛིན་མཁན་ཚོར་གདུག་རྩུབ་ཆེ་བའི་བཙན་གནོན་དང་དམ་དྲག ད་དུང་དགྲར་འཛིན་དང་ཤུགས་རྐྱེན་ངན་པའི་སྤྱི་ཚོགས་དྲྭ་ལམ་ཁག་ལ་བཀག་སྡོམ་བྱེད་ཀྱི་ཡོད་ཚུལ་དང་། དེ་བཞིན་སྲིད་དོན་གྱི་རྒྱུ་ཚན་བཅས་ལ་བརྟེན་ནས་མི་མང་གི་གཏམ་བརྗོད་རང་དབང་ལ་དམ་དྲག་བྱས་པས་རྒྱལ་ཁབ་དེ་དག་གི་ན་གཞོན་ཆབ་སྲིད་དང་སྤྱི་ཚོགས་ལས་འགུལ་བ་མི་རབས་གསར་པ་ཞིག་གིས་ཁ་གཏད་འཐབ་རྩོད་བྱེད་ཀྱི་ཡོད་པའི་གནས་ཚུལ་ཞིབ་ཕྲ་བཀོད་ཡོད་པ་རེད།

རྒྱལ་སྤྱིའི་ཉེས་ཡངས་འགྲོ་བ་མིའི་ཐོབ་ཐང་ཚོགས་པའི་ཤར་ཕྱོགས་དང་ལྷོ་ཤར་ཨེ་ཤི་ཡ། ཞི་བདེ་རྒྱ་མཚོའི་མངའ་ཁུལ་གྱི་ས་གནས་སྤྱི་ཁྱབ་འགན་འཛིན་ཎི་ཀོ་ལ་སི་བྷེ་ཀུ་ལིན་གྱིས་ཨེ་ཤི་ཡའི་གླིང་ཆེན་ཡོངས་ཀྱི་སྲིད་གཞུང་ཁག་གིས་མི་མང་གི་གཞི་རྩའི་རང་དབང་ཐོབ་ཐང་ཁག་རྕ་མེད་བཟོ་ཐབས་བྱེད་བཞིན་འདུག འདི་དང་དུས་མཉམ་དུ་མང་ཚོགས་ཀྱིས་གཞུང་གི་དབང་སྒྱུར་སྒྲིག་འཛུགས་ཁག་ལ་ཁ་གཏད་དང་རྒོལ་འཛིང་བྱེད་པའི་ལས་འགུལ་ཞིག་སྤེལ་གྱི་ཡོད་པ་དེའི་མདུན་ཕྱོགས་སུ་སྣེ་ཁྲིད་བྱེད་མཁན་རྣམས་ན་གཞོན་མི་རབས་གསར་པ་ཞིག་ཐོན་འདུག་ཅེས་གསུངས་ཡོད་པ་རེད།

སྐུ་ཞབས་བྷེ་ཀུ་ལིན་གྱིས་ཧོང་ཀོང་གི་ནང་སྲིད་ལ་རྒྱ་ནག་གཞུང་གིས་ཐེ་གཏོགས་བྱེད་ཀྱི་ཡོད་པར་མངའ་ཁུལ་དེའི་སློབ་ཕྲུག་ན་གཞོན་ཚོས་ཁ་གཏད་བཅག་ནས་ངོ་རྒོལ་བྱུང་ཡོད། རྒྱ་གར་གཞུང་གིས་ཁ་ཆེ་ཚོ་ཟུར་འདོན་དབྱེ་འབྱེད་བྱས་པའི་སྲིད་ཇུས་ལ་རྒྱ་གར་གྱི་སློབ་ཕྲུག་ཚོས་ངོ་རྒོལ་ལས་འགུལ་ཞིག་གི་སྣེ་ཁྲིད་བྱས་ཡོད། དེ་བཞིན་ཐེ་ལན་ཌིའི་མི་རབས་གསར་པའི་ན་གཞོན་འོས་བསྡུ་བ་ཚོས་ཕྱོགས་འགལ་སྲིད་དོན་ཚོགས་པ་གསར་པ་ཞིག་ལ་དགའ་ཞེན་དང་རྒྱབ་སྐྱོར་བྱེད་ཀྱི་ཡོད་པ་སྟེ། ཐེ་ལན་ཌའི་རང་བཙན་དོན་གཉེར་བའི་གཞུང་འཛིན་ཚོགས་པར་འོས་བསྡུའི་རྒྱལ་ཁ་ཐོབ་པ་སོགས་དབང་འཛིན་སྒྲིག་འཛུགས་ཁག་ལ་ཁ་གཏད་ཀྱི་ལས་འགུལ་འདི་རྣམས་ན་གཞོན་མི་རབས་གསར་པ་ཞིག་གིས་སྣེ་ཁྲིད་བྱེད་བཞིན་པ་རེད་ཅེས་གསུངས་ཡོད་པ་རེད།

རྒྱལ་སྤྱིའི་ཉེས་ཡངས་འགྲོ་བ་མིའི་ཐོབ་ཐང་ཚོགས་པས་ཨེ་ཤི་ཡའི་རྒྱལ་ཁབ་ཆེ་ཤོས་རྒྱ་གར་དང་རྒྱ་ནག་གིས་མང་ཚོགས་ཀྱི་གཞི་རྩའི་རང་དབང་དང་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་ཡོད་པས་གླིང་ཆེན་ཡོངས་ཁྱབ་ཀྱི་ནང་དུ་མང་ཚོགས་ལ་བཙན་གནོན་དང་དམ་དྲག་གི་འགྱུར་འགྲོས་ཤིག་འགོ་ཚུགས་པ་རེད་ཅེས་མཛུབ་སྟོན་གནང་སྟེ། ཨེ་ཤི་ཡའི་རྒྱལ་ཁབ་མང་པོར་སྲིད་གཞུང་ཁག་གིས་མི་མང་གི་རང་དབང་ཐོབ་ཐང་ལ་དྲག་གནོན་བྱེད་པའི་གནས་ཚུལ་ཞིབ་ཕྲ་ལོ་འཁོར་སྙན་ཐོ་དེར་བཀོད་འདུག

སྔ་ལོ་རྒྱ་ནག་གཞུང་གིས་ཧོང་ཀོང་ས་གནས་གཞུང་ལ་དོགས་ཅན་རྣམས་རྒྱ་ནག་ལ་རྩིས་སྤྲོད་བྱ་རྒྱུ་དགོས་ཞེས་རྩིས་སྤྲོད་ཁྲིམས་གཞི་ཞིག་གཏན་འབེབས་བྱེད་དུ་བཅུག་པར་ཧོང་ཀོང་གི་རྒྱ་ཆེའི་མང་ཚོགས་ཀྱིས་རྒྱ་ནག་སྲིད་གཞུང་གིས་ཧོང་ཀོང་དབྱིན་ཇིའི་ལག་ནས་རྩིས་ལེན་བྱས་པའི་སྐབས་སུ་མངའ་ཁུལ་འདིའི་དམངས་གཙོའི་རང་དབང་གི་ཐོབ་ཐང་ཁག་ལ་འགན་སྲུང་བྱ་རྒྱུ་ཡིན་པའི་ཁས་ལེན་དང་། ཧོང་ཀོང་ལ་ཚད་མཐོའི་རང་སྐྱོང་གི་ཐོབ་ཐང་སྤྲོད་རྒྱུའི་ཁས་ལེན་བྱས་ཡོད་པ་རྣམས་བརྩི་མེད་གཏོང་ཐབས་ཤིག་རེད་ཅེས་སེམས་འཚབ་ཆེན་པོས་དམངས་གཙོ་དོན་གཉེར་གྱི་ལས་འགུལ་ཞིག་འགོ་ཚུགས། ཁོ་ཚོའི་དགོས་འདུན་དེ་དག་མ་གྲུབ་བར་དུ་ངོ་རྒོལ་མཚམས་འཇོག་བྱ་རྒྱུ་མིན་པའི་ཆོད་སེམས་བརྟན་པོ་བཙུགས། ཡང་རྒྱ་གར་གྱི་སྲིད་བློན་མོ་དྷིའི་གཞུང་གིས་ཁ་ཆེ་ཚོ་ཟུར་འདོན་དབྱེ་འབྱེད་བྱེད་པའི་སྤྱི་དམངས་ཐོབ་ཐང་གི་བཅའ་ཁྲིམས་གསར་པ་ཞིག་གཏན་འབེབས་བྱུང་བར་རྒྱ་གར་མི་མང་ས་ཡ་མང་པོས་ངོ་རྒོལ་ལས་འགུལ་གཞི་རྒྱ་ཆེན་པོ་ཞིག་སྤེལ་བཞིན་འདུག་ཅེས་འཁོད་ཡོད་པ་རེད།

དེ་དང་ཕྱོགས་མཚུངས་ལས་བསྡོམས་སྙན་ཐོ་དེར་ཨིན་རྡུ་ནེ་ཤི་ཡའི་གྲོས་ཚོགས་ཀྱིས་མི་མང་གི་རང་དབང་ལ་དམ་དྲག་བྱེད་པའི་ཁྲིམས་གཞི་གསར་པ་མང་པོ་ཞིག་གཏན་འབེབས་བྱས་པར་མི་མང་གིས་ངོ་རྒོལ་བྱས་ཡོད་ཅིང་། ཨབ་གྷ་ཎི་སི་ཐན་ལ་རྒྱ་ཆེའི་མི་མང་གིས་རང་གི་བདེ་འཇགས་ལ་ཉེན་ཁ་འཛེམས་མེད་ཀྱིས་ཡུལ་དེར་ལོ་བཅུ་ཕྲག་མང་པོའི་ནང་འཁྲུག་ལངས་པ་མཚམས་འཇོག་ཡོང་ཐབས་སུ་ཞི་བའི་གོམ་བགྲོད་ཀྱི་ལས་འགུལ་སྤེལ། དེ་བཞིན་པ་ཀི་སི་ཐན་ལ་སྲིད་གཞུང་གིས་ཆབ་སྲིད་ལྡོག་ཕྱོགས་པ་རྣམས་གར་སོང་མེད་དུ་གཏོང་ཐབས་བྱས་པ་དང་། ཁྲིམས་ལུགས་ལ་མི་མཐུན་པའི་ཉེས་ཆད་གཅོད་ཀྱི་ཡོད་པ་སོགས་བཙན་གནོན་གྱི་སྲིད་ཇུས་ཁག་ལག་ལེན་བསྟར་པར་པག་ཏུན་ཏ་ཧ་ཧྥུ་ཛི་སྒྲིག་འཛུགས་ཀྱིས་སྲིད་གཞུང་ལ་ངོ་རྒོལ་གྱི་ཞི་བའི་ལས་འགུལ་སྤེལ་བཞིན་ཡོད་པས་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་མང་པོར་སྲིད་གཞུང་གིས་མང་ཚོགས་ཀྱི་གཞི་རྩའི་རང་དབང་ཐོབ་ཐང་ལ་བརྩི་རྡོག་རོལ་དང་དྲག་གནོན་བྱེད་ཀྱི་ཡོད་པར་རྒྱ་ཆེ་མང་ཚོགས་ཀྱིས་ངོ་རྒོལ་ལས་འགུལ་སྤེལ་གྱི་ཡོད་པའི་མང་ཆེ་བ་ནི་ན་གཞོན་མི་རབས་གསར་པའི་ལས་འགུལ་བ་ཚོས་སྣེ་འཁྲིད་བྱེད་ཀྱི་ཡོད་པའི་གནས་ཚུལ་ཞིབ་ཕྲ་ཁག་ཅིག་འཁོད་ཡོད་པ་རེད།།