༄༅།། ཟླ་བ་འདིའི་ཕྱི་ཚེས་༡༢་དང་༡༣་གཉིས་ལ་རྒྱ་ནག་གི་སྲིད་འཛིན་བལ་ཡུལ་ལ་རྒྱལ་དོན་འཚམས་འདྲིར་ཕེབས་ཡོད་ཅིང་། སྐབས་དེར་ཕྱོགས་གཉིས་ཀྱིས་མི་སྣ་རྩིས་སྤྲོད་ཀྱི་ཆིངས་ཡིག་ཅིག་འཇོག་ཐབས་བྱས་པར་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཁག་གིས་དགག་པ་ཤུགས་ཆེན་བརྒྱབ་ཡོད་རེད། གཟའ་ཁོར་འདིའི་ལས་རིམ་ནང་དུ་སྤྱི་འཐུས་ཚོགས་གཞོན་ཡེ་ཤེས་ཕུན་ཚོགས་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་རྣམ་གཉིས་གནད་དོན་དེའི་ཐད་དུ་གླེང་མོལ་ཞུས་ཡོད།