ངོ་འཕྲད་བདེ་བའི་དྲ་འབྲེལ།

རྒྱ་ནག་གིས་ཇག་ཚོགས་ཀྱི་སྡིགས་སྐུལ་བྱེད་ཀྱི་ཡོད་སྐད།


ཐད་ཀར་ཕབ་ལེན་གྱི་དྲ་འབྲེལ།

༄༅།། ཧོང་ཀོང་དུ་བཅའ་སྡོད་ཨ་མི་རི་ཀའི་ཕྱི་འབྲེལ་དོན་གཅོད་ཁང་གི་ཆབ་སྲིད་ཚན་པའི་འགན་འཛིན་ཇུ་ལི་ཨི་དྷེ་ཧོང་ཀོང་གི་དམངས་གཙོའི་ལས་འགུལ་གྱི་འགོ་ཁྲིད་ཇཱོ་ཤི་ཝ་ཝང་དང་ནེ་ཐན་ལོ་སོགས་ལ་མགྲོན་ཁང་ཞིག་ཏུ་ཐུག་འཕྲད་བྱས་ཤིང་། རྒྱ་ནག་གཞུང་གིས་ཧོང་ཀོང་གི་ངོ་རྒོལ་བ་དེ་ཚོར་ཨ་མི་རི་ཀས་ལྐོག་ཏུ་ངན་སྐུལ་བྱེད་ཀྱི་ཡོད་པ་ར་འཕྲོད་བྱུང་སོང་ཞེས་བསྒྲགས། ཧོང་ཀོང་གི་ཏ་གུང་པའོ་ཚགས་པར་ནང་དུ་ཨ་མི་རི་ཀའི་ཕྱི་འབྲེལ་མི་སྣ་ཇུ་ལི་ཨི་དྷེའི་སྒེར་གྱི་གནས་ཚུལ་དང་ཕྲུ་གུའི་མིང་། འདྲ་པར་རྣམས་འགྲེམ་སྤེལ་བྱས་པར་ཨ་མི་རི་ཀའི་ཕྱི་སྲིད་ལྷན་ཁང་གི་མགྲིན་ཚབ་པས་རྒྱ་ནག་གཞུང་གིས་ཇག་ཚོགས་ལྟར་སྡིགས་སྐུལ་བྱེད་ཀྱིན་འདུག་ཅེས་སྐྱོན་བརྗོད་དྲག་པོ་བྱས་ཡོད་ཅིང་། དཔེར་ན་གཟའ་ཕུར་བུའི་ཉིན་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པས་ཨ་མི་རི་ཀའི་ཕྱི་འབྲེལ་མི་སྣ་ཞིག་གི་སྒེར་གྱི་གནས་ཚུལ་ཕྱིར་བསྒྲགས་བྱས་ནས་བུ་ཕྲུག་གི་འདྲ་པར་དང་མིང་སོགས་ཕྱིར་བསྒྲགས་བྱས་པ་ནི་ལུགས་མཐུན་གྱི་ངོ་རྒོལ་བྱེད་སྟངས་ཤིག་མིན་ཞིང་། དེ་ནི་ཇག་ཚོགས་ཀྱི་སྲིད་གཞུང་ཁག་གིས་ལག་ལེན་བསྟར་སྲོལ་ཡོད་པའི་ཐབས་ཇུས་ཤིག་རེད། འགན་འཁྲི་ལེན་པའི་རྒྱལ་ཁབ་ཅིག་ཡིན་ན་གནས་ཚུལ་དེའི་རིགས་ཕྱིར་བསྒྲགས་གཏན་ནས་བྱ་མི་སྲིད། རྒྱ་ནག་གཞུང་གིས་ཐད་ཀར་བཀོད་འདོམས་བྱས་ནས་ཏ་གུང་པའོ་ཚགས་པར་གྱིས་གནས་ཚུལ་དེ་ཚོ་ཕྱིར་བསྒྲགས་བྱས་པ་ཞིག་ཡིན་པར་ཨ་མི་རི་ཀས་ངོས་འཛིན་བྱེད་ཀྱི་ཡོད་ཅེས་བཤད་མོད། འོན་ཀྱང་གཟའ་པ་སངས་ཉིན་རྒྱ་ནག་གཞུང་གིས་ཨ་མི་རི་ཀའི་ཕྱི་སྲིད་ལྷན་ཁང་གི་མགྲིན་ཚབ་པས་རྒྱ་ནག་ལ་ཇག་ཚོགས་ཀྱི་སྲིད་གཞུང་ཞེས་ཁ་རྡུང་བཏང་བ་ནི་ཧ་ཅང་གི་དམའ་འབེབས་ཐལ་དྲགས་པ་ཞིག་རེད་ཅེས་དགག་པ་བརྒྱབ་འདུག

ཧོང་ཀོང་དུ་བཅའ་སྡོད་ཨ་མི་རི་ཀའི་སྐུ་ཚབ་དོན་གཅོད་ཁང་གི་ཆབ་སྲིད་ཚན་པའི་འགན་འཛིན་ཇུ་ལི་ཨི་དྷེ་དང་ཧོང་ཀོང་དམངས་གཙོའི་ལས་འགུལ་གྱི་འགོ་ཁྲིད་ཚོ་ཐུག་འཕྲད་བྱས་པར་ཧོང་ཀོང་ས་གནས་ཀྱི་ཕྱི་སྲིད་ལས་དོན་ཁང་གིས་དངོས་སུ་ངོ་རྒོལ་བྱས་པར་མ་ཟད། ཨ་མི་རི་ཀས་ཧོང་ཀོང་གི་ངོ་རྒོལ་བ་ཚོར་འབྲེལ་བ་གཙང་གཅོད་བྱ་དགོས། ཨ་རིའི་དོན་གཅོད་ཁང་གིས་རྒྱ་ནག་དགྲར་འཛིན་བྱེད་པའི་ཧོང་ཀོང་གི་ངོ་ལོག་ཤོག་ཁག་ལ་གོ་བརྡ་ལོག་པ་ཞིག་གཏོང་གི་ཡོད་པ་མཚམས་འཇོག་བྱ་དགོས། ཨ་མི་རི་ཀས་ཧོང་ཀོང་གི་ནང་སྲིད་ལ་ཐེ་གཏོགས་བྱ་རྒྱུ་མཚམས་འཇོག་བྱ་དགོས་པ་དང་ཧོང་ཀོང་གི་དྲག་ཟིང་སྡུག་ཏུ་གཏོང་གི་ཡོད་པ་མཚམས་འཇོག་བྱ་དགོས་ཞེས་དགོས་འདུན་བཏོན། ཡིན་ནའང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པས་ཨ་མི་རི་ཀའི་ཕྱི་འབྲེལ་མི་སྣ་ཁག་གི་འབྲེལ་ཡོད་ས་གནས་སོ་སོའི་སྲིད་དོན་པ་ཚོར་ཐུག་འཕྲད་བྱེད་ཀྱི་ཡོད་པ་ནི་ཨ་མི་རི་ཀའི་ཕྱི་འབྲེལ་ལམ་སྲོལ་ཞིག་ཡིན། ཨ་མི་རི་ཀའི་ཕྱི་འབྲེལ་མི་སྣ་ཚོས་སྲིད་གཞུང་གི་འགོ་ཁྲིད་ཚོ་དང་ཕྱོགས་འགལ་ཚོགས་པའི་ངོ་རྒོལ་བ། ད་དུང་འབྲེལ་ཡོད་རྒྱལ་ཁབ་ཁག་གི་ཤེས་ཡོན་ཅན་ཚོར་ཐུག་འཕྲད་བྱེད་ཀྱི་ཡོད། འདི་ནི་རྒྱ་ནག་དང་ཧོང་ཀོང་གཅིག་པུའི་ནང་དུ་བྱེད་ཀྱི་ཡོད་པ་ཞིག་མིན། འཛམ་གླིང་ཡུལ་གྲུ་གང་སའི་ཨ་རིའི་གཞུང་ཁག་ཏུ་ཉིན་ལྟར་ཐུག་འཕྲད་འདིའི་རིགས་འབྱུང་གི་ཡོད། རྒྱ་ནག་གཞུང་གིས་སྐྱོན་འཛུགས་བྱ་ཡུལ་ཨ་མི་རི་ཀའི་ཕྱི་འབྲེལ་མི་སྣ་དེས་རང་གི་ལས་འགན་སྒྲུབ་བཞིན་ཡོད། ང་ཚོས་ཨ་མི་རི་ཀའི་ཕྱི་འབྲེལ་མི་སྣ་དེར་ཧོང་ཀོང་གི་ངོ་རྒོལ་བའི་འགོ་ཁྲིད་ཚོར་ཐུག་འཕྲད་བྱ་དགོས་པའི་བཀོད་ཁྱབ་བཏང་བ་ཡིན་ཞེས་བཤད་འདུག

རྒྱ་ནག་གཞུང་གིས་ཧོང་ཀོང་ས་གནས་གཞུང་ལ་ཁྲིམས་བྱོལ་བའམ། ཡང་ན་དོགས་ཅན་པ་རྣམས་རྩིས་སྤྲོད་ཀྱི་བཅའ་ཁྲིམས་ཤིག་གཏན་འབེབས་བྱ་དགོས་པའི་རྒྱུད་སྐུལ་བྱས་པས་འདས་པའི་ཟླ་བ་གཉིས་ལྷག་གི་རིང་དེར་ཧོང་ཀོང་མི་མང་ས་ཡ་མང་པོས་ངོ་རྒོལ་ཁྲོམ་སྐོར་དང་ཉེན་རྟོག་པར་རྒོལ་འཛིན། ཧོང་ཀོང་གི་ཉེན་རྟོག་པ་ཚོས་མི་མང་ངོ་རྒོལ་བ་ཚོར་དྲག་གནོན་བྱས་ནས་ཟིང་ཆ་ཆེན་པོ་ཞིག་ཏུ་གྱུར། རྒྱ་ནག་གཞུང་གིས་ཨ་མི་རི་ཀ་དང་ནུབ་ཕྱོགས་རྒྱལ་ཁབ་ཁག་གིས་ངན་སྐུལ་བྱས་ནས་ཧོང་ཀོང་ལ་ཟིང་འཁྲུག་སློང་གི་ཡོད་པའི་སྐྱོན་འཛུགས་བྱེད་ཀྱི་ཡོད་པ་སྟེ། པ་ཀི་སི་ཐན་དུ་བཅའ་སྡོད་རྒྱ་ནག་གི་གཞུང་ཚབ་པ་གཞོན་པ་ཀྲའོ་ལི་ཅན་གྱིས་ཊོས་ཊར་དྲྭ་ལམ་ངོ་ཚ། ངན་སྐུལ་བ་མིག་མཐོང་ལག་ཟིན་བྱུང་བ་རེད་ཅེས་ཏ་གུང་པའོ་ཚགས་པར་ལ་ཐོན་པའི་གསར་འགྱུར་དེའི་འདྲ་པར་ཞིག་གི་མཉམ་དུ་འཕྲིན་ཐུང་ཞིག་སྤེལ། ཨ་རིའི་ཕྱི་སྲིད་ལྷན་ཁང་གིས་ང་ཚོས་རྒྱ་ནག་གི་ནང་སྲིད་ལ་གཏན་ནས་ཐེ་གཏོགས་བྱེད་ཀྱི་མེད། སྲིད་འཛིན་ཌོ་ནལ་ཊམ་གྱིས་ཨ་མི་རི་ཀ་ཧོང་ཀོང་གི་ངོ་རྒོལ་དེར་འབྲེལ་བ་མེད་པར་རྒྱང་ཐག་རིང་པོ་བྱས་ནས་སྡོད་དགོས། ཧོང་ཀོང་རྒྱ་ནག་གི་ཆ་ཤས་ཤིག་ཡིན་པས་ཧོང་ཀོང་གི་གནད་དོན་རྒྱ་ནག་གི་ནང་སྲིད་ཅིག་རེད་ཅེས་བཀོད་ཁྱབ་བཏང་སོང་། ཐ་ན་སྲིད་འཛིན་ཌོ་ནལ་ཊམ་གྱིས་ཧོང་ཀོང་གི་ངོ་རྒོལ་དེར་ཟིང་ཆ་ཞེས་འགྲེལ་བཤད་བརྒྱབ་ཡོད་པ་ནི་རྒྱ་ནག་གཞུང་གི་ཚིག་འགྲེལ་ཁག་དང་འདྲ་བོ་ཞིག་ཆགས་ཡོད། ཧོང་ཀོང་མི་དམངས་ལ་གཏམ་བརྗོད་རང་དབང་དང་ཞི་བའི་འདུ་འཛོམས་ཀྱི་རང་དབང་ཡོད་པ་དེར་ཨ་མི་རི་ཀས་མུ་མཐུད་དུ་རྒྱབ་སྐྱོར་བྱེད་ཀྱི་ཡོད་ཅེས་བཤད།

ཉེ་ཆར་ཨོ་གླིང་རྒྱལ་ཁབ་དང་དབྱིན་ཇི། ཨར་ལན་ཌི་དང་སིངྒ་པུར། ཉི་ཧོང་བཅས་ཀྱིས་རང་གི་སྤྱི་དམངས་རྣམས་ཧོང་ཀོང་ལ་འགྲིམ་འགྲུལ་བྱས་ན་བདེ་འཇགས་མེད་པའི་བརྡ་ཁྱབ་བཏང་ཡོད་ཅིང་། གཟའ་ཕུར་བུའི་ཉིན་ཨ་མི་རི་ཀས་ཀྱང་རང་གི་སྤྱི་དམངས་རྣམས་ཧོང་ཀོང་ལ་འགྲུལ་སྐྱོད་བྱས་ན་བདེ་འཇགས་མི་འདུག ཕྱི་ཟླ་༨་ཚེས་༩་ནས་ཉིན་གསུམ་གྱི་རིང་ལ་ཧོང་ཀོང་གི་ངོ་རྒོལ་བ་ཚོས་གནམ་ཐང་བཀག་ནས་ངོ་རྒོལ་བྱ་རྒྱུའི་ཁྱབ་བསྒྲགས་བྱས་ཡོད་པར་བསམ་བློ་ཐོངས་ཞེས་བཀོད་ཁྱབ་ཅིག་བསྒྲགས། ཁ་སྔོན་ཕྱི་ཟླ་༦་པ་ནས་ཧོང་ཀོང་གི་དངུལ་རྩའི་ཁྲོམ་རའི་ལྟེ་གནས་དེར་ངོ་རྒོལ་བྱུང་ནས་བདེ་འཇགས་མེད་པར་གྱུར། ད་ལྟ་ཧོང་ཀོང་གི་ངོ་རྒོལ་བ་ཚོས་ཁྲིམས་བྱོལ་བ་རྩིས་སྤྲོད་ཀྱི་བཅའ་ཁྲིམས་གཏན་འབེབས་བྱ་རྒྱུ་རྦད་དེ་ཕྱིར་འཐེན་བྱ་དགོས། ཧོང་ཀོང་གི་སྲིད་སྐྱོང་ཁེ་རི་ལམ་རང་གི་ལས་གནས་ནས་གནང་བ་ཞུ་དགོས་ཞེས་སྐད་འབོད་བྱེད་ཀྱི་ཡོད་པ་ཁོ་ན་མིན། ཧོང་ཀོང་གི་ངོ་རྒོལ་བ་ཚོས་དབྱིན་ཇིའི་མི་སེར་སྤེལ་ཡུལ་དུ་གྱུར་པའི་ས་གནས་དེར་ཕྱོགས་ཡོངས་ནས་དམངས་གཙོའི་སྒྱུར་བཅོས་གཏོང་དགོས། ནག་ཉེས་འཛུགས་རྒྱུ་མེད་པར་འཛིན་བཟུང་བྱེད་ཡོད་པའི་མི་མང་ངོ་རྒོལ་བ་རྣམས་གློད་གྲོལ་གཏོང་དགོས། ཧོང་ཀོང་གི་ཉེན་རྟོག་པ་ཚོས་འགོག་ར་བརྒྱབ་ནས་ངོ་རྒོལ་བྱེད་དུ་འཇུག་གི་མེད་པ་ཕྱིར་འཐེན་བྱ་དགོས། ཧོང་ཀོང་གི་ཉེན་རྟོག་པའི་དྲག་གནོན་ལ་རང་བཙན་གྱི་ཚོགས་པ་ཞིག་གིས་ཞིབ་འཇུག་བྱ་དགོས། ཧོང་ཀོང་བཅིངས་འགྲོལ་གཏོང་དགོས་ཞེས་འབོད་ཚིག་སྣ་ཚོགས་དང་དགོས་འདུན་འདྲ་མིན་ཞིག་འདོན་གྱི་ཡོད་པ་རེད།

ཧོང་ཀོང་ས་གནས་ཀྱི་འགོ་ཁྲིད་ཚོས་མི་མང་གི་ངོ་རྒོལ་བྱས་པའི་སྟབས་ཀྱིས་མངའ་ཁུལ་དེའི་དཔལ་འབྱོར་དང་ཚོང་ལས་ལ་གྱོང་གུད་ཆེན་པོ་ཕོག་སོང་། ༢༠༠༣་ལོར་རྒྱ་ནག་ལ་གློ་ཚད་ཀྱི་ནད་ཡམས་ཤིག་ཁྱབ་པའི་སྐབས་སུ་ཧོང་ཀོང་གི་དཔལ་འབྱོར་དང་ཚོང་ལས་ལ་གྱོང་གུད་ཕོག་ནས་བཟུང་། ད་ལོ་བར་དུ་ཧོང་ཀོང་གི་དཔལ་འབྱོར་དང་ཚོང་ལས་ལ་གྱོང་གུད་ཆེན་པོ་འདི་འདྲ་ཞིག་ཕོག་མྱོང་མེད། བདུན་ཕྲག་རྗེས་མའི་གཟའ་མིག་དམར་ཉིན་ཧོང་ཀོང་ས་གནས་ཀྱི་འགོ་ཁྲིད་ཚོ་ཚོགས་འདུ་འཚོགས་རྒྱུ་ཡིན། ད་ལྟ་ཟླ་བ་གསུམ་འགྲོ་བཞིན་ཡོད་པའི་ཧོང་ཀོང་གི་ངོ་རྒོལ་འདིར་གདོང་ལེན་ཇི་ལྟར་བྱ་དགོས་མིན། ད་ལོའི་ངོ་རྒོལ་གྱིས་རྐྱེན་པས་ཧོང་ཀོང་གི་ཚོང་ལས་དང་དཔལ་འབྱོར་འཕེལ་རྒྱས་ལ་འགོག་རྐྱེན་འབྱུང་གི་ཡོད་པ་ཇི་ལྟར་སེལ་དགོས་མིན་ལ་གྲོས་བསྡུར་བྱ་འཆར་ཡོད་ཅེས་བཤད། ཧོང་ཀོང་གི་འགོ་ཁྲིད་ཚོའི་ཚོགས་འདུ་དེར་ཚོང་ལས་སྡེ་ཚན་ཁག་༣༣་གྱི་སྐུ་ཚབ་རྣམས་ཀྱང་གདན་འདྲེན་ཀྱིས་ཧོང་ཀོང་གི་དཔལ་འབྱོར་ཉམས་རྒུད་དང་ཚོང་ལས་ལ་གྱོང་གུད་འཕོག་གི་ཡོད་པའི་གནད་དོན་འདི་ཚབས་ཆེན་དང་ཡུན་རིང་གི་དཀའ་ངལ་ཞིག་ལ་ངོས་འཛིན་བྱས་ནས་གདོང་ལེན་བྱེད་ཕྱོགས་སུ་གྲོས་བསྡུར་བྱ་འཆར་ཡོད་ཅེས་གནས་ཚུལ་སྤེལ་འདུག ཡིན་ནའང་ཧོང་ཀོང་གི་སྲིད་སྐྱོང་ཁེ་རི་ལམ་གྱིས་ང་ཚོས་ངོ་རྒོལ་བ་ཉུང་ཤས་ཀྱིས་བཏོན་པའི་དགོས་འདུན་ཁག་ལ་ངོས་ལེན་བྱ་ཐུབ་ཐབས་མེད། ང་ཚོས་ཧོང་ཀོང་གི་རྒྱ་ཆེའི་མང་ཚོགས་ལ་ཁེ་ཕན་ཡོད་པ་ཞིག་བསྒྲུབ་དགོས་ཞེས་ལངས་ཕྱོགས་མཁྲེགས་འཛིན་དང་ཧོང་ཀོང་གི་མི་མང་ངོ་རྒོལ་བ་ཚོས་དགོས་འདུན་བཏོན་ཡོད་པ་དེར་མོས་མཐུན་བྱ་རྒྱུའི་རྣམ་འགྱུར་ཙམ་ཡང་བསྟན་མེད་པ་རེད།།

XS
SM
MD
LG