ཨ་རིའི་ཧ་ཝར་ཊི་སློབ་ཆེན་གྱི་ཉམས་ཞིབ་པ་བྰེས་ལམ་ཨོ་བུར་ཧོ་ཁྲི་ཡིས་ཉེ་ཆར་ཨ་རིའི་རྒྱལ་ས་ཝ་ཤིང་ཊོན་ཏུ་ཡོད་པའི་ཉམས་ཞིབ་ཁང་ཞིག་ཏུ་ཁོང་གིས་ཉེ་ཆར་བཏོན་པའི་རྒྱ་ནག་གི་ཡར་རྒྱས་ཁྲོད་ཀྱི་ཉེན་ཁ་ཞེས་པའི་དཔེ་དེབ་སྐོར་གྱི་དཔྱད་ཞིབ་ཚོགས་འདུའི་སྟེང་བརྗོད་དོན་ལ། འདས་པའི་ལོ་ངོ་བཞི་བཅུའི་རིང་རྒྱ་ནག་གི་བཅོས་སྒྱུར་སྒོ་འབྱེད་ཀྱི་སྲིད་ཇུས་འོག་དཔལ་འབྱོར་ཡར་རྒྱས་བྱུང་སྟེ་ད་ལྟ་རྒྱ་ནག་དམར་ཕྱོགས་ཚོགས་པའི་ཆབ་སྲིད་ཀྱི་གོ་གནས་ཇེ་བརྟན་དུ་བཏང་ཡོད་ནའང་། དཔལ་འབྱོར་ཡར་རྒྱས་བྱུང་བའི་གནས་སྟངས་འདིས་ལྡོག་སྟེ་རྒྱ་ནག་ལ་ཉེན་ཁ་གསར་ཞིག་ཀྱང་སློང་མི་སྲིད་པ་མ་རེད། ལྷག་པར་དུ་ད་ལྟའི་སྲིད་འཛིན་ཞིས་ཅིན་ཕིན་གྱི་ཉེན་ཁ་ཅན་གྱི་ཆབ་སྲིད་འཐབ་ཇུས་དེ་རྒྱ་ནག་གི་དཔལ་འབྱོར་ཡར་རྒྱས་ཀྱི་གེགས་སུ་འགྲོ་ངེས་པ་དང་དེ་ལས་ལྷག་པའི་ཉེན་ཁ་སློང་སྲིད་ཅེས་དང་། ད་ལྟ་རྒྱ་ནག་གི་ཆབ་སྲིད་དང་དཔལ་འབྱོར་གྱི་གནས་སྟངས་དེ་ཧ་ཅང་རྙོག་འཛིང་ཅན་གྱི་དུས་སྐབས་ཤིག་ལ་འཁེལ་ཡོད་པའི་སྟབས་ཀྱིས་གལ་སྲིད་སྲིད་གཞུང་གི་སྒྲིག་གཞིར་འགྱུར་བ་མ་བཏང་ན་མུ་མཐུད་ནས་དཔལ་འབྱོར་འཕེལ་རྒྱས་འགྲོ་རྒྱུ་ཁག་པོ་ཡིན་པའི་ངོས་འཛིན་བྱེད་བཞིན་པ་དང་། རྒྱ་ནག་གཞུང་གིས་སྒེར་གཉེར་ཁེ་ལས་མང་པོ་ཞིག་གི་དཔལ་འབྱོར་རང་རྐྱ་འཕེར་བ་དང་རང་དབང་ལྡན་པའི་སྒོ་ནས་འཕེལ་རྒྱས་གཏོང་རྒྱུར་ཚོད་འཛིན་བྱེད་བཞིན་པ་མ་ཟད། སྲིད་འཛིན་ཞིས་ཅིན་ཕིན་གྱིས་རྒྱ་ནག་དམར་ཕྱོགས་ཚོགས་པའི་དབང་ཆ་གཅིག་སྡུད་ཀྱི་དབང་སྒྱུར་གོ་གནས་སྲ་བརྟན་ཡོང་རྒྱུར་དམིགས་བསལ་གྱིས་འབད་བརྩོན་བྱེད་ཀྱི་ཡོད་པ་བཅས་ཀྱིས་སྒེར་གྱི་ཁེ་གཉེར་བ་མང་པོ་ཞིག་གི་འདོད་བློ་ཁེངས་ཀྱི་མེད་པ་འདི་རྒྱ་ནག་གི་དཔལ་འབྱོར་འཕེལ་རྒྱས་ཀྱི་གེགས་སུ་འགྲོ་བའི་ཚོད་དཔག་བྱས་འདུག སྲིད་འཛིན་ཞིས་ཅིན་ཕིན་གྱིས་ཁོང་གི་སྲིད་འཛིན་གྱི་ལས་ཡུན་དང་པོའི་ནང་དུ་རྒྱ་ནག་དམར་ཕྱོགས་ཚོགས་པའི་སྲིད་དབང་སྲ་བརྟན་ཡོང་ཆེད་ཁོང་དང་ལྟ་བ་ལངས་ཕྱོགས་མི་མཐུན་མཁན་དག་རྩ་མེད་དུ་བཏང་ཡོད་པ་དང་། སྲིད་འཛིན་གྱི་ལས་ཡུན་གཉིས་པའི་རིང་རྒྱ་ནག་ལ་བཅོས་སྒྱུར་གཏོང་རྒྱུའི་འཆར་གཞི་ཡོད་ནའང་ད་སྔ་གྲུབ་འབྲས་ཅི་ཡང་བྱུང་མེད་པ། ཁོས་མུ་མཐུད་ནས་རང་གི་མངོན་འདོད་དག་སྒྲུབ་ཆེད་སྲིད་འཛིན་ལས་ཡུན་གསུམ་པར་མུ་མཐུད་ནས་ཆབ་སྲིད་ཀྱི་ལས་འགན་འཁུར་རྒྱུ་གཏན་འཁེལ་ཡིན་པ། ད་སྔ་ཞིས་ཅིན་ཕིན་གྱིས་ཁོས་བཏོན་པའི་སྲིད་ཇུས་དག་ལག་བསྟར་དོན་འཁྱོལ་བྱེད་ཐུབ་ཀྱི་མེད་པ་མ་ཟད་ཐབས་ཇུས་གལ་ཆེན་ཅི་ཡང་འདོན་ཐུབ་ཀྱི་མེད་དེ། དཔེར་ན། རྒྱ་ནག་གི་དཔལ་འབྱོར་ལ་བཅོས་སྒྱུར་དང་འཕེལ་རྒྱས་ཀྱི་འགྲོས་མྱུར་དུ་གཏོང་རྒྱུའི་རེ་བ་བྱེད་ཀྱི་ཡོད་ནའང་། ཁོས་འདོད་པ་ལྟར་གྱི་རྒྱ་ནག་གི་རྒྱལ་གཉེར་ཁེ་ལས་དག་ཁྲོམ་ར་ཅན་དུ་བསྒྱུར་རྒྱུ་དང་། རྒྱལ་གཉེར་ཁེ་ལས་དང་སྒེར་གཉེར་ཁེ་ལས་དག་གི་ལས་དོན་གྱི་མཐའ་མའི་ཐག་གཅོད་ཀྱི་དབང་ཆ་དེ་སྔར་བཞིན་དམར་ཕྱོགས་ཚོགས་པའི་མགོ་ཁྲིད་ཚོར་ཡོད་དགོས་པ་གཉིས་འགལ་ཟླ་ཆགས་ཡོད་པ། དེ་བཞིན་ཁེ་ལས་དག་གི་དཔལ་འབྱོར་ཐོན་ཁུངས་ཀྱི་སྙོམས་སྒྲིག་དེ་ཁྲོམ་རས་ཐག་གཅོད་བྱེད་རྒྱུ་དང་རྒྱལ་གཉེར་ཁེ་ལས་དག་ལ་དམིགས་བསལ་གྱིས་རོགས་དངུལ་སྟེར་གྱི་ཡོད་པ་གཉིས་འགལ་ཟླ་ཆགས་ཀྱི་ཡོད་པ་བཅས་འགལ་ཟླ་འདི་དག་གི་ཁྲོད་དུ་ཞིས་ཅིན་ཕིན་གྱིས་ཡོད་ཚད་སྒྲུབ་འདོད་པའི་རེ་བ་འདི་དག་ཡོད་ཚད་འགྲུབ་མི་སྲིད་པའི་ཉེན་ཁ་ཞིག་ལ་འཕྲད་རྒྱུའི་རྟགས་མཚན་མངོན་ཡོད་པ་དང་། རྒྱ་ནག་གི་ཁྲོམ་ར་སྙོམས་སྒྲིག་དང་ཆབ་སྲིད་ཀྱི་ཚོད་འཛིན་དམ་པོའི་བར་དུ་ཛ་དྲག་པའི་འགལ་ཟླ་ཞིག་ཡོད་ནའང་། ཁོས་སྔར་བཞིན་ཆབ་སྲིད་ཀྱི་གོ་གནས་སྲ་བརྟན་དུ་གཏོང་རྒྱུ་དེ་ལས་དོན་ཨང་དང་པོར་བརྩི་བཞིན་པ་རེད། དེ་སྔོན་མའོ་ཙེ་ཏུང་གི་དུས་སྐབས་སུ་ཆབ་སྲིད་གཙོ་བོར་བྱས་ཤིང་། ཏིང་ཞོ་ཕིན་དང་ཅང་ཙེ་མིན་གྱི་སྐབས་སུ་དཔལ་འབྱོར་གཙོ་བོར་བྱས་ཡོད་ལ། ད་ལྟ་ཞིས་ཅིན་ཕིན་གྱི་སྐབས་སུ་ཡང་བསྐྱར་ཆབ་སྲིད་གཙོ་བོར་བཟུང་བཞིན་པ་འདི་ནི་དཔལ་འབྱོར་འཕེལ་རྒྱས་ཀྱི་ངོས་ནས་མི་ལེགས་པའི་སྔ་ལྟོས་ཤིག་རེད། ད་སྔ་རྒྱ་ནག་དམར་ཕྱོགས་གཞུང་གིས་སྒེར་གཉེར་ཁེ་ལས་དག་ལ་ཡང་ཐེ་ཇུས་བྱས་ཏེ་ཆབ་སྲིད་ཀྱི་དབང་ཆས་ཡོད་ཚད་དབང་སྒྱུར་རྒྱུ་ལས་སླ་རུ་གཏོང་བཞིན་ཡོད་ནའང་། རྒྱ་ནག་གི་ཤེས་ལྡན་པ་མང་པོས་ཨ་རྒྱ་གཉིས་ཀྱི་ཉོ་ཚོང་གི་འགལ་ཟླ་བརྒྱུད་ནས་རྒྱ་ནག་གི་ཁྲོམ་ར་སྒོ་འབྱེད་བྱ་རྒྱུར་སྐུལ་འདེད་གཏོང་ཐུབ་རྒྱུའི་རེ་བ་བྱེད་ཀྱི་ཡོད་པ་བཅས་ཀྱི་དཔྱད་གཏམ་སྤེལ་འདུག
གཟའ་ཉི་མ། ༢༠༢༣/༡༢/༠༣