༄༅།། ཉེ་དུས་ཤིག་ནས་ཨ་རིའི་སྲིད་འཛིན་ཌོ་ནལ་ཊམ་གྱིས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་རྒྱུའི་སྲིད་ཇུས་ཤིག་ལག་ལེན་བསྟར་ནས་ཕྱོགས་གཉིས་ཀྱི་འབྲེལ་བ་བཟང་པོ་མེད་པ་དང་། ཨ་མི་རི་ཀའི་སྲིད་གཞུང་གིས་ཐེ་ཝན་ལ་རྒྱབ་སྐྱོར་བྱ་རྒྱུ་ཤུགས་ཆེ་རུ་འགྲོ་བཞིན་པའི་གོ་སྐབས་བཟུང་སྟེ། ཐེ་ཝན་སླར་ཡང་མཉམ་འབྲེལ་རྒྱལ་ཚོགས་ཀྱི་སྒྲིག་འཛུགས་ཁག་ལ་མཉམ་ཞུགས་བྱ་ཐབས་བྱེད་བཞིན་པ་རེད། གལ་ཏེ་ཐེ་ཝན་རྒྱལ་ཚོགས་ཀྱི་སྒྲིག་འཛུགས་ཁག་ལ་མཉམ་ཞུགས་བྱ་མ་ཐུབ་ཀྱང་རྒྱ་ནག་དང་ཨ་མི་རི་ཀའི་འབྲེལ་བར་འགལ་རྐྱེན་དུ་འགྱུར་སྲིད་པའི་སྲིད་ཇུས་ཁག་ཅིག་ལག་ལེན་བསྟར་རྒྱུ་ཤུགས་ཆེ་རུ་བཏང་འདུག
དེ་ཡང་ཐེ་ཝན་གྱི་ཁོར་ཡུག་སྲུང་སྐྱོབ་ལྷན་ཁང་གི་བློན་ཆེན་གཞོན་པ་ཐོ་མ་སི་ཆན་དང་མཐོ་རིམ་ལས་སྣེ་ཨོ་ཌི་རི་ཐང་གཉིས་ནེའུ་ཡོཀ་གྲོང་ཁྱེར་ལ་ཕེབས་ཏེ་རྒྱུན་འཁྱོངས་པའི་མཉམ་འབྲེལ་རྒྱལ་ཚོགས་ཀྱི་འཛུགས་སྐྲུན་དམིགས་ཡུལ་ཁག་ལ་ཐེ་ཝན་གྱིས་རྩ་འཛིན་བྱས་ནས་གྲུབ་འབྲས་གང་ལེགས་ཐོན་ཡོད་པ་རྣམས་སྒྲོག་སྤེལ་བྱེད་ཀྱི་ཡོད་ཅིང། དཔེར་ན་ཨ་རིའི་ནེའུ་ཡོཀ་གྲོང་ཁྱེར་དུ་བཅའ་སྡོད་ཐེ་ཝན་གྱི་སྐུ་ཚབ་དོན་གཅོད་ཁང་དང་ཀོ་ལིམ་བྷི་ཡ་སློབ་གྲྭ་ཆེན་མོ། མར་ཤཱེལ་གླིང་ཕྲན་རྒྱལ་ཁབ་བཅས་ཀྱིས་ཐུན་མོང་གི་གོ་སྒྲིག་བྱས་པའི་རྒྱུན་འཁྱོངས་ཐུབ་པའི་མཉམ་འབྲེལ་རྒྱལ་ཚོགས་ཀྱི་འཛུགས་སྐྲུན་དམིགས་ཡུལ་ལ་བགྲོ་གླེང་བྱ་རྒྱུ། ཐེ་ཝན་གྱི་ཁོར་ཡུག་སྲུང་སྐྱོབ་ལྷན་ཁང་གི་བློན་ཆེན་གཞོན་པས་བགྲོ་གླེང་དེའི་ཐོག་ཏུ་འདས་པའི་ལོ་དེར་ཐེ་ཝན་གཞུང་གིས་རྒྱུན་འཁྱོངས་ཐུབ་པའི་མཉམ་འབྲེལ་རྒྱལ་ཚོགས་ཀྱི་འཛུགས་སྐྲུན་དམིགས་ཡུལ་ཁག་ལག་ལེན་བསྟར་པའི་གྲུབ་འབྲས་རྣམས་བསྒྲགས་པ་རེད། གཟའ་ཕུར་བུའི་ཉིན་ཐེ་ཝན་གྱི་ཁོར་ཡུག་སྲུང་སྐྱོབ་ལྷན་ཁང་གི་བློན་ཆེན་གཞོན་པས་ཐེ་ཝན་གཞུང་གིས་ཨང་རྟགས་འཕྲུལ་རིག་ལག་རྩལ་བཀོལ་སྤྱོད་བྱས་ནས་གསར་གཏོད་དང་སྤྱི་ཚོགས་ཡར་རྒྱས། མཉམ་འབྲེལ་རྒྱལ་ཚོགས་ཀྱི་རྒྱུན་འཁྱོངས་ཐུབ་པའི་འཛུགས་སྐྲུན་དམིགས་ཡུལ་ལག་བསྟར་བྱས་པའི་གྲུབ་འབྲས་རྣམས་གླེང་སློང་བྱ་འཆར་ཡོད་པར་མ་ཟད། གཟའ་འཁོར་འདིའི་བགྲོ་གླེང་ཁག་ཐེ་ཝན་གྱི་སྐུ་ཚབ་གཅོད་དོན་ཁང་དང་ཀོ་ལིམ་བྷི་ཡ་སློབ་གྲྭ་ཆེན་མོའི་ཁོར་ཡུག་སྡེ་ཚན། ཨང་རྟགས་འཕྲུལ་རིག་སྡེ་ཚན་དང་འཛམ་གླིང་གི་གནམ་གཤིས་འགྱུར་ལྡོག་སྡེ་ཚན། མར་ཤཱེལ་གླིང་ཕྲན་རྒྱལ་ཁབ་བཅས་ཀྱིས་མཉམ་དུ་གོ་སྒྲིག་བྱེད་ཀྱི་ཡོད་པ་དང་། ད་དུང་ཐེ་ཝན་གྱི་གྲོས་ཚོགས་འཐུས་མི་ཁག་ཅིག་ཀྱང་ནེའུ་ཡོཀ་གྲོང་ཁྱེར་དུ་ཕེབས་ནས་འབྲེལ་བ་རྒྱ་སྐྱེད་དང་སྲ་བརྟན། ཐེ་ཝན་གྱི་དམངས་གཙོ་དང་རང་དབང་། ཁྲིམས་ཀྱིས་སྐྱོང་བའི་ལམ་ལུགས་བཅས་ལ་གྲུབ་འབྲས་གཟེངས་སུ་ཐོན་པ་ཞིག་བྱུང་ཡོད་པ་རྣམས་དྲིལ་བསྒྲགས། ཐེ་ཝན་གྱི་གཞུང་འབྲེལ་མ་ཡིན་པའི་ཚོགས་པ་ཁག་གིས་ཕྱི་ཟླ་༡༠་ཚེས་༡་བར་དུ་མཉམ་འབྲེལ་རྒྱལ་ཚོགས་ཀྱི་རྒྱས་འཛོམས་ཚོགས་ཆེན་ཞོར་དུ་ལས་འགུལ་སྤེལ་ནས་མཉམ་འབྲེལ་རྒྱལ་ཚོགས་ཀྱི་ཚོགས་འཐུས་རྒྱལ་ཁབ་ཁག་གི་གཞུང་འབྲེལ་མ་ཡིན་པའི་ཚོགས་པ་ཁག་ལ་འབྲེལ་བ་འཛུགས་རྒྱུ། འཛམ་གླིང་གི་གནམ་གཤིས་འགྱུར་ལྡོག་བཀག་འགོག་དང་ཁོར་ཡུག་སྲུང་སྐྱོབ་གཉིས་མཉམ་འབྲེལ་རྒྱལ་ཚོགས་ཀྱི་ལས་དོན་གཙོ་བོ་ཞིག་ཡིན་པས། ཐེ་ཝན་གཞུང་གིས་ཁོར་ཡུག་སྲུང་སྐྱོབ་དང་རྒྱུན་འཁྱོངས་ཐུབ་པའི་འཛུགས་སྐྲུན་སྲིད་ཇུས་གླེང་ནས་རྒྱལ་སྤྱིའི་ཐོག་ཏུ་སྡིངས་ཆ་ཞིག་རྙེད། ཐེ་ཝན་མཉམ་འབྲེལ་རྒྱལ་ཚོགས་ཀྱི་སྒྲིག་འཛུགས་ཁག་ལ་བསྐྱར་དུ་ཚུགས་མི་སྲིད་ཀྱང་མཚོ་གླིང་དེའི་ཁོར་ཡུག་སྲུང་སྐྱོབ་དང་རྒྱུན་འཁྱོངས་ཐུབ་པའི་འཛུགས་སྐྲུན་སྲིད་ཇུས་ཁག་ལ་རྒྱལ་ཚོགས་ཀྱི་ཚོགས་འཐུས་རྒྱལ་ཁབ་ཁག་གིས་རྒྱབ་སྐྱོར་བྱེད་པའམ། ཡང་ན་གདུང་སེམས་མཉམ་སྐྱེད་ཀྱི་རྣམ་འགྱུར་ཞིག་སྟོན། ཐེ་ཝན་གྱི་ཉམས་ཞིབ་པ་ཚོས་རྒྱ་ནག་གི་དཔལ་འབྱོར་དང་དམག་གི་སྟོབས་ཤུགས་རྒྱ་སྐྱེད་འགྲོ་བའི་དུས་སྐབས་འདིར་ཐེ་ཝན་རྒྱལ་ཚོགས་ཀྱི་ཡན་ལག་སྒྲིག་འཛུགས་ཁག་ལ་མཉམ་ཞུགས་ཐུབ་རྒྱུ་དེར་སྔར་ལས་ལྷག་པའི་ཤུགས་སྣོན་རྒྱག་དགོས། ཐེ་ཝན་མཉམ་འབྲེལ་རྒྱལ་ཚོགས་ལ་ཐད་ཀར་མཉམ་ཞུགས་བྱ་རྒྱུའི་ཚབ་ཏུ་འཛམ་གླིང་འཕྲོད་བསྟེན་སྒྲིག་འཛུགས་དང་ཁོར་ཡུག་སྲུང་སྐྱོབ་སྡེ་ཚན་ལྟ་བུར་མཉམ་ཞུགས་བྱ་དགོས། ཐེ་ཝན་གྱི་ཕྱི་སྲིད་འཛིན་ཕྱོགས་ལ་འགྱུར་བ་ཅུང་ཟད་ཅིག་གཏོང་དགོས་ཀྱིན་འདུག་ཅེས་བསམ་འཆར་བཤད། རྒྱ་ནག་གི་གནོན་ཤུགས་འོག་ཏུ་ཐེ་ཝན་ལ་ཕྱི་འབྲེལ་གཅོད་མཁན་རྒྱལ་ཁབ་ཇེ་མང་དུ་འགྲོ་བཞིན་ཡོད་པས་ཨ་མི་རི་ཀས་ཐེ་ཝན་ལ་ཕྱི་འབྲེལ་བཅད་པའི་རྒྱལ་ཁབ་ཁག་ཏུ་བཅའ་སྡོད་ཨ་མི་རི་ཀའི་གཞུང་ཚབ་པ་རྣམས་ཕྱིར་འཐེན་བྱས་ནས་ངོ་རྒོལ་བྱས་སོ།།
