ཨ་རིའི་ནང་རྟེན་གཞི་བྱས་པའི་ཞི་བདེ་གོང་སྤེལ་ལྟེ་གནས་ཀྱིས་འཛམ་གླིང་ནང་ཆོས་ལུགས་དང་མི་རིགས་ཕན་ཚུན་དབར་གྱི་རྩོད་རྙོག་ཡོད་པའི་རྒྱལ་ཁབ་ཁག་ནས་གཞོན་སྐྱེས་འགོ་ཁྲིད་༢༥ བཞུགས་སྒར་རྡ་རམ་ས་ལར་༧གོང་ས་སྐྱབས་མགོན་ཆེན་པོ་མཆོག་མཇལ་ཁ་དང་བཀའ་སློབ་ཞུ་བར་བཅར་བའི་ལས་རིམ་ཐེངས་གཉིས་པ་དེ་དབུ་འཛུགས་གནང་ཡོད་པ་དང་གཟའ་ཟླ་བའི་ཉིན་སྤྱི་ནོར་༧གོང་ས་མཆོག་ནས་བཀའ་སློབ་སྩལ་ཡོད་པ་རེད། ཐེངས་འདིའི་བགྲོ་གླེང་ལྷན་ཚོགས་འདི་སྤྱི་ཟླ་ ༡༡ པའི་ཚེས་ ༦ དང་ ༧ ཉིན་གཉིས་རིང་འཚོགས་ཀྱི་ཡོད་པ་དང་། ལྷན་ཚོགས་ནང་ཨབ་གྷ་ནི་སི་ཐན་དང་འབར་མ། ཀོ་ལམ་བྷི་ཡ། ཨི་རཱག ནེ་ཇི་རི་ཡ།ཤྲི་ལངྐ། ལྷོ་སུ་དཱན། སི་རི་ཡ། ཏུ་ནི་ཤི་ཡ། དཀྱིལ་ཤར་ཡུལ་གྲུ། ཨ་རི། སུ་དཱན་བཅས་རྒྱལ་ཁབ་ ༡༢ ནས་མི་གྲངས་ ༢༥ ལྷན་བཅར་ཞུས་ཡོད་འདུག
