ཨ་མདོ་རྔ་པར་ཆོ་འཕྲུལ་ཟླ་བའི་བོད་ཚེས་༡༥ཉིན་བུད་མེད་ཅིག་གིས་རང་སྲེག་ངོ་རྒོལ་གནང་བའི་རྗེས་ཡང་རེས་གཟའ་ཉི་མ་དང་སྤྱི་ཚེས་༨ཉིན་དགེ་འདུན་པ་ཞིག་གིས་ངོ་རྒོལ་སྐད་འབོད་གནང་འདུག
དེ་ཡང་ཆོ་འཕྲུལ་ཟླ་བའི་བོད་ཚེས་༡༥དང་རེས་གཟའ་ཕུར་བུའི་ཉིན་བོད་མདོ་སྨད་རྔ་པ་རྫོང་གི་སྤྲོ་ཚིགས་ཡུལ་ཚོའི་རྡོ་བ་སྡེ་པའི་བུད་མེད་ནོར་ཕྱུག་ཞུ་བ་ཞིག་གིས་རང་ལུས་མེར་བསྲེགས་བཏང་འདུག དགུང་གྲངས་༤༧ལ་ཕེབས་པའི་ནོར་ཕྱུག་ལགས་ཀྱིས་རང་སྲེག་ངོ་རྒོལ་གནང་སྐབས་མཚན་མོ་ཡིན་ཞིང་། འདས་གྲོངས་སུ་སོང་བའི་རྗེས་ཁོང་གི་སྐུ་ཕུང་རྒྱ་ནག་གཞུང་གིས་བཙན་འཕྲོག་བྱེད་པར་དོགས་ཏེ་ལམ་སེང་སྤྱི་ཚེས་༦ཉིན་གྱི་སྔ་དྲོ་སྐུ་ཕུང་ཞུགས་འབུལ་ཞུས་ཡོད་འདུག ཤེས་རྟོགས་བྱུང་བར་གཞིགས་ན། ཁོང་གིས་ལོ་ཤས་གོང་ནས་༸གོང་ས་མཆོག་སྐུ་ཚེ་ཞབས་པད་བརྟན་པའི་ཆེད་དུ་དམིགས་ཏེ་དམར་ཟས་སྤངས་ཡོད་འདུག
གཞན་ཡང་སྤྱི་ཚེས་༨ དང་རེས་གཟའ་ཉི་མའི་ཉིན་རྔ་པ་ཀིརྟི་དགོན་པའི་གྲྭ་དགེ་འདུན་ཕུན་ཚོཌ་ཞུ་བ་ཞིག་གིས་༧གོང་ས་སྐྱབས་མགོན་ཆེན་པོ་མཆོག་གི་སྐུ་པར་མགོའི་སྟེང་འཁྱེར་ནས་རྔ་པ་རྫོང་མཁར་གྱི་སྲང་ལམ་ཐོག་༧གོང་ས་མཆོག་བོད་ལ་གདན་འདྲེན་ཞུ་དགོས་ཞེས་དང་། བོད་ལ་རང་དབང་འདྲ་མཉམ་དགོས་ཞེས་པའི་དགོས་འདུན་སྟོན་ཏེ་ངོ་རྒོལ་སྐད་འབོད་བྱས་ཤིང་། རྒྱ་ནག་གཞུང་གི་ཉེན་རྟོག་པ་ཚོས་ཁོང་ལམ་སེང་འཛིན་བཟུང་གིས་བཙན་འཁྲིད་བྱས་པ་དང་། ད་ལྟའི་འཆར་ཁོང་ག་པར་བཀག་ཉར་བྱས་ཡོད་མེད་ཤེས་རྟོགས་མི་འདུག དེའི་སྐོར་ལ་ཀིརྟི་བྱེས་པ་གྲ་ཚང་གི་གནས་ཚུལ་འབྲེལ་མཐུད་པ་ཀ་ཉག་ཚེ་རིང་ལཌ་སུ་གནས་འདྲི་ཞུས་པ་ཞིག་གསན་རོགས་གནང་།
