ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་༧གོང་ས་མཆོག་ལ་རྒྱ་གར་གྱི་སྲིད་བློན་དམ་པ་ནཱ་རཱ་སིམ་ཧའི་རྗེས་དྲན་གཟེངས་རྟགས་འབུལ་བཞེས་དང་། གྷ་ཛའི་དམག་འཁྲུག་དང་ཨ་རིས་གོ་མཚོན་མཁོ་སྤྲོད་མཚམས་འཇོག ཨ་རིའི་༢༠༢༤ ལོའི་འོས་བསྡུའི་མཐའ་མའི་ཟླ་བ་དྲུག ཞི་ཅིན་ཕིང་གི་ཡུ་རོབ་འཚམས་གཟིགས་སོགས་ཡོད། ཀུན་གླེང་ལས་རིམ་དུ་ཚེ་རིང་སྐྱིད་ལགས་ཀྱིས་ཧྥ་རན་སི་བོད་རང་བཙན་སློབ་ཕྲུག་ཚོགས་པའི་རྒྱུན་ལས་བསྟན་འཛིན་རྣམ་རྒྱལ་ལགས་གདན་འདྲེན་ཞུས་ནས་ཞི་ཅིན་ཕིང་གི་ཧྥ་རན་སིར་འཚམས་གཟིགས་དང་བོད་པ་དང་བོད་དོན་རྒྱབ་སྐྱོར་བའི་ངོ་རྒོལ་གྱི་ཐད་བགྲོ་གླེང་ཞུ་རྒྱུ་དང་། དེ་བཞིན་དུ་ཚེ་རིང་སྐྱིད་ལགས་ཀྱིས་ཨ་རིའི་བོད་པ་དང་ཆབ་སྲིད་དཔྱད་བརྗོད་པ་བསྟན་འཛིན་ཆོས་དབྱིངས་ལགས་གདན་འདྲེན་ཞུས་ནས་ཨ་རིའི་སློབ་གྲྭ་ཆེན་མོ་ཁག་ཏུ་སློབ་ཕྲུག་མང་པོ་ཞིག་གིས་པ་ལི་སི་ཐན་ལ་རྒྱབ་སྐྱོར་ལས་འགུལ་སྤེལ་བཞིན་པའི་མཚོན་དོན་དང་ཤུགས་རྐྱེན་ཐད་བགྲོ་གླེང་ཞུ་རྒྱུ་ཡིན་པས་དུས་ཐོག་གསན་གཟིགས་གནང་བར་ཞུ།།