༸གོང་ས་༸སྐྱབས་མགོན་ཆེན་པོ་མཆོག་ གིས་བྱང་ཆུབ་ལམ་རིམ་ཆེན་མོའི་བཀའ་ཆོས་འཕྲོ་སྐྱོང་རེ་ཞིག་མཇུག་སྒྲིལ་རྗེས་བཙུན་མགོན་བྱང་ཆུབ་ཆོས་གླིང་དུ་ཆིབས་སྒྱུར་བསྐྱངས་ནས་སློབ་སྦྱོང་ཐོག་ནས་ཕོ་མོ་འདྲ་མཉམ་ཡོང་བ་བྱེད་དགོས་ཞེས་བཙུན་མ་རྣམས་ལ་བཀའ་སློབ་བསྩལ་བ་རེད།།
དབུས་བོད་མིའི་སྒྲིག་འཛུགས་ཀྱི་དྲ་རྒྱའི་སྟེང་གནས་ཚུལ་བཀོད་པ་ལྟར་ན། ཕྱི་ལོ་ ༢༠༡༤ ཟླ་ ༡༢ ཚེས་ ༢༨ ཉིན་མོན་གྷོ་དགའ་ལྡན་བྱང་རྩེ་གྲྭ་ཚང་དུ་ལམ་རིམ་བཀའ་ཆོས་རེ་ཞིག་གནང་གྲུབ་ནས་དེ་ཉིན་ཕྱེད་ཡོལ་ཆུ་ཚོད་ ༤ ཙམ་ལ་བཙུན་དགོན་བྱང་ཆུབ་ཆོས་གླིང་དུ་ཆིབས་སྒྱུར་བསྐྱངས་ཏེ་བཙུན་མ་ཚོར་བཀྲ་ཤིས་བདེ་ལེགས་ཞུས་ནས། དེང་སྐབས་ཕོ་མོ་འདྲ་མཉམ། ཞེས་ང་ཚོས་ཤོད་ཀྱི་ཡོད། འདྲ་མཉམ་ཡོང་རྒྱུ་ངོ་མ་དེ་སློབ་སྦྱོང་ཐོག་ནས་དགེ་བཤེས་དང་དགེ་བཤེས་མ། ཞེས་འདྲ་འདྲ་འཐོན་ཐུབ་པ་ཞིག་བྱུང་ན་ང་རང་ཚོའི་ཕོ་མོ་འདྲ་མཉམ་གྱི་གནས་ཚུལ་ལའང་ཕན་ཐོགས་ཡོད། བཅོམ་ལྡན་འདས་ཀྱི་རྩ་བའི་ཆ་ནས་དགེ་སློང་ཕ་དང་དགེ་སློང་མ། ཞེས་ཐོབ་ཐང་གཅིག་པ་གནང་ཡོད་ཅེས་གསུངས་ཡོད།།
༧གོང་ས་མཆོག་གིས་མུ་མཐུད་དུ་དེ་རིང་ཁ་སང་དུས་སྐབས་སུ་བུད་མེད་དང་སྐྱེས་པ་འདྲ་མཉམ་ཡིན། ཞེས་འགྲོ་དགོས་པ་ཧ་ཅང་གལ་ཆེན་པོ་རེད་གསུངས་ནས། སྤྱོད་འཇུག་དང་རིན་ཆེན་ཕྲེང་བའི་ནང་དུའང་སྐབས་རེ་བུད་མེད་ཀྱི་ རྟེན་དེ་དམན་པ་ལྟ་བུ་བརྩིས་པ་དེ་འདྲ་གཞུང་ནས་བཤད་རྒྱུ་ཡོད། རེད་ཀྱང་རེད། ཁྱེད་ཚོས་རྒྱག་རེས་རྒྱག་དགོས་བྱུང་ན་ཁྱོ་ག་ཤུགས་ཆེ་བ་ལས་སྐྱེ་དམན་ཤུགས་ཆེ་རྒྱུ་མེད། དེ་འདྲའི་ཐོག་ནས་སྤྱིར་སྟངས་ཀྱི་ཤོད་ཀྱི་ཡོད་པ་ལས། གཞན་མིའི་ཀླད་པ་ལ་བུད་མེད་དང་ཁྱོ་ག་གཉིས་ལ་དབྱེ་བ་གང་ཡང་མེད། ཐོབ་ཐང་དབྱེ་བའང་གང་ཡང་མེད་སོགས་གསུངས་པ་དང་། དེར་བརྟེན་ཁྱེད་ཚོས། ང་ཚོ་བུད་མེད་ཡིན། ཞེ་དྲག་གང་ཡང་ཡོང་གི་མ་རེད་བསམ་པའི་བསམ་བློ་དེ་འདྲ་མ་བཏང་བར་ང་ཚོ་འདྲ་མཉམ་ཡིན་ཞེས་ངར་སེམས་དོད་ཙམ་བྱེད་དགོས། ཡང་འདྲ་མཉམ་ཡིན། ཞེས་འཛིང་རེས་དང་ཨབ་ཏང་ཚད་དགོས་ནའང་འདྲ་མཉམ་ཡིན། ཞེས་བརྗོད་ཐུབ་རྒྱུ་རྩ་བ་ནས་མེད། ང་ཚོ་འདྲ་མཉམ་ཡིན་བརྗོད་རྒྱུ་དེ་སངས་རྒྱས་ཀྱི་ཆོས། བཅོམ་ལྡན་འདས་ཁོང་རང་གིས་དགེ་སློང་མ་ཞེས་ཐོབ་ཐང་གཅིག་པ་གནང་ཡོད། དེར་བརྟེན་ང་ཚོས་སློབ་སྦྱོང་བྱེད་རྒྱུ་དེ་དག་ཚང་མ་སྐྱེས་པ་དང་འདྲ་མཉམ་བྱས་ནས་ཕྱིན་ཏེ་བསྟན་པ་དང་འགྲོ་བའི་དོན་དུ་ཞབས་འདེགས་བསྒྲུབ་རྒྱུ་དེ་དག་རབ་བྱུང་ཕོ་དང་འདྲ་མཉམ་བྱེད་ཐུབ་པ་གཅིག་བྱ་རྒྱུ་ཡིན། ཁྱེད་ཚོས་སེམས་ཤུགས་སྐྱེད་ཤོག་ཨང་། ཞེས་བཀའ་སློབ་བསྩལ་བ་རེད།།