འོས་བསྡུའི་ཉིན་མོ་བར་ཟླ་བ་གཉིས་ཙམ་ལས་མེད་པ་དང་ཨ་མི་རི་ཀ་བ་འོས་འཕེན་པ་ཚོས་གལ་ཆེའི་ཐག་གཅོད་གནང་དགོས་པ་དེ་སྲིད་འཛིན་ལས་གནས་གཅིག་པུ་མིན་པ་རེད། འོས་བསྡུའི་འགྲན་རྩོད་ཤུགས་ཆེ་ཡོད་པའི་གདན་གྲངས་བརྒྱ་ཐམ་པ་ལས་མེད་པའི་ཨ་མི་རི་ཀའི་གྲོས་ཚོགས་གོང་མའི་ནང་སྤྱི་མཐུན་སྲིད་དོན་ཚོགས་པའི་འཐུས་མི་༥༣ གྱི་གདན་གྲངས་ཟིན་ཏེ་གྲངས་མང་ཆགས་པའི་གནས་བབས་དེ་སྤྱི་མཐུན་ཚོགས་པས་མུ་མཐུད་འཛིན་ཐུབ་མིན་ཐག་གཅོད་བྱ་རྒྱུ་དང་། འགྱུར་བ་དེ་ཡིས་འབྱུང་འགྱུར་ལོ་གཉིས་རིང་རྒྱལ་ཁབ་ཀྱི་ཆབ་སྲིད་ལས་འཆར་ལ་མཇུག་འབྲས་ཧ་ཅང་ཆེན་པོ་ཡོང་རྒྱུ་ཡིན་པ་རེད། གནད་འགག་ཅན་གྱི་མངའ་སྡེ་འགའ་ཤས་ནང་འོས་འཕེན་པ་ཚོར་འཕྲད་པའི་གདམ་གའི་སྐོར་འདི་ག་རླུང་འཕྲིན་ཁང་གི་གྲོས་ཚོགས་གནད་དོན་གསར་འགོད་པ་Katherine Gypsonགིས་སྤེལ་བའི་གནས་ཚུལ་ནམ་མཁའ་བསྟན་འཛིན་གྱིས་ཕབ་བསྒྱུར་དང་སྙན་སྒྲོན་ཞུ་གི་རེད།
