ངོ་འཕྲད་བདེ་བའི་དྲ་འབྲེལ།

ཕྱི་སྲིད་དྲུང་ཆེ་གསར་པས་རྒྱ་ནག་ལ་འཛིན་པའི་ཐབས་ཇུས།


)
ཐད་ཀར་ཕབ་ལེན་གྱི་དྲ་འབྲེལ།

༄༅།། ཉེ་ཆར་ཨ་མི་རི་ཀའི་སྲིད་གཞུང་གསར་རྙིང་གཉིས་ལ་སྲིད་དབང་རྩིས་སྤྲོད་རྩིས་ལེན་གྱི་འཐབ་རྩོད་བྱུང་བའི་སྐབས་དང་བསྟུན་ནས་རྒྱ་ནག་དམར་ཤོག་སྲིད་གཞུང་གིས་ཊམ་གྱི་གཞུང་འཛིན་ལྷན་ཁང་གི་འགོ་ཁྲིད་ཟུར་པ་ཁག་ཅིག་ལ་ཉེས་ཆད་བཅད་པ་ཡིན་ཞེས་བསྒྲགས། ཨ་རིའི་སྲིད་འཛིན་ལས་ཐོག་ཇཱོ་བྷ་ཌན་གྱི་སྲིད་གཞུང་གིས་དེ་ལ་ཡ་ལན་ནན་པོ་ཞིག་སློག་ཡོད་པ་སྟེ། ཕྱི་སྲིད་དྲུང་ཆེ་གསར་པ་བྷ་ལིན་ཁེན་གྱིས་སྲིད་འཛིན་ཟུར་པ་ཌོ་ནལ་ཊམ་གྱི་སྲིད་གཞུང་གིས་རྒྱ་ནག་ལ་སྲིད་ཇུས་མཁྲེགས་པོ་ཞིག་བཟུང་བ་རྣམས་ང་ཚོས་མུ་མཐུད་དུ་རྒྱུན་འཁྱོངས་བྱ་རྒྱུ་ཡིན་ཞེས་བཤད། ཉེ་སྔོན་ཁོང་ལ་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གིས་ཉན་ཞིབ་བྱས་པའི་སྐབས་སུའང་སྲིད་གཞུང་གསར་པས་སྤྱི་མཐུན་ཚོགས་པར་མཉམ་འབྲེལ་བྱ་རྒྱུའི་འདུན་པ་ཆེན་པོ་ཡོད་པའི་རྣམ་འགྱུར་བསྟན། ཁོང་གི་སྐད་ཆ་དེས་མ་འོངས་པའི་ལོ་བཞིའི་རིང་ལ་ཨ་མི་རི་ཀས་རྒྱ་ནག་ལ་འཛིན་པའི་ཕྱི་འབྲེལ་སྲིད་ཇུས་ནི་སྔོན་བཞིན་མཁྲེགས་པོ་བྱ་རྒྱུའི་བརྡ་ཞིག་བཏང་བ་རེད་ཅེས་ཉམས་ཞིབ་པ་ཚོས་ཚོད་དཔག་བྱེད་འགོ་ཚུགས་འདུག

རྒྱ་ནག་གིས་ཨ་རིའི་སྲིད་གཞུང་གསར་རྙིང་གཉིས་དབང་ཆ་རྩིས་སྤྲོད་རྩིས་ལེན་གྱི་སྔ་ཉིན་དེར་ཕྱི་སྲིད་དྲུང་ཆེ་ཟུར་པ་མེཀ་ཕོམ་ཕིའོ་ལ་ཉེས་ཆད་བཅད། ཁོང་གིས་རྒྱ་ནག་དམར་ཤོག་སྲིད་གཞུང་གིས་ཡུ་གུར་མི་རིགས་རྩ་མེད་གཏོང་གི་ཡོད་པ་དང་འགྲོ་བ་མིའི་རིགས་ལ་གནོད་འཚེ་གཏོང་གི་འདུག་ཅེས་གཏམ་བཤད་སྤེལ། ཕྱི་སྲིད་དྲུང་ཆེ་གསར་པ་བྷ་ལིན་ཁིན་གྱིས་ཀྱང་ཕྱི་སྲིད་དྲུང་ཆེ་ཟུར་པ་མེཀ་ཕོམ་ཕིའོ་ཡི་གཏམ་བཤད་དེར་མོས་མཐུན་ཡོད། སྲིད་འཛིན་ཊམ་གྱི་དུས་སུ་ཨ་རིའི་ཕྱི་སྲིད་ལྷན་ཁང་གིས་ཐེ་ཝན་ལ་འཛིན་པའི་ཁྲིམས་ཡིག་གཏན་འབེབས་བྱས་ཡོད་པ་རྣམས་ལག་ལེན་བསྟར་རྒྱུ་ཡིན། འདི་ནི་ཨ་རིའི་གཞུང་དམངས་གཉིས་དང་སྲིད་དོན་ཚོགས་པ་གཉིས་ཀ་ལངས་ཕྱོགས་གཅིག་གྱུར་དང་མངོན་འདོད་གཅིག་གྱུར་ཡིན་ཞེས་བཤད།།

གཟའ་འཁོར་འདིར་ཇཱོ་བྷ་ཌན་གྱིས་དངོས་སུ་ཨ་རིའི་སྲིད་འཛིན་གསར་པའི་ལས་འཁུར་དམ་འབུལ་ཞུས་པའི་སྐབས་དེར་རྒྱ་ནག་ཕྱི་སྲིད་ལྷན་ཁང་གིས་རྒྱ་ནག་གི་མངའ་ཁོངས་བདག་དབང་ལ་གནོད་པ་ཚབས་ཆེན་སྐྱེལ་མཁན་སོགས་ཀྱི་ཉེས་མིང་བཏགས་ནས་ཨ་རིའི་སྲིད་འཛིན་ཟུར་པ་ཌོ་ནལ་ཊམ་གྱི་སྲིད་གཞུང་གི་མཐོ་རིམ་ལས་སྣེ་༢༨་དང་དེ་དག་གི་བཟའ་མི་བུ་ཕྲུག་བཅས་པ་རྒྱ་ནག་དང་ཧོང་ཀོང་། ཨོ་མེན་དམིགས་བསལ་ས་ཁུལ་བཅས་སུ་ཡོང་མི་ཆོག་ཅེས་ཉེས་ཆད་བཅད། མི་༢༨་དེ་དག་ལ་རྒྱ་ནག་གི་ཁེ་ལས་ཁག་གིས་ཚོང་འབྲེལ་འཛུགས་མི་ཆོག་ཅེས་བཀག་འགོག་བྱས་འདུག རྒྱ་ནག་གིས་ཉེས་ཆད་བཅད་པ་དེའི་ཁོངས་སུ་ཨ་རིའི་ཕྱི་སྲིད་དྲུང་ཆེ་ཟུར་པ་མེཀ་ཕོམ་ཕིའོ་དང་རྒྱལ་སྲུང་བདེ་འཇགས་སློབ་སྟོན་པ་ཟུར་པ་ཨོ་བྷི་རེན། ཕོ་བྲང་དཀར་པོའི་ཚོང་དོན་སློབ་སྟོན་པ་ཕི་ཊར་ན་ཝྭ་རོ་དང་ཨ་རིའི་འཕྲོད་བསྟེན་དྲུང་ཆེ་ཟུར་པ་ཨ་ལིཀ་སི་ཨེ་ཛར། མཉམ་འབྲེལ་རྒྱལ་ཚོགས་ཀྱི་ཨ་རིའི་སྐུ་ཚབ་ཟུར་པ་ཁེ་ལི་ཁ་ར་ཧྥོ་ཊི་བཅས་འདུས།།

སྲིད་འཛིན་བྷ་ཌན་གྱི་སྲིད་གཞུང་གསར་པའི་རྒྱལ་ཁབ་བདེ་འཇགས་ལས་དོན་ཚོགས་ཆུང་གི་མགྲིན་ཚབ་པ་ཧོ་རེན་གྱིས་གསར་འགོད་པ་ཚོར་བཤད་པ་ལྟར་ན། རྒྱ་ནག་གིས་ཨ་རིའི་སྲིད་འཛིན་གསར་པའི་ལས་ཁུར་དམ་འབུལ་གྱི་མཛད་སྒོའི་ཉིན་མོར་སྲིད་གཞུང་སྔོན་མའི་མཐོ་རིམ་ལས་སྣ་ཁག་ལ་ཉེས་ཆད་བཅད་པ་ནི་ངལ་བ་འབྲས་མེད་དུ་འགྱུར་ངེས་རེད། ཨ་རིའི་སྲིད་དོན་ཚོགས་པ་གཉིས་ཀར་མི་མཐུན་པའི་འགལ་ཟླ་ཡོད་པར་རྒྱ་ནག་གིས་དབྱེན་སྦྱོར་བྱས་ནས་འགལ་ཟླ་ཆེ་རུ་གཏོང་འདོད་ཀྱི་ཀུན་སློང་ཞིག་འཆང་འདུག འོན་ཀྱང་ཨ་རིའི་སྲིད་དོན་ཚོགས་པ་གཉིས་ཀས་རྒྱ་ནག་གི་སྤྱོད་ངན་འདི་རྣམས་ཐེར་འདོན་བྱ་དགོས་ཞེས་ཡ་ལན་སློག ཨ་རིའི་ཕྱི་སྲིད་དྲུང་ཆེ་གསར་པ་བྷ་ལིན་ཁིན་གྱིས་ཀྱང་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཉན་ཞིབ་ཚོགས་འདུའི་ཐོག་ཏུ་ཞིན་ཅང་གི་ཅང་ཡུ་གུར་བའི་གནད་དོན་དང་ཐེ་ཝན་ལ་འཛིན་པའི་སྲིད་ཇུས་སོགས་སྲིད་གཞུང་སྔོན་མས་གཏན་ལ་ཕབ་ཡོད་པ་རྣམས་ལག་ལེན་བསྟར་རྒྱུ་ཡིན་ཞེས་བཤད་ཡོད་པས་ཨ་མི་རི་ཀས་རྒྱ་ནག་ལ་སྲིད་ཇུས་མཁྲེགས་པོ་ཞིག་བཟུང་ཡོད་པ་རྣམས་རྒྱུན་འཁྱོངས་བྱ་ངེས་ཡིན་པའི་ཚོད་དཔག་བྱེད་ཀྱི་ཡོད་པ་རེད།།

XS
SM
MD
LG