༄༅།། འཛམ་གླིང་འདིར་སྐད་གྲགས་ཡོད་པའི་སྲིད་པའི་གངས་རྒན་ཏེ། རི་བོ་ཏེ་སེ་ནི་བོད་བྱང་ཕྱོགས་ཀྱི་ལྷོ་སྣེར་ཆགས་ཡོད་ཅིང་། ད་ལྟ་རྒྱ་ནག་དམར་ཤོག་གཞུང་གིས་ཆ་བགོ་བྱེད་ཡོད་པ་ལྟར་ན་བོད་རང་སྐྱོང་ལྗོངས་ཀྱི་སྤུ་ཧྲེང་རྫོང་གི་བྱང་རྒྱུད་དུ་ཡོད། གནས་རི་འདིར་ལོ་ངོ་སྟོང་ཕྲག་མང་པོའི་སྔོན་ནས་ནང་པ་སངས་རྒྱས་དང་ཕྱི་རོལ་མུ་སྟེགས་པ་སོགས་ཀྱིས་རང་རང་གི་གནས་མཆོག་ཅིག་ལ་བརྩིས་ནས་ངོས་འཛིན་བྱེད་ཚུལ་མི་འདྲ་བ་ཡོད་པར་མ་ཟད། བོད་པ་དང་ཧི་མ་ལ་ཡའི་རི་བརྒྱུད་ཀྱི་ཡུལ་ཚོའི་ཆོས་ལུགས་དད་མོས་དང་ཡུལ་གོམས་གཤིས་ལུགས་སོགས་ཕྱོགས་གང་ཐད་དུ་འབྲེལ་བ་དམ་ཟབ་ཡོད་པ་དང་རིག་གནས་ཀྱི་སྲོག་ཤིང་ལྟ་བུར་གྱུར་པའི་གནས་རི་རྩ་ཆེན་ཞིག་ཏུ་གྲགས།།
གཟའ་འཁོར་གཅིག་ཙམ་གྱི་སྔོན་ལ་རྒྱ་ནག་གི་སྒྱུ་རྩལ་བ་ཀྲང་ཧོན་ཟེར་བ་ཞིག་གིས་ཟླ་བ་རྗེས་མའི་ཟླ་མགོ་ཙམ་ལ་གངས་རིན་པོ་ཆེ་ཡོད་སར་སྒྱུ་རྩལ་གྱི་ལས་གཞི་གསར་པ་ཞིག་མགོ་བརྩམ་རྒྱུ་ཡིན་ཞེས་གསལ་བསྒྲགས་སྤེལ། སྒྱུ་རྩལ་དྲྭ་བ་ཞེས་པའི་དྲྭ་ཚིགས་སུ་གནས་ཚུལ་སྤེལ་བ་ལྟར་ན་བོད་ཀྱི་རྒྱུན་སྲོལ་ལྟར་ཕུང་པོ་བྱ་གཏོར་བྱེད་པ་ནི་སྦྱིན་པ་ཆེན་པོ་ཞིག་ཏུ་བསམ་བློ་བཏང་སྟེ་ཤ་རུས་གདོས་བཅས་ཀྱི་ཕུང་པོ་དེ་ཉིད་ས་ལ་ཐིམ་སྟེ་སླར་ཡང་རང་བྱུང་ཁམས་སུ་འདྲེས་ཀྱི་ཡོད་པའི་ཆོས་ཉིད་སྟོན་གྱི་ཡོད་པས་རྒྱ་མི་སྒྱུ་རྩལ་བ་ཀྲང་ཧོན་ལ་བློ་བསྐྱེད་ཆེན་པོ་ཞིག་རྙེད་ནས་སྒྱུ་རྩལ་བརྩམས་ཆོས་ཀྱི་ལམ་ནས་གོང་གི་དགོངས་པ་དེ་མཚོན་ཐབས་བྱ་རྒྱུ་ཡིན་ཚུལ་བརྗོད་འདུག ལྷག་པར་དུ་ད་ཐེངས་ཀྱི་འགྲེམ་སྟོན་དེར་དར་ལྕོག་ས་ཡ་གཅིག་ཙམ་འཐེན་རྒྱུ། འགྲེམ་སྟོན་མཛད་སྒོ་མཇུག་སྒྲིལ་རྗེས་སུ་ཁོར་ཡུག་ལ་གནོད་པ་གང་ཡང་མི་འཕོག་པར་སྒྱུ་རྩལ་འགྲེམ་སྟོན་གྱི་རྒྱུ་ཆ་རྣམས་རང་སར་ཞིག་སྟེ་ས་ལ་ཐིམ་རྒྱུ་རེད། འདི་ནི་མིའི་རིགས་ཀྱི་ཕྱིའི་འཕྲུལ་རིག་ལག་རྩལ་གྱི་འཕེལ་རྒྱས་དང་ནང་སེམས་ཀྱི་ཉམས་ལེན་གཉིས་ངོ་བོ་རོ་གཅིག་ཏུ་འདུས་པ་སྟོན་ཐབས་ཀྱི་སྒྱུ་རྩལ་ལས་གཞི་རླབས་པོ་ཆེ་ཞིག་ཡིན་ཞེས་འགྲེལ་བརྗོད་བྱེད་བཞིན་ཡོད་འདུག
