ངོ་འཕྲད་བདེ་བའི་དྲ་འབྲེལ།

གཟའ་པ་སངས། ༢༠༢༤/༠༣/༢༩

འབྲི་རུའི་བོད་པ་གཉིས་འཛིན་བཟུང་དང་གཅིག་བཙོན་ཁང་དུ་འདས་གྲོངས།


ཐད་ཀར་ཕབ་ལེན་གྱི་དྲ་འབྲེལ།

བསྟན་འཛིན་ཐར་པ་ཞེས་པའི་སྐྱེས་པ་ཞིག་དང་ལྷ་མོ་ཞེས་པའི་བུད་མེད་ཅིག་༢༠༢༠་ལོའི་ཕྱི་ཟླ་༦་པའི་ནང་དུ་སྔ་རྗེས་སུ་རྒྱ་གཞུང་གི་ས་གནས་ཉེན་རྟོག་པ་ཚོས་འཛིན་བཟུང་བཙན་ཁྲིད་བྱས་ཤིང་། ཁོང་གཉིས་འཛིན་བཟུང་བྱེད་དགོས་དོན་ནི་རྒྱ་གར་དུ་གནས་འཁོད་སྤུན་མཆེད་ཚོར་དངུལ་སྒོར་བཏང་བ་ཁྲིམས་འགལ་དུ་བརྩིས་ནས་འཛིན་བཟུང་བྱས་པ་རེད་ཅེས་ཕ་ཡུལ་ཁམས་འབྲི་རུ་ནས་ཡིན་པ་དང་། དེང་སྐབས་རྒྱ་གར་ལྷོ་ཕྱོགས་ཀྱི་བྷེང་ལོར་གྲོང་ཁྱེར་དུ་ཁྲིམས་ལུགས་སློབ་སྦྱོང་བྱེད་མཁན་དཀོན་མཆོག་རིན་ཆེན་གྱིས་ཞིབ་ཕྲའི་གནས་ཚུལ་མཁོ་སྤྲོད་གནང་བྱུང་།།

གསར་འགྱུར་མཁོ་སྤྲོད་པས་ལྷ་མོ་འཛིན་བཟུང་བྱས་ནས་ཉིན་ཤས་རྗེས་སུ་ཉེན་རྟོག་པ་ཁ་ཤས་ལྷ་མོའི་ཁྱིམ་དུ་ཡོང་ནས་སྔོག་བཤེར་གྱིས་༧གོང་ས་མཆོག་གི་སྐུ་པར་དང་བཀའ་ཆོས་ཀྱི་འོད་སྡེར་སོགས་ཁྱེར། ༢༠༢༠་ལོའི་ཕྱི་ཟླ་༨་པའི་ནང་དུ་ལྷ་མོའི་བཟའ་མི་ཚོར་ཉེན་རྟོག་པས་ཁ་པར་བཏང་སྟེ་གང་མགྱོགས་ནག་ཆུའི་སྨན་ཁང་དུ་ཤོག་ཅེས་བཀའ་བཏང་ཡོད་པར་མ་ཟད། བཟའ་མི་རྣམས་སྨན་ཁང་དུ་འབྱོར་དུས་ལྷ་མོའི་མིག་གིས་ཅུང་ཙམ་ལྟ་ཐུབ་ཀྱང་ཁ་གྲག་མི་ཐུབ་པར་གདོང་པ་ཡོངས་རྫོངས་སྐྲང་སྟེ་སྔོན་པོར་གྱུར། ཁོ་མོ་ལས་སླ་པོར་ངོ་མི་ཤེས་པ་ཞིག་ཏུ་གྱུར་འདུག དེ་ནས་ཉིན་གཉིས་གསུམ་ཞིག་ལ་སྨན་ཁང་དུ་བསྡད་ཀྱང་མཐའ་མཇུག་དྲག་སྐྱེད་མ་བྱུང་བར་སྨན་ཁང་དུ་འདས་གྲོངས་སུ་གྱུར་སོང་། ཁོང་ལ་འཆི་སྐྱོན་བྱུང་བའི་རྗེས་སུ་བཟའ་མི་ཚོར་ཕུང་པོ་རྩིས་སྤྲོད་མ་བྱས་པ་དང་ཕུང་པོར་བརྟག་དཔྱད་ཀྱང་བྱེད་དུ་མ་བཅུག་པར་འཕྲལ་དུ་མེར་སྲེག་གཏོང་དགོས་པའི་བཙན་བཀའ་བཏང་ནས་ཕུང་པོ་མེར་སྲེག་གཏོང་དགོས་བྱུང་འདུག ལྷ་མོ་འདས་གྲོངས་སུ་གྱུར་པའི་སྐབས་དེར་ལོ་ན་༣༦་ལ་སོན་པ་དང་འབྲོག་མོ་དཀྱུས་མ་ཞིག་ཡིན་ཞིང་། ཁོ་མོ་བདེ་ཐང་ཡིན་པ་དང་ནད་རྙིང་ཡོད་པ་དེ་འདྲ་གང་ཡང་མ་རེད། ཁོ་མོའི་ཤུལ་དུ་དྭ་ཕྲུག་གསུམ་ལུས་ཡོད་པ་དང་ཆུང་བ་དེ་ལོ་བདུན་ཙམ་རེད་ཅེས་གནས་ཚུལ་མཁོ་སྤྲོད་བྱུང་འདུག

བསྟན་འཛིན་ཐར་པ་འཛིན་བཟུང་བཙན་ཁྲིད་བྱས་པའི་རྗེས་སུ་ཡུན་རིང་གང་དུ་ཡོད་མེད་སོགས་ཀྱི་གནས་ཚུལ་ཤེས་རྟོགས་མ་བྱུང་། ཁོང་གི་ཆེད་དུ་རྒྱ་ནག་ནས་ཁྲིམས་རྩོད་པ་ཞིག་ཐེངས་གསུམ་ལ་གླས་ཏེ་ཁྲིམས་རྩོད་པར་རྒྱ་སྒོར་ཁྲི་༣༠་གླ་ཆ་སྤྲོད་དགོས་བྱུང་འདུག ད་ལྟ་བསྟན་འཛིན་ཐར་པ་ནག་ཆུའི་བཙོན་ཁང་ཞིག་ཏུ་ཁྲིམས་ཐག་མ་བཅད་པར་བཞག་ཡོད་པ་ཤེས་རྟོག་བྱུང་། བསྟན་འཛིན་ཐར་པ་ནི་དེ་སྔོན་གསེར་རྟ་ལྔ་རིག་ནང་བསྟན་སློབ་གླིང་དུ་སློབ་གཉེར་བྱས་ཏེ་འཚེ་བ་མེད་པ་དང་རྒྱང་འཛིན་ཞེས་པ་སོགས་དེབ་ཁ་ཤས་བརྩམས་ཏེ་དཔར་དུ་བསྐྲུན། ༢༠༡༢་ལོར་རྒྱ་ནག་གཞུང་གིས་བོད་རང་སྐྱོང་ལྗོངས་ཀྱི་ཕྱི་ལོགས་ཏེ། མདོ་སྟོད་སྨད་ཁུལ་དུ་སློབ་གཉེར་ལ་ཕྱིན་པ་རྣམས་ནི་རྒྱ་གར་ལ་ཕྱིན་པ་དང་གཅིག་མཚུངས་ངོས་འཛིན་གྱིས་དུས་བཀག་ལྟར་ཕ་ཡུལ་དུ་ཕྱིར་ལོག་བྱ་དགོས་པའི་བཙན་བཀའ་བཏང་སྟེ་བོད་རང་སྐྱོང་ལྗོངས་ཁོངས་ཀྱི་གྲྭ་བཙུན་རྣམས་བཙན་དབང་གིས་རང་གནས་སུ་ཕྱིར་ལོག་བྱེད་དུ་བཅུག་པ་དེ་དག་གི་གྲས་སུ་བསྟན་འཛིན་ཐར་པའང་ཚུད་འདུག

ཁོང་ཕ་ཡུལ་དུ་ལོག་པའི་རྗེས་སུ་ཆགས་རྩེ་ཡུལ་ཚོར་བོད་ཡིག་དང་རིག་གནས་གཙོ་བོར་གྱུར་བའི་སློབ་གྲྭ་ཞིག་བཙུགས། ཡུན་རིང་མ་འགོར་པར་ཆགས་རྩེ་ཤང་མི་དམངས་སྲིད་གཞུང་ཟེར་བས་སློབ་གྲྭ་དེ་ཁྲིམས་མཐུན་མིན་ཚུལ་བཤད་དེ་སྒོ་བརྒྱབ། བསྟན་འཛིན་ཐར་པའི་འགྲོ་སྡོད་ལ་ལྟ་རྟོག་ནན་པོ་བྱེད་འགོ་ཚུགས། ༢༠༡༤་ཙམ་ནས་ཚོང་ལས་གཉེར་ཏེ་དབྱར་རྩྭ་དགུན་འབུ་དང་ས་ཁང་ཉོ་ཚོང་གི་ཚོང་ལས་གཉེར། ༢༠༡༥་ཙམ་ནས་བོད་ལྗོངས་འབྲི་རུ་ཀ་ཐོན་རྫས་ཚད་ཡོད་མཐུན་གཉེར་ཁང་ཟེར་བའི་ཚོང་གཉེར་ཁང་ཞིག་གསར་དུ་བཙུགས། ཁོང་གིས་སྤྱི་ཁྱབ་འགན་འཛིན་གྱི་ལས་འགན་ཁུར་ནས་ཚོང་ལས་ཀྱི་ཁེ་ཕན་ནས་ཉམ་ཐག་མང་ཚོགས་ལ་རོགས་རམ་གནང་ཡོད་པ་རེད་ཅེས་བཤད།།

དེ་རིང་ཕྱི་ཚེས་༢༩་ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་གནས་ཚུལ་སྤེལ་བ་ལྟར་ན། ལྷ་མོ་རྒྱ་ནག་གཞུང་གིས་འཛིན་བཟུང་བཀག་ཉར་འོག་རྐྱེན་འདས་སུ་ཕྱིན་པར་རྟོག་ཞིབ་བྱ་དགོས། ཉེས་མེད་འཛིན་བཟུང་བྱས་པའི་བསྟན་འཛིན་ཐར་པའང་གློད་གྲོལ་གཏོང་དགོས་ཞེས་དགོས་འདུན་བཏོན་འདུག རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་ཚན་པའི་འགན་འཛིན་སོ་ཧྥི་རི་ཆར་ཌི་སན་གྱིས་ལྷ་མོ་རྐྱེན་འདས་སུ་ཕྱིན་པ་ནི་རྒྱ་ནག་གཞུང་གི་བཀག་ཉར་འོག་མནར་གཅོད་བཏང་སྟེ་རྐྱེན་འདས་སུ་འགྲོ་བཞིན་པའི་དངོས་ཡོད་གནས་སྟངས་གསར་ཤོས་དེ་རེད། བོད་ནང་གི་ས་གནས་ཀྱི་དཔོན་རིགས་ཚོས་གང་བྱུང་འཛིན་བཟུང་དང་མནར་གཅོད་གཏོང་བ། འཚོ་གནས་ཀྱི་ཐོབ་ཐང་བཙན་འཕྲོག་བྱེད་པ་སོགས་ཚུད་པའི་ཐོབ་ཐང་ལ་རྡོག་རོལ་ཚབས་ཆེན་གཏོང་བཞིན་པར་འགན་ལེན་བྱེད་དགོས་ནན་བརྗོད་འདུག་་ད་དུང་གསར་འགྱུར་མཁོ་སྤྲོད་པ་དཀོན་མཆོག་རིན་ཆེན་གྱིས་ཕྱི་ལ་ཡོད་པའི་བོད་མི་ཡོངས་ཀྱི་ཚབ་ཞུས་ནས་རྒྱ་ནག་གཞུང་ལ་དགོས་འདུན་དོན་ཚན་བཞི་བཏོན།།

ཁོང་གིས་དེང་སྐབས་འབྲི་རུའི་གནས་སྟངས་ནི་ཧ་ཅང་དམ་དྲག་ཆེན་པོའི་འོག་གནས་ཡོད་པ་དང་ཨ་རི་གཙོས་རྒྱལ་སྤྱིའི་འགྲོ་བ་མིའི་ཐོབ་ཐང་དང་ཡུ་རོབ་མཉམ་འབྲེལ་སོགས་དྲང་བདེན་ལ་དགའ་བའི་གཞུང་དང་གཞུང་འབྲེལ་མ་ཡིན་པའི་སྒྲིག་འཛུགས་ཁག་དང་རང་དབང་ཅན་གྱི་གསར་ཁང་ཁག་འབྲི་རུའི་གནས་སྟངས་ལ་རྟོག་ཞིབ་བྱེད་དུ་ཕེབས་དགོས་། རྒྱ་ནག་གཞུང་གིས་འབྲི་རུའི་དངོས་ཡོད་གནས་སྟངས་ཀྱི་འབྱུང་རྩ་གང་ཡིན་འཛམ་གླིང་ཡོངས་ལ་གསལ་བཤད་ངེས་པར་དུ་བྱ་དགོས། བསྟན་འཛིན་ཐར་པ་ལ་སོགས་པའི་ཉེས་མེད་བཙོན་འཇུག་བྱེད་ཡོད་པའི་འབྲི་རུའི་བོད་པ་རྣམས་འཕྲལ་དུ་གློད་གྲོལ་གཏོང་དགོས། གློད་གྲོལ་བཏང་བའི་རྗེས་སུའང་གཞི་རྩའི་འགྲོ་བ་མིའི་ཐོབ་ཐང་ཁག་བཙན་འཕྲོག་བྱེད་མི་ཆོག་ཅེས་བཀོད། འདི་དང་དུས་མཚུངས་སུ་དཀོན་མཆོག་རིན་ཆེན་གྱིས་བོད་མིའི་སྒྲིག་འཛུགས་ལའང་དེའི་ཐད་ད་ཞིབ་འཇུག་དང་རྒྱ་ནག་ལ་བརྡ་ལན་ཞིག་སྤྲོད་དགོས་ཞེས་འབོད་སྐུལ་ཞུས་འདུག་པའི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

XS
SM
MD
LG