ངོ་འཕྲད་བདེ་བའི་དྲ་འབྲེལ།

ཪོང་པོ་དགོན་ཆེན་ལ་མདོ་སྨད་འཇང་དགུན་ཆོས་འཚོགས་བཞིན་པ།


ཐད་ཀར་ཕབ་ལེན་གྱི་དྲ་འབྲེལ།

༄༅།། ཕྱི་ཟླ་༡༠་པའི་ཚེས་༡༡་ནས་བཟུང་སྟེ་བོད་ནང་གི་རེབ་གོང་རོང་པོའི་དགོན་ཆེན་བདེ་ཆེན་འཁོར་གླིང་དུ་མདོ་སྨད་འཇང་དགུན་ཆོས་ཆེན་མོ་ཐེངས་༢༦་པ་དེ་འཚོགས་འགོ་ཚུགས་ཡོད་ཅིང་། ད་ལོའི་འཇང་དགུན་ཆོས་ལ་དགོན་ཁག་དང་དགེ་འདུན་པ་ཅི་ཙམ་ཕེབས་ཡོད་མེད་ཀྱི་གྲངས་འབོར་སོགས་ཕྱིར་སྒྲགས་བྱེད་མི་ཆོག་པར་དམ་དྲག་འོག་ཏུ་བཞག་འདུག

དེ་ཡང་བོད་ནང་གི་བོད་པ་མིང་བརྗོད་འདོད་མེད་མཁན་ཞིག་གིས་འདི་ག་རླུང་འཕྲིན་ཁང་གི་གསར་འགོད་པར་བརྗོད་དོན་ལྟར་ན། ད་ལོ་མདོ་སྨད་འཇང་དགུན་ཆོས་ཆེན་མོར་འདུས་པའི་དགེ་འདུན་པའི་གྲངས་འབོར་དང་དགོན་ཁག་ཅི་ཙམ་ཡོད་མེད། ལྷག་པར་དུ་དགེ་འདུན་པ་དང་དད་ལྡན་མང་ཚོགས་རྣམས་མཉམ་དུ་འདུས་ཡོད་པའི་རྣམ་པ་སོགས་ཕྱིར་སྒྲགས་བྱེད་མི་ཉན་ཞིང་། གལ་ཏེ་ཁྱབ་བསྒྲགས་ཆེན་པོ་བྱེད་ན་རྒྱ་གཞུང་གིས་དམ་དྲག་ནན་པོ་བྱེད་པའམ། ཡང་ན་བཀག་འགོག་གི་གནས་ཚུལ་འབྱུང་ཉེན་ཆེན་པོ་འདུག དེར་བརྟེན་སེར་སྐྱ་མང་ཚོགས་ཀྱིས་ཁྱབ་བསྒྲགས་མི་བྱེད་པའི་རེ་བ་ཡོད། མི་སྒེར་སོ་སོའི་དྲྭ་ཚིགས་ཀྱི་རྒྱབ་ལྗོངས་སོགས་སུ་འདྲ་པར་དང་བརྙན་ཐུང་བླངས་ནས་འགོད་མི་ཉན། མི་ཚང་མས་དེ་ལྟར་བསྒྲུབ་དགོས་ཞེས་འབོད་སྐུལ་ཞུ་བཞིན་འདུག

ཐོག་མའི་འཆར་གཞི་ལྟར་ན་ཁྱོན་སྡོམ་ཉིན་བཅུའི་རིང་ལ་འཇང་དགུན་ཆོས་འཚོགས་རྒྱུ་ཡིན་པར་མ་ཟད། ལོ་ལྟར་གཙང་དགོན་པ་དང་རྭ་རྒྱ་དགོན། རེབ་གོང་རོང་པོའི་དགོན་ཆེན་བཅས་སུ་རེས་མོས་སུ་འཚོགས་བཞིན་ཡོད་པ་དང་ལོ་འདིར་རོང་པོའི་དགོན་ཆེན་དུ་འཚོགས་གཏན་ཁེལ་ཡོད་པ་རེད། ཕལ་ཆེར་ཚོད་རྩིས་བྱས་ན་༢༠༢༠་ལོའི་མདོ་སྨད་འཇང་དགུན་ཆོས་ཆེན་མོར་དགེ་འདུན་པ་ཞལ་གྲངས་༢༠༠༠་བརྒལ་བ་འཛོམས་ཐུབ་ཡོད་པ་དང་དད་ལྡན་སེར་སྐྱ་བསྟན་པའི་སྦྱིན་བདག་ཀྱང་མང་པོ་ཞིག་ཕེབས་འདུག གསར་འགྱུར་མཁོ་སྤྲོད་པས་མུ་མཐུད་དུ་བརྗོད་དོན་ལྟར་ན། ལོ་འདིར་ཏོག་དབྱིབས་ནད་དུག་གིས་མི་མང་ཕོན་ཆེན་འདུ་འཛོམས་བྱེད་མི་ཆོག་ཅེས་རྒྱ་གཞུང་གིས་བསྒྲགས་འདུག་མོད། འོན་ཀྱང་སྦྱི་ཚོགས་དྲྭ་ལམ་ཁག་ཏུ་གནས་ཚུལ་མང་པོ་ཞིག་བཤད་མི་ཉན་པ་དང་བཤད་ན་ཉེན་ཁ་འདུག གང་ལྟར་སྒྲིག་ཁྲིམས་བཙན་པོ་རེད། དྲྭ་ལམ་དང་ཡུལ་དངོས་བཅས་ལ་དམ་དྲག་ཆེན་པོ་བྱེད་ཀྱི་འདུག་ཅེས་བརྗོད་འདུག

འདི་དང་དུས་མཚུངས་སུ་བོད་ནས་འབྲེལ་ཡོད་སྤྱི་ཚོགས་དྲྭ་ལམ་ཁག་ཏུ་གནས་ཚུལ་བཀོད་པ་ལྟར་ན། ཁ་སང་ནས་མདོ་སྨད་འཇང་དགུན་ཆེན་པོ་འཚོགས་བཞིན་པའི་རྣམ་པ་དང་དགེ་འདུན་པ་རྣམས་ཀྱིས་འཛིན་གྲྭ་ལྟར་རྟགས་གསལ་གཏོང་བཞིན་པ། དད་ལྡན་མི་མང་རྣམས་མཆོད་མཇལ་དུ་སླེབས་ཡོད་པ་སོགས་ཀྱི་བརྙན་ཐུང་དང་པར་རིས་རྣམས་འགྲེམ་སྤེལ་བྱས་ནས་ཕྱི་ལོགས་སུ་བལྟ་ཐུབ་ཀྱི་ཡོད་པ་སོགས་ཀྱི་གནས་ཚུལ་ཐོན་འདུག

XS
SM
MD
LG