ངོ་འཕྲད་བདེ་བའི་དྲ་འབྲེལ།

ཨ་རིའི་ཕྱི་མི་གཞིས་ཆགས་ཁྲིམས་ཡིག་དང་བོད་མི་ལྔ་སྟོང།


ཨ་རིའི་ནང་ཕྱི་མི་གཞིས་ཆགས་ཀྱི་གནད་དོན་དེ་རྒྱུན་རིང་ནས་དཀའ་ངལ་སེལ་མ་ཐུབ་པར་སྲིད་འཛིན་རིམ་པས་ཨ་རིའི་གྲོས་ཚོགས་ལ་གནད་དོན་དེའི་སྐོར་ཁྲིམས་ཡིག་བསྐྱར་བཅོས་གནང་དགོས་པའི་རྒྱབ་གཉེར་གནང་ཡོད་ནའང་། ད་བར་དེའི་ཐོག་དོན་ཕན་སོན་པའི་ཐག་གཅོད་གནང་ཐུབ་མེད་པ་དང་། སྲིད་འཛིན་ཨོ་བྷ་མས་ལས་རྒྱུན་གཉིས་པར་གནད་དོན་དེ་ལས་དོན་གལ་ཆེ་ཤོས་ལ་ངོས་འཛིན་གནང་ནས་ད་ལོ་སླར་ཡང་གྲོས་ཚོགས་ལ་ཁྲིམས་འཆར་དེར་ཐག་གཅོད་གནང་དགོས་པའི་རྒྱབ་གཉེར་གནང་ཡོད་པ་རེད། ཨ་རིའི་གྲོས་ཚོགས་གོང་མས་ཕྱི་མི་གཞིས་ཆགས་ཀྱི་བསྐྱར་བཅོས་ཁྲིམས་འཆར་ལ་མང་མོས་རྒྱབ་སྐྱོར་ཐོབ་ནས་ཐག་གཅོད་གནང་ཟིན་ཡོད་ནའང་། གྲོས་ཚོགས་འོག་མའི་ནང་ཐག་གཅོད་ཡོང་རྒྱུར་ད་ལྟའང་དཀའ་ངལ་འཕྲད་བཞིན་ཡོད་པ་རེད། ཁྲིམས་འཆར་དེའི་ནང་བོད་མི་ལྔ་སྟོང་ཨ་རིའི་ནང་གཞིས་ཆགས་བྱ་རྒྱུའི་དོན་ཚན་ཞིག་ཀྱང་ཚུད་ཡོད་པ་རེད། ལས་རིམ་ནང་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་བུ་ཆུང་ཚེ་རིང་ལགས་དང་ཨ་རིའི་ཕྱི་མི་གཞིས་ཆགས་ཀྱི་ཁྲིམས་རྩོད་པ་བསྟན་འཛིན་དབང་རྒྱལ་ལགས་གཉིས་གདན་འདྲེན་ཞུས་ནས་ཨ་རིའི་ཕྱི་མི་གཞིས་ཆགས་ཁྲིམས་འཆར་གྱི་ཕུགས་རེ་དང་བོད་མི་ལྔ་སྟོང་ཨ་རིར་ལེན་འཆར་གྱི་རེ་བ་བཅས་ཀྱི་སྐོར་ལ་བགྲོ་གླེང་ཞུ་རྒྱུ་ཡིན།

ཀུན་གླེང་ནི་འཁོར་སྐར་བརྒྱུད་ནས་བལྟ་ཐུབ་པ་དང་ རླུང་འཕྲིན་ཐོག་ཏུ་ཉན་ ཐུབ་པ་མ་ཟད། ད་དུང་དྲ་རྒྱ་བརྒྱུད་ནས་ཀྱང་དུས་ཐོག་ཏུ་བལྟ་ཉན་བྱེད་ཐུབ་པ་དང༌། བདུན་ཕྲག་རེའི་གཟའ་ལྷག་པ་དང་གཟའ་པ་སངས་ནམ་ཡིན་ལ་འཛམ་གླིང་གཅིག་གྱུར་གྱི་ཆུ་ ཚོད་༡༤་ནས་༡༥་བར་རམ། ཡང་ན་ལྷ་སའི་དགོང་མོའི་ཆུ་ཚོད་༡༠་ནས་༡༡་བར་དུ་ཀུན་གླེང་ལ་བལྟ་ཉན་ཐུབ་ཅིང༌། བོད་དང་རྒྱ་ནག་ནས་ཁ་པར་ཨང་གྲངས་༡༠༨༨༨༨་མནན་ཚེ། ཨེ་ཊི་ཨེན་ཊི་ཞེས་པའི་སྒྲ་ཞིག་ཐོས། དེའི་རྗེས་སུ་ཁ་པར་ཨང་གྲངས་༨༦༦ ༨༣༧ ༥༡༥༩ མནན་ན་སྐུ་ཉིད་ཀྱིས་རིན་པ་སྤྲོད་མི་དགོས་པའི་ཁ་པར་དེ་ང་ཚོར་འཕྲོད། ཨ་རི་དང་རྒྱལ་ཁབ་གཞན་ནས་༡ ༢༠༢ ༦༡༩ ༣༧༧༤ མནན་ནས་ཁ་པར་འབྲེལ་མཐུད་པར་རིན་པ་ཨ་རིའི་རླུང་འཕྲིན་ཁང་ལ་སྤྲོད་དུ་འཇུག་ དགོས་ཞེས་མངགས་བཀོད་བྱེད་ན་ཁ་པར་གྱི་རིན་པ་ང་ཚོས་སྤྲོད་ངེས་ཡིན། ཡང་ན་སྔོན་ནས་སྐུ་ཉིད་ཀྱི་མིང་དང་ཁ་པར་ཨང་གྲངས་ང་ཚོར་བསྐུར་ཚེ། ང་ཚོས་ཀུན་གླེང་གི་བགྲོ་གླེང་སྐབས་སུ་སྐུ་ཉིད་ལ་འབྲེལ་བ་བྱེད་ཆོག་པ་དང༌། གལ་ཏེ་སྐུ་ཉིད་ཀུན་གླེང་ལ་དངོས་སུ་མཉམ་ཞུགས་མི་ཐུབ་ཀྱང་ང་ཚོར་ tibetantv@voanews.com བརྒྱུད་ནས་ཨི་མེལ་གཏོང་བའམ། ཡང་ན་ཧཕེཀ་སི་ཨང་གྲངས་༡ ༢༠༢ ༣༨༢ ༥༥༩༦ བརྒྱུད་ནས་དྲི་བ་བསྐུར་གནང་ཡོད་པ་ཞུ།
XS
SM
MD
LG