ངོ་འཕྲད་བདེ་བའི་དྲ་འབྲེལ།

བལ་ཡུལ་ལ་སྲིད་སྤྱིའི་སྔོན་འགྲོའི་འོས་བསྡུ་སྔ་སྣུར།


ཐད་ཀར་ཕབ་ལེན་གྱི་དྲ་འབྲེལ།

༄༅།། བོད་མིའི་སྒྲིག་འཛུགས་ཀྱི་དབུས་འོས་བསྡུ་ལྷན་ཁང་གིས་ཆོག་མཆན་བཀོད་པ་ལྟར་བལ་ཡུལ་དུ་ཕྱི་ཟླ་༡༢་པའི་ཚེས་༢༥་ནས་ས་གནས་ཁག་ཅིག་ཏུ་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་བྱེད་འགོ་ཚུགས་ཡོད་ཅིང་། བལ་ཡུལ་གཞུང་གི་ཉེན་རྟོག་པས་སྔ་ཕྱི་བར་གསུམ་དུ་བོད་པ་བཙན་བྱོལ་བ་ཚོས་འོས་ཤོག་འཕེན་པའི་དུས་སུ་མི་ཁག་ཅིག་ཉེན་རྟོག་ཁང་དུ་ཁྲིད་ནས་ཆུ་ཚོད་ཁ་ཤས་རིང་བཀག་ཉར་བྱས་ཡོད་པའི་གནས་ཚུལ་བྱུང་འདུག་ཅེས་བལ་ཡུལ་གྱི་བོད་པ་བཙན་བྱོལ་བའི་འོས་བསྡུའི་སྤྱི་ཁྱབ་འགན་འཛིན་ཀརྨ་རྒྱལ་མཚན་གྱིས་འགྲེལ་བརྗོད་བྱས་འདུག

ཁོང་གིས་དེ་རིང་ཕྱི་ཚེས་༣༠་ཉིན་རྒྱལ་ས་ཀ་ཐ་མན་དྷུའི་མངའ་ཁུལ་དུ་ཡོད་པའི་དོན་གཅོད་ཁང་དུ་རྒྱལ་སའི་ཁྱབ་ཁོངས་ཀྱི་བོད་པ་བཙན་བྱོལ་བ་ཚོས་༢༠༢༡་གི་སྲིད་སྐྱོང་དང་བོད་མི་དམངས་སྤྱི་འཐུས་ཀྱི་སྔོན་འགྲོའི་འོས་ཤོག་འཕེན་བཞིན་ཡོད། སྔ་དྲོའི་ཆུ་ཚོད་༡༡་ཡས་མས་སུ་བལ་ཡུལ་གཞུང་གི་ཉེན་རྟོག་པ་སླེབས་ནས་འོས་ཤོག་དང་འོས་ཤོག་འཕངས་ཟིན་པའི་འོས་སྒམ་རྣམས་ཁྱེར་ཡོད་པར་མ་ཟད། ད་དུང་ལས་བྱེད་པ་༨་དང་མི་མང་འོས་ཤོག་འཕེན་མི་༥་བཅས་ཁྱོན་མི་༡༣་ཉེན་རྟོག་ཁང་དུ་ཁྲིད་སོང་། ཁོ་ཚོའི་གྲས་ཀྱི་མི་གཉིས་བུ་མེད་ཡིན་པ་དང་གཞན་རྣམས་སྐྱེས་པ་རེད་ཅེས་བཤད།།

ཐོག་མར་ནས་བལ་ཡུལ་རྒྱལ་གྱི་ས་ཀ་ཐན་མན་དྷུའི་བོད་པ་བཙན་བྱོལ་བ་ཚོས་འོས་ཤོག་འཕེན་རྒྱུར་བཀག་འགོག་གང་མང་ཞིག་བྱུང་དང་འབྱུང་བཞིན་ཡོད་ཅིང་། ཟླ་བ་འདིའི་ཕྱི་ཚེས་༢༧་ཉིན་མཆོད་རྟེན་དང་འཇོར་པ་ཊྲེའི་ཁྱབ་ཁོངས་ཀྱི་བོད་པ་ཚོས་འོས་ཤོག་འཕེན་བཞིན་པའི་སྐབས་སུའང་ས་གནས་འགོ་འཛིན་སོགས་ཁྱོན་བསྡོམས་མི་༥་ཉེན་རྟོག་པས་བཙན་ཁྲིད་ནས་ཆུ་ཚོད་༡༠་ཡས་མས་ཞིག་ལ་བཀག་ཉར་བྱས་འདུག དེ་རིང་ཕྱི་ཚེས་༣༠་ཉིན་ཡང་གནས་ཚུལ་གཅིག་མཚུངས་ཤིག་བྱུང་བས་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་དང་ཨ་རིའི་གཞུང་ཚབ་ཁང་གི་ལས་སྣེ་སོགས་ཀྱིས་བོད་པ་བཙན་བྱོལ་བ་ཚོར་སྲུང་སྐྱོབ་བྱས་ཤིང་། བལ་ཡུལ་གྱི་ཉེན་རྟོག་ཁང་གིས་བཀལ་ཉར་བྱས་པའི་བོད་པ་ཚོ་དགོང་མོར་གློད་གྲོལ་གཏོང་རྒྱུ་ཡིན་ཞེས་བཤད།།

བདུན་ཕྲག་འདིར་རྒྱ་ནག་གི་མཐོ་རིམ་དཔོན་རིགས་བཞི་བལ་ཡུལ་ལ་སླེབས་ཡོད་པས་བོད་པ་བཙན་བྱོལ་བ་ཚོར་དམ་དྲག་བྱེད་ཀྱི་ཡོད་པའི་གནས་ཚུལ་ཐོན་འདུག སྤོག་ར་དང་ས་མཚམས་ཀྱི་ས་གནས་ཁག་ཏུ་གནས་འཁོད་བོད་པ་བཙན་བྱོལ་བ་ཚོས་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་ཕྱི་ཚེས་༣་གྱི་སྔོན་དུ་ལེགས་གྲུབ་འབྱུང་ཐུབ་རྒྱུའི་ཚོད་བྱེད་ཀྱི་ཡོད་པ་སོགས་ཀྱི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

XS
SM
MD
LG